Soˈlin Maˈofadto, Kamayanho a Lipahak

1-2. Samaanay ko pinengneng ni Yihofa to matoˈasay madimadiay a salikaka? (ˈOlic 92:12-14; nengnengen ko coka.)

ANO icowato mapiliˈay ko tamdaw maliteng. Maharatengayho iso ihacowaay a maˈaraway iso ko ˈofad no niyah hani? Cowa ko sapitangsolaw kiso mifaˈenot, ho eca ka ˈaraw no tao han? Kawra mafanaˈay kiso mihaen to demak awaay ko kapo, samanen faˈenoten iso ko cecay, malengawayho ko adihayay. Soˈlinayto ano cimato i, caay ka olah maliteng.

² Kawra oya matoˈasayto a madimadiay salikaka samaanay ko pinengneng ni Yihofa cangranan aki? (Taneng 16:31) O pinengneng ni Yihofa cangranan mahecaday o marohrohay ko papah taˈangayay a kilang. (ˈOsien ko ˈOlic 92:12-14.) Tada matatodongay koniya sapatinako, hano han ko sowal hani? Samanen ora marohrohay ko papah, fangsisay ko hanek a kilang, pinaayto poloˈ miheca ko lomahad. Tinakoen, itini Dipong adihayay ko makapahay sakora a kilang, o roma marohrohay, taˈlifayto ko comaˈol miheca ko lomahad. Oya madimadiay matoˈasay salikaka itini pinengneng ni Yihofa i, tada makapahay, mahecad toniya kilang. Maˈaraw ni Yihofa ko maˈofadayto a madimadiay salikaka i, o makapahay a capeling nangra ko misinanotan Ningra. Samanen halafinayto cangra mihadidi, ano ngaˈayto tatiihto ko nikaˈorip, kamayan madimadi matayal saki ci Yihofaan. O pinengneng ni Yihofa i, sano odoˈay cangra maemin!

3. Misakadademakan ni Yihofa ko matoˈasay tamdaw palaˈosi to araaw no Niyah, tano tinakoen a mitadtad.

³ Matoˈasto ko tamdaw awaayto ko kapo han? Cowa pihaen ko pinengneng ni Yihofa.a Soˈlinay haw i, marariday ci Yihofa misakadademak to matoˈasayto a tamdaw palaˈosi to araaw no Niyah. Tinakoen, 90 ko mihecaan ni Sara i, milasilay ci Yihofa cingranan mamalo taˈangayay kitakit ko teloteloc ningra, hanaca mamalo lalitengan no Misiya cingra. (Satapangan 17:15-19) Ya ocoren ni Yihofa ci Mosi mikerid to Israil tamdaw miliyas to Icip i, 80 ko mihecaan ni Mosi. (Kasadakan 7:6, 7) Makayatay ni Yihofa ko tarokos ci Yohani mitilid to lima maloloday cudad no Fangcalay Cudad i, mangataayto 100 ko mihecaan.

4. Sasamaan ko pidemak no malitengay, ho ngaˈay miremo to pasangar i nokaˈorip, mansanay ko sowal no Taneng 15:15? (Nengnengen ko coka.)

⁴ Maliteng malitengto i, adihay adihayay ko masiˈayaway no malitengay a pasangar. Pakatawaay ko cecay fafahiyan salikaka sanay: “Sakalitengaw i misaaliay to timolo, o kalatawaay a tamdaw aka a maliteng!” Nikawrira, ano padadotoc lipahakb ko malitengay a tamdaw, mamadoloto miremo to masakenakenaay a pasangar i nokaˈorip. (ˈOsien ko Taneng 15:15.) Onini a lalakaw mamilengo, sasamaan ko pidemak no malitengay wa ngaˈay padadotoc a lipahak, ato sasamaan ko salikaka mipadama cangranan. Salakat nengnengen ita, pakayni i malitengay sapadadotocaw lipahak hano cowa ko madoloay.

Padadotoc Lipahak Hano Cowa ko Madoloay?

5. Malitengayto a tamdaw o manan ko lalangian malahdaw ko lipahak hani?

⁵ Malitengto i, sapadadotocaw lipahak hano cowa ko madoloay hani? Marariday kiso matoled ko falocoˈ alatek, samanen adihayay a demak cowato pakadangar kiso nohatini. Ciharatengay kiso to isaˈayaway a romiˈad, sapatikolaw a kaemang tanektek ko tireng. (Patnakay 7:10) O fafahiyan salikaka ci Rupi sanay: “Masamoˈayto kako, adada sanay ko tireng, to romiˈamiˈad pasangaray a cirikoˈ. Ano cikocustato pasangarayto. Adadaay ko pokoh no tarodoˈ ako, mansa ano mimingayto a demak cowato pakadangar.” Faˈinayan salikaka ci Halote ya matayalay i Pitil, sanay cingra: “Cato ka ngaˈay midemak to kaolahan a demak, tada maketeray kako. Midingoto kako i, cowato ka fanaˈ kako to idadingoayto ko cima cingra! Kaemangho kako i, mafanaˈay mionto, kaolahan ako i, o miyakiway. Isaˈayaw pasowal ko tao: ‘Tekolen ko mali ci Halotean, mamacapet ningra!’ Kawra nohatini i, caayto pakatekol to mali.”

6. (1) Iraayho ko manan a demakan to papakatoled to malitengay hani? (2) Ngangaˈayho padadotoc parakat to tosiya anca ciotofay, o manan ko sasinanoten no malitengay hani? (Nengnengen ko “Wa Misawad Kako Parakat to Tosiya Han?” sanay a lalakaw.)

⁶ Alatek cowato ka ngaˈay kiso midemak to adihayay a dademaken, mansa matoleden kiso. Tinakoen, mamalinah kiso kalacafay to wawa a maroˈ, anca ira ko tamdaw tatayni ilomaˈ misimaw tisowanan. Alatek tatiih tatiihayto ko mata ato tireng iso, mansa caka ngaˈay parakat to tosiya anca ciotofay, cowato ka ngaˈay ko niyah talacowacowa. Mahaenay nokaˈorip cowato ka depoc! Cowato ka ngaˈay misatekedan a ˈorip a mihimaw to niyah, cowato ka ngaˈay parakat to tosiya anca ciotofay, o pinengneng ni Yihofa ato tao i, awaayto ko kapo iso han? Cowa. Aka mapawan, mafanaˈay ci Yihofa to harateng iso. Misakaretengayho to nafalocoˈan iso. Mafanaˈay ci Yihofa tada maolahay kiso Cingranan, maolahayho to salikaka, mansa misalimlaay ci Yihofa tisowanan.—1 Samuil 16:7.

7. Ano eca pakatala kako to romiˈad ni Yihofa sa ko harateng iso i, saharateratengen ko manan ngaˈ padadotoc a tawlik ko harateng hani?

⁷ ˈAyaw no mamapatay, alatek cato ka ˈaraw ko pipalaˈafo ni Yihofa to mariˈangay a hekal. Ano mahaenay ko nika rarom iso i, o manan ko papadama tisowanan hani? Haratengen, mihadidiay ci Yihofa a mitala. (Isaya 30:18) Kawra, cowa ka patelas sa ci Yihofa a mitala. O pihadidi Ningra, o pakayniay i masacaˈolay masaefangay a tamdaw iraho ko toki mafanaˈ Cingranan, malo widang Ningra. (2 Pitiro 3:9) Mihaenay, ano matoleden kiso i, ngaˈay saharateratengen, iˈayaw no kaira a romiˈad ni Yihofa i, hakowa ko tamdaw pakayni i pihadidi ni Yihofa a malidong! Wa mahawpay ko paro no lomaˈ ato salawina no miso han?

8. Wa misiˈayawho ko malitengay to maanan a pasangar hani?

⁸ Ano malitengay anca o kaemangay, adada ko tireng i, madoloay a somowal anca midemak to cowa ka tatodong a demak. (Patnakay 7:7; Yakop 3:2) Tinakoen, maolahay ci Yopu to Kawas, kawra pisemsem to adada i, ‘mafolaay macalohay ko sasowalen’ ningra. (Yopu 6:1-3) Roma i, mafiyoray no adada ato sapaiyo ko malitengay, alatek midemak to mafolaay a demak. Soˈlin cowa ka pakayni kita i katoˈas anca tatiih no tireng, kasimaan sa ko sasowalen, anca adihayto ko saali to tao. Ano mafanaˈayto kita midokaˈay ko sowal no niyah to tao i, kalikien a miliˈay.—Matay 5:23, 24.

Sasamaan ko Demak Ngaˈ Padadotoc a Lipahak?

9. Micada to sapadama no tao iraay ko maanan a epoc? (Nengnengen ko coka.)

⁹ Micada to sapadama no tao. (Kalatiya 6:2) I satapang, mihaen ko demak cowa ko madoloay sanay ko harateng iso. Fafahiyan salikaka ci Keleite sanay: “Nolatekay cowa ka picada kako to sapadama no tao, samanen cowa ka sapiafadaw kako to tao. Halafinay tatokian ngaˈ mafalicay ko mahaenay a harateng no mako, misapoener a mihayi misaaliay kako to sapadama no tao.” Soˈlinay i, ano cadaen iso ko sapadama no tao, wa matinako no tao ko paladaˈay a lipahak. (Dmak 20:35) Roma i, ano mihaen ko demak iso wa matinako to tada maolahay ciharatengay ko tao tisowanan, mamatongal ko lipahak iso.

10. Hano paihkal kita to miakoˈiday falocoˈ? (Nengnengen ko coka.)

¹⁰ Paihkalen ko miakoˈiday falocoˈ. (Kolosay 3:15; 1 Tisalonika 5:18) Ano padamaay ko tao kitanan a midemak i, wa mikifalocoˈ a miakoˈid cangranan, kawra nolatekay mapawanay kita a pasowal. Mansa paihkal to miakoˈiday falocoˈ tada masakalimlaan. Ano sedien ko pising a pasowal to miakoˈiday, mamafanaˈ ko tao to misalimla kita to sapadama nangra. Fafahiyan salikaka ci Liya itiniay i Pitil a matayal, midimokosay cingra to matoˈasay a salikaka, sowal ningra: “Midimokosay kako to cecay matoˈasay fafahiyan salikaka, maceriday cingra mitilid to kato pafeli takowanan, soˈlin cecay tosaay aca ko sowal, kawra dihkoan nanay kako. Macada ako ko kato ningra i, tada mahemekay kako. Mafanaˈ to miakoˈiday cingra to midemakan ako i cingranan, mahemekay kako.”

11. Sasamaan kiso padama to tao hani? (Nengnengen ko coka.)

¹¹ Saˈicelen a padama to tao. Ano sakadademaken ita ko toki, micerid ciharateng ato padama to tao, cato ka haharateng sa to pasangar no niyah. Iraay ko sapatinako a sowal no Afrika, o malitengay hato o kadofahay a pitelian to cudad, o nalifetan ato taneng no malitengay mahecad o cecacecay a cudad. Kawra onini a cudad ano tateli han i cadada, caka ˈosien no tamdaw awaay ko kapo. Mihaenay i, cinalifetan ato sifanaˈ ko malitengay salikaka ka talaˈayaw a paladaˈ to kaemangay no kasakopang. Ngaˈayay licayen iso cangra to pina salicay, ikor songilaˈen a mitengil. Wa ngaˈayho kiso padama cangranan a cipinang, midofdof to palinian ni Yihofa a maˈorip o sangaˈayay, paira to soˈlinay a lipahak. Misaˈicel kiso mihinom ato pakalalok to kaemangay, mamangalef ko nika hemek no niyah.—ˈOlic 71:18.

12. Mikiˈokay ci Yihofa sasamaan padama to malitengay, mansanay ko sowal no Isaya 46:4? (Nengnengen ko coka.)

¹² Cangacangen ci Yihofa pafeli tisowanan to ˈicel. Nolatekay malonayay awa ko saloˈingaw kiso. Kawra haratengen, awaay ko tolas no ˈicel ni Yihofa, ‘cowa ka roray a cinaˈefien Cingra.’ (Isaya 40:28) Mihaenay i, papafelien Ningra kiso to matomesay a ˈicel. (Isaya 40:29-31) Mikiˈokayho Cingra papadamaen Ningra kiso. (ˈOsien ko Isaya 46:4.) Hanaca dadoedoen ko misowalan Ningra. (Yosuwa 23:14; Isaya 55:10, 11) Tolonen iso ci Yihofa, mahapinang sasamaan Cingra midama tisowanan, milifet to tada maolahay Cingra tisowanan, mamangalef ko nika lipahak.

13. Mikitini 2 Korinto 4:16-18, haratengen ita ko maanan hani? (Nengnengen ko coka.)

¹³ Pakatalipaˈelalen ko niyah, cecayay aca a liyad ko pasangar. Ano haratengen konini, wa madolo kiso a mihadidi. Mikiˈokay ko Fangcalay Cudad, noikor cowato ko mamilifet to adada ato liteng. (Yopu 33:25; Isaya 33:24) Nohatini alatek tangoˈolay kiso tono kaemangho a tatokian. Kawra o sangaˈayay iso a nokaˈorip i, itiniay i noikoran! (ˈOsien ko 2 Korinto 4:16-18.) Dotoc nengnengen ita, sasamaan ko i kasakopangay a romaroma tamdaw padama to malitengay a salikaka.

Misamaan Padama ko Roma Tamdaw to Malitengay?

14. Mirinnak ato milisoˈ to malitengay hano o masakalimlaan hani?

¹⁴ Ceriden mirinnak ato milisoˈ to malitengay. (Hipray 13:16) Maceriday ko malitengay misacecay to niyah, awaawa sa i, cinatoˈolan cangra. Sanay ko faˈinayan salikaka ci Kamiyi: “Awaay ko pakayraan ako a mahadak, sa romiˈad sanay itini i lomaˈ, cowa ka fanaˈ to o mananto ko dademaken! Nolatekay hato marofoay a malitengay layong kako, macariraw a matoled.” Lisoˈen ita ko malitengay salikaka ho mafanaˈ cangra, misalimlaay kita a maolah cangranan. Kawra nolatekay wa mahaen kita: Salakat sapilisoˈaw to cecay malitengay no kasakopang, ikor ˈifowaay ko demak mapawanayto a milisoˈ. Soˈlin adihayay ko dademaken ita to romiˈamiˈad, kawra haratengen ita iraayho ko ‘masakalimlaan’ a demak, mahawpay ko ciharateng to malitengay a salikaka. (Filipi 1:10) Sasamaan ko demak iso hani? Songilaˈen a milimasmas, aka tatala sato ciromiˈaday. Ano mihalakaay kiso sapipatingwa anca palihaf to cimacima a malitengay i, ngaˈayay tiliden i koyomi anca piliˈen iso ko cecay romiˈad milisoˈ cangranan.

15. Ngangaˈayho kiso malacafay to matoˈasay salikaka midemak to maanan?

¹⁵ Alatek calemcemay kiso sasamaan ciharateng to matoˈasay, mafokilayto o manan ko sasowalen cangranan, anca malacafay to o manan ko dademaken. Kawra aka a calemcem, saˈicelen a mala soˈlinay widang o ngaˈayayto. (Taneng 17:17) ˈAyaw ato pihererek no saˈopo ngaˈay kiso talaˈayaw masasowal to matoˈasay, licayen cangra o manan ko kaolahan nangra a sinael, anca i kaemangho o manan ko kasemeran nangra a demak. Ngangaˈayho kiso mitahidang cangranan minengneng to JW Tilifi a kamok. Roma i, padamaho cangranan midemak to cowa ka dangar nangra a demak, tinakoen padama cangranan mikinsa to soci anca pingpan, anca misiyacay to safaelohay a lalakaw. Matoˈasay fafahiyan salikaka ci Karol sanay: “Ngaˈay kiso mitahidang to matoˈasay malacafay tisowanan midemak to kaolahan iso a demak. Soˈlin matoˈasayto kako, kawra sapisinowayay kako to kaˈorip! Maolahay kako tayra i icifa minengneng, komaen to ˈaredetay kakaenen, maolahayho to tatayra i lotolotokan ˈaloˈaloan a pisarakrarakat.” O cecay kaemangay fafahiyan salikaka ci Mayra sanay: “Iraay ko cecay widang ako maedeng 90 ko mihecaan ningra. Maceriday mapawan kako to ikakaay ko 57 ko mihecaan tono mako, samanen malacafayay kami minengneng to ika, malacafay matawa. Tahalifa to pasangar no kaˈorip i, malacafayay kami masasowal, malalicay o manan ko ngaˈayay a sapaini.”

16. Ano patihi ko matoˈasay mipaising, hano ngaˈayay han ko hatiniay a demak?

¹⁶ Patihi cangranan a paising. Ano paising cangra i, cowa ko pisera aca iso cangranan, patihienho cangra a micomod, nengnengen samaanay ko waywayan no ising ato kangkofo a mipasowal cangranan. Ano ngaˈayay i, pacafayen a mitengil to samaanay ko sowal no ising. (Isaya 1:17) Ano ngaˈayay i, tiliden ko sowal no ising. O cecay matoˈasay fafahiyan salikaka ci Ruso sanay: “Ano cecay kako paising i, cowa ka sikolen nangra kako. Sanayho ko roma ising: ‘Cowa ka adada kiso da, o harateng aca iso kora.’ Kawra ano ira ko patihiay takowanan i, misongilaˈayto ko ising a pasowal takowanan. Tada miakoˈiday kako to salikaka patihi takowanan.”

17. Sasamaan ko demak iso wa ngaˈay malacafay to matoˈasay salikaka mirienang to mitosilay a tayal?

¹⁷ Malacafay to matoˈasay a mitosil. Malonayay ko tireng no roma matoˈasay salikaka, mansa cowa ka ngaˈay cangra milingad pakalomalomaˈan a mitosil. Mihaenay, sasamaan midemak kiso cangranan hani? Tinakoen, tahidangen iso ko matoˈasayto a fafahiyan salikaka malacafay tisowanan mirienang to sapisawacay a paliding a mitosil han? Sadayen ko kamaroˈan i katihi no sapisawacay a paliding hakamaroˈan ningra. Anca tahidangenho ko cecay matoˈasay faˈinayan salikaka mirienang to pakingkiwan iso han? Ano ngaˈayay i, malacafayho to sito iso tayra i lomaˈ no matoˈasay mikingkiw. Roma i, limasmasen no malohemay malitengay i lomaˈ no matoˈasay salikaka misikay to ˈayaw no mitosilay a saˈopo, ho madolo cangra malacafay to salikaka a mitosil. Mihaen ko demak mamipalak to adihayay toki ato ˈicel, kawra mihaen ko demak ho macada no matoˈasay salikaka to olah ato mikangodoay, tada ciepocay ko hatiniay noka pisaˈicel!—Taneng 3:27; Loma 12:10.

18. Dotoc a lalakaw mamilengo to maanan?

¹⁸ O matoˈasay salikaka, tada misalimlaay ci Yihofa tisowanan, ano kamoto i, maolahay tisowanan! Pasangarayto ko nikaˈorip iso, nikawrira pakayni pitadiˈec to sapadama ni Yihofa papadadotoc kiso a lipahak. (ˈOlic 37:25) Haratengen, o sangaˈayay nokaˈorip iso cowa ko isaˈayaway, ao itiniay i noikoran! O roma tamdaw halafinay midimokos to matoˈasay a paro no lomaˈ, adadaay a wawa anca widang. Ano masiˈayaw iso ko mahaenay a demak i, o manan ko papadama tisowanan padadotoc a lipahak hani? Dotoc a lalakaw mamilengo tonini a salicay.