Halafinan Midimokos to Salawina Kamayan a Lipahak

1-2. Ano hahalafin kiso midimokos to salawina, samaanay ko piharateng ni Yihofa? (Taneng 19:17) (Nengnengen ko coka.)

“32 MIHECA mararamod kami.” Oya itiniay i Koriya faˈinayan salikaka ci Cenli sanay ko sowal: “Ciadadaay to Pakinson ko fafahi ako, pasangar pasangarayto a romakat. Toniya lima miheca, padadotocay kako i tatihi ningra midimokos cingranan. Tada maolahay kako cingranan, makahiay midimokos cingranan. Masakalimlaan cingra. To dadayadaya oya no ising a takal ko ningra a kafotiˈan, kako sa i, itini tatihi ningra a takal mafotiˈ, kiting sanayto kamay ningra malacafay mafotiˈ.”

² Hahalafin kiso midimokos to kaolahan iso a tamdaw han? Alatek matoˈasayto a wama wina, anca adadaay a raramod, o wawa, widang. Maedeng makahiay kiso midimokos cingranan, paihkal to maolahay kiso cingranan. Misarocod kiso midimokos to salawina, paihkalay konini to maolahay kiso ci Yihofaan. (1 Timoti 5:4, 8; Yakop 1:27) Kawra, midimokos to salawina cowa ko madoloay. Alatek misiˈayaw kiso to adihayay pasangar, kawra awaay ko tamdaw mafanaˈay to narorayan iso. Ira ko milisoˈay a tamdaw i, hato mahemekay kiso a nengnengen. Kawra cecayto kiso i, masomadto a tomangic. (ˈOlic 6:6) Soˈlin caka fanaˈ ko tao to roray iso, nikawrira ihkalay ko kafanaˈ ni Yihofa. (Nengnengen ko Kasadakan 3:7.) O losaˈ iso, o pisaˈicel iso, sahtoay o kalimlaan sanay pinengneng Ningra. (ˈOlic 56:8; 126:5) Maharatengay ni Yihofa ko midemakan iso a kihcod midimokos to salawina. Harateng Ningra o mihadakan iso i, mahecaday o pacaliway Cingranan, mikiˈokay Cingra to papatikolen iso.—ˈOsien ko Taneng 19:17.

3. Sapidimokosaw ci Apraham aci Sara ci Tirahan hano cowa ko madoloay?

³ Matiliday i Fangcalay Cudad ˈalomanay tamdaw mamidimokos to matoˈasay anca adadaay a tamdaw. Nengnengen ita ko tinakoan ni Apraham aci Sara. Miliyas cangra to Ur i, soˈlin mangatato to 200 mihecaan no wama ci Tirah, kamayan cingra misaˈosi malacafay cangranan a malinah. O rarakaten no paro no lomaˈ ni Apraham, maedeng 960 kongli ko raay, ngaˈ tahiraay i Haran. (Satapangan 11:31, 32) Alatek wa halafin cangra mikalic to lakota anca lofa, pakaynien to matoˈasay ci Tirah cowa ko madoloay a demak. Ci Apraham aci Sara tada maolahay to wama nangra ci Tirahan, kawra itini maraayay a rarakaten midimokos to matoˈasay a wama adihayay ko pasangaray a demak. Tada malotayayto ko tireng nangra alatek, awaayto ko saloˈingaw no falocoˈ. Kawra ano o mananto a demakan ko mifekaday, pafelian ni Yihofa cangra to ˈicel. Malecaday, papadamaen ni Yihofa kiso, ho ngaˈay kiso padadotoc a tanektek.—ˈOlic 55:22.

4. Oniya lalakaw mamilengo to maanan?

⁴ Padadotoc lipahak, papadama tisowanan kiemel sapisawadaw a midimokos to matoˈasay anca adadaay a salawina. (Taneng 15:13) Aka mapawan, soˈlin tahasiˈayaw to pasangaray a demak, wa kamayan padadotoc kiso a lipahak. (Yakop 1:2, 3) Sasamaan ko demak iso hani? Ka pitadiˈec ci Yihofaan, cangacangen Cingra padama tisowanan padadotoc a tawlik. Oniya lalakaw mamilengo: Halafin a midimokos to salawina a tamdaw sasamaan a padadotoc a lipahak? O romaroma tamdaw sasamaan a padama cangranan hani? ˈAyaw no sapacaˈofaw toniya salicay i, nengnengen ita padadotoc a lipahak hano masakalimlaan, ato midimokosay to salawina a tamdaw alatek tatahalifa to maanan a pasangaray.

Padadotoc Lipahak, Hano Cowa ko Madoloay?

5. O midimokosay to salawina a tamdaw hano kalimlaan ko sapadadotocaw a lipahak?

⁵ O halafinay midimokos to salawina a tamdaw ano malahdaw ko lipahak, mamadoloto a malotayen ko harateng. (Taneng 24:10) Wa cangoˈotto ko ˈicel nangra, awato ko pakayraan a mihadidi midimokos to salawina. Ano hatiraay i, o manan a lalangian palahdaway to lipahak nangra hani?

6. O roma tamdaw halafinay midimokos to ciadadaay a salawina, hano cinaˈefian ko falocoˈ hani?

⁶ Malotayay ko tireng, awaay ko saloˈingaw no falocoˈ. Sanay ko sowal no fafahiyan salikaka ci Liya: “Midimokos to adadaay tada marorayayto. Soˈlin awaay ko mifekaday a demak i cecay romiˈad, kawra midimokos to adadaay a tamdaw hato maeminayto ko ˈicel. Nolatekay, mipalihafto to tao awaayto ko ˈicel no mako. Tada marorayayto ko falocoˈ.” O roma tamdaw cowato ka ngaˈay ko hanhan, misasinoway to tireng. Sanay ko fafahiyan salikaka ci Inis: “Maceriday kako cowa ka ngaˈay ko fotiˈ, samanen lafii kinapinaay a lomowad midimokos to wina. Kako ato faˈinay pinaayto a miheca caay ka lacafay masadak a misalama.” O romaroma tamdaw to romiˈamiˈad to lafii midimokosay to adadaay a salawina, mansa caayto ka picada to satahidang no widang, anca matayal saki Kawas. Alatek matoˈolan cangra, awaay ko sapadama, hato awaayto ko hatokel noikor.

7. O roma halafinay midimokos to salawina a tamdaw hano raroroh sato niyah a masomad?

⁷ Taroroh han ko niyah a masomaden. Sanay ko sowal no fafahiyan salikaka ci Cisika: “Padadotocay kako midimokos to wama, mafanaˈayho to papahanhan ko niyah, kawra pahanhan sa kako i, mirorohay to niyah, misatekeday ko harateng sanay.” Karetengay a ˈinorong ko adadaay a salawina, o roma tamdaw mafanaˈayto cowa ka ngaˈay mihaen to harateng, kawra nolatekay iraay ko mahaenay a nafalocoˈan, tada mariˈangayto ko niyah saan. O roma tamdaw mirorohay to niyah, cowa ka adihay ko midemakan. O roma tamdaw macalohay, mansa somowalay to midokaˈay a sasowalen, ikor masomadayto ko niyah. (Yakop 3:2) O roma tamdaw maharateng konini adadaay, misaaliay to dadimokosen, mansa masomaday ko falocoˈ, samanen nao tanoktokay a talifak cingra. Fafahiyan salikaka ci Papala sanay: “Kasomadan i, manengneng ko kaolahan no niyah a tamdaw palidlid sa a malonay ko tireng.”

8. Tano tinakoan a mitadtad, cecay tosa ko miakoˈiday a sowal taˈangayayto ko mipakalalok to tamdaw.

⁸ O tatodongto ko pikinafalah no niyah saan. O roma halafinay midimokos to salawina a tamdaw hano ira ko mahaenay a harateng hani? Samanen o pikinafalah nangra cowa ka rarid a macada ko piakoˈid ato sapakahemek. Soˈlin cecay tosa ko miakoˈiday a sowal, taˈangayayto ko pakalalok cangranan. (1 Tisalonika 5:18) Sanay ko fafahiyan salikaka ci Melisa: “Midimokos to adadaay tamdaw tada marorayayto, nolatekay takaw sanayto kako tomangic. Kawra matengil ko sowal nangra ‘koˈidayto adihayay ko midemakan iso takowanan’ sa i, tangsolay kako tawlik a ciˈicel. Nanay anocila padadotoc midimokos cangranan.” Faˈinayan salikaka ci Ayhamato ato fafahi ningra midimokosay to maforiˈakay a wawa no salawina, sanay cingra: “Mafanaˈay kako mimingayho cingra, cowa ka misongilaˈ cipinang cingra to pikinafalah niyam i cingranan. Kawra matengil ko miakoˈiday a sowal ningra, anca maˈaraw ko cowa ka kapah a mitilidan ningra to ‘maolahay kako tisowanan’ sanay i, tada matemeray ko falocoˈ niyam.”

Sasamaan Padadotoc Lipahak?

9. Sasamaan ko demak paihkalay to misamimingay to falocoˈ?

⁹ Misamiming to falocoˈ. (Taneng 11:2) O toki ato ˈicel no kahacecay tamdaw iraay ko tolas. Mansa songilaˈen miharateng, o manan ko ngaˈayay demaken ato cowa ka ngaˈay demaken no niyah ko manan. Nolatekay ngaˈayay minaˈayay to tao, mihaen to demak cowa ko mararaway. Aka pidemak to cowa ka dangar no niyah a demak, onini o misamimingayto a falocoˈ. Ano ira ko papadama tisowanan i, makahi a micada. Faˈinayan salikaka ci Cieyi sanay: “To romiˈamiˈad cowa ka adihay ko midemakan no mita. Ka cipinang to ˈicel no niyah ngaˈ padadotoc a lipahak.”

10. Cipinang to demak hano masakalimlaan hani? (Taneng 19:11)

¹⁰ Cipinang to demak. (ˈOsien ko Taneng 19:11.) O cecay tamdaw ano cipinang to demak, mapakararaw no tao ko niyah i, padadotocay a rihaday ko falocoˈ. Wa cipinang cingra to lalangian hano mihaen ko demak no tao. Midimokos to adadaay no tamdaw i, tada misaaliay to cacipinang to demak. O roma adada taˈangayay ko nika falic no pinangan no tamdaw. (Patnakay 7:7) Tinakoen, na cisidaˈitay a tamdaw alatek pakayni i adada cowato ka kahi mitengil to sowal no tamdaw, pakidemayho ko saali, o mananto a demakan cowa ka picada. Ano midimokosay kiso to pakidemay ko adada a tamdaw, adihayen ko kacipinang to milingatay to adada ningra a sifanaˈ wa padama tisowanan. Matongal ko kacipinang iso mamafanaˈto, ira ko mahaenay noka falic ningra samanen adadaay, cowa ko padetengan ningra ko sakahaen.—Taneng 14:29.

11. Midimokosay to salawina a tamdaw, to romiˈamiˈad limasmasen ko toki midemak to masamaanay a kalimlaan a demak hani? (ˈOlic 132:4, 5)

¹¹ Limasmasen ko toki patanoktok to kalawidang ci Yihofaan. Nolatekay sawaden iso to roma a demak ngaˈ ira ko toki midemak to ‘masakalimlaan’ a demak. (Filipi 1:10) O cecay ‘masakalimlaan’ a demak i, papaˈicelen ko kalalaˈed no niyah aci Yihofaan. Itini toniya pakayraan, tada ngaˈayay taˈarawan ita ci Tafiti. O Hongti cingra, tada ˈifowaay, kamayan paisalakatan ko pidoko ci Yihofaan a demak. (ˈOsien ko ˈOlic 132:4, 5.) Soˈlin ˈifowaay kiso, kawra isalakten a milimasmas ko toki miasip to Fangcalay Cudad ato mitolon to romiˈamiˈad. Sanay ko fafahiyan salikaka ci Ilisa: “Mitolon ci Yihofaan, misimsimho to lalakaw no ˈOlic, pairaay to taˈangayay a sahinom ato lipahak takowanan. To sapadadotocaw a rihaday, kinapinapinaay kako a mitolon to romiˈamiˈad, ano eca ka pitolon i, cowa ko mamaˈorip kako.”

12. Limasmasen ko toki midimokos to sakatanoktok no niyah, hano masakalimlaan hani?

¹² Limasmasen ko toki a midimokos to sakatanoktok ko tireng no niyah. Sakatanoktokaw no tireng no niyah, ira ko nanaman a komaen alatek cowa ko madoloay. Samanen ˈifowaay kiso midimokos to tao, alatek awaay ko toki miˈaca to sakatanoktok cihaleday a kakaenen. Kawra haratengen, komaen to cihaleday a kakaenen, macerid miwicawic to tireng, wa ngaˈay pakatanoktok to tireng ato falocoˈ iso. Samaanto ko kaˈifowa i, songilaˈen a komaen, limasmasen ko toki a miwicawic to tireng, mihaen misakadademak to toki o matatodongay. (Ifiso 5:15, 16) O roma i, kalikien a mafotiˈ, aka salafii sa caho ka fotiˈ. (Patnakay 4:6) Sanay ko cecay mikakingkiway, o ngaˈayay a fotiˈ wa ngaˈay mifalah to etok no ponoˈ, misafaeloh to ponoˈ. O cecay mikakingkiway to ising a lalakaw sanay, sangaˈayay a fotiˈ miesalay to cariraw, ciˈicel micoˈay to saroero. O roma i, aka mapawan limasmasen ko toki a mihalama. (Patnakay 8:15) Pakayni sasamaan a padadotoc lipahak, o cecay fafahiyan salikaka sanay: “Ano ngaˈay ko romiˈad i, milimasmasan ako to toki misarakarakat a mipacidal. Folafoladan limasmasan ako ko cecay romiˈad malacafay to widang tayra i papotal a mihalama.”

13. Hano pairaen ko pakatawaay o ngaˈayay a pakayraan hani? (Taneng 17:22)

¹³ Pairaen ko pakatawaay. (ˈOsien ko Taneng 17:22; Patnakay 3:1, 4) O pakatawaay sakaciepoc no tireng ato falocoˈ. Midimokos to matoˈasay ato ciadadaay a tamdaw nolatekay fahal sanay mifekad ko cowa ka harateng a demak. Ano mahaen i, tawa han ngaˈayayto. Alatek awaayto ko cowa ka hemek a demak. Roma i, malacafay kiso to midimokosan iso a tamdaw a matawa, mamakedec ko kalalaˈed namo.

14. Mifanaˈ to ngaˈayay widang to nafalocoˈan o manan ko epoc hani?

¹⁴ Malacafay to ngaˈayay widang somowal to nafalocoˈan. Soˈlin misaˈicelay kiso sapadadotocaw a lipahak, kawra nolatekay kamayan pakidem ko saroero, cowa ka tomeseng a micada. Mihaen i, misaaliay kiso to cecay ngaˈayay a widang. O soˈlinay ngaˈayay a widang cowa ka pakidem ko pipacaˈof, cowa ko pakayni i sasowalen iso patelas a milikaf tisowanan. (Taneng 17:17) Wa mihadidi cingra mitengil, lopayˈen dihkoen ko sasowalen a mihinom tisowanan. Itini i sapadama no ngaˈayay a widang i, wa ngaˈay miliyaw kiso patatikol to sakalipahak.—Taneng 12:25.

15. Miharateng to i Lakoingay a nokaˈorip, o manan ko epoc hani?

¹⁵ Haratengen malacafay tamowanan i Lakoing a maˈorip. Aka mapawan, adada ato liteng cowa ko araaw ni Yihofa. Mihaenay i, cowa ko tahadaˈoc kiso midimokos to tamdaw. (2 Korinto 4:16-18) Cato ka halafin, polong a tamdaw wa irato ko ‘soˈlinay ˈorip.’ (1 Timoti 6:19) Ngaˈay malacafay kiso masasowal to midimokosan no miso a tamdaw, o manan ko hademak namo i lakoing. Mihaenay a masasowal papaira tamowanan to taˈangayay a pahemek. (Isaya 33:24; 65:21) Fafahiyan salikaka ci Hayse sanay: “Maceriday kako mifanaˈ tora midimokosan ako a tamdaw, cato ka halafin wa malacafay kita misangaˈ to rikoˈ, malacafay comikay, malacafay citingsiya. Wa maˈarawho ita ko patikolay maˈorip a salawina, malacafay cangranan mihodhod to epang, mitangtang to kaesoˈay a kakaenen. Maharateng koniya noikor a hatokel, lipahakay kita, wa malacafay kita miakoˈid ci Yihofaan.”

O Romaroma Tamdaw Misamaan a Mipadama Hani?

16. Itini kasakopang, ano iraay ko tamdaw micerid midimokos to ciadadaay a salawina i, sasamaan ita padama cangranan hani? (Nengnengen ko coka.)

¹⁶ Papipahanhanenho cangra. Itini kasakopang ita ano ira ko tamdaw mamicerid midimokos to ciadadaay a salawina i, wa ngaˈay kita talaˈayaw a mipadama, milimasmas to toki a midimokos cingranan han? Mihaenay i, oya midimokosay cingranan a tamdaw wa ira ko toki a mahadak anca midemak tono niyah a demak. (Kalatiya 6:2) O roma salikaka mitilidayho to lipalipay a milimasmas a rayray, ho mafanaˈ ko ˈalomanay icowaay a romiˈad o cima ko tatayra a padama. Fafahiyan salikaka ci Nataliya midimokosay cingra to masamoˈay a faˈinay, sanay cingra: “I kasakopang niyam iraay ko faˈinayan salikaka, lipalipayan kinacecay kinatosaay tayni i lomaˈ niyam patihi to faˈinay ako. Malacafayay cangra mitosil, masasowal, malacafayho a minengneng to ika. Ano irato cingra i, mahemekay ko faˈinay ako. Ira ko toki ako masadak misarakarakat, midemak to kaolahan no niyah a demak.” Ano hangangaˈay i, mitahidang to roma tamdaw misalafii a midimokos, mihaen i, ora miceriday midimokosay a tamdaw wa ngaˈayto ko fotiˈ ningra.

17. Ora midimokosay to ciadadaay a salawina a tamdaw pasangaray misamacay mitengil to saˈopo, samaanen ita padama cangra hani?

¹⁷ I kasaˈopoan a tatokian padamaen cangra. O roma salikaka ˈifowa a midimokos to ciadadaay a salawina. Mansa misaˈopo anca mitaykay i, pasangaray a misamacay mitengil to kamok. Wa ngaˈay kita talaˈayaw a milicay misaˈopo i, i katihi no ciadadaay a tamdaw maroˈ han? Soˈlin o kapotoˈay a toki konini, kawra mapadamaay cangra. Ano ciadadaay tamdaw cowa ka ngaˈay malingad masaˈopo i, wa ngaˈay kita talaˈayaw a milicay, tayra i lomaˈ ningra malacafay to ciadadaay a tamdaw tano wanglo mirienang to saˈopo. Mihaenay i, oya midimokosay cingranan a tamdaw wa ngaˈay tayra i Kasaˈopoan a misaˈopo.

18. Oya midimokos to ciadadaay ko salawina tamdaw, wa ngaˈayho kita misamaan padama cangranan?

¹⁸ Pakahemek cangranan, patadoen cangra a mitolon. Oya maceriday midimokos to ciadadaay ko salawina a tamdaw, malohemay malitengay no kasakopang ceriden a milisoˈ ciharateng cangra. (Taneng 27:23) Soˈlinay i, kita maemin ngaˈay micerid pakahemek cangranan, mifanaˈ cangranan tada maolahay kita cangranan, misalimla to narorayan nangra. O roma i, wa ngaˈayho micangacang ci Yihofaan padadotoc pafeli to ˈicel i cangranan, padama cangranan padadotoc a lipahak.—2 Korinto 1:11.

19. Noikor ira ko maanan makapahay a hatokel ita hani?

¹⁹ Cato ka halafin, wa sisitento ni Yihofa ko emin a nano losaˈ no tamdaw. Itiyato i, aawato ko adada ato patay, ‘o mapiˈiway i, wa misatelotelocto mahecad to malonem.’ (Paˈarawan 21:3, 4; Isaya 35:5, 6) Cowato ka liteng ko tamdaw a cinarorayen, awato ko dadimokosen a adadaay tamdaw. Oniya kihcod i, malo o ‘isaˈayawayto a demak,’ ‘cowato ko hatatikolen no tamdaw a miharateng.’ (Isaya 65:17) Soˈlin mitalaayho kita toniya makapahay a hatokel a malaˈosi, kawra wa padadotoc ci Yihofa patihi kitanan, cowa ko fafalahen Ningra kita. Ano padadotoc kita mitiˈer Cingranan, wa paˈicelen Ningra kita, kita maemin wa ‘ira ko mihadidiay ato lipahakay, padadotoc miemem!’—Kolosay 1:11.