Tada Masakalimlaan Kiso!

1-2. O manan ko papadama tisowanan mihapinang itini pinengneng ni Yihofa tada o masakalimlaan kiso?

I PINENGNENG ni Yihofa, polong a finawlan ni Ningra tada masakalimlaan. Kawra, o roma salikaka alatek pakayniay i halafinay a malikaf no tao, awaayto ko kapo no niyah sanay a miharateng, pasangaray pakasoˈlin to misalimlaay ci Yihofa cangranan. Mahaenay ko harateng iso han? Ano mahaenay i, o manan ko papadama tisowanan a mihapinang to itini pinengneng ni Yihofa o masakalimlaan kiso hani?

² Adihayay a nalifetan matiliday itini Fangcalay Cudad, padama kitanan a cipinang o harateng ni Yihofa i, nanay kahacecay tamdaw o sangaˈayay ko picada no tao. Miˈosi toniya nalifetan wa mapakalalok kiso. Tinakoen, nengnengen hena misamaanay ci Yis micada to tamdaw hani? Cowa ka milikaf ci Yis to tamdaw, mikangodoay cingra to kahacecay tamdaw. Mihaenay mahapinangayto ita, ano awaay ko kapo no niyah sa a miharateng i, misakaretengan ni Yihofa aci Yis cangra. (Yohani 5:19; Hipray 1:3) Oniya lalakaw mamilengo: (1) Misamaanan ni Yis padama ko tao mihapinang to ciepocay cangra. (2) Sasamaanen ita ko demak hongaˈ pakasoˈlin, i pinengneng ni Yihofa mahecaday to odoˈ ko niyah a masakalimlaan.—Hakay 2:7.

Misamaanan ni Yis Padama ko Tao Mihapinang to Ciepocay Cangra

3. Samaanay ci Yis micada to ˈalomanay tamdaw?

³ Sakinatolo ni Yis itini Kalili mitosil i, safereng sanay ko tamdaw sapitengilaw to kimad ni Yis, o roma i, nanay miadah ci Yis to adada nangra. I pinengneng ni Yis i, ‘cowa ka sadafdaf ko picada cangranan, awaay ko tatiˈeren, mahecad to siri awaay ko mihimaway a tamdaw.’ (Matay 9:36; nengnengen ko pitadtad no 《精讀本》.) Hano mahaen ko harateng ni Yis hani? Samanen ˈaˈideman no pidoyongan misakahmaway to ˈalomanay tamdaw, pasowalayho ‘wa cipadiing cangra.’ (Yohani 7:47-49; nengnengen ko pitadtad no 《精讀本》.) Kawra misakaretengay ci Yis to ˈalomanay, makahi a pakafanaˈ cangranan halo miadah to adada nangra. (Matay 9:35) Cowa konini aca, pahatatanamanho ni Yis ko tarokos a mitosil, ira ko ˈicel miadah to masakenakenaay a adada, mihaen mapadamaay ko ˈalomanay tamdaw.—Matay 10:5-8.

4. Mikitini picada ni Yis to ˈalomanay tamdaw mahapinangay ita ko maanan?

⁴ Tada sidaˈitay ci Yis a micada to ˈalomanay tamdaw, mikangodo cangranan, paihkalay konini oya masamsaman no tao a tamdaw tada misakaretengan ni Yihofa aci Yis cangra. Ano midokoay kiso ci Yihofaan, kawra awaay ko kapo no niyah saan a miharateng i, songilaˈen a misaharaterateng, oya misapoeneray minanam ci Yisan a tamdaw tada misakaretengan ni Yis cangra. Mihaen wa ngaˈay padama tisowanan a cipinang, tada misakaretengan ni Yihofa kiso.

5. Malitemohay ni Yis ko cecay fafahiyan i Kalili, malifaay ningra ko maanan a pasangar, sowalen hena.

⁵ Cowa ka ciharateng aca ni Yis pakafanaˈ to ˈalomanay, ano notekedan aca a micangacang to sapadama ni Yis i, papadamaen ningra. Tinakoen, itini Kalili cingra a mitosil i, malitemohay ko cecay fafahiyan, o pakafoladay ningra cowa ka terep moetep tosaay a miheca, o pakidemay a adada koni. (Marko 5:25) Pakayni i Rikec ni Mosi, o cowa ko makoracay a fafahiyan koni, ano cima ko mikamaay cingranan, o sahtoay cowa ka korac. Mihaenay i, cowa ka ngaˈay cingra macacawmaˈ to tao. Halafinay a tatokian edengan cecayay aca ko niyah misateked. O roma i, cowa ka ngaˈay cingra malacafay to tao a misalisin, mirienang to midokoay a demak. (Lifi 15:19, 25) Oniya adada pakadokaˈay to tireng ato falocoˈ ningra, cinatoˈolan cingra, awaay ko kapo no niyah sanay cingra a miharateng.—Marko 5:26.

6. Ora ciadadaay a fafahiyan misamaanay a maadah ko adada ningra?

⁶ Oniya kasiniˈadaan a fafahiyan sanay ko harateng, nanay adahen ni Yis ko adada ningra, kawra matalaway cingra miˈaraw ci Yisan, misamaanay hani? Alatek pakayni adada no niyah awaayto ko kapo no niyah sanay, kangodoan, anca calemcemay to rarikecen ni Yis cingra, ikor milalang cingra alatek. Samanen cowa ko makoracay cingra, cowa ka ngaˈay ilalomaˈ no ˈalomanay. Mansa takaw sanay cingra mikama to kafafang ni Yis, pakasoˈlinay cingra ano mihaen ko demak, mamaadah ko adada no niyah. (Marko 5:27, 28) Hatiraay ko pakasoˈlinay falocoˈ ningra, macadaay ko sapalifon! Ikor maadahayto ko adada ningra! Itiya milicayay ci Yis to cima ko mikamaay cingranan, pasowalayto koniya fafahiyanan. Ano mihaen ko demak ningra, ikor samaanayto ko demak ni Yis hani?

7. Misamaanay ci Yis micada toniya fafahiyan hani? (Marko 5:34)

⁷ Maˈaraw ni Yis koya fafahiyanan ‘matalaw a matirtir,’ sidaˈitay a siniˈada cingranan. (Marko 5:33) Mihinoman ni Yis cingra, o “fafahiyan wawa” hananay ningra miowaw. Mihaen ko sowal ni Yis padihekoay to falocoˈ ningra, misakaretengay ci Yis cingranan, ngaˈayay ingiden. (ˈOsien ko Marko 5:34.) O pitadtad no 《精讀本》 sanay: “Itini Fangcalay Cudad edengan koni ci Yis miowaw to cecay fafahiyan ‘o fafahiyan wawa’ sanay. Alatek mikiriwiˈay koniya demak, anca ‘matirtirayto’ koniya fafahiyan.” Mansa mihaen ko sowal ni Yis, ya matengil noya fafahiyan ko sowal ni Yis i, sinowayay ko falocoˈ ningra! Haratengen, ano cowa ka hinomen ni Yis cingra i, samaan ko teloc hani? Soˈlin maadahayto ko adada ningra, kawra calemcemayho ko falocoˈ ningra. Nikawrira, cowa ka saan ci Yis a miharateng, sakafanaˈaw cingra toniya fafahiyan to o kanonoˈan ni Yihofa a wawa cingra.

8. O salikaka ci Maliya iraay ko maanan a pasangar hani?

⁸ O roma salikaka pakayni i pakidemay ko adada no niyah, awaay ko kapo sanay ko harateng. Itiniay i Pracil a fafahiyan salikaka ci Maliya,a o miceriday misakafahay cingra. Kawra hofoc han awaayto ko ooˈ ato kawili a kamay ningra. Sanay cingra: “Kaemangho mitakci i, maceriday masamsam no cafacafay. Panganganayho to pakatawaay a ngangan. Mapiliˈayho ko paro no lomaˈ takowanan.”

9. Hano mahapinang ni Maliya itini pinengneng ni Yihofa tada ciepocay ko niyah hani?

⁹ Malo Misawacayay Tamdaw ni Yihofa ci Maliya ikor, maceriday ko salikaka a mihinom pakalalok cingranan, padama cingranan tano pinengneng ni Yihofa a minengneng to niyah. Sanay cingra: “ˈAlomanay salikaka padamaay takowanan, ano eminen a mitilid ko midemakan nangra a demak i, cowa ko mamaemin a mitilid. Tada miakoˈiday kako ci Yihofaan pafeli takowanan to dihkoay a paro no lomaˈ no Krisciyang, o taˈangayay a paro no lomaˈ konini!” Itini i sapadama no salikaka i, mahapinangayto ni Maliya, itini pinengneng ni Yihofa tada ciepocay ko niyah.

10. O Maktala a tamdaw ci Mariya iraay ko maanan a pasangar hani? (Nengnengen ko coka.)

¹⁰ Dotoc nengnengen ita, mamaˈimeray no pitoay mariˈangay coyoh ko Maktala a tamdaw ci Mariya. (Luka 8:2) Samaanan ni Yis padama cingranan hani? Itiya i, mafiyoray no mariˈangay coyoh ci Mariya, mansa masakatalawan ko waywayan ningra, mihaenay cowato ka kahi ko ˈalomanay tamdaw mingata cingranan. Itiya i, kasiniˈadaan cingra, matalaway a cariraw, awaay ko maolahay takowanan sanay miharateng cingra. Ikorto i, padamaan ni Yis cingra milaplap ko mariˈangay coyoh nai tireng ningra, mihaenay malo nisawawaanto ni Yis cingra. Toha sapipadamaaw ni Yis ci Mariyaan a cipinang, itini pinengneng ni Yihofa tada masakalimlaan cingra, o mananho ko midemakan ni Yis padama cingranan hani?

11. Misamaanay ci Yis padama to Maktala a tamdaw ci Mariya mihapinang, itini pinengneng no Kawas masakalimlaan cingra hani?

¹¹ Ya mikerid ci Yis to nisawawaan tayra icowacowa a pala mitosil i, matahidangay ci Mariya a malacafay.b Maceriday maˈaraw ni Mariya ci Yis pakafanaˈ to tao, maedeng adihay ko mananamay. O roma i, ya patikol ci Yis maˈorip toya romiˈad pakaˈarawan ni Yis ko papina nisawawaan masasowal cangranan, masalalomaˈay ci Mariya. Itiya cowa konini aca, miocoranho ni Yis ci Mariya mifanaˈ to romaroma a tarokos, patikolayto maˈorip ci Yis. Oniya kihcod dademakan ni Yis pakafanaˈay ci Mariyaan, itini pinengneng ni Yihofa o masakalimlaan cingra!—Yohani 20:11-18.

12. Hano awaay ko kapo no niyah, sanay ko harateng ni Litiya hani?

¹² O harateng no ˈalomanay salikaka mahecaday ci Mariyaan, awaay ko tamdaw to mamaolah takowanan. Tinakoen, itiniay i Sipanya a salikaka ci Litiya sanay, itiyadho no wina cingra i, cowa ko sapihofocaw ko wina cingranan, maharatengay kaemangho cingra i, cowa ka cerid ciharateng ko wina cingranan, maceriday a mitongangan cingranan. Sanay cingra: “Sapilifokaw kako to kaciharateng ato olah no tao, nanay cadaen no tao kako, kawra awaay ko tatodong ako sanay ko harateng, samanen awaay ko kapo ako sanay a mifanaˈ ko wina takowanan.”

13. Hano mahapinang ni Litiya itini pinengneng ni Yihofa tada ciepocay ko niyah hani?

¹³ Minanam ci Litiya to Fangcalay Cudad ikor mafalicayto ko harateng. Pakayniay cingra i satolon, mikingkiw to Fangcalay Cudad, ato miharateng to sasowalen ato pidemakan no salikaka i cingranan, palidlid sanay cipinang cingra itini pinengneng ni Yihofa tada ciepocay ko niyah. Sanay cingra: “Maceriday pasowal ko faˈinay ako tada pakidemay ko olah ningra takowanan, saliyaliyawayho pasowal takowanan, adihayay ko kangaˈayan no mako. O roma salikaka mahaenay a micada takowanan.” I katihiay iso a salikaka misaaliay to mahaenay a sapadama han? Ngangaˈay kiso pakayni waywayan ato sasowalen paihkal to ciharatengay kiso cangranan han? Ho mafanaˈto cangra itini pinengneng ni Yihofa tada ciepocay cangra.

Tano Pinengneng ni Yihofa a Minengneng to Niyah

14. Samaanay ko pinengneng ni Yihofa to tamdaw, mansanay ko 1 Samuil 16:7? (Nengnengen ko sapatongal lalakaw “Hano Misalimlaan ni Yihofa ko Finawlan no Niyah?”)

¹⁴ Haratengen, cowa ka tano pinengneng no hekal a tamdaw ko pinengneng ni Yihofa tisowanan. (ˈOsien ko 1 Samuil 16:7.) Cowa ka pakayni i pising iso, saaroˈan anca hakowaay ko pitakcian iso a misaˈosi to iraay ko kapo iso hokira. (Isaya 55:8, 9) Mihaenay i, aka tooren iso ko palinian noniya hekal, ao palinian ni Yihofa ko pinengneng to niyah. Sasamaan ko pidemak ita hani? Itini nolitengan madimadiay midoko ci Yihofaan a tamdaw, tinakoen ci Iliya, ci Naomi, ci Hana na cisasaay cangra to epoc no niyah, ˈosien iso ko nalifetan nangra, mamafanaˈto kiso misalimlaay ci Yihofa toniya madimadiay a sikawdan. O roma i, malifetay iso a demak isaˈayaw, ngaˈayay padama tisowanan a mihapinang, tada maolahay misalimlaay ci Yihofa tisowanan, songilaˈen a mitikol miharateng to isaˈayaway a nalifetan no niyah, halo tiliden. Iraayho ko cecay pakayraan. Adihayay mitepangan ita a lalakaw wa ngaˈay padama to tamdaw miremo to awaay ko kapo ko niyah sanay a harateng, mihaenay songilaˈen a milimasmas ko toki miˈosi mikingkiw to hatiniay a lalakaw.c

15. Hano o masakalimlaan ci Taniil sanay ci Yihofa hani? (Taniil 9:23)

¹⁵ Haratengen, madimadiay kiso ci Yihofaan, mansa misakaretengan ni Yihofa kiso a minengneng. O nalifetan ni Taniil tada pakalalokay kitanan. Mangata 100 ko mihecaan ningra i, fahal sanay ‘maroray ko falocoˈ,’ pakidemay a matoled. (Taniil 9:20, 21) Samaanay ci Yihofa pakalalok cingranan hani? Miocoran ni Yihofa ko coyoh ci Kapriil a pasowal cingranan, ‘tada masakalimlaan kiso’ sanay, pasowalho ci Taniilan matengilay ni Yihofa ko satolon ningra. (ˈOsien ko Taniil 9:23.) Hano o masakalimlaan ci Taniil sanay ci Yihofa hani? Samanen maolahay cingra to moecelay a demak, tahatolas ko nika madimadi ci Yihofaan. (Icikil 14:14) O nalifetan ni Taniil miˈoningan ni Yihofa itini i Fangcalay Cudad, ho mikitini kita milifok to sahinom. (Loma 15:4) Aka a mapawan, dohingaen ni Yihofa ko satolon iso. Maˈaraway Ningra maolahay kiso to moecelay a demak, madimadi midoko Cingranan, ho ngaˈay pakasoˈlin kiso to misalimlaan ni Yihofa kiso.—Mika 6:8, ato roma pihongyak; Hipray 6:10.

16. Samaanen iso ko demak ngaˈ pakasoˈlin o sidaˈitay a Wama ci Yihofa hani? (Nengnengen ko coka.)

¹⁶ Pakasoˈlinen, o sidaˈitay a Wama ci Yihofa, tada maolahay Cingra tisowanan. Sapadamaaw ci Yihofa tisowanan, cowa ka pisamacay Cingra minengneng to raraw iso. (ˈOlic 130:3; Matay 7:11; Luka 12:6, 7) ˈAlomanay salikaka ano awaay ko kapo ko niyah sanay ko harateng i, haratengen cowa ka pikidat ci Yihofa to raraw iso, mihaen mamilifok kiso to sahinom. Itiniay i Sipanya a salikaka ci Miciyang pinaay a miheca maapaay sanay ko faˈinay cingranan, mitonganganho cingranan, ikor awaayto kapo sanay ko harateng cingra. Sanay cingra: “Ano awaay ko kapo ako sanay a miharateng i, mamiharateng kako miˈafofoan ni Yihofa kako, mihinom mipohpoh takowanan.” (ˈOlic 28:9) Itini Nanfi fafahiyan salikaka ci Lolan maceriday patalipaˈelal to niyah: “Halafinay padadotocay ci Yihofa padama takowanan miingid Cingranan, mahecaday tano olah a sasoˈot mitengteng takowanan tayra i katihi Ningra, sakadademakanho Ningra kako pakafanaˈ to tao, i pinengneng ni Yihofa tada o ciepocay a tamdaw kako sanay ko harateng, wa ngaˈay midemak to adihayay a demak.”—Hosiya 11:4.

17. O manan a wacay ko paihkalay to mihaydaan ni Yihofa kiso hani? (ˈOlic 5:12, ato roma pihongyak; nengnengen ko coka.)

¹⁷ Pakasoˈlinen, mihaydaan ni Yihofa kiso. (ˈOsien ko ˈOlic 5:12.) Sanay ci Tafiti, o pihayda ni Yihofa mahecad o ‘taˈangayay a sapatada,’ midipot to moecelay a tamdaw. Ano pakasoˈlinay kiso to pihayda pidama ni Yihofa tisowanan i, cowato ka saan ko harateng iso to awaay ko kapo to niyah saan. O manan a wacay ko paihkalay to mihaydaan ni Yihofa kiso hani? Saka cecay, pakaynian ni Yihofa to Kimad Ningra Fangcalay Cudad padadotoc paihkal to mihaydaan kiso. Saka tosa, pakaynian ni Yihofa to malohemay malitengay, ngaˈayay a widang iso ato roma salikaka pasowal tisowanan, masakalimlaan kiso i pinengneng ni Yihofa. Kawra ano pakalalokay ko tao tisowanan i, sasamaan ko demak iso hani?

18. Hano cadaen iso ko sapakahemek no tao hani?

¹⁸ Oya maolahay tisowanan a tamdaw ano naifalocoˈ pakahemek tisowanan i, o sowal aca nangra aka saan a miharateng. Haratengen, pakaynian ni Yihofa i cangranan pasowal tisowanan, mihaydaan no Kawas kiso. Ya masowalay isawni a fafahiyan salikaka ci Miciyang sanay: “Palidlid sanayto kako micada to sapakahemek no tao, minaˈenang ako i falocoˈ a miharateng. Soˈlin cowa ko madoloay, kawra mafanaˈay kako papicadaen ni Yihofa kako to pakahemek nangra.” Roma i, adihayay ko sapadama no malohemay malitengay ci Miciyangan. Nohatini o misakafahayto ci Miciyang, padamaayho to tayal no Pitil.

19. Hano pakasoˈlinay kiso to misakaretengay ci Yihofa tisowanan?

¹⁹ Madaˈmaˈay ci Yis pakatalipaˈelal kitanan, kakarayan Wama ci Yihofa tada misakaretengay kitanan. (Luka 12:24) Mihaenay i, pakasoˈlinen ita, kita kahacecacecay tamdaw itini pinengneng ni Yihofa tada ciepocay, iraay ko kapo. Tawlikay ko pinengneng ni Yihofa kitanan. Mansa saˈicelen a padama to tao a mafanaˈ, itini pinengneng ni Yihofa tada masakalimlaan cangra!