O Cisiniˈadaay Kitanan a Sakakaay Saysi ci Yis

1-2. (1) Hano ocoren ni Yihofa ci Yis tayni i fafekang no sera hani? (2) Oniya lalakaw mamilengo to manan? (Hipray 5:7-9)

ˈAyaw no tosa caˈol miheca, ocoran ni Yihofa ko kaolahan Ningra a Wawa tayni i fafekang no sera. Misamaanay hani? Kalimlaan a araaw oha sapilidong to tamdaw mihepol to raraw ato patay, hanaca o palahdaw to kihcod pairaan ni Satan a pasangar. (Yohani 3:16; 1 Yohani 3:8) Roma i, mafanaˈay ci Yihofa, o milifetay ni Yis i fafekang no sera papadama cingranan malo cisiniˈadaay to tamdaw a Sakakaay a Saysi. Kongyen 29 miheca, mipaputisem ci Yis ikor, malo Sakakaayto a Saysi.a

² Oniya lalakaw mamilengo, o nalifetan ni Yis i fafekang no sera misamaanay a ‘citatodong’ cingra malo Sakakaay a Saysi. O masakalimlaan konini, ano pakasoˈlin ci Yisan to siniˈadaay kitanan a Sakakaay Saysi i, wa madoloto mingiid ci Yihofaan. Soˈlin mararaw kita a matoled i, ngaˈayay tolonen ci Yihofa.—ˈOsien ko Hipray 5:7-9.

Tayni ci Yis i Fafekang no Sera

3-4. Nai kakarayan ci Yis tayni i fafekang no sera ikor i, milifetay to masamaanay taˈangayay noka falic hani?

³ ˈAlomanay tamdaw na malifetay ko cowa ka dolo a kafalic, tinakoen malinah to kafanaˈan a kitiraan, miliyas to salawina ato widang. Kawra sataˈangayay ko nika falic ni Yis. I kakarayan salakatay masakalimlaan a coyoh ci Yis. Maolahay ci Yihofa cingranan, i tatihiay ni Yihofa a matayal, mansa mahemekay cingra. (ˈOlic 16:11; Taneng 8:30) Kawra Filipi 2:7 sanay ko sowal, makahiay ci Yis ‘misawad to kihcod,’ mahawpay ko i kakarayan a saaroˈan, tayni i fafekang no sera kalacafay to cowa ko malefotay a tamdaw maˈorip.

⁴ O kaˈorip ni Yis i fafekang no sera cowa ka hecad to i kakarayan. Haratengen hena samaanay ko kaˈorip ni Yis itini i fafekang no sera. Mikitini i sapatoˈaya no wama wina ningra mahapinang ita, o kahofocan ni Yis itiniay i manikaway a paro no lomaˈ. (Lifi 12:8; Luka 2:24) O roma i, hofocen ci Misiya o ci Yis hananay i, sapipatayaw ko hongti ci Hiroti cingranan, mansa mikeridan ni Yosif aci Mariya ci Yis milaliw tayni i Icip a maˈorip to cecay a liyad.—Matay 2:13, 15.

5. I fafekangho no sera ci Yis maˈaraw ko manan? Oniya nalifetan samaanay padama cingranan siniˈadaay to tamdaw malo Sakakaay a Saysi hani? (Nengnengen ko coka.)

⁵ I fafekang no sera ci Yis maˈaraway ningra ko ˈalomanay tamdaw taharoray. Ano cingrato i, tahalifaay to pasangar, tinakoen mapatay ko padek a wama ningra ci Yosif. Mitosil cingra i, maˈaraway ni Yis ko mapohaway, malonoˈay ko adada a tamdaw, masamoˈay a tamdaw ato mapatayay ko wawa a wama wina. Tada siniˈadaay ci Yis cangranan. (Matay 9:2, 6; 15:30; 20:34; Marko 1:40, 41; Luka 7:13) Soˈlin pakaˈaraway ci Yis nai kakarayan to roray no tamdaw, kawra taynito i fafekang no sera ikor i, mangalefayto ko kacipinang ningra to roray no tamdaw. (Isaya 53:4) Roma i, ano ci Yisto i, mahecaday to kalo a tamdaw a marorayen, macariraw a masomad. Oniya nalifetan pakacipinangay cingranan i cowa ka hecad a pakayraan samaanay ko nafalocoˈan no tamdaw, cipinang to masiˈayaway a pasangar i, tada o karorayan.

Siniˈadaay ci Yis to Tao

6. Mikitini Isaya 42:3, samaanay ko picada ni Misiya to tadancaay a tamdaw? (Isaya 42:3)

⁶ Pairasolay ko Fangcalay Cudad, tada ciharatengay siniˈadaay ci Yis to tadancaay a tamdaw. Tinakoen mikayatan no fangcalay saocor ci Isaya tano penen ato keliw no dawdaw, pairasolay ci Misiyaan oha mamihaen to demak. I Hipray Sowal Fangcalay Cudad, oya tanoktokay ko pakasoˈlinay falocoˈ ato Kawas a tamdaw hato cowa mamakedal a palosayan ato taˈangayay a kilang. (ˈOlic 92:12; Isaya 61:3; Yirimiya 31:12) Awaay ko hatokel, ato maroeroay a tamdaw patinakoan to ˈakongay a penen, oha mamapadengto a keliw no dawdaw. (ˈOsien ko Isaya 42:3.) Mitosil ci Yis i, soˈlinay mahecad to pairasolan no Isaya, tada ciharatengay siniˈadaay to masamsamay a tamdaw.

7-8. Samaanay ci Yis patatodong to sapairasol ni Isaya?

⁷ Tano sapairasol ni Isaya ci Matay a paihkal to papalaˈosien ni Yis konini a sapairasol, sanay ci Matay: ‘O mapaekelay a penen, cowa ka piteken ningra, oya mamapadengto a keliw no dawdaw, cowa ka padengen ningra.’ (Matay 12:20) Midemak ci Yis to kasapaan, padamaay to ˈalomanay marorayay a tamdaw. O manan ko tahasiˈayawan noniya tamdaw a pasangar hani? Haratengen hena, ciadadaay to malonoˈay a tamdaw, cowato ko mamaadah wa cowato ka ngaˈay macacawmaˈ to paro no lomaˈ ato widang, samaanay ko harateng ningra hani? (Luka 5:12, 13) O roma i, maˈaraway ko madoˈengay a tamdaw, mahemek ko tao a masasowal, kawra o niyah sa i, cowa ka ngaˈay masasowal cangranan, maedeng masomaday koniya madoˈengay a tamdaw. (Marko 7:32, 33) Soˈlinay i, cowa konini aca ko roray nangra.

⁸ I lintad ni Yis, ano adada ano masamoˈ ko tamdaw, o pinengneng no ˈalomanay Yutaya tamdaw i, pakayniay i notekedan anca mararaway ko wama wina ningra sanay. (Yohani 9:2) Oniya mararaway harateng, tada misakahmawan no tao ko pinengneng to adadaay masamoˈay a tamdaw, i falocoˈ noniya adadaay masamoˈay a tamdaw hato awaayto ko epoc no niyah, cowato ko mamisakareteng ko tao a minengneng. Kawra, adahanto ni Yis ko adada nangra, padamaanho cangra mafanaˈ to ciharatengay ko Kawas cangranan. Malaˈosiayto ko sapairasol ni Isaya. Mikitini toniya demak o manan ko mananamay ita hani?

9. Hano mafanaˈ kita o Sakakaay a Saysi ci Yis soˈlinay siniˈada to cowa ka lefot a tamdaw? (Hipray 4:15, 16)

⁹ ˈOsien ko Hipray 4:15, 16. Ngangaˈay pakasoˈlinen ita, tada siniˈadaay ci Yis kitanan. Tatodong no siniˈadaay a Krisiya sowal i, pakayni malifaay no tao a roray mahecaday ko nafalocoˈan no niyah, talaˈayaway a padama cangranan. (Nengnengen ko Hipray 10:34, itini toniya sinael misakadademakan ni Pawlo ko melecaday a Krisiya a sowal.) Mikitini mitilidan a midemakan ni Yis a kafahkaˈan mahapinangay no mita, tada siniˈadaay ci Yis to taharorayay a tamdaw. Miadahan ningra ko hatiraay a tamdaw, samanen tada ciharatengay cingra cangranan, makalimay sapadamaaw cangranan, cowa ko mipaciecian ko demak. Tinakoen, soˈlin cowa ka kamaen ni Yis kora malonoˈay a tamdaw, wa ngaˈayho adahen cingra, kawra maolahay ci Yis cingranan, oranto i, kamaen cingra. Haratengen hena, ikor no ciadada no malonoˈay sakinacecayho ira ko makahiay mikama cingranan. Roma i, patadoay ci Yis toya madoˈengay a tamdaw miharateng, mikeridan cingra paliyas toya ˈarawaway a kitiraan, miliyas to ˈalomanay a tamdaw, ikorto ngaˈ miadahan cingra. Kinacecayayho, iraay ko cecay mikifalocoˈay pasasiyoray a fafahiyan tano losaˈan ningra micepaˈ ko ooˈ ni Yis, hanaca tano fokes ningra a miˈicang. Tada mapiliˈay ko Farisay a tamdaw torira fafahiyan, nikawrira maˈadingan ni Yis koniya fafahiyan, hanaca mirikecay toya Farisay a tamdaw. (Matay 8:3; Marko 7:33; Luka 7:44) Oniya tinakoan mitadtaday, cowa ka liyasen ni Yis to pikidemay ko adada anca pakidemay ko raraw a a tamdaw. Makalimay cingra miingid to mahaenay a tamdaw, siniˈadaho cangranan, paihkal to olah cangranan. Mansa wa pakasoˈlin kita, mamihaen ci Yis a siniˈada kitanan.

Todongen Ita ko Sakakaay Saysi

10. Sasamaan kita padama to madoˈengan ato mapohaway a tamdaw? (Nengnengen ko coka.)

¹⁰ Makalimay kita mitodong ci Yisan, mansa wa misarocod kita siniˈada to tao, paihkal to olah cangranan. (1 Pitiro 2:21; 3:8) Soˈlin cowa ka ngaˈay kita midemak to kafahkaˈan miadah to madoˈengay ato mapohaway a tamdaw, kawra wa ngaˈay padama ita cangra mafanaˈ ato miingid ci Yihofaan. Nohatini oya mikawingan mitepangan no mita maedeng 100 kasasiroma ko pihongyak. Sapipadamaaw to mapohaway ato maapohay ko mata a tamdaw, misangaˈan ita mataˈlifay ko simoˈot sasowalen tano sowalan mitadtad a ika, oya tano kamayan mikama a cudad mataˈlifayto ko 60 a sasowalen. O mahaenay a mitepangan, padama to madoˈengay ato mapohaway a tamdaw miingid ci Yihofaan ato kaolahan Ningra a Wawa ci Yis.

11. O likakawa ni Yihofa samaanay mitodong ci Yisan ciharateng to cowa ka hecad ko kalomahadan a tamdaw? (Dmak 2:5-7, 33; Nengnengen ko coka.)

¹¹ O likakawa ni Yihofa mitodongay ci Yisan, misaˈicelay padama to cowa ka hecad ko kalomahadan a tamdaw mafanaˈ ci Yihofaan. Kongyen 33 miheca Kocinsic, patikolto maˈorip a Yisan padamaay to nisawawaan ningra milifok to fangcalay saocor, ho ngaˈay pasowal to masasiromaay a sasowalen, mihaen i, masasiromaay a kasangasaw wa ngaˈay tano ‘niyah a sasowalen’ mitengil to ngaˈayay a lihaf. (ˈOsien ko Dmak 2:5-7, 33.) Anini, i pikayat ni Yis, o likakawa ni Yihofa mataˈlifay ko 1,000 sasowalen a mitepangan lalakaw, nikawrira o roma sasowalen cowa ko ˈaloman ko tamdaw. Tinakoen, o roma Intian a sowal cowa ka ˈaloman ko somowalan itini i Kaˈamis a Amilika ato Katimol a Amilika. Kawra, sapadamaaw cangranan tahatengil to ngaˈayay lihaf, o likakawa ni Yihofa mitepangay to 160 no Intian sasowalen a lalakaw. O roma i, o Romo a sasowalen. O somowalay to Romo a tamdaw, o itiniay i Kawaliay no Iwropa ato Kawaliay Katimolay no Iwropa a yincumin cangra. Halafinay cangra tahalifa to pihakokay, pikapiliˈ, misakakinih to tamdaw, kawra o likakawa ni Yihofa mitepangayto mataˈlifay ko 20 a sasowalen no Romo a lalakaw. Pakayni toniya mitepangan a lalakaw, ˈalomanayto ko tamdaw micadaay to soˈlinay kimad.

12. Anini o likakawa ni Yihofa midemakayho to manan padama to tao hani?

¹² O likakawa ni Yihofa cowa ko pipadama aca mafanaˈ to ngaˈayay lihaf, tawlikayho a padama to tahapadesay a tamdaw. ˈAlomanay Misawacayay Tamdaw ni Yihofa makalimay padama to tahapadesay a salikaka. Roma i, o likakawa ni Yihofa patirengayho to adihayay pidokoan a kitiraan. Oniya kasaˈopoan soˈlin kantangay ko pisafaco, kawra ngaˈayay malisopsop ko tamdaw midoko ci Yihofaan, cipinangho to maolahay ci Yihofa kitanan.

Sakakaay Saysi ci Yis wa Padama Tisowanan

13. Sasamaan ci Yis padama kitanan?

¹³ O sangaˈayay a pakaenay ita ci Yis, ciharatengay cingra kitanan to kahacecay a tamdaw, papadama kitanan ira ko ngaˈayay kalawidang ci Yihofaan. (Yohani 10:14; Ifiso 4:7) Alatek pakidemay ko adada ita, malacongis ko i kasakopangay a tamdaw, anca mararaway, tahalifa to romaroma pasangar. Ano mahaen i, wa maroray masomad ko harateng ita alatek, malecad o mapaekelay a penen anca mamapadeng a keliw no dawdaw, cowato ka pisamacay to hanoikor a hatokel. Aka a mapawan, mafanaˈay ci Yis to o manan ko malifaay iso, cipinangayho to nafalocoˈan iso. Tada siniˈadaay cingra tisowanan, papadamaen ningra kiso. Sasamaan padama cingra tisowanan hani? Tinakoen, pakayni to malohemay malitengay ato salikaka pakalalok a midama tisowanan. (Yohani 16:7; Titus 3:6) Ano malonay kiso i, papadamaen ningra kiso milifok to fangcalay saocor, patanektek tisowanan.—Ifiso 4:8.

14. Ano matoled kita i, sasamaan ko pidemak hani?

¹⁴ Ano pakayniay iso i dangoc anca raraw no niyah a matoleden i, aka mapawan o Sakakaay Saysi ita ci Yis, hanaca songilaˈen a miharateng o manan ko tatodong nonini tisowanan. Haratengen, miocoran ni Yihofa ci Yis tayni i fafekang no sera, cowa ko kinafalah aca to ˈorip pakayni kitanan, pakayniayho sakasiniˈadaaw kitanan, cipinang to masiˈayaway no cowa ka lefot a tamdaw a pasangar. Mihaenay, ‘i pisaalian ita to sapadama a tatokian’ makalimay ci Yis padama kitanan.—Hipray 4:15, 16.

15. O cecay faˈinayan salikaka samaanay patikol i kasakopang, sowalen hena.

¹⁵ Mikayatayho ci Yis to finawlan ningra mikilim to malafelay a lopayˈay siri, padama cangranan patikol tayni tatihi ni Yihofa. (Matay 18:12, 13) Nengnengen ko nalifetan no faˈinayan salikaka ci Setifano.b Mapadeng ko ngangan ningra nai kasakopang ikor no 12 miheca, misetek cingra to falocoˈ a misatapang mirienang to saˈopo. Sanay cingra: “Soˈlin mangodoay ko harateng ako, kawra makalimay kako sapinokayaw i taˈangayay paro no lomaˈ ni Yihofa. Masasoˈaraw ko malohemay malitengay i takowanan i, tada damsayay, sarihaday sanay ko harateng ako. Nolatekay hato awaay ko kapo ko niyah sanay ko harateng sapisawadaw i, pakalalokay ko malohemay malitengay takowanan, pakafanaˈ takowanan makalimay ci Yihofa aci Yis padadotoc kako a tanektek. Miliyaw macada no kasakopang kako ikor, polong a salikaka maemin mahemakay militemoh takowanan. Ikor o fafahi ako misatapangayto minanam to Fangcalay Cudad. Anini malacafayay kami midoko ci Yihofaan.” Matomesay ko olah a Sakakaay Saysi ci Yis Kristo, maˈaraw ko ˈalomanay salikaka misaˈicelay padama to pasasiyoray tamdaw patikol i kasakopang, tada mahemekay cingra!

16. Hano miakoˈid kiso ci Yihofaan minilnil ci Yisan malo Sakakaay Saysi hani?

¹⁶ Isaka 1 hahekalan, misaali ko ˈalomanay tamdaw to sapadama i, padamaanto ni Yis cangra. Anini wa ngaˈay pakasoˈlin ita, itini pisaalian ita a tatokian papadama ci Yis kitanan. Itini noikoran a faelohay hekal, oya midofdofay a tamdaw papadamaan ni Yis cangra palahdaw to pifiyor no raraw. Minilnilan ni Yihofa ci Yis malo Sakakaay a Saysi, tada siniˈadaay cingra to tamdaw. Mamikifalocoˈ kita miakoˈid ci Yihofaan paihkal to taˈangayay olah kitanan!