​Kaemangay Fafahiyan Salikaka—Ka Pisaˈicel Malo o Matenesay a Krisciyang

1. Mamalo o matenesay a Krisciyang, mamidemak kita to maanan hani?

SAHOSAHO maˈaraw ko nika lomahad no wawa malo taˈangayay a tamdaw, marariday fahkaˈan nanay kita. O tatirengan no tamdaw lingad sanay a lomahad, kawra malo o matenesay a Krisciyang cowa ka mahaen.b (1 Korinto 13:11; Hipray 6:1) To sakatenesaw kita, papalahaden ita ko tangongolay noka lawidang aci Yihofa, hanaca tatiˈeren ita ko fangcalay saocor Ningra palahad to makapahay a capeling, minanam to ciepocay a inaneng, misaday to sapitamorongaw to ˈinorong anoikor.​—Taneng 1:5.

2. (1) Mikitini Satapangan 1:27 mananamay ita ko maanan? (2) Onini a lalakaw mamilengo to maanan?

² Misangaˈan ni Yihofa ko faˈinayan ato fafahiyan. (ˈOsien ko Satapangan 1:27.) Mahapinangay, itini i tatirengan faˈinayan fafahiyan taˈangayay ko kasasiromaan, kawra itini i romaroma pakayraan iraay ko kasasiromaan. Tinakoen, pafelian ni Yihofa ko faˈinayan fafahiyan to cowa ka lecad a saaroˈan, mansa o papalahad cangra to pina a capeling ato inaneng, ngaˈ ngaˈay mitamorong to ˈinorong no niyah. (Satapangan 2:18) Oniya lalakaw mamilengo, o kaemangay fafahiyan salikaka sasamaan ko pidemak ngaˈ malo o matenesay a Krisciyang, ilaenoay a lalakaw mamilengo o kapah salikaka samaan ko pidemak.

PALAHADEN KO KAOLAHAN NO KAWAS A CAPELING

3-4. O kaemangay fafahiyan salikaka aicowa mikilim to ngaˈayay todongen a taˈarawan? (Nengnengen ko coka.)

³ Itini Fangcalay Cudad ˈalomanay ko ngangaˈay todongen ita a fafahiyan. Cangra maolahay ci Yihofaan, madimadiay midoko Cingranan. (Nengnengen ko jw.org wangcan a lalakaw “Itiniay Fangcalay Cudad a Fafahiyan ​—O Cima ko Ngaˈayay Taˈarawan, o Cima ko Tatiihay Tinakoan?”) Mahaen to sowal no lalangian a sinael, ‘o fafahiyan mamiˈimer to kaˈorip madimadi i maamaan a demakan.’ Roma sa i, itini kasakopang iraay ko matenesay a fafahiyan a Krisciyang, ngangaˈay todongen no kaemangay fafahiyan salikaka.

⁴ Kaemangay fafahiyan salikaka, haratengen cima a matenesay fafahiyan salikaka ngangaˈay todongen namo ko taˈarawan nangra. Sinanoten iraay ko maanan makapahay capeling nangra, ikor saharateratengen sasamaan patalahkal kamo tonini a capeling. Dotoc, mamilengo kita to papairaen a tolo masakalimlaan a capeling no matenesay fafahiyan salikaka.

5. O matenesay a fafahiyan salikaka hano papaira to misapoeneray a capeling hani?

⁵ Misapoeneray ko falocoˈ, o papairaen no matenesay Krisciyang a capeling. O misapoeneray fafahiyan salikaka iraay ko ngaˈayay kalalaˈed aci Yihofa ato tao. (Yakop 4:6) Misapoeneray cingra maolahay ci Yihofaan, mansa mikangodoay cingra to mipatirengan no kakarayan Wama a fadangalan no mikeriday limasmas. (1 Korinto 11:3) Itini paro no lomaˈ ato i kasakopang, midofdofay cingra to mikayatay a tamdaw.c

6. O kaemangay fafahiyan salikaka sasamaan mitodong ci Ripikaan, patalahkal to misapoeneray a waywayan?

⁶ Nengnengen ko taˈarawan ni Ripika. O matanengay fafahiyan cingra, kalamkamay ko pidemak, mafanaˈay cingra itini matatodongay a tatokian midemak to matatodongay a demak. (Satapangan 24:58; 27:5-​17) Nikawrira, mikangodoayho cingra to tao, makahiyay midofdof. (Satapangan 24:17, 18, 65) Ano matiraay kiso ci Ripikaan ira ko misapoeneray a waywayan, makahi midama to limasmas ni Yihofa i, ngangaˈay kiso itini i paro no lomaˈ ato kasakopang ira ko tawlikay noka pifiyor.

7. O kaemangay fafahiyan salikaka sasamaan mitodong ci Istiran, malo misamimingay ko falocoˈ a tamdaw?

⁷ Misamimingay ko falocoˈ, o papairaen no matenesay a Krisciyang a capeling. Sowal no Fangcalay Cudad ‘o misamimingay a tamdaw’ o citanengay sanay. (Taneng 11:2) Ci Istir mikangodoay to Kawas tada o misamimingay, cowa pitaˈlif to fadangalan midemak. Mitengilay to sapaini no kaka ningra ci Mortikay, hanaca padadotocay midoedo a midemak. (Istir 2:10, 20, 22) Ngangaˈay kiso mitodong ci Istiran malo misamimingay a tamdaw, talaˈayaw pasayra i tao micangacang to ngaˈayay a sapaini, halo midoedo a midemak.​—Titus 2:3-5.

8. Mikitini 1 Timoti 2:9, 10, o fafahiyan salikaka ano ira ko misamimingay a waywayan, sasamaan milafa to caˈedong?

⁸ Ci Istir itini roma pakayraan patalahkalay to misamimingay a waywayan. Soˈliˈlin “o makapahay a kaying cingra, makapah ko tireng ningra,” kawra cowa ka sapikidataw to kaciharateng no tao cingranan. (Istir 2:7, 15) O fafahiyan salikaka sasamaan pasayra ci Istiran minanam hani? O cecay pakayraan i, itini i pilafa to caˈedong misaka dademak to safalod no 1 Timoti 2:9, 10. (ˈOsien.) Palimoˈotay ko tarokos ci Pawlo o fafahiyan Krisciyang sanengsengen ko kapicaˈedong, paihkal to matatodongay a falocoˈ. Onini sowal ni Pawlo paihkalay, o fafahiyan Krisciyang itini i caˈedong papatalahkal to misamimingay a waywayan, sikolen ko piharateng no tao, ho eca ka pikidat to kaciharateng no tao. O matenesay a fafahiyan salikaka itini i caˈedong, patalahkal to misamimingay a waywayan, tada masemeray kita cangranan.

9. Mikitini taˈarawan ni Apikail mananamay ita ko maanan hani?

⁹ Mafanaˈ pafafidaˈ to demak, o papatalahkalen no matenesay fafahiyan Krisciyang a roma capeling. O manan ko mafanaˈay pafafidaˈ to demak hani? Tatodong i, citanengay ko pisaˈosi, padama to tamdaw pafafidaˈ to ngaˈayay ato tatiihay, halo citaneng ko pisaˈosi. Nengnengen ko taˈarawan ni Apikail. Tona mararaway ko saˈosi no faˈinay ningra, teloc mangata mapatay ko polong paro no lomaˈ ningra. Kao ngaˈayay mafanaˈay ci Apikail pafafidaˈ to demak, kalamkamay dademak, hato madipotay ko ˈorip no paro no lomaˈ. (1 Samuil 25:14-​23, 32-​35) Ano mafanaˈ kita pafafidaˈ to demak i, mamafanaˈ to hahacowa caciyaw, hahacowa a tomerep, hanaca mafanaˈay to sasamaan a ciharateng to tao, aeca ka tatiihen ko falocoˈ no tao.​—1 Tisalonika 4:11.

MINANAM TO CIEPOCAY A INANENG

10-11. Mafanaˈ kiso miˈosi mitilid papaira to maanan a epoc no niyah ato tao hani? (Nengnengen ko coka.)

¹⁰ O fafahiyan salikaka maminanam to pina ciepocay a inaneng. O fafahiyan mimingho minanamto to pina inaneng, oha sakaciepoc i hakelong no kaˈorip nangra. Nengnengen ko pina tinakoan.

¹¹ Palahaden ko inaneng a miˈosi ato mitilid. Itini i romaroma serangawan, o fafahiyan tamdaw cowa ko masakalimlaan a mafanaˈ miˈosi ato mitilid sanay. ˈArawhan pakaynien i kahacecay Krisciyang, tada masakalimlaan ko mafanaˈay miˈosi ato mitilid a inaneng.d (1 Timoti 4:13) Mankora, ano tahalifa to maanan a pasangar, aka misawad a minanam miˈosi ato mitilid. Mihaen kiso mamalifok ko maanan a epoc hani? Ano ira ko mahaenay inaneng iso i, madolo a mietan to payci a paririˈ to niyah, hanaca itini pinanam no niyah to Fangcalay Cudad ato pasifanaˈ to tao minanam to Fangcalay Cudad i, wa ngaˈay ko demak. O masakalimlaan i, pakayni i picekiw ato midotim to Kimad no Kawas, mamatongal ko piingid iso ci Yihofaan.​—Yosuwa 1:8; 1 Timoti 4:15.

12. Taneng 31:26 sasamaan padama tisowanan matongal ko nika ngaˈay no kasasowal ato tao?

¹² Palahaden ko inaneng a masasowal. O maminanam ko Krisciyang ciepoc a masasowal to tamdaw. Itini toniya demakan, nisawawaan ci Yakop mihadakay to tada ciepocay a sapaini, sanay cingra: “O sasongilaˈen ita a maemin ko pitengil to sowal no tao. Aka ka tangsol a somowal.” (Yakop 1:19) Ano misongilaˈ kiso mitengil to sowal no tao, o patalahkalay kiso to ‘sidaˈitay a falocoˈ.’ (1 Pitiro 3:8) Ano awaay ko pinang iso to tatodong no sowal ningra ato piharateng ningra, ngaˈayay sadaken iso ko pina matatodongay a salicay. ˈAyaw no hasasomowal, salakatho misaharaterateng o manan ko hasowal ato samaan a pasowal. (Taneng 15:28 ato roma pihongyak.) Ngaˈayay haratengen iso: “O hasasowalen ako o soˈliˈlinay han? O papakalalok cingranan han? Matatodongay ko misowalan ako, misikolay to nafalocoˈan ningra han?” Tonini a pakayraan, ngaˈayay kiso minanam to matanengay ko kasasowal a fafahiyan salikaka. (ˈOsien ko Taneng 31:26.) Sinanoten iso ko misowalan nangra ato samaanay ko pakayraan a pasowal. Ano mataneng kiso a masasowal to tao, wa ngaˈayto ko kalalaˈed cangranan.

13. Sasamaan kiso mafanaˈ midimokos to lomaˈ? (Nengnengen ko coka.)

¹³ Minanam a midimokos to lomaˈ. Itini adihayay kitiraan, o tayal no lomaˈ marariday o fafahiyan ko midemakay. Alatek ngaˈay kiso mikitini i wina ato matanengay a fafahiyan salikaka minanam to pina inaneng. Fafahiyan salikaka ci Sinti sanay ko sowal: “Mananamay ako ko kalimlaan a demak nai wina, malalok a dademak ngaˈayay palipahak to tamdaw. Minanamay kako mifacaˈ to rikoˈ, mirahekad to kakaenen, mitaˈis ato inaneng a micakay to dafong, ngaˈayayto kako midimokos to niyah, hanaca adihay ko tayal saki Yihofaan. Pasifanaˈay ko wina takowanan minanam a halilafang, hato ngaˈayayto kako a mafanaˈ to ˈalomanay tatodongen a salikaka.” (Taneng 31:15, 21, 22) O malalokay, hinalafangay, mafanaˈay midimokos to lomaˈ a fafahiyan salikaka, ano itinito i lomaˈ anca i kasakopang sahtoay o kalimlaan cangra, mitongalay to lipahak no itatihiay a tamdaw.​—Taneng 31:13, 17, 27; Dmak 16:15.

14. (1) Mikitini nalifetan ni Kristol mananamay iso ko maanan? (2) Haharatengen iso ko manan?

¹⁴ Minanam midimokos to niyah. Sakala matenesay a Krisciyang, minanam a midimokos to niyah ato marenecen tada o masakalimlaan. (Filipi 4:11; 2 Tisalonika 3:7, 8) Fafahiyan salikaka ci Kristol sanay: “Papinanamay ko wama wina takowanan i kawcong to pina ciepocay a inaneng, itini pipiliˈ to cacudaden, adihayay ko sapadama takowanan. Pakalalokay ko wama takowanan minanam tono kayki. Onini a cacudaden soˈlinay ciepocayto.” Cowa ko pinanam aca to inaneng, maminanam talaˈayaw misaˈosi to payci, hanaca tooren ko paliˈayawan misaˈosi a miˈimer to mamapalak a payci. (Taneng 31:16, 18) Haratengen, ano minanam kiso a marenecen, eca ka cikiyam, o ngangaˈayto misamacay ko falocoˈ matayal saki Yihofaan.​—1 Timoti 6:8.

MISADAY TO HANOIKOR

15-16. Cowa ka ciraramod a fafahiyan salikaka hano tada kalimlaan hani? (Marko 10:29, 30)

¹⁵ Ano mapalahadayto iso ko makapahay capeling, halo mananamayto ko ciepocay a inaneng, o ngangaˈayto misaday to hanoikor, mitamorong to adihayay ˈinorong. Nengnengen ngaˈay kiso a midemak to pina a demakan.

¹⁶ Ngaˈay kiso caka ciraramod to cecay liyad. Itini romaroma serangawan, o cowa ka ciraramod a tamdaw taˈangayay ko macadaay a saroero. Soˈliˈlin, iraay ko romaroma fafahiyan salikaka matiraay to sowal ni Yis cowa ka ciraramod. (Matay 19:10-​12) O roma fafahiyan salikaka pakayniay to maanan a lalangian caka ciraramod. Ano masamaanayto aka calemcem, ci Yihofa aci Yis cowa ka pisakahmaw to caay ciraramod a Krisciyang. Itini paro no kakarayan, o caay ka ciraramod a fafahiyan salikaka pairaay to tawlikay a noka pifiyor i kasakopang. Onini a fafahiyan salikaka matomesay ko olah, misasoˈlin a ciharateng to tao, itini noˈadingoan malo kakaay, malo safaay ato wina no ˈalomanay cangra.​—ˈOsien ko Marko 10:29, 30; 1 Timoti 5:2.

17. O kaemangay fafahiyan salikaka sasamaan misongilaˈ misaday nohatini mirienang to mieminay to toki matayal saki Kawas hani?

¹⁷ Ngaˈayay kiso miemin to toki matayal saki Kawas. Itini i paro no cikiw mitosilay a tayal, o fafahiyan salikaka tada karetengay ko ˈinorong nangra. (ˈOlic 68:11) Toha sapirienangaw to mieminay to toki a matayal noikor, nohatiniho ngaˈay kiso milimasmas han? Ngangaˈay kiso patireng to patosokan, malo miceriday misakafahay, patirengay a tayal anca itini i Pitil a matayal. Ka pitolon micangacang ci Yihofaan padama tisowanan malaˈosi konini a patosokan, malalicay toya malaˈosiayto ko patosokan a tamdaw, minengneng to mamisamaan kiso pakatoor to hatatodong. Dotoc, limasmasen iso ko mamadangar a demak. Ano ngaˈay kiso miemin to toki a matayal, aadihayto ko toki iso sakadademaken ni Yihofa, matongal ko nika raheker no kaˈorip iso.

18. O fafahiyan salikaka hano mamisinanot minaˈon mipiliˈ to haramod? (Nengnengen ko coka.)

¹⁸ Ngangaˈay kiso mipiliˈ ciraramod. O masowalay nonini lalakaw a capeling ato inaneng papadama tisowanan malo ngaˈayay a fafahi. Ano makalimay kiso sakaciramodaw, sasinanoten a minaˈon mipiliˈ ko hararamod, samanen o mararamoday o kalimlaan a saˈosi iso i hakelong no kaˈorip. Aka mapawan, ikor no ciraramod o mamidofdof kiso to fadangalan no faˈinay. (Loma 7:2; Ifiso 5:23, 33) Mihaenay, itini pisinanot to hararamod i, saharateratengen: “O matenesay a Krisciyang cingra han? Paisalakatan ningra i kaˈorip ci Yihofa han? Citanengay ko misaˈosian ningra han? Ano mararaw cingra ikor mihayiay to raraw han? Mikangodoay cingra to fafahiyan han? Ngaˈayay cingra itini midokoay demak talaˈayaw mikerid, mietan to payci paririˈ to paro no lomaˈ, itini nofalocoˈan misalimla a midipot takowanan han? O makahiay cingra mitamorong to ˈinorong han? Itini kasakopang iraay ko maanan ˈinorong ningra? Samaanay ko midemakan ningra?” (Luka 16:10; 1 Timoti 5:8) Manaokaniw, sapikilimaw kiso to ngaˈayay faˈinay, ano kisoto, mamihadak to ˈicel malo ngaˈayay a fafahi noikor.

19. O sapafeli ni Yihofa to saaroˈan no fafahi hano cowa ko misakahmaway to fafahi?

¹⁹ Sowal no Fangcalay Cudad, o ngaˈayay a fafahi ‘matatodongay a cafay’ no faˈinay, ‘papadama’ to faˈinay. (Satapangan 2:18) Mararaway ko kacipinang no roma tamdaw to Fangcalay Cudad, o sasafaay ko saaroˈan no fafahi sanay miharateng. Kawra aka mapawan, marariday ko Fangcalay Cudad somowal, o papadama ci Yihofa kitanan. (ˈOlic 54:4; Hipray 13:6) Mikitini ngaˈay mahapinang ita, o sapafeli no Kawas to fafahi a saaroˈan cowa ko mamisakahmaw to fafahi, ao papaira to tariˈang no fafahi. Midama ko fafahi to faˈinay, ano maherekto ko faˈinay misaˈosi to demak no paro no lomaˈ, o mamisongilaˈ a midama to faˈinay, mihaen o mamalo ngaˈayayto a dama no faˈinay. Tangongol ko kaolah no fafahi ci Yihofaan, o mamisarocod patado to faˈinay milifok to adihayay a pikangodo. (Taneng 31:11, 12; 1 Timoti 3:11) Mitongal kiso to olah ci Yihofaan, misaˈicelho itini paro no lomaˈ ato kasakopang padama to tao, ngaˈayto ko pisaday, malo ngaˈayay fafahi noikor.

20. O wina iraay ko maanan a sapadama to paro no lomaˈ?

²⁰ Wa malo wina kiso alatek. Ciraramod kiso ikor wa ira ko wawa alatek. (ˈOlic 127:3) Mihaenay, talaˈayaw a miharateng tonini a demak o ngaˈayay. Ano palahad kiso to masowalay nonini lalakaw makapahay capeling ato inaneng, noikor mamalo ngaˈayayto a fafahi, mamalo ngaˈayayho a wina. Paihkal kiso to olah, sidaˈitay ato mihadidiay, wa paira to dihkoay rihadayay no paro no lomaˈ, irato ko rihaked no wawa, tanektek ko kalomahad.​—Taneng 24:3.

21. Sasamaan ko pinengneng ita to fafahiyan salikaka? Misamaanay? (Nengnengen ko papotalay coka.)

²¹ Fafahiyan salikaka, adihayayto ko midemakan namo pakayni ci Yihofaan ato finawlan Ningra, tada maolahay kami tamowanan. (Hipray 6:10) Misaˈicel kamo palahad to makapahay capeling, ciepocay a inaneng, pairaay to adihayay epoc no niyah ato itatihiay a tamdaw. Roma i, pakayniayho kamo sapitamorongaw to adihayay ˈinorong no ikor ngaˈay ko pisaday. Pakaynien i likakawa ni Yihofa, tada kalimlaanto a odoˈ kamo!