¿Chiuu waa nnda̱a̱ nntseindyooˈndyuˈ ñequio Tyˈo̱o̱tsˈom?

1. ¿Aa mandii Tyˈo̱o̱tsˈom chaˈtso tyˈoo ˈnaaⁿ nnˈaⁿ?

Tyˈo̱o̱tsˈom mañenquia na chaˈtso nnˈaⁿ nnda̱a̱ nlaˈcandyooˈndyena ñequioñê quiana nlaˈneiⁿna nnoom (Salmo 65:2). Sa̱a̱, nchii ñecatsonaˈ na mañeeⁿ oo cjaweeˈ tsˈoom chaˈtso tyˈoo na cwilˈa nnˈaⁿ. Biblia matsonaˈ, xeeⁿ na cwii tsaⁿsˈa machˈee na ticajndañe scuuˈ «nntseicuˈnaˈ» na nndii Tyˈo̱o̱tsˈom quiana ntseineiiⁿ nnoom (1 Pedro 3:7). Tyˈo̱o̱tsˈom ticañeeⁿ tyˈoo ˈnaaⁿ nnˈaⁿ israelitas quiana jndye ndiiˈ ñelˈana natia. Sa̱a̱ mañeeⁿ tyˈoo ˈnaaⁿ nnˈaⁿ na ñelˈa jnaⁿ ndoˈ cwilcweˈ nˈomna. Catseiˈnaⁿˈ Isaías 1:15 ndoˈ 55:7.

Cantyˈiaˈ video ¿Aa mandii Tyˈo̱o̱tsˈom chaˈtso tyˈoo ˈnaaⁿ nnˈaⁿ?

2. ¿Chiuu waa macaⁿnaˈ nlˈaa tyˈoo ˈnaaⁿya?

Quiana cwilana̱a̱ⁿ nnom Tyˈo̱o̱tsˈom, cwilaˈtˈmaaⁿˈndyo̱ jom, joˈ na tomti nnom Jiowa nlana̱a̱ⁿ (Mateo 4:10; 6:9). Ee na nnˈaⁿ jnaⁿ jaa, joˈ na macaⁿnaˈ na nlˈaa tyˈoo ñequio xueeˈ Jesús, ee jom tueeⁿˈeⁿ cwentaa jnaaⁿya (Juan 14:6). Jiowa tilˈue tsˈoom na nlaˈnaaⁿ oo na cweˈ na ntyjii nqua̱a̱ⁿya ñˈoom na nlˈuuya nnoom, xeeⁿ nchii ˈnaⁿ na ñjom naquiiˈ nˈo̱o̱ⁿya. Catseiˈnaⁿˈ Mateo 6:7 ndoˈ Filipenses 4:6, 7.

Tyˈo̱o̱tsˈom na sˈaa jaa mati mañeeⁿ quiana ñemaaⁿˈ cwilana̱a̱ⁿya nnoom (1 Samuel 1:12, 13). Mati lˈue tsˈoom na nlana̱a̱ⁿya nnoom chaˈtso xjeⁿ, chaˈna quiana nnquintyjaaya ndoˈ xjeⁿ na jnda̱ nntaaya, xjeⁿ na nlcwaaˈa ndoˈ quiana cwiwino̱o̱ⁿya nawiˈ. Catseiˈnaⁿˈ Salmo 55:22 ndoˈ Mateo 15:36.

3. ¿Chiuu tsˈiaaⁿˈ na nntsaa jomta ˈnaaⁿ nnˈaⁿ ˈnaaⁿˈ Cristo?

Mˈaaⁿya naquiiˈntaaⁿ nnˈaⁿ na tiñeˈcalaˈyuˈ ndoˈ ticueeˈ nˈom ñˈoom na maqueⁿtyeⁿ Tyˈo̱o̱tsˈom na nlcoˈyaaⁿ Tyuaawaa. Juunaˈ nntsˈaanaˈ na nˈndya̱a̱ya na cwilˈaa jndyaaˈ na cwilaˈcandyooˈndyo̱ ñequio Tyˈo̱o̱tsˈom (2 Timoteo 3:1, 4; 2 Pedro 3:3, 13). Ncˈe joˈ, macaⁿnaˈ na nntjomndyo̱ ñequio ntˈomcheⁿ nnˈaⁿ ˈnaaⁿˈ Cristo cha na nñenquiana na tˈmaⁿ nˈo̱o̱ⁿya. Mati macaⁿnaˈ na nñenquiaya na tˈmaⁿ nˈomna. Catseiˈnaⁿˈ Hebreos 10:24, 25.

Quiana cwitjomndyo̱ ñequio nnˈaⁿ na wiˈ nˈom Tyˈo̱o̱tsˈom nntseicandyooˈtinaˈ jaa ñequio jom. Naquiiˈ jomta ˈnaaⁿ nnˈaⁿ na cwitjeiˈyuuˈndye cantyja ˈnaaⁿˈ Jiowa nnda̱a̱ ntaˈjnaaⁿya nnˈaⁿ na tyeⁿ cwilaˈyuˈ, na nnda̱a̱ nteiˈjndeiina jaa na majoˈti nlˈaa. Catseiˈnaⁿˈ Romanos 1:11, 12.

4. ¿Chiuu waa nnda̱a̱ nntseindyooˈndyuˈ ñequio Tyˈo̱o̱tsˈom?

Nnda̱a̱ nntseindyooˈndyuˈ ñequio Tyˈo̱o̱tsˈom xeeⁿ na ncˈoomˈ tsˈomˈ ˈnaⁿ na jnda̱ seiˈnaⁿˈ cantyja ˈnaaⁿˈaⁿ naquiiˈ Biblia. Cˈoomˈ tsˈomˈ ˈnaⁿ na jnda̱ sˈaaⁿ, ñˈoomya ˈnaaⁿˈaⁿ ndoˈ ñˈoom na tqueⁿtyeeⁿ na nntsˈaaⁿ. Na ncˈoomˈ tsˈomˈ ndoˈ na nntsaˈ tyˈoo, ntseiˈno̱ⁿˈ cwanti tˈmaⁿ na wiˈ tsˈom Tyˈo̱o̱tsˈom ndoˈ na jndo̱ˈ tsˈoom. Catseiˈnaⁿˈ Josué 1:8 ndoˈ Salmo 1:1-3.

ˈU nnda̱a̱ nntseindyooˈndyuˈ ñequio Tyˈo̱o̱tsˈom, xeeⁿ na tyeⁿ matseiyuˈ ndoˈ matseintyjaaˈ tsˈomˈ jom. Ñˈoom na tyeⁿ matseiyuˈ tsˈaⁿ matseijomnaˈ chaˈxjeⁿ ˈnaⁿ na wandoˈ: macaⁿnaˈ na ñequiiˈcheⁿ na nlcwaˈ, maluaaˈ ˈu ticwii xuee ncˈoomˈ tsˈomˈ cwaaⁿ xˈee ñˈoom na matseiyuˈ. Catseiˈnaⁿˈ Mateo 4:4 ndoˈ Hebreos 11:1, 6.

5. ¿Chiuu waa mateijndeiinaˈ jaa xeeⁿ na nndyooˈ mˈaaⁿ ñequio Tyˈo̱o̱tsˈom?

Jiowa ñjom tsˈoom nnˈaⁿ na wiˈ nˈom jom. Nnda̱a̱ ncwañoomˈm joona ñequio meiⁿquia ˈnaⁿ na nntseiˈndaaˈ na tyeⁿ cwilaˈyuˈna ndoˈ na cwilaˈntyjaaˈ nˈomna na nntaˈndoˈna na macanda̱ (Salmo 91:1, 2, 7-10). Mati matseicañeeⁿ na mayaaⁿ tia ˈnaaⁿ nnˈaⁿ nnda̱a̱ nlcoˈwiˈnaˈ seiina ndoˈ nnchˈueenaˈ na neiⁿnco nˈomna. Ndoˈ maˈmo̱o̱ⁿnaˈ chiuu waa na yati ntando̱o̱ˈa. Catseiˈnaⁿˈ Salmo 73:27, 28 ndoˈ Santiago 4:4, 8.