¿Aa nnda̱a̱ nteijndeii Biblia jaa na nnaⁿndyo̱ ñequio cwii tycu?

Ñˈoom na mawˈo̱ Biblia

Nnda̱a̱. Tyˈo̱o̱tsˈom ñjom tsˈoom chaˈtsondye nnˈaⁿ na tyeⁿ meiⁿntyjeeˈ ñˈeⁿñe quia na wiina. Biblia maqueⁿtyeⁿnaˈ ñˈoom waa cwentaana: «Quia na waa yuu maquiinaˈ jom ndoˈ nquiˈcaljoonaˈ jom jnduu, ¡Jehová nñenquiaa na jneiⁿ!» (Salmo 41:3). Ntyˈiaaya ndyee nnom ˈnaⁿ na nnda̱a̱ nlˈaaya xeⁿ na laxmaaⁿya cwii tycu na tatjaaˈnaⁿ nasei:

1. Cataaⁿya nnom Jiowa na cateijneiⁿ jaa cha na nnda̱a̱ nnaⁿndyo̱. Na nñenquiaa Tyˈo̱o̱tsˈom na coˈyanaˈ nˈo̱o̱ⁿya nteijndeiinaˈ jaa na tintseichjoonaˈ nˈo̱o̱ⁿya ndoˈ nñequiaanaˈ na jnda̱a̱ya meiiⁿ na wiiya (Filipenses 4:6, 7).

2. Calˈaaya na neiⁿnco nˈo̱o̱ⁿya. Biblia matsonaˈ: «Jeeⁿ nasei na nncˈoom tsˈaⁿ na neiⁿnco tsˈoom, ndoˈ na nncˈoom tsˈaⁿ na chjooˈ tsˈoom, tˈmaⁿ matseicjenaˈ jom» (Proverbios 17:22). Na nntsˈaa tsˈaⁿ na neiⁿnco tsˈoom nchii cweˈ na xotseichjooˈnaˈ tsˈoom, mati nnteijndeiinaˈ na xocwiweeⁿˈeⁿ.

3. Calantyjaaˈ nˈo̱o̱ⁿya na ncwjeeˈ cwii xuee na yati. Na cwicantyjaaˈ nˈo̱o̱ⁿya cwii ˈnaⁿ, nnteijndeiinaˈ jaa na nncˈo̱o̱ⁿ na neiiⁿya (Romanos 12:12). Biblia maqueⁿtyeⁿnaˈ na nncwjeeˈ cwii xuee na meiⁿncwii tsˈaⁿ xocatso: «Ja wiiˈa» (Isaías 33:24). Tyˈo̱o̱tsˈom ntseicatsuu chaˈtso nnom ntycu na xjeⁿ jeˈcheⁿ tyonasei tileicanda̱a̱ nlˈana nasei. Mati cheⁿndyo cheⁿ ntsˈaaⁿ na nncwindyuanndaˈndye nnˈaⁿ, ee Biblia matsonaˈ: «Quiajoˈ tsaⁿˈñeeⁿ nlcoˈyanndaˈnaˈ jom, nntsˈaanndaˈnaˈ jom chaˈxjeⁿ quia na ñetˈom na ndyuañê» (Job 33:25).

Nota: Nnˈaⁿ na cwiteiˈyuuˈndye cantyja ˈnaaⁿˈ Jiowa tˈmo̱o̱ⁿˈ nˈo̱o̱ⁿyâ na nteijneiⁿ jâ, sa̱a̱ mati cwitsaayâ wˈaa nasei quia na wiiyâ (Marcos 2:17). Meiⁿ na luaaˈ, xocalˈajndeiiˈâ na cwii tsˈaⁿ cˈoom nasei, ee cwii ndoˈ cwii tsˈaⁿ macaⁿnaˈ na ntsˈaañe cwenta.