Wa Misawad Kako Parakat to Tosiya Han?

Ano o miso a pakayraan koni, sasamaan kiso misaˈosi ko niyah to hapaparakatho to tosiya han?

Itini roma kitakit, o parakatay tahira tora mihecaan miliyaway aca misiking, anca micada to pisawacay no ising ngaˈ miliyaw ira ko mingkiw no tosiya. Oniya kitakit a Krisciyang mamidofdof to mahaenay a sarikec, o sifo ano cato ka ngaˈay cangra parakat to tosiya sa i, mamidofdof cangra. (Loma 13:1) O kitakit no miso ano awaay ko mahaenay a sarikec, kamayanho kiso minengneng to roma a sakayat, haratengen hena wa ngaˈayho ko niyah padadotoc a dipayal mirakat to tosiya hokira?

Haratengenho ko Niyah a Pakayraan

Ngaˈayay minengneng kiso to tono malitengay mikakingkiway no Padaka a sapaini, salalicayen ko niyah to ilaenoay a salicay:

• Cowa ka hapinang ako ko sakayat no lalan hokira? Anca to dadaya cowa ka hapinang to lalan?

• Pasangaran nanay kako misacingacinga minengneng to pakomiya ato icowacowa hani?

• Pasangaran nanay kako tangsol miripaˈ to pasimalan mifalic to mifaˈotan han?

• Maosoyay kako parakat to tosiya, mansa macalohay ko tao parakat to tosiya han?

• Toniya ngata kinapinapinaay kako sakasasongtolaw to tao han? O tosiya ako masongtolay ko ilawacay no dafong, mansa pakonisay ko tosiya makipes han?

• Pakayniay i parakat to tosiya, na maˈetengay no dimeng kako hokira?

• Matokatokayto kako marakat to tosiya han?

• Komaenay kako to sapaiyo wa pifiyor to parakat to tosiya han?

• Calemcemay ko paro no lomaˈ anca widang to dipayalay ko parakat to tosiya ako han?

I fafekangay a salicay ano tosaay ko “hayi” sanay a caˈof i, o mamisalof to kiso alatek. Tinakoen, akato mararid kiso parakat to tosiya, mangalef hamaanto parakat to dadaya. Roma i, ceriden miharateng ko pakayraan no niyah. Salaliceyen iso ko paro no lomaˈ anca widang, samaanay ko piparakat no miso. Ngangaˈay kiso mirienang to sakangaˈay a parakat a pipahatatanam. Nikawrira, ano mataˈlifay ko tosa caˈof iso to “hayi” sanay i, akato parakat to tosiya.a

Simsimen ko Milingatay a Safalod no Fangcalay Cudad

Alatek cowato ka hapinang no mita to cowato ka ngaˈay ko piparakat no niyah, anca matalaway cato ka ngaˈay ko niyah parakat to tosiya, mansa caka kahi miharateng toniya demak. Ano hatiraay i, o manan a safalod no Fangcalay Cudad ko papadama kitanan matatodong ko pinengneng to pakayraan no niyah, citaneng ko pisaˈosi hani? Nengnengen ko tosa safalod.

Padadotoc misamiming ko falocoˈ. (Taneng 11:2) Matoˈas matoˈasto i, o pinengneng, o pitengil, o fatil ato tangsolay pafafidaˈay a inaneng malahdaw malahdawayto, telocto i, madoloayto a madokaˈ. Mihaenay i, ˈalomanay tamdaw matoˈasto i, cowato ka pakidem a mionto. Sakangaˈayaw ko piparakat i, o cecay tamdaw matoˈasto ikor alatek caayto ka parakat to tosiya, o paihkalay to misamimingay a falocoˈ konini. (Taneng 22:3) O roma i, ano ira ko tamdaw pasowal to saparikec, o misamimingay ko falocoˈ a tamdaw makahiay a micada.—Nengnengen ko 2 Samuil 21:15-17.

Aka a palakis to remes. (Limoˈot 22:8) Ano caka pinaˈon, o tosiya ita mamalo sapipatay to tamdaw a lalosidan alatek. O tamdaw ano cato ka ngaˈay parakat, kawra pacieci sa parakat to tosiya, alatek mamidokaˈto to ˈorip no niyah ato tao. Ano masasongtol ko tosiya mapatay ko tao i, ora parakatay a tamdaw wa ciˈinorong to palakisay to remes a raraw alatek.

Cato ka ngaˈay parakat to tosiya awaayto ko kapo no niyah, aka ka saan. Misakaretengay ni Yihofa i, o makapahay capeling iso. Padadotoc kiso misapoener ko falocoˈ, mihayi to citolasay ko ˈicel no niyah, hanaca ciharateng to ˈorip no tao, maedeng o mamaolah ci Yihofa tisowanan. Mikiˈokay Cingra papadamaen Ningra kiso, mihinom tisowanan, cowa ko fafalahen Ningra kiso. (Isaya 46:4) Mihaenay, misaharaterateng to sapihawadaw parakat to tosiya i, ngitangiten ci Yihofa pafeli tisowanan to ciepocay a taneng ato pafafidaˈay to demak a inaneng, padama tisowanan citaneng ko pisaˈosi.