SAKA 57 FEDENGAN
Ano Midemak to Pakidemay a Raraw i, Samaanto Hani?
Tangongolay ko olah iso ci Yihofaan, misaˈicelay pakahemek Cingraanan, kawra nolatekay mararaway kiso. Pakayni i Fangcalay Cudad, o roma raraw, o pakidemay. (1 Korinto 6:9, 10) Ano midemak kiso to pakidemay a raraw i, haratengen kamayan maolah ci Yihofa tisowanan, mamakahi misodod a padama tisowanan.
1. Sapicadaaw to sasodod ni Yihofa, wa misamaan ko demak hani?
Maolahay ci Yihofaan a tamdaw cipinangay to pakidemay ko raraw no niyah i, tada adadaay ko falocoˈ. Kawra, mikitini sakiˈok ni Yihofa wa ngaˈay milifok to sasayar. Sanay ci Yihofa: ‘Soˈlin, tangongol malo kahngangay sa ko raraw namo i, wa ngaˈay sano soeda a makorac.’ (Isaya 1:18) Ano nai falocoˈ kita pasasiyor, wa misodod ci Yihofa kitaanan. Sasamaan nai falocoˈ a pasasiyor hani? Tatodong i, pakayni i raraw no niyah patatikol ko falocoˈ, cowato ko mamiliyaw a mararaw, micangacangho to sasodod ni Yihofa kitaanan. Haratengenho, o manan tatiihay a nanaman ato mararaway a harateng, wa pakararaw to niyah, ikor saˈicelen a misalof, hakelongen ko ˈakawangay palinian ni Yihofa a maˈorip.—ˈOsien ko Isaya 55:6, 7.
2. Ano midemak to pakidemay a raraw kita i, samaanan ni Yihofa misaka dademak ko malohemay malitengay padama kitaanan hani?
Ano midemak to pakidemay a raraw kita i, sanay ci Yihofa, ‘tahidangen ko malohemay malitengay.’ (ˈOsien ko Yakop 5:14, 15.) Maolahay ko malohemay malitengay ci Yihofaan, maolahayho to finawlan ni Yihofa. Mapahatatanamay cangra, mafanaˈay sasamaan padama kitaanan patikol malangaˈay ko kalalaˈed aci Yihofaan.—Kalatiya 6:1.
Ano pakidem ko raraw ita i, wa samaan ko malohemay malitengay padama kitaanan hani? Wa ira ko tosa anca tolo a malohemay malitengay, tano Fangcalay Cudad padama kitaanan a cipinang to icowaay ko raraw ita. Papafeli cangra kitaanan to ciepocay a sapaini padama kitaanan ho eca ka miliyaw a mararaw. Ano pakidem ko raraw no cecay tamdaw, cowa ka kahi pasasiyor i, sapidipotaw ko malohemay malitengay to kasakopang ho eca ka denga, wa mipadeng to ngangan no hatiniay tamdaw nai kasakopang.
CALEPEN MIKADKAD
Dotoc mamatongal ko kacipinang iso: Ano pakidem ko raraw iso i, samaanay ci Yihofa milayaˈ to kamay a padama? Oniya limasmas wa miakoˈid kiso Cingraanan.
3. Aka mihimed to raraw no niyah, patikol ko kalangaˈay to kalalaˈed aci Yihofaan
Ano midemak to pakidemay a raraw kita i, wa mararom ko falocoˈ ni Yihofa. Sapisalofaw to kalalaˈed Cingranan i, tatayra i kaˈayaw Ningra pasowal to raraw no niyah. ˈOsien ko ˈOlic 32:1-5, ikor lengoen ko ilaenoay a salicay:
Misamaanay hano cowa ka ngaˈay mihimed to raraw, ao pasayra ci Yihofaan pasowal to raraw no niyah hani?
Mifanaˈ kita to raraw ci Yihofaan, mikilimho to malohemay malitengay micangacang to sapadama. Mihaen i, wa masayar ko falocoˈ ita. Nengnengen ko IKA, ikor lengoen ko ilaenoay a salicay:
Samaanan no malohemay malitengay padama ci Canon patikol i katihi ni Yihofa?
O padamaay ko malohemay malitengay kitaanan. Mihaenay i, nai falocoˈen a mifanaˈ cangra. ˈOsien ko Yakop 5:16, ikor lengoen ko ilaenoay a salicay:
Misamaanay nai falocoˈen a pasowal to malohemay malitengay, ngaˈ madolo cangra padama kitaanan?
Pasayni ci Yihofaan pasowal to raraw no niyah, ikor fanaˈen ko malohemay malitengay to kihcod, dotoc cadaen ko sidaˈitay a sapadama ni Yihofa
4. Siniˈadaay ci Yihofa to mararaway a tamdaw
Ano pakidemay ko raraw no cecay tamdaw, cowa ka kahi midofdof to saali ni Yihofa a misalof, wa mapadeng ko ngangan nai kasakopang, cowato ko mamaterek i kasakopang, cowato ka ngaˈay macacawmaˈ kita cingranan. ˈOsien ko 1 Korinto 5:6, 11, ikor lengoen ko ilaenoay a salicay:
O tamod pafoˈaway to ponpon, mahecaday koni, macacawmaˈ to cowa ka pasasiyor a tamdaw, wa misamaan mafiyor ko kasakopang maemin hani?
O malohemay malitengay wa mitodong ci Yihofaan a siniˈada to mararaway a tamdaw, misaˈicel a padama to mapadengay ko ngangan nai kasakopang a tamdaw. ˈAlomanay tamdaw patikolayto i kasakopang, samanen midofdofan nangra ko sapirikec. Mahaenay a sapirikec, soˈlin adadaay ko falocoˈ, kawra, wa ngaˈay patalipaˈelal papipatikol cangranan.—ˈOlic 141:5
O moecelay, sidaˈitay, ciolahay a Kawas ci Yihofa, samaanan Ningra mipadang ko mararaway a tamdaw?
5. Wa sododen ni Yihofa ko pasasiyoray a tamdaw
Tano sapatinakoan ni Yis padama kita cipinang to samaanay ko harateng ni Yihofa minengneng to pasasiyoray a tamdaw. ˈOsien ko Luka 15:1-7, ikor lengoen ko ilaenoay a salicay:
Masamaanay a Kawas ci Yihofa, man sanay ko sinael hani?
ˈOsien ko Icikil 33:11, ikor lengoen ko ilaenoay a salicay:
Samaan paihkal kita to pasasiyorayto ko niyah?
O sidaˈitay a pakaenay ci Yihofa, maolahay to lopayˈay siri Ningra
ANO IRA KO SOMOWALAY: “Ano fanaˈen ako ko malohemay malitengay to demak no mako i, matalaway kako wa cowato ko mamaterek i kasakopang,” sanay.
Mahaenay ko harateng a tamdaw samaanen iso pasowal cingra?
KALIMLAAN
Ano midemak kita to pakidemay a raraw i, nai falocoˈen a pasasiyor, seteken ko falocoˈ ecato ka miliyaw a mararaw. Mihaen i, wa sododen ni Yihofa kita.
Lomalen
Ano midemak kita to pakidemay a raraw i, hano fanaˈen ci Yihofa to raraw no niyah?
Sapicadaaw to sasodod ni Yihofa i, sasamaan ko demak ita hani?
Hano micangacang to sapadama no malohemay malitengay?
MALALITINGAY A LALAKAW
Nengnengen ko nalifetan ningra, ci Yihofa misamaanay mahecad to sowal ni Isaya 1:18, cisidaˈitay to tamdaw.
Samaanen no malohemay malitengay a mipadang ko mararaway a tamadaw?
“Paihkalen ko Olah ato Siniˈadaay to Mararaway a Tamdaw” (Mikecolay, Saka 8 Folad 2024)
Sasamaan paihkal to olah ato siniˈada i cowaho pasasiyor ko falocoˈ a tamdaw?
“Padamaen ko Mapadengay ko Ngangan Nai Kasakopang a Tamdaw” (Mikecolay, Saka 8 Folad 2024)
Samaanan ni Yihofa misolot ko cecay na miliyasay to soˈlinay kimad a tamdaw patatikol hani? Nengnengen ko nalifetan ningra: “Patikol Kako Pasayni ci Yihofaan.”
“Minanam to Fangcalay Cudad a Mafalic ko Nokaˈorip” (Mikecolay, 2012/4/1)