Salikorayto 40 Romiˈad ni Yis i Fafekang no Sera a Makapahay Taˈarawan

1-2. Oya tatosa nisawawaan ni Yis malingaday tayra i Imaus malitemohay ko manan a demakan?

I KONGYEN 33 miheca Nisan a folad 16 romiˈad, mararomay ko nisawawaan ni Yis, matalawayho. O tatosa nisawawaan ni Yis tayra i Imaus a niyaroˈ, ora niyaroˈ maedeng 11 kongli ko raay to Yirusalim. Mararomay koniya tatosa nisawawaan, samanen oya maceriday mikotodan nangra a Yisan mipatayanto no tao. Hinatalaay cangra malaˈosi ni Misiya ko dademaken, ˈarawhan malahoracayto. Kawra, ikor mafekaday ko cowa ka harateng nangra a demak.

² Iraay ko cecay kafahalan a tamdaw mingataay cangranan, kalacafayay cangranan a romakat, fanaˈan nangra kora tamdaw to na demakan ni Yis. Ikor o misowalan nora kafahalan a tamdaw cowato ko mamatawal nangra. ‘Mikitini ci Mosian ato pairasolay a cudad a misatapang’ cingra, a mitadtad to hano misemsem a mapatay ci Misiya. Mamaraodto cangra tahira i Imaus i, mahapinangay nangra to oya patatikolay maˈorip a Yisan cingra. Haratengen hena, mafanaˈayto cangra patatikolayto a maˈorip ci Misiya i, samaan sa ko hemek nangra!—Luka 24:13-35.

3-4. (1) Pakayni sapakalalok ni Yis i, samaanay ko kafalic no nisawawaan? (Dmak 1:3) (2) Oniya lalakaw mamilengo to manan?

³ I salikorayto ni Yis i fafekang no sera to 40 romiˈad, kinapinaay cingra paˈaraw to nisawawaan.a (ˈOsien ko Dmak 1:3.) Ikorto no patay ni Yis, matalaway mararomay ko nisawawaan, kawra macada nangra ko sapakalalok no patatikolayto maˈorip a Yisan ikor tawlikayto, matomesay ko pakasoˈlin no falocoˈ ato timolo, padadotocayto mitenak to ngaˈayay lihaf no Kitakit no Kawas.

⁴ Songilaˈen ita misinanot ko demak ni Yis toniya 40 romiˈad, wa adihay ko mananamay. Oniya lalakaw mamilengo, samaanay misakadademak ci Yis toniya tatokian (1) pakalalok to nisawawaan, (2) padama to nisawawaan matongal ko kafanaˈ to Fangcalay Cudad, (3) pahatatanamen ko nisawawaan micada to karetengay a ˈinorong. Wa milengoho, itini toniya pakayraan sasamaan kita mitodong to taˈarawan ni Yis.

PAKALALOK TO TAO

5. Misamaanay hano misaali ko nisawawaan ni Yis to sapakalalok?

⁵ Nisawawaan ni Yis misaaliay to sapakalalok, misamaanay hani? Sakangaˈayaw no roma tamdaw mikotod ci Yisan, miliyasayto to paro no lomaˈ, niyaroˈ, misawad to tayal no niyah. (Matay 19:27) O roma malo nisawawaan ningra a tamdaw masamsamay no tao. (Yohani 9:22) Pakasoˈlinay cangra ci Yis o miocoran no Kawas a Misiya cingra, mansa makalimay a kinafalah cangra. (Matay 16:16) Kawra mapatay ci Yis ikor, mararomay cangra a masomad, cowato ka fanaˈ to sasamaan noikor.

6. Patatikol maˈorip ci Yis ikor, samaanayto ko demak ningra?

⁶ Cipinangay ci Yis, cowa ka cangoˈot ko pakasoˈlinay falocoˈ no nisawawaan, pakayni i patay ningra a mararom cangra o matatodongayto. Oranto i, patikol maˈorip cingra toya romiˈad, satapangay pakalalok to nisawawaan. Tinakoen, Maktala tamdaw hananay a Mariya tomangicay i potal no tadem ni Yis, mansa paˈarawan ni Yis cingra. (Yohani 20:11, 16) Paˈarawanho ni Yis ko masowalay no lalakaw a tatosa nisawawaan. Roma i, paˈarawan ni Yis ci Pitiro. (Luka 24:34) Dotoc, nengnengen ita isalakat paˈaraw ci Yis ci Mariyaan i, samaanay pakalalok cingranan, ato sasamaan kita mitodong cingranan a minanam.

7. Mikitini Yohani 20:11-16, i kanikaran no Nisan folad 16 romiˈad, maˈaraw ni Yis o manan ko midemakan ni Mariya? Ikor samaanayto ko demak ni Yis? (Nengnengen ko coka.)

⁷ ˈOsien ko Yohani 20:11-16. Kanikaran no Nisan folad 16 romiˈad, iraay ko papina fafahiyan tayraay i patademan ni Yis, o cecay o Maktala tamdaw hananay a Mariya. (Luka 24:1, 10) Maˈaraw ningra to awaay koya mapatayay i tadem, comikayay a mifanaˈ ci Pitiroan aci Yohani. Tatosa tarokos tangsolay tayra i patademan, mihakelongay ci Mariya cangranan. Mahapinang no tatosa tarokos awaay ko mapatayay i tadem, ikor minokayayto cangra. Kawra cowa piliyas ci Mariya, tatangic sanay cingra itira. Cowa ka fanaˈ cingra to iraay i tatihi ci Yis. Maˈaraw ni Yis koniya madimadiay fafahiyan a tomangic, matemeray ko falocoˈ. Oranto i, paˈarawan ni Yis ci Mariya a masasowal cingranan, patorodanho ni Yis to masakalimlaan a ˈinorong cingra, oha mamifanaˈ to salikaka patatikolayto ci Yis a maˈorip. Mihaen ci Yis a midemak, pakalalokayto ci Mariyaan.—Yohani 20:17, 18.

8. Sasamaan mitodong kita ci Yisan a minanam?

⁸ Sasamaan mitodong kita ci Yisan a minanam? Ano mitodong kita ci Yisan, misinanot to masiˈayaway no salikaka a pasangar, tano siniˈadaay a falocoˈ masasowal, wa pakalalok cangranan padadotoc midoko ci Yihofaan. Nengnengen ko nalifetan ni Ciyawselin salikaka, o safa ningra mapatayay i fahal sanay mifekad a demak. Sanay cingra: “Halafinay a tatokian, mararomay a makesem ko falocoˈ ako.” O cecay mararamoday mitahidangay cingra tayra i lomaˈ, ho iraay ko pakayraan pasowal to nafalocoˈan ningra. Mihadidiay cangra mitengil, maolahay ci Yihofa cingranan sanay. Sanay ci Ciyawselin: “Hato pakaynian ni Yihofa cangranan, nai taˈangayay tapelik no riyar mipaˈorip takowanan. I sapadama nangra tawlikayto kako, makalim a padadotoc midoko ci Yihofaan.” Ngaˈayay kita mihadidi mitengil to nafalocoˈan no salikaka, siniˈada ko sasowalen cangranan. Mihaen i, wa mapakalalok ita ko salikaka, padama cangranan padadotoc a midoko ci Yihofaan.—Loma 12:15.

PADAMA TO TAO PAKAYNI FANGCALAY CUDAD A MITADTAD

9. (1) Hano misaali ko nisawawaan ni Yis ko sapadama? (2) Samaanay ci Yis padama to nisawawaan?

⁹ Pakasoˈlinay ko nisawawaan ni Yis to Kimad no Kawas, halo misaˈicel midofdof. (Yohani 17:6) Kawra, cowa ka cipinang cangra, hano o mararaway han ci Yis a mipatay. Cipinangay ci Yis to sakacisasa nangra, cowa ka cangoˈot ko pakasoˈlinay falocoˈ anca cowa ka olah to Kawas cangra, ao cowa ka tangongol ko kacipinang to Fangcalay Cudad. (Luka 9:44, 45; Yohani 20:9) Mihaenay, padamaay ci Yis cangranan pakayni Fangcalay Cudad a mitadtad, matatodongay noka cipinang to soˈlinay kimad. Nengnengen hena, paˈarawan ni Yis koya malingaday tayra i Imaus a tatosa nisawawaan i, samaanay ko demak ningra.

10. Samaanay padama ci Yis to nisawawaan cipinang to o ci Misiya cingra hani? (Luka 24:18-27)

¹⁰ ˈOsien ko Luka 24:18-27. Sinanoten, cowa ka tangsol sa ci Yis pasowal to nisawawaan to o cima cingra, isalakatan ningra a milicay cangra. Mihaen ko demak ningra, alatek papipasowalaw ni Yis cangranan to harateng nangra. Dotoc sanay ko sasa no nisawawaan. Hinatalaay cangra o pilidong ni Yis to Israil miliyas to saroero no sifo no Loma, kawra oniya hinatala nangra malahoracayto. Matengil ni Yis ko harateng nangra ikor, tano Fangcalay Cudad padama cangranan cipnang, mafekad koniya demak o paihkalay to malaˈosiayto ko milingatay ci Misiyaan a sapairasol.b Toya romiˈad a dadaya i, paˈarawan ni Yis ko romaroma nisawawaan, halo mitadtad to soˈlinay kimad cangranan. (Luka 24:33-48) Mananamay ita ko manan hani?

11-12. (1) Mikitini sapakafanaˈ ni Yis mananamay ita ko manan? (Nengnengen ko coka.) (2) O pakingkiway a singsi ni Notay samaanay padama cingranan?

¹¹ Sasamaan mitodong kita ci Yisan a minanam? Pakafanaˈ to pakingkiwan i, ngaˈay licayen ko pina salicay, ho papipasowalaw ko pakingkiwan to nafalocoˈan no niyah. (Taneng 20:5) Cipinangto to harateng ningra ikor, wa ngaˈay pakafanaˈen cingra mikilim to milingatay to saali no niyah a sinael. Aka a patodiceken pasowal to sasamaan ko demak ningra, ao padama cingranan tano Fangcalay Cudad a mitadtad, papiharatengen cingra to sasamaan misakadademak to safalod no Fangcalay Cudad. Nengnengen ko nalifetan no faˈinayan salikaka ci Notay.

¹² I Kanaay ci Notay, 16 ko mihecaan misatapangay cingra minanam to Fangcalay Cudad, kawra tangsolay misafelitay ko paro no lomaˈ ningra. O manan ko padamaay cingranan tanektek ko falocoˈ hani? O pakingkiway a singsi ningra tano Matay 10 fedengan a mitadtad, soˈlinay a Krisciyang wa tahalifa to hakokay. Sanay ci Notay: “Mansa, na misafelitay ko paro no lomaˈ ako i, pakasoˈlinay kako to makilimay ko soˈlinay kimad.” Paˈarawanho no pakingkiway a singsi cingra to Matay 10:16, ikor malalengoay to sasamaan cingra mitawmec to talipaˈelalay, misinanot to masamaanay a pakayraan alatek wa mikidat to sakalacongisaw no paro no lomaˈ, milengoayho sasamaan cingra tano mikangodoay a waywayan mitadtad to pihakelongan. Mipaputisem ci Notay ikor makalimay a misakafah, kawra papitakcian no wama ningra to taykak. O pakingkiway a singsi cowa pakafanaˈ ci Notayan to misamaan ko demak, o pilicay aca cingranan, padama cingranan mifolfol to safalod no Fangcalay Cudad. Samaanayto ko teloc? Malo misakafahay ko pisaˈosi ni Notay. Kawra ikor, malaplapay no wama cingra. Samaanayto ko harateng ningra hani? Sanay cingra: “Pakasoˈlinay kako to matatodongay ko pisaˈosi ako.” Ano mipalak kita to toki padama to tao micalep cipinang to Fangcalay Cudad, wa padama cangranan malo sakatenesaw.—Ifiso 3:16-19.

PADAMA TO FAˈINAYAN SALIKAKA CITATODONG TO KALIMLAAN A ˈINORONG

13. Samaanan ni Yis a milimasmas, ho ngaˈay padadotoc ko mitosilay a demak? (Ifiso 4:8)

¹³ I fafekangho no sera ci Yis i, malefotay ciˈinorong to sapatorod no kakarayan Wama cingranan. (Yohani 17:4) Cowa ka saan cingra: “Sakalaˈosiaw noniya a tayal, edengan kako ngaˈ malahci.” Mitosil cingra to tolo ira ko kalitosa mihecaan i, pahatatanamay ci Yis to roma tamdaw. ˈAyaw no tayra i kakarayan, patorodan ningra ko kalimlaan a ˈinorong to nisawawaan, itiya o roma nisawawaan alatek 20 aca ko mihecaan. Palimoˈotay ci Yis cangranan mamidimokos to kalimlaan a siri no Kawas, talaˈayaw mikerid to mitosilay a tayal. Sapipadamaaw toya madimadiay malalokay a nisawawaan ‘malo sapatelong’ a tamdaw no kasakopang, samaanay ci Yis i salikorayto a 40 romiˈad a pahatatanam cangranan hani?—ˈOsien ko Ifiso 4:8.

14. ˈAyaw no tayra i kakarayan ci Yis to 40 romiˈad, samaanay cingra padama to nisawawaan a macakat hani? (Nengnengen ko coka.)

¹⁴ Tano sidaˈitay ci Yis a mirikec to nisawawaan. Tinakoen, mafanaˈay cingra iraay ko cisasaay a falocoˈ no roma nisawawaan, mansa mirikecay cangranan, padama cangranan palahdaw to cisasaay a falocoˈ. (Luka 24:25-27; Yohani 20:27) Palimoˈotayho to nisawawaan misakareteng to pakaenay to siri a tayal, o ikakaay to niyah a tayal han ko pinengneng. (Yohani 21:15) Patalipaˈelalay cingra to nisawawaan, aka pakidem a mikihar to macadaay no tao a ˈinorong. (Yohani 21:20-22) Roma i, papisalofanho ni Yis to mararaway a harateng nangra to Kitakit no Kawas, halo padama cangranan misarocod mitenak to ngaˈayay lihaf. (Dmak 1:6-8) Mamananam no malohemay malitengay ko manan hani?

15-16. (1) O malohemay malitengay sasamaan mitodong ci Yisan? (2) Ci Patelike pakayni i sapirikec micada to manan a epoc hani?

¹⁵ Sasamaan ko malohemay malitengay mitodong ci Yisan a minanam? O malohemay malitengay pahatatanamen ko faˈinayan salikaka, padama cangranan ira ko tatodong ciˈinorong i kasakopang. Pahatatanaman nangra a tamdaw mahawpay ko kapah a salikaka.c Malefot ko pidemak no salikaka cowa ka saan ko malohemay malitengay, ao pairaen ko sidaˈitay a mihadak to sapaini cangranan, padama cangranan malo misapoeneray, ngaˈayay tiˈeren, mahemek padama to tao a tamdaw.—1 Timoti 3:1; 2 Timoti 2:2; 1 Pitiro 5:5.

¹⁶ Nengnengen ko faˈinayan salikaka ci Patelike samaanay pakayni i sapirikec tahacada to epoc. Kaemangho cingra i, cowa ka sidaˈit ko sasowalen ato demak ningra, mihaenan ningra ko fafahiyan a salikaka. Mahapinangay no malohemay malitengay ko dangoc ni Patelike, pairaen ningra ko sidaˈitay a waywayan, patodicek hananay a mirikec cingra. Sanay ci Patelike: “Miakoˈiday kako mihaen ko demak ningra. Isaˈayaw, ano o niharatengan ako a tayal o taoto ko midemakay i, matoleday ko falocoˈ ako. Kawra o sapirikec noniya malohemay malitengay pakacipinangay takowanan, wa minanam kako to misapoeneray, halo paihkal to olah i salikaka, hamaan a haharateng sato sakaciˈinorongaw i kasakopang.” Ira ko sapadama no malohemay malitengay, ci Patelike maedeng 20 ko mihecaan manilnilayto malo malohemay malitengay.—Taneng 27:9.

17. Samaanay ci Yis paihkal to pakasoˈlinay cingra to nisawawaan?

¹⁷ Patorodan ni Yis a ˈinorong to nisawawaan cowa aca ko mitosilay a demak, mahawpay ko pasifanaˈ to tamdaw. (Nengnengen ko Pitadtad no Sapikingkiw a Fangcalay Cudad no Matay 28:20 “pasifanaˈ cangranan.”) Alatek o nisawawaan cowa ko papakalahci kako toniya tayal saan ko harateng. Kawra pakasoˈlinay ci Yis cangranan, hananay ningra ko nisawawaan: ‘Misamaanay ko Wama a miocor takowanan, nohatini wa mihaen kako a miocor tamowanan.’ Mihaenay, pakasoˈlinay ci Yis cangranan wa malaˈosi koniya tayal.—Yohani 20:21.

18. Malohemay malitengay sasamaan mitodong ci Yisan?

¹⁸ Sasamaan ko malohemay malitengay mitodong ci Yisan a minanam? Cinalifetan a malohemay malitengay mahemekay patorod to tayal i roma faˈinayan salikaka. (Filipi 2:19-22) Tinakoen, malohemay malitengay ngaˈayay ocoren ko kapah a salikaka miasik ato mitomadaw to Kasaˈopoan. Patorod to tayal i faˈinayan salikaka ikor, songilaˈen no malohemay malitengay pakafanaˈ cangranan sasamaan ko demak, pasalat han papidemak, halo pakasoˈlin cangranan to mamalahci ko tayal. O kapahho a malohemay malitengay ci Masiw, tada miakoˈiday cingra to pahatatanamay cingranan a malohemay malitengay, samanen misongilaˈay cangra pakafanaˈ cingranan a midemak, halo pakasoˈlin cingranan mamalahci koniya tayal. Sanay ci Masiw: “Soˈlin mararaw ko midemakan ako, kawra ano sakacakataw no mako i, wa tahasiˈayaw to mahaenay a demak, sanay ko harateng nangra. Padamaay cangra takowanan padadotoc a macakat, adihayayto ko mananamay ako.”d

19. Mamisetek kita to falocoˈ samaan ko pidemak?

¹⁹ Metmetan ni Yis ko toki to salikoray 40 romiˈad, tawlikay a pakalalok, pasifanaˈ ato pahatatanam to tao. Nanay seteken ita ko falocoˈ a mikotod cingra, mitodong to taˈarawan ningra. (1 Pitiro 2:21) Wa padamaen ni Yis kita, samanen mikiˈokay cingra sanay a pasowal: ‘Itini toniya kihcod a romiˈad, tahira i salikoray a ˈawaled, kalacafayen ako kamo.’—Matay 28:20.