Cowa ko Papatoled to Tamdaw Kalimlaan a Hatokel

1. Hano ngaˈay ci Apraham padadotoc mitawmec to hatokel hani?

MIKIˈOKAN ni Yihofa ko widang Ningra ci Apraham, o kasakitakit i fafekang no sera o papakayni i teloc ningra a milifok to sapalemed. (Satapangan 15:5; 22:18) Tanektekay ko nika pakasoˈlin ni Apraham to Kawas, mankora pakasoˈlinay cingra to mamalaˈosi ko sakiˈok no Kawas. Soˈliˈlin ci Sara 90 ko mihecaan, 100 ko mihecaan ni Apraham, awaayho ko wawa nangra, kawra o sowal no Fangcalay Cudad: ‘[Ci Apraham] mikitiniay i tokel, pakasoˈlinay to mamalo wama no adihayay kitakit ko niyah.’ (Loma 4:18; Satapangan 21:1-7) Mafanaˈay kita salikor malaˈosiay ko mihalamhaman ni Apraham, mahofocayto to halafinay talaen ningra a wawa ci Isakan. Mihaenay i, hano ira ko mahaenay noka pakasoˈlin ni Apraham hani?

2. Ci Apraham hano pakasoˈlinen to mamalaˈosi ko sakiˈok ni Yihofa hani?

² Tada cipinangay ci Apraham ci Yihofaan, mankora ‘pakasoˈlinay cingra to mamalaˈosi ko kihcod mikiˈokan no Kawas.’ (Loma 4:21) Samanen iraay ko pakasoˈlinay falocoˈ ni Apraham, hato mihaydaan ni Yihofa cingra, malo ‘moecelay tamdaw’ han cingra. (Yakop 2:23) Matira to patalahkalan no Loma 4:18, o pakasoˈlinay falocoˈ ni Apraham ato tokel ningra makakedecay a malaliting. Pakayni to hatokel, dotoc nengnengen ita o maanan ko nisowalan ni Pawlo itini Loma saka 5 fedengan.

3. Pakayni i hatokel, mikitini sowal ni Pawlo mamafanaˈ kita to maanan?

³ Mitadtaday ci Pawlo, hano ngaˈay pakasoˈlin kita o sapafeli no Kawas a hatokel ‘cowa ko papatoled to tamdaw.’ (Loma 5:5) Padamaan Ningra kita cipinang, sasamaan ngaˈ padadotoc paˈicel to hatokel no mita. Dotoc, itini pifolfol to Loma 5:1-5 i, ngaˈayay haratengen iso ko nalifetan no niyah. Mihaen, wa mahapinang iso alatek, o tokel no niyah ano palalinien to isaˈayaway i, matongalayto ko nika tanektek. Oniya lalakaw papadama tisowanan a mihapinang, sasamaan padadotoc paˈicel to hatokel no niyah. Salakat nengnengen ita koya nisowalan ni Pawlo a cowa ka patoled to tamdaw a kasapaan a hatokel.

KASAPAAN A HATOKEL

4. Itini Loma 5:1, 2 somowalay to maanan?

⁴ ˈOsien ko Loma 5:1, 2. O sapatilid ni Pawlo a sowal to i Lomaay a kasakopang a Krisciyang. O itiraay a salikaka mafanaˈayto ci Yihofaan aci Yisan, tano midemakan patalahkal to pakasoˈlin, malo Krisciyangto. Pakayniay noka pakasoˈlin no falocoˈ ‘malo o moecelay tamdaw’ hanto no Kawas, mapanilnilayto no fangcalay saocor. Mihaenay haw i, iraay ko cecay kasapaan, tanektekay a hatokel nangra.

5. O mapanilnilay no fangcalay saocor a Krisciyang iraay ko maanan a hatokel?

⁵ Ikor, ci Pawlo itini i Ifiso cudad somowalay to manilnilay no fangcalay saocor a Krisciyang to iraay ko hatokel nangra milifok to ‘sapafeli no Kawas to fangcalay finawlan a hafay.’ (Ifiso 1:18) Ci Pawlo itini i Kolosay cudad mitadtaday to aicowa milifok cangra to halifon. Sowal ningra iraay ko hatokel nangra milifok to ‘miterekan no Kawas cangranan itini i kakarayan a sapalemed.’ (Kolosay 1:4, 5) Mihaenay, hatokel nonini a Krisciyang, o papatikol maˈorip tayra i kakarayan milifok to tahadaˈocay a ˈorip, hanaca kalacafay ci Yis Kristoan mala hongti.​—1 Tisalonika 4:13-​17; Paˈarawan 20:6.

6. Pakayni to hatokel no niyah, o cecay mapanilnilay no fangcalay saocor a faˈinayan salikaka paihkalay to maanan nafalocoˈan?

⁶ O mapanilnilay no fangcalay saocor a Krisciyang tada misalimlaay tonini a hatokel nangra. Fratelik Frans salikaka o masalalomaˈay nangra. Mikifalocoˈay a somowal cingra: “O hatokel niyam tanektekay, o mamasahci a malaˈosi, mikikakaay to niharatengan niyam. O kahacecay no 144,000 tamdaw, o mamilayap to mikiˈokan no Kawas to mimingay ˈopo a siri a sapalemed.” Somowal ko salikaka ci Frans toniya sowal itiniay i 1991 miheca, itiya halafinayto cingra a madimadi midoko ci Yihofaan, tanektekay cingra a somowal: “Kamayan kami misakareteng tonini a hatokel. . . . Halafin ko nika pitala niyam i, matongalay ko pisalimla tonini a hatokel. Pakayni tonini hatokel mihadidi kami a mitala tada ciepocay, soˈlinto oha mamitala kami to 100 ˈofad a mihecaan cowa ko mamasawi. Kako nohatini, ikakaay to itiyaayho a misalimla tonini a hatokel no niyah.”

7-8. ˈAlomanay midokoay to Kawas a tamdaw iraay ko maanan a hatokel hani? (Loma 8:20, 21)

⁷ Anini, o ˈalomanay midokoay ci Yihofaan a tamdaw iraay ko roma a hatokel. Onini a hatokel matiraay oni Apraham, o aitini i pikowan no Hongti Kitakit no Kawas, tahadaˈoc i fafekang no sera a maˈorip. (Hipray 11:8-​10, 13) Masowalay ni Pawlo, o iraay ko matiniay a hatokel a tamdaw aira ko ˈodingaray a noikoran. (ˈOsien ko Loma 8:20, 21.) Maharatengayho iso, satapangho kiso cipinang to pakayniay noikoran a mikiˈokan no Fangcalay Cudad i, o manan ko mihalamhaman hani? O mamalo malefotay a tamdaw, caayto ka ˈimer no raraw han? Anca sapakaˈarawaw to mapatayay a salawina itini i fafekang no sera a lakoing patikol maˈorip han? ‘Mikitini to sapafeli no [Kawas] a hatokel,’ maedeng matomesay ko pihalamham iso to noikoran.

⁸ O mitalaan ita ano itiniay i fafekang no sera anoca itiniay i kakarayan a midaˈoc ko ˈorip, ora iraay ita a kasapaan a hatokel papalipahak kitanan. Roma i, ora hatokel ita ngangaˈay a padadotocen a paˈicel. Hano ngaˈay a mihaen hani? Dotoc a sowal ni Pawlo mitadtaday toninian. Ano songilaˈen ita misinanot kora sowal ningra i, mamatongal ko pakasoˈlin ita onini a hatokel ngangaˈay a padadotocen a paˈicel, hanaca cowa ko papatoled kitanan.

O HATOKEL ITA SASAMAAN MATONGAL KO KATANOKTOK

9-10. Mikitini tinakoan ni Pawlo mahapinangay ita o Krisciyang tatahalifa to maanan? (Loma 5:3) (Nengnengen ko coka.)

⁹ ˈOsien ko Loma 5:3. O sowal ni Pawlo fafahkaˈen ko tamdaw alatek, masowalay ningra o pades papatongal to tanektek no hatokel ita alatek. O kahacecay mikotoday ci Kristoan a tamdaw o tatahalifa to pades, hatiraay ci Pawlo. Sanay ko sowal ningra to i Tisalonikaay a kasakopang: ‘Itira kami i tamowanan i, na paliˈayaway a mitadtad to mamalifa ita ko pades. Soˈlinay a mahaen ko demak.’ (1 Tisalonika 3:4) Sanay ko sowal ningra to i Korintoay a kasakopang: ‘Salikakaaw, o malifaay niyam a pades i Aciya pala, harateng niyam i nanay mafanaˈ kamo . . . Na mamapatayto sanay kami to niyahan.’​—2 Korinto 1:8; 11:23-​27.

¹⁰ Anini, o Krisciyang tatahasiˈayaw to pinapina a pades. (2 Timoti 3:12) Tahalifaay kiso to pades to nika pihakelong ci Yisan han? Mikatawaan no salawina ato widang, a micoli tisowanan han? Misetekay kiso to falocoˈ itini kihcod a demakan caay pisamangah, pakayni toninian malifaay iso ko fangafang i katayalan han? (Hipray 13:18) Pakayniay kiso i pipaladaˈ to tao to hatokel no Fangcalay Cudad a malifa ko pisafelit no sifo han? Sowal ni Pawlo, ano o mananto a pades ko malifaay ita, oha kalipahakan. Misamaanay hani?

11. Hano mamisetek kita to falocoˈ, miemem to kihcod a sapalifet hani?

¹¹ Malifa ita ko pades i, ngaˈayay lipahak, samanen mafanaˈay kita o pades papadama kitanan palahad to masakalimlaan a capeling. Malecad to sowal itini i Loma 5:3: ‘O pades pahatatanamay to tamdaw miemem.’ Polong Krisciyang o tatahalifa to sapalifet, mihaenay i, o mamisetek kita to falocoˈ mihadidi to kihcod a sapalifet. Edengan aca mihaen ngaˈ, mamaˈaraw ita malaˈosi ko hatokel no niyah. Caay ka ciharateng kita mahaen o misowalan ni Yis a sapatinako a tamdaw, malecaday cangra to mimingay ko sera a fakelokelohan, o roma tamdaw satapang pakatengil to kimad no Kawas i, tangsolay mahemek a micada, kawra ikorto pakayni ‘tahalifa to pades anca hakokay, tangsolay a misawad.’ (Matay 13:5, 6, 20, 21) Manaokaniw, tahalifa to pisafelit anca sapalifet maedeng cowa ko madoloay, cowa ko kahemekan no tamdaw, kawra padadotoc miemem papaira to adihayay a haepoc. O manan a haepoc hani?

12. Miemem to sapalifet papaira to maanan haepoc hani?

¹² Nisawawaan ci Yakop somowalay to epoc no miememay to sapalifet, sanay cingra: “Lahcien ko nipihadidi namo. Ta awaayto ko laliyaliyawen i tamowanan to nika songilaˈ namo.” (Yakop 1:2-4) O sowal ni Yakop “lahcien ko nipihadidi namo” sa i, hato pasowalay to iraay ko lalahcien a demak no nipihadidi sanay. O manan a lalahcien a demak hani? Papadama tisowanan palahad to adihayay noka pihadidi, pakasoˈlinay falocoˈ o sanay, hanaca minanam mitongal to pitiˈer ci Yihofaan. Roma sa i, o miememay papairaho to roma a haepoc.

13-14. O miememay papaira to maanan haepoc? Oniya demak sasamaan mifiyor to hatokel ita? (Loma 5:4)

¹³ ˈOsien ko Loma 5:4. Sowal ni Pawlo: ‘Miememay tamdaw mamilifok to pihayda no Kawas.’ Cowa ka olah ko Kawas maˈaraw kita taharoray, kawra maˈaraw Ningra kita taharoray i, kamayan madimadi Cingranan, tada mahemekan nanay Cingra. Padadotoc kiso miemem, mamilifok to pihayda Ningra. Tada o masakalimlaan konini a sapalemed!​—ˈOlic 5:12.

¹⁴ Na miememay ci Apraham to sapalifet, milifokay to pihayda ni Yihofa, o widang ni Yihofa cingra, o moecelay a tamdaw hananay. (Satapangan 15:6; Loma 4:13, 22) O ngangaˈay kita malo mahaenay a tamdaw. Mihayda ci Yihofa kitanan, cowa ko nika adihay ko katayal ita Cingranan, anoca iraay ko maanan mikiriwiˈay a saaroˈan, ao pakayniay noka padadotoc ita miemem, madimadi tahatolas. Ano hakowaayto ko mihecaan ita, ano masamaanayto ko pakayraan, anoca hakowaay ko ˈicel, kita kahacecay tamdaw oha ngangaˈay miemem tahatolas. Nohatini i, miememay kiso to sapalifet, padadotocay madimadi to Kawas han? Ano hatiraay i, aka calemcem, malifokayto iso ko pihayda no Kawas. Mafanaˈ to mihaydaan no Kawas ko niyah i, pafeliay kitanan to taˈangayay ˈicel, padama kitanan matongal ko pakasoˈlin to mamalaˈosi ko hatokel ita.

TANEKTEKAY A HATOKEL

15. Dotoc pasowalay ci Pawlo to maanan? O sowal ningra hano mioratay to romaroma tamdaw?

¹⁵ Matira o sowal ni Pawlo, ano pakahadidi kita to sapalifet i, mamalifok ko pihayda ni Yihofa. Nengnengen dotoc o manan ko sowal ni Pawlo, sanay cingra: ‘O tamdaw ano mahayda i, airato ko hatokel, onini a hatokel cowa ko papatoled to tamdaw.’ (Loma 5:4, 5) Ora sowal ni Pawlo mamaoraten ko roma tamdaw alatek. Misamaanay hani? Samanen isaˈayaw itini Loma 5:2 masowalayto ni Pawlo, o itiniay i Loma a Krisciyang ‘iraayto ko hatokel a milifok to ˈdil no Kawas’ sanay. Mihaenay, saan ko harateng no roma tamdaw alatek: “Ano iraayto ko hatokel nora Krisciyang, ikor hano pasowal haca ci Pawlo, ikor no milifok to pihayda cangra airato ko hatokel saan hani?”

16. O hatokel no tamdaw samaanay misatapang a mapaˈicel hani? (Nengnengen ko coka.)

¹⁶ Sakacipinangaw to tatodong no sowal ni Pawlo haharatengen, o hatokel ngaˈayay padadotocen paˈicel. Haratengen hena, isalakat pakatengil kiso to mihadakan no Fangcalay Cudad a hatokel i, samaanay ko harateng iso hani? Itiya saan kiso alatek, tahadaˈoc i fafekang no sera a lakoing maˈorip o makapahay aca a mitiihan. Kawra ikor, matongal matongalto ko kafanaˈ iso ci Yihofaan ato sakiˈok no Fangcalay Cudad i, o mamatongal ko pakasoˈlin, onini a hatokel o ngangaˈay a malaˈosi.

17. Patafang to tireng micada to paputisem ikor, o hatokel iso samaanay padadotoc mapaˈicel hani?

¹⁷ Soˈlin ikor no patafang to tireng micada to paputisem i, ngangaˈayho kiso pakayni noka tongal to kafanaˈ ci Yihofaan, itini pihakelongan mamalingad ko katenes iso, hato matongalay ko katanektek no hatokel no niyah. (Hipray 5:13–​6:1) Pakayni nalifetan no niyah, mafanaˈayto kiso to tatodong no sowal i Loma 5:2-4. Tahalifaay kiso to masakenakenaay a pades, kawra padotocay kiso miemem, mahapinangayho to mihaydaay ci Yihofa tisowanan. Pakasoˈlinay kiso tada maolahay ci Yihofa tisowanan, mansa adihayayto ko lalangian iso pakasoˈlin nohatini, o mamalifok no niyah ko mikiˈokan no Kawas a sapalemed. Palalinien to kafanaˈho iso to soˈlinay kimad i, matongalayto ko katanektek no hatokel iso nohatini. Onini a hatokel ihkalayto i falocoˈ iso, matongalay ko epoc tisowanan, taˈangayay ko pifiyor tisowanan. Onini a hatokel mifalicay to kahirahira no kaˈorip iso, mahawpay to sasamaan misiˈayaw to paro no lomaˈ, sasamaan misaˈosi, ato sasamaan misaka dademak to toki.

18. Pafelian ni Yihofa kita to maanan a sakiˈok?

¹⁸ Malifokto ita ko pihayda no Kawas i, iraayto konini a hatokel, pakayni toninian mitongalay ci Pawlo a somowal, o mamalaˈosi ko hatokel iso sanay. Misamaanay ngaˈayay pakasoˈlin kiso tonini hani? Mikayatan no Kawas ci Pawlo mikiˈok to polong a Krisciyang, sanay ko sowal: ‘Oniya hatokel cowa ka patoled to tamdaw. Samanen tona pakayniay to sapafeli no Kawas a fangcalay saocor i kitanan, o olah Ningra matomesayto i falocoˈ ita.’ (Loma 5:5) O ngangaˈay pakasoˈlin kiso, ‘onini a hatokel,’ o hatokel no miso, o mamalaˈosi maemin.

19. Pakayni to hatokel iso, papakasoˈlinen iso ko maanan?

¹⁹ Pafelien ni Yihofa ci Apraham to sakiˈok, mihayda cingranan, hanaca o widang no Niyah saan minengneng cingranan, onini a demak tada ciepocay a dotimen no mita. O hatokel ni Apraham cowa ko mamalahorac, sowal no Fangcalay Cudad: ‘Patalahkal ci Apraham to mihadidiay falocoˈ ikor, milifokayto tonini a sakiˈok.’ (Hipray 6:15; 11:9, 18; Loma 4:20-​22) Ano padadotoc kiso madimadi ci Yihofaan i, ngangaˈay pakasoˈlin to mamalecad ko niyah ci Aprahaman milifok to halamhaman a sapalifon. O tanektekay ko hatokel iso, o papakahemek cowa ko papatoled tisowanan. (Loma 12:12) Sowal ni Pawlo: ‘Nanay o pafeliay to hatokel i tamdaw a Kawas pakayni i pitadiˈec namo i Cingranan, o mamatomes ko lipahak ato rihaday namo. Mihaenay i, pakayni pipadama no fangcalay saocor, o mamatomesto ko hatokel namo.’​—Loma 15:13.