¿Chiuu waa ñetaʼndoʼ nnʼaⁿ naquiiʼ ntjom Edén?

Jeeⁿ jndye ʼnaⁿ na ya tquiaa Tyʼo̱o̱tsʼom nnom Adán ndoʼ Eva (Génesis 1:28)

Jiowa sʼaaⁿ Eva, yuscu najndyee, jnda̱ chii tquiaaⁿ juu nnom Adán na tuiiñe tsaⁿʼñeeⁿ scoomʼm (Génesis 2:21, 22).

Tyʼo̱o̱tsʼom sʼaaⁿ Adán ndoʼ Eva na canda̱a̱ʼya na yaana. Ñʼomtiuu ndoʼ seiʼtsʼo ʼnaaⁿna canda̱a̱ʼyanaʼ.

Ñetaʼndoʼna naquiiʼ ntjom Edén: cwii joo jeeⁿ neiⁿncooʼ yuu ñetua cwii jndaa, nʼoom ntʼmaⁿ ndoʼ quiooʼ. Tuiinaʼ cwii ntjom jeeⁿ neiⁿncooʼ.

Jiowa tyotseineiⁿ ñequio joona ndoʼ tyoʼmo̱o̱ⁿ nda̱a̱na jndye ʼnaⁿ. Xeⁿna ñetandoʼna na macanda̱ naquiiʼ ntjomʼñeeⁿ, macaⁿnaʼ na nndyeyana ndoʼ nlaʼcanda̱na ʼnaⁿ na matso Tyʼo̱o̱tsʼom.

Tyʼo̱o̱tsʼom tqueⁿ nda̱a̱na na nchii nlquiina ta̱a̱ʼ cwii tsʼoomʼñeeⁿ (Génesis 2:16, 17)

Tyʼo̱o̱tsʼom tsoom nnom Adán ñequio Eva na nchii nlquiina ta̱a̱ʼ cwii tsʼoom na meintyjeeʼ naquiiʼ ntjomʼñeeⁿ. Xeⁿ na nlquiina ta̱a̱ʼ tsʼoomʼñeeⁿ, nncwjena.

Cwii ángel seiquieʼ tsʼom nnom Tyʼo̱o̱tsʼom. Ángel wiʼñeeⁿ cwiluiiñe Satanás.

Satanás tilʼue tsʼoom na joona nlaʼcanda̱na ʼnaⁿ na matso Jiowa. Teilʼueeʼñê cwii catsuu, na tso nnom Eva na tixocueʼeⁿ xeⁿna nlqueeⁿ ta̱a̱ʼ tsʼoom na ticwanaan na nlqueen. Tsoom na nntsʼaanaʼ juu chaʼna nquii Tyʼo̱o̱tsʼom. ¡Cwanti tʼmaⁿ cantu! (Génesis 3:1-5.)