Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais
AKỌP MÈ ONYAN GE 4-10
INU UNYE OTU EWE OKUP ME USEM AWAJI | JỌN EYI ADASI 1-5
“Ikama Linyọn̄ Keyi! Ikamama Si Otutuuk Inu Geelek Òkup Me Linyọn̄”
(Jọn Eyi Adasi 2:15, 16) Ikama linyọn̄ keyi! Ikamama si otutuuk inu geelek òkup me linyọn̄. Ene geelek òkima linyọn̄ keyi ìkpokọt ima Awaji Ute. 16 Mije, inu geelek òkup me linyọn̄, bene me ijo ulọk eyi akpalek, mè ulọk inu chieen̄ ene okimun̄, re lek isasa inu eyi ugwem keyi ikigugo lek, otutuuk inu chi geelek ìnan̄a me linyọn̄ keyi, ìkanan̄a me ubọk Awaji.
w05 1/1 10 ¶13
Gọọk Akpat Ukot Jisọs Ojeen̄be
13 Usini ene mekọt ikikeek ibe ke ikare otutuuk inu okup me linyọn̄ yi olọ. Ikerere ibe ke ire ikeya, linyọn̄ yi mè ulọk kan̄ mokọt irọ me eji ekagwuun̄ chieen̄ me lek ntọbọ ebum kiji isa inyi Jioba. Me lek inu echi linyọn̄ yi okisan̄a isibi, kpunu geege okitaba eji iriaak me lek Awaji. Eya orọ, ire eji ima inu okup me linyọn̄ yi, ikerere ibe ke inu cha me lek kiban̄ kpechubọk ilọ, eji ekigọọk oniin̄ eyi mosakbe eji unan me lek. (Timọti Eyi Adasi 6:9, 10) Isọkọ me lek, owuwa inu me linyọn̄ yi kpechubọk inwọn, mekọt ifiat eji si. Ire eji ekikpọ film mè iyaka ire drama ekijeen̄ me okop ikpọ mkpọ, echi ogọbọ afa, ililibi igọọk inu nkaan̄, mè iyaka ire barabat, eji mekọt ibene ikima inu cha,—mokana ntọ-mkpọ inyi eji si. Ire eji ikigọọk ebi isun̄ irọrọ me ubọk iluk ugwem kiban̄ inwọn̄ mè iyaka ire ililibi igọọk owuwa mbubek kubọk adasi inu me ugwem kiban̄ igbaan̄ ije, inu cha mekọt ikana inu echi okukup ufiak ichit me ugwem kiji si.—Matiyu 6:24; Ebi Kọrint Eyi Adasi 15:33.
(Jọn Eyi Adasi 2:17) Linyọn̄ keyi, mè otutuuk ijo ulọk kan̄ geelek, ìboraraka isan̄a kpai. Ire, ene geelek òkirọ inu Awaji okiweek môluk ugwem ire mgbọ ikakaan̄ge itata.
w13 8/15 27 ¶18
Keek-nu Mbet Ene Owu Morebe
18 Ofifi mkpọ obotap ubọk inyi eji ejit “inu geelek òkup me linyọn̄” yi ire isusun̄ usem Jọn otumube inan̄a me unye ekwukwu mbuban me ejit kiji, ibe: “Linyọn̄ keyi, mè otutuuk ijo ulọk kan̄ geelek, ìboraraka isan̄a kpai. Ire, ene geelek òkirọ inu Awaji okiweek môluk ugwem ire mgbọ ikakaan̄ge itata.” (Jọn Eyi Adasi 2:17) Ikup kubọk inyọn̄ kè Setan ibobabia ire mgbọ geelek. Ire, usen ge, monu me uyaka. Me lek inu echi inyọn̄ kè Setan okisan̄a isibi, kpunu geege obobia ire mgbọ geelek. Ire eji ekikeek atikọ yi, motap ubọk inyi eji ekọt ekejit ntọ-mkpọ kè Yọk.
Week Inu Unye Otu Ewe Okup Me Usem Awaji
(Jọn Eyi Adasi 2:7, 8) Ebi une n̄a ebi mmun̄be me chieen̄, ikan keyi nkige ijet enyi ìkare ayaya ikan. Îre oka ikan ya eyi enyibe enyi bene me okpa otu mgbọ enyi enọbe ata etip. Oka ikan yi ìre etip ya eyi enyi ewuukbe lek inọ. 8 Ire, ubọk geelek si, ikan yi ìre aya ikan. Ugwem Karais olukbe, mè ubọk enyi si ekiluk ugwem kinyi, îjeen̄ ibe ke ayaya ikan yi òkisi ikwaan̄ me atikọ. Mije, ubọk irọ-inu eyi emen udun òkiraka, atata utoon̄ ya si îra iwuuk lek ibene ikitoon̄.
w13 9/15 10 ¶14
Nteme Jioba Ire Echi Mekọtbe Itoon̄ Ejit Me Lek
14 Agan̄ Esabe Girik Ige me Baibul iben owuwa nteme ofolek ikekijeen̄ ge ge ima. Jisọs ibe ke ikan òso iba òmimin ichit ire eyi obe “ma ogwu melek kwun̄ kubọk omabe akpalek kwun̄.” (Mat. 22:39) Ikeya si, Jemis ngwan kè Jisọs igwen imumechieen̄ ‘ikan ogwu ubọọn̄.’ (Jemis 2:8) Ogwu ikwaan̄ Jọn ige ibe: “Ebi une n̄a ebi mmun̄be me chieen̄, ikan keyi nkige ijet enyi ìkare ayaya ikan. Îre oka ikan ya eyi enyibe enyi bene me okpa otu mgbọ enyi enọbe ata etip.” (Jọn Eyi Adasi 2:7, 8) Keke ke Jọn ogwen “oka ikan”? Ikitumu ikọ ofolek ikan imumun̄ ene me chieen̄. Ire “oka” mije ibe ke Jisọs inyi ikan ya me owuwa acha oraraka, “bene me okpa otu mgbọ.” Ire, ikan ya si ire “ayaya” mije ibe ke igọbọ isasa lek igwa ngwugwa inan̄a me ima, eyi ebi udun̄ kè Jisọs meweekbe igọọk me lek ayaya inu ema mejebe itibi. Kubọk ebi udun̄ Karais, ire eji kpema ntaba-me-utọn̄ echi okitap ubọk inyi eji ekọt eketim egak ekwukwu linyọn̄ yi orere, ikekikeek nnwọn eyi kiji gaalek, eyi mokọtbe irọ me ima eji ekaan̄be me lek ebi melek kiji ikiwọ ni?
(Jọn Eyi Adasi 5:16, 17) Ire ikaan̄ gwun̄ Nte òmumun̄ ogwu ngwan̄ okirọ ijo inu eyi kposabe mkpa inu, ene ya iriaak uriaak me ibot ogwu ngwan̄ ya, ke Awaji mônyi ogwu ngwan̄ ya ugwem. Ǹkitumu ikọ keyi ibak otutuuk ebi ìrọrọ ijo inu eyi kposabe mkpa inu. Îkaan̄ ijo inu eyi òkisa mkpa inu. Ìkare ojelek ijo inu keya ke mbe enyi eriaak uriaak me lek. 17 Irọrọ geelek eyi ikatatge ìre ijo inu. Ire, îkaan̄ ijo inu eyi ìkakisa mkpa ìnu.
it-1 862 ¶5
Ntele-nnyi
Ibebeek uriaak ibe Awaji itele inyi ebi ofifi ife, ikerere otutuuk ebi ntitiin̄ ikalọ. Mosis irọ inu yaage mgbọ iriaakbe uriaak me ibot otutuuk ebi ido Ijeren, itumu ijo kiban̄ isibi mè ibeek ibe Awaji itele inyi ema, Jioba igban̄ utọn̄ me lek uriaak ya. (Ifuk 14:19, 20) Mgbọ ekirọ orirọ isasa ikana uwu mbuban itap me ubọk Awaji, Solomọn si ibeek Jioba ibe itele inyi ebi kan̄ ire ema erọ ijo inu mè igwu ikom. (1 Ubọọn̄ 8:30, 33-40, 46-52) Ejira itumu ijo ebi Ju inan̄a me usun̄ akọn̄ ika ikpọk mbum me isi otutuuk ene. Uriaak iriaakbe inan̄a me ejit kan̄ mè nteme inyibe ema ibieen̄ ema ibe erọ inu oborọ me Jioba itele inyi ema. (Ejira 9:13–10:4, 10-19, 44) Jemis itap efuuk me owot ogwu lek ikanyege me emen ekwukwu ibe igwen ebi ugane ntitiin̄ inyi eriaak uriaak me ibot kan̄, “ire ikaan̄ ijo inu geelek ene ya orọbe, Okaan̄-ene môtele si inyi ene ya.” (Jemis 5:14-16) Ire, “îkaan̄ ijo inu eyi òkisa mkpa inu,” ire ijo ekirọ ikeme ekwukwu mbuban, orere igegen ibak ikirọ ijo inu eyi ikakaan̄ge ntele-nnyi. Ogwu eyi Karais ikariaak uriaak me ibot ebi ikirọ mbet lek ijo inu okup ikeya.—1 Jọn 5:16; Mat 12:31; Iburu 10:26, 27; kpọ si SIN, I; SPIRIT.
Ifufuk Baibul
(Jọn Eyi Adasi 1 1:1–2:6) Eji ekige inu ofolek Ikọ eyi Ugwem. Ikọ eyi Ugwem yi ìkukup bene me ibebene, sabum enirom linyọn̄. Eji mîsa utọn̄ kiji inọ Ikọ ya, mè isa chieen̄ kiji ikpọ, mè imun̄. Eji mîsa si ubọk kiji ichak me lek Ikọ eyi Ugwem ya. 2 Ugwem yi îkana ebilene, eji esasa chieen̄ kiji imun̄, mè ikeke ata-ikọ inyi, mè isa me ikeya ikitumu ikọ ofolek kan̄ inyi enyi. Ugwem yi ìre ugwem ikakaan̄ge itata. Ọmọ melek Awaji Ute ekup sabum ọmọ onikana isibi me isi kiji. 3 Me atikọ, îre inu eji esabe utọn̄ kiji inọ, mè isa chieen̄ kiji imun̄ ke eji ekikpa si inyi enyi, inyi enyi egọọk eji egbaan̄ inu erọ. Eji melek Awaji Ute mè ogwu Gwun̄ Jisọs Karais ekigbaan̄ inu irọ. 4 Eji ekige ikpa yi ijet enyi, inyi enyi egọọk eji egbaan̄ inu erọ, mè eji esa me ikeya ekaan̄ òjot òjot unwọọn̄. 5 Mgbọ keyi, etip eji enọbe me otu kè Jisọs, mè isa inilook enyi ìre ikeyi: Awaji ìre utoon̄, kpunu udun geege me emen kan̄. 6 Eya orọ, ire eji ibe ke eji ekigọọk Awaji igbaan̄ inu irọ, mè iyaka ikiluk ugwem me emen udun, eji ekikan̄ ataak. Ubọk irọ inu kiji ìkare eyi atikọ. 7 Ire, ire eji ikije me emen utoon̄, kubọk Awaji me lek kan̄ okupbe me emen utoon̄, ìsibi ibe ke eji mêkigbaan̄ irọ inu melek ebi melek kiji. Mgbọ ya si, eje kè Jisọs Karais, Gwun̄ Awaji, môkigwọk otutuuk ijo kiji isan̄a, mè ikirọ inyi eji etana me isi Awaji. 8 Ire eji ibe ke kpunu ijo inu me emen ugwem kiji, eji ekifiaan̄ lek kiji. Atikọ ìkakup me emen kiji. 9 Ire, ire eji itumu ijo kiji isibi, Awaji môtele ijo kiji inyi eji, mè igwọk otutuuk ijo irọrọ geelek isan̄a eji me lek, inyi eji etana me isi kan̄, mije, Awaji ìkakitele irọrọ ikọ kan̄ geelek iso. Ọmọ si ìre ogwu òkirọ inu òtatat mgbọ geelek. 10 Ire eji ibe ke eji kperọ ijo inu, eji ekigwen Awaji ogwu ataak. Ikọ kan̄ si ìkakup me emen ugwem kiji. 2 Nsabọn n̄a, ǹkige ikpa yi ijet enyi, inyi enyi ekarọ ijo inu. Ire, ire ikaan̄ ogwu irọ ijo inu, eji mîkaan̄ ogwu òkitumu ikọ ibot kiji me isi Awaji Ute. Ene ya ìre Jisọs Karais, Ogwu Ata Irọrọ. 2 Ọmọ ore ogwu esabe igwa ngwugwa iben unaan̄-ejit Awaji isan̄a, mè isiki Awaji ejit, inyi itele ijo kiji inyi eji. Ìkare mije ijo inu eyi kiji gaalek, îre si mije ijo inu otutuuk ebilene me linyọn̄ erọbe. Ebi ìriọọn̄ Awaji mêkirọ inu Awaji okiweek 3 Ire eji ikirọ otutuuk inu Awaji obe eji erọ, eji mêsa me ikeya iriọọn̄ ibe ke eji mîriọọn̄ Awaji me atikọ. 4 Ire ene ikibe ke ọmọ îriọọn̄ Awaji, ire, ìkakirọ otutuuk inu Awaji obe erọ, ene ya ìre ogwu ataak. Kpunu atikọ geege me emen kan̄. 5 Ire, ene geelek òkirọ ikọ Awaji, imumechieen̄ Awaji îsi ikwaan̄ òjot òjot me emen ugwem ene ya me atikọ. Ubọk eji ekisa iriọọn̄ ibe ke eji melek Awaji ekigbaan̄ inu irọ ìre ikeyi: 6 Ene geelek òbe ke ọmọ melek Awaji ekigbaan̄ inu irọ, ene ya ìkaan̄ iluluk ugwem kubọk Jisọs Karais olukbe.
AKỌP MÈ ONYAN GE 11-17
INU UNYE OTU EWE OKUP ME USEM AWAJI | JỌN EYI ÒSO IBA 1–JUDU
“Eji Mesa Otutuuk Efuuk Kiji Ikup Inye me Ichechieek”
(Judu 3) Bọn Nte n̄a ebi mmun̄be me chieen̄, me sọntiik mgbọ òraraka, îyok emi me ejit enenen igege ikpa ijet enyi ofolek unyan̄a eyi Awaji onyan̄abe eji otutuuk ene. Ire, me mgbọ keyi, nyaka imun̄ ibe ke îkup me uyọt ibe emi ǹge ikpa keyi ǹsa ǹtap enyi efuuk me emen. Ìsa otutuuk unye kinyi ìkwukwulu, mè imun̄ ibe ke enyi mîkeke inye me emen ata etip eyi enyi echieekbe me lek, eyi Awaji okanabe itap me ubọk bọn kan̄. Ata etip yi ìkakinwene.
w04 9/15 11-12 ¶8-9
“Ikeke Inye me emen Okaan̄-ene”
8 Eji miriọọn̄ ifiọk kè Setan mije ibe ke Baibul ikpa echi ichubọk ikisa irọ mkpọ. (Ebi Kọrint Eyi Òso Iba 2:11) Yọk ifiat mkpọ nkaan̄ kè Jobu, ikpan̄ ebi imabe, isa ukeme ototun̄ ukan̄ kan̄, unan eyi akpalek mè ijo ikọ ebi unene kan̄ etumube isa itọ Jobu ikpọ. Jobu ifieek ejit enenen mè ikeek ibe ke Awaji ijit ọmọ. (Jobu 10:1, 2) Usini mgbọ ikare Setan okichubọk isan̄a ufialek ebi eyi Karais ekichichini isibe me chereyi, ire, Yọk si ikisa inu cha isi ikwaan̄.
9 Inu echi mokọtbe isak eji unan me emen ekwukwu iwa me ota mgbọ yi. Eji eluk me inyọn̄ eyi ogbogbo ene ekilibi igọọk inu nkaan̄, kpan̄asi inu echi emen ekwukwu. Me tv, radio mè newspaper, ekijeen̄ ibe ke ijo eru barabat ikinyi ene ubelejit kpan̄asi ufialek. Owuwa me lek ebilene si mikana ebi “ìkima utop linyọn̄ igak Awaji.” (Timọti Eyi Òso Iba 3:1-5) Ubọk ikeek inu keyi mokọt isak eji unan me emen ekwukwu ire eji kpetap nteme keyi me ikwaan̄: “Ìsa otutuuk unye kinyi ìkwukwulu, mè imun̄ ibe ke enyi mîkeke inye me emen ata etip eyi enyi echieekbe me lek.”—Judu 3.
Week Inu Unye Otu Ewe Okup Me Usem Awaji
(Judu 4) Ǹkitumu ikọ yi, mije, îkaan̄ usini ebi ekariọọn̄ge Awaji ebi ìnwenween̄ lek iraka inin̄ etete kinyi me enyi ekariọọn̄ge. Ife chi mînwene atikọ eyi atata nnwọn eyi Awaji itap ubọk òneme ema, mè ikisa ejit nsan Awaji ito me isi ikiluk ugwem barabat kiban̄ ifo isi. Ema mîjit Jisọs Karais ogwu ọmọ gaalek orebe ogwu Ubọọn̄ kiji mè Okaan̄ kiji. Mîge me Ikpa Mbuban karake ukot ukot ibe ke Awaji ìkpolọlọ isusulu ebi ìkup ikeya osusut òmimin enenen.
(Judu 12) Me ere geelek enyi egbaan̄be ititiin̄ ikirie inorie, mè ikibele ejit, ife chi ekikup me etete kinyi kubọk oka ekwut òbabat [ewuuk olelet me emen mun̄], mè ikitap enyi esip me isi. Ema ekpọkpọ ikup ikirie mè ikinwọ, kpekikeek ebi ofifi ife, kperiọọn̄ esip. Ema ekup kubọk ofifit oduku inyọn̄ eyi efet owutbe ikpọk, ìkayaka ìkọt ìrep ibot. Ema ekup kubọk uti eyi ìkakito mfut, ìrere me mgbọ kan̄. Ema ekup si kubọk uti eyi egbaan̄be ọmọ melek ugwun̄-ijọn̄ kan̄ ijibi, ikwukwu isan̄a isi ge.
it-2 279
Inorie Ima
Baibul ikakpa ubọk ekirie inorie yi mè mgbọ inen ekirie. (Judu 12) Ikare Okaan̄ kiji Jisọs Karais mè iyaka ire ebi otuchieen̄ kan̄ enyi ida ibe ekerie inorie yi, ikakup me ufiak, ikpobobia si ire mgbọ geelek. Usini ene ebe ke ebi eyi Karais ikakaan̄ ikpoko ekirọ orirọ yi mè igwen ebi ugbọọn̄ ibe enenwọọn̄ lek. Kubọk ebi ngwan̄, otutuuk kiban̄, ebi kpante, nwakpa, ubọọn̄ mè ebi ugbọọn̄ ekigbaan̄ irie inorie yi.
it-2 816
Ewuuk
Ofifi usem Girik, spi·lasʹ, ire ‘ewuuk olelet me emen mun̄’. Judu isa usem ya isa itọt me lek usini ene, ebi isasa ijo nkeek inin̄ ntitiin̄ ebi eyi Karais. Kubọk ewuuk olelet emen mun̄ obokọt isak unan me lek uji mun̄, ikeya ke ife chi esa ire ebi ibetap unan me lek ebi ofifi ife me ntitiin̄. Ofolek ife chi, Judu itumu ibe: ‘Me ere geelek enyi egbaan̄be ititiin̄ ikirie inorie, mè ikibele ejit, ife chi ekikup me etete kinyi kubọk ewuuk olelet me emen mun̄.’ —Judu 12.
(Judu 14, 15) Enọk ogwu òso owot iman jaaba bene me lek kè Adam ogwu ute, îben nriran ofolek ife chi, mè itumu ibe, “Kpọ, Okumugwem mônu melek obop obop ebi osat kan̄ ekariọọn̄ge otu ifuk, 15 inisibi oyerebet me ibot otutuuk ebilene, mè itip otutuuk ebi kperiọọn̄ Awaji oyerebet, mije otutuuk ijo ugwem ema elukbe, mè ijo otu ikọ geelek echi ema ekisa itumu Awaji ilọ.”
wp17.1 12 ¶1
“Irọrọ Kan̄ Îbele Awaji Ejit”
Kpasi nriran ke Enọk oben? Itumu ibe: “Kpọ, Okumugwem mônu melek obop obop ebi osat kan̄ ekariọọn̄ge otu ifuk, inisibi oyerebet me ibot otutuuk ebilene, mè itip otutuuk ebi kperiọọn̄ Awaji oyerebet, mije otutuuk ijo ugwem ema elukbe, mè ijo otu ikọ geelek echi ema ekisa itumu Awaji ilọ.” (Judu 14, 15) Taba iman̄ ibe ke usem Enọk osabe irọ mkpọ ikup kubọk Awaji ira irọ nriran ibenbe ya iso. Ikeya si ke esa iben owuwa nriran me mgbọ Enọk okwube iraka. Enọk iriọọn̄ ibe ke nriran ibenbe ya iborọrọ iso, omọrọ itumube usem cha kubọk inu orara irọ iso!—Asaya 46:10.
wp17.1 12 ¶3
“Irọrọ Kan̄ Îbele Awaji Ejit”
Ichechieek kè Enọk mobieen̄ eji ibe ekedo lek kiji mè ire eji ekimun̄ inyọn̄ keyi ike Awaji okebimun̄. Etip oyerebet Enọk osabe me unye-ejit ilook ikaan̄ mgbaan̄ me lek kiji; iborọrọ iso me chereyi ike irọbe iso me mgbọ ya. Igọọk me lek nriran Enọk obenbe, Jioba isa Mun̄ ile ifiat ebi ikpak me usen kè Nuwa. Mfiat omimin igak keya monu si. (Matiyu 24:38, 39; Pita Eyi Òso Iba 2:4-6) Awaji melek ebi osat kan̄ mibem lek ititip ebi ikpak oyerebet. Ikup ufiak ibe eji ge ge esun̄ ntaba-me-utọn̄ kè Enọk me ejit mè esi elook ebi ofifi ife si. Mokọt ire ibe ke ebi ototun̄ ukan̄ kiji mè ebi unene kiji kpebegban̄ utọn̄ me lek etip kiji. Usini mgbọ, mokọt ikup kubọk eji gaalek ekup. Ire, Jioba ikajuuk Enọk itele; me chereyi si, ikpojuuk ebi usun̄ kan̄ igbegbe utoon̄-ejit itele!
Ifufuk Baibul
(Jọn Eyi Òso Iba 1-13) Emi ogwu ugane ntitiin̄ Awaji nkige ikpa etip keyi ijet owu, atata ogwu enenwaan̄ Awaji ogobobe inyi lek kan̄, melek nsabọn kwun̄. Me atikọ, mmun̄ enyi me chieen̄ enenen. Ìkare emi gaalek mmun̄ enyi me chieen̄. Otutuuk ebi ìrọriọọn̄ atikọ eyi Awaji mîmun̄ si enyi me chieen̄. 2 Eji emun̄ enyi me chieen̄, mije, eji mîriọọn̄ atikọ. Atikọ ya si môkup me emen kiji mege ire mgbọ ikakaan̄ge itata. 3 Atata nnwọn, mè nsan, mè esuuk eyi Awaji Ute mè Jisọs Karais ogwu Gwun̄ môkup inyi eji me emen atikọ mè imumechieen̄. 4 Îre inu ikpele unwọọn̄ inyi emi imumun̄ usini nsabọn kwun̄ ekiluk ugwem me emen atikọ, kubọk Awaji Ute onyibe ida ibe eji ekerọ. 5 Eya orọ, atata ogwu enenwaan̄, ǹkibeek owu ibe mè eji ekemun̄ lek kiji me chieen̄. Eyi ìkare aya ikan. Îre oka ikan eyi enyibe eji bene me ibebene, mgbọ eji ebọkọbe ikọ Awaji itap ayaya. 6 Iluluk ugwem igọọk me lek Ikan Awaji, eya ore imumechieen̄. Kubọk enyi ewuukbe lek inọ bene me ibebene, Ikan Awaji onyibe eji ìre, mè eji ekemun̄ ebi melek kiji me chieen̄ mgbọ geelek. 7 Owuwa ebi ofiaan̄ mîra inin̄ ijot linyọn̄. Ife chi kpechieek ibe ke Jisọs Karais înu me linyọn̄ keyi me akpalek ebilene. Ene geelek òkirọ ojelek inu òkup ikeyi ìre ogwu ofiaan̄, mè ire si ogwu ochicha kè Karais. 8 Eya orọ, ìgbala chieen̄, inyi inu ya eyi enyi ekwukwulube me lek ikachep enyi me ikike. Ire, ìtet lek ìnye, inyi enyi ebọkọ òjot òjot mkpukpe me lek ikwaan̄ enyi erọbe. 9 Ogwu geelek òrọrọ inu isaba iraka itele ijejeen̄ eyi Karais ojeen̄be eji, ene ya ìkakaan̄ Awaji me emen ugwem kan̄. Ire, ogwu geelek òkekeke inye me emen ijejeen̄ kè Karais ya, ene ya îkaan̄ Awaji Ute, mè ikaan̄ si ogwu Gwun̄ me emen ugwem kan̄. 10 Eya orọ, ire ogwu inu ibonijeen̄ enyi inu, mè ìkajeen̄ ijejeen̄ keyi, ikabọkọ ene ya ìtap me uwu kinyi. Ikatọtọp si ọmọ amọn geege. 11 Mije, ogwu geelek òtọtọp ene ya amọn, ogwa îgọọk ene ya igbaan̄ ikirọ ijo inu eyi ene ya okirọ. 12 Me atikọ, nkaan̄ owuwa ikọ mbatumu inyi enyi. Ire, ǹkaweek igege me ikpa. Kpan̄asi ikeya, ǹkikpọ chieen̄ ibe ke mânunu inikpọ enyi, mè igọọk enyi itumu ikọ isi mè isi, inyi unwọọn̄ kiji me lek kinyi ijot ichak. 13 Nsabọn ngwan̄ kwun̄ enenwaan̄, ogwu Awaji ogobobe inyi lek kan̄, mîtọp owu amọn.
AKỌP MÈ ONYAN GE 18-24
INU UNYE OTU EWE OKUP ME USEM AWAJI | ICHICHILI 1-3
“Nriọọn̄ Ubọk Ikwaan̄ Kinyi”
(Ichichili 1:20) Ke omun̄ ntoronyan̄ jaaba chi òkup me ubọk n̄a agan̄ ulom, melek ngugọọn̄ mkpukan̄ jaaba cha esabe alata araran̄ irom? Nlelet inu òkup me lek kiban̄ ìre ikeyi: Ntoronyan̄ jaaba chi ìkeke inyi ebi osat Awaji jaaba ìkikpulu ntitiin̄ Awaji jaaba cha. Sà ngugọọn̄ mkpukan̄ jaaba chi okeke inyi ntitiin̄ Awaji jaaba cha me lek kiban̄.”
w12 10/15 14 ¶8
Kpasi Eru Ke Okijeen̄?
8 Ufuna eji ekakaan̄ mbet lek eru keya, eji ekekeek ibe ke Baibul itumu ibe ke Jisọs ikaan̄ “ntoronyan̄ jaaba” me ubọk agan̄ ulom kan̄. “Ntoronyan̄ jaaba chi” ekeke ichit chieen̄ ebi ugane ntitiin̄ ekenbe aran̄, mè ebi ugane ntitiin̄ ikup me otutuuk ntitiin̄ si. Jisọs mokọt inyi “ntoronyan̄ jaaba” cha ntọ-ubọk geelek imun̄be ibe ke igbe ibe inyi ema. (Ichi 1:16, 20) Eya orọ, otutuuk ebi ugane ntitiin̄ ekup me irak Jisọs, Ogwu Ibot Ntitiin̄ Ebi Eyi Karais. Ire igbe ibe enen̄e ogwu ugane ge esun̄, Ogwu “chieen̄ kan̄ okisak kubọk alọm ukan̄” momun̄ ibe ke mirọ eya me mgbọ iweekbe mè oniin̄ iweekbe. (Ichi 1:14) Ire, sabum mgbọ ya, kè eji ekejeen̄ ebi egobobe inan̄a me unye ekwukwu mbuban ulibi ogbegbe, mije Pọọlu ige ibe “Ìkisiki ibot ìnyi ebi ibot kinyi mè ìkirọ inu ema ekitumu inyi enyi. Ìre ema ekikpọ chieen̄ me lek kinyi, mije ema mêrọ ifuk ofolek kinyi inyi Awaji. Ìkigban̄ utọn̄ ìnyi ema, inyi ema ekesa me ubelejit esi ikwaan̄ kiban̄, mè ikwaan̄ ya ikakana ufialek ìnyi ema. Mije, eya ikposibi oruru geege inyi enyi.”—Iburu 13:17.
(Ichichili 2:1, 2) Ogwu mmun̄be ya onenitumu inyi emi ibe, “Ge ikpa jet ogwu osat Awaji ogwu òkikpulu ntitiin̄ Awaji òkup me Efesọs ibe: Eyi ìre ikọ ònan̄a me otu ogwu òkaan̄ ntoronyan̄ jaaba me akajit ubọk kan̄ agan̄ ulom, mè ikije ikana me etete ngugọọn̄ mkpukan̄ jaaba cha esabe alata araran̄ irom. 2 Nriọọn̄ otutuuk kwulukwulu kinyi, mè iriọọn̄ si ibe ke enyi mîkinye lek irọ ikwaan̄, mè ikikat si ejit mgbọ inu okiyọt. Nriọọn̄ si ibe ke enyi kpekichieek ibe ebi ìkirọ ijo inu ekup me etete kinyi. Îkaan̄ ebi ìkigwen lek kiban̄ ebi otuchieen̄, me ere ema kpere ebi otuchieen̄. Nriọọn̄ ibe ke enyi mîtọ ife chi ikpọ, mè imun̄ ibe ke ema ìre ebi ataak.
w12 4/15 29 ¶11
Jioba Ikibem Eji Inyi Eji Ekaan̄ Unyan̄a
11 Me ilaak ọkpọchieen̄ okup me ikpa Ichichili, ibot 2 mè 3, Jisọs Karais me irek umin kan̄ isi ikpọ ntitiin̄ jaaba ikup me Asia Minor. Ilaak ọkpọchieen̄ ya ikijeen̄ ibe ke Karais ikimun̄ otutuuk inu okibọkọ irek. Me usini ere, ibak erieen̄ usini ene, itọn̄ ema mè iyaka ire iteme ema me oniin̄ ogbegbe. Keke ke eya okijeen̄? Me nrọ-nso ilaak ọkpọchieen̄ ya, ntitiin̄ jaaba cha ekeke ichit chieen̄ otutuuk ebi ekenbe aran̄ mgbọ acha 1914 orakabe, me chereyi, nteme enyibe ntitiin̄ jaaba cha ikaan̄ mgbaan̄ me lek otutuuk ntitiin̄ ebi eyi Awaji me linyọn̄ yi. Omọrọ, eji mekọt itumu ibe ke Jioba ikisa Gwun̄ kan̄ iban ebi eyi kan̄. Kpa ubọk ke eji ebesa ikaan̄ oruru inan̄a me lek mban ya?
w01 1/15 20-21 ¶20
Gọọk Ntitiin̄ Jioba Kigbaan̄ Je
20 Ikekigọọk ntitiin̄ Jioba, eyi okije inyi isi igbaan̄ ije iweek ibe eji ekemun̄ Jisọs Karais kubọk ogwu “ibot inyi ntitiin̄ Awaji,” orere, irek Awaji onyibe ọmọ. (Ebi Efesọs 5:22, 23) Taba iman̄ si me lek inu okup me ikpa Asaya 55:4, ere ya ibe: “Kpọ, [Emi Jioba] ǹsa ọmọ irọ inu ata-ikọ inyi ebi esese ife geelek, mè irọ ọmọ ogwu ibot mè ogwu òkitọ ikọ inyi ebi esese ife geelek.” Jisọs iriọọn̄ ubọk ekikpulu. Ọmọ iriọọn̄ si arọọn̄ kan̄ mè irọrọ kiban̄. Mgbọ isibe isi ikpọ ntitiin̄ jaaba ikup me Asia Minor, itumu inyi ema mgbọ go ibe: “Nriọọn̄ Ubọk Ikwaan̄ Kinyi.” (Ichichili 2:2, 19; 3:1, 8, 15) Kubọk Nte kan̄ Jioba, Jisọs si iriọọn̄ ufiak kiji. Sabum ijeen̄be Uriaak Okaan̄-ene, Jisọs itumu ibe: “Nte kinyi îriọọn̄ inu geelek òkup enyi me uyọt sabum enyi ebenichichili otu ido.”—Matiyu 6:8-13.
Week Inu Unye Otu Ewe Okup Me Usem Awaji
(Ichichili 1:7) Ìkpọ, òkinu! Ìboje melek oduku inyọn̄ inu. Chieen̄ geelek mômun̄ ọmọ, ìrere ebi ìsasa otunwa ichim ọmọ, ema si mêmun̄ ọmọ. Otutuuk ebi ido geelek òkup me linyọn̄ keyi mêto ito ufieejit mije kan̄. Iin̄, ikeya ke îbokup! Ikup ikeya!
kr 226 ¶10
Ama Ubọọn̄ Awaji Mosan̄a Ebi Ochicha Kan̄
10 Itip Oyerebet. Otutuuk ebi ochicha Ama Ubọọn̄ Awaji memun̄ inu oborọ inyi ema ekaan̄ ujaralek. Jisọs itumu ibe: “Mêmun̄ Gwun̄ Ebilene okinu me emen oduku inyọn̄, me ikpele unye mè ujamgbugbo.” (Mak 13:26) Uyeke oniin̄ keyi Jisọs obosa ijeen̄ unye kan̄ mojeen̄ ibe ke ọmọ inu inenifieek oyerebet. Me ofifi agọọk me lek nriran ibenbe ofolek ota mgbọ, Jisọs ikpa igbaalek inu ofolek oyerebet ebefieek me mgbọ ya. Itumu eyi mgbọ itobe urọk ofolek arọọn̄ mè ebot. (Fuk Matiyu 25:31-33, 46.) Ebi ikisa me utoon̄ ejit ibieen̄ Ama Ubọọn̄ Awaji inye ke ebegwen “arọọn̄,” ema ‘mebene ibot kiban̄ ifo inyọn̄’ mije eriọọn̄be ibe ke ‘mgbọ ebefaka ema isibi igbet.’ (Luk 21:28) Ire, ebi ikikeke ikeme Ama Ubọọn̄ ke ebegwen “ebot,” ema “mêto ito ufieejit” mije eriọọn̄be ibe ke ‘mekpan̄ ema.’ —Mat 24:30; Ichi 1:7.
(Ichichili 2:7) “Ogwu ikaan̄ utọn̄, inọ inu Ekwukwu Awaji okitumu inyi ebi ntitiin̄ Awaji geelek! Ogwu itim ikpan̄, mânyi ene ya unye ibe irie mfut ònan̄a me lek uti eyi òkinyi ene ugwem, eyi òtibi me eden̄ Paradais eyi Awaji.”
w09 1/15 31 ¶1
Inu Ekpabe Ofolek Ikpa Ichichili—I
2:7—Keke ore “paradais eyi Awaji”? Eyi irebe ibe ke ekitumu ikọ yi inyi ebi eyi Karais ekenbe aran̄, ikpolọlọ ibe ke paradais yi ire emen inyọn̄—ere Awaji me lek kan̄ okweekbe, eyi okup kubọk paradais. Mkpukpe ebi ekenbe aran̄ igbegbe utoon̄ ejit ebebọkọ ire irerie mfut onan̄a me lek “uti eyi òkinyi ene ugwem.” Ema kpebeyaka ikpọk ikwu.—1 Kọr 15:53.
Ifufuk Baibul
(Ichichili 1:1-11) Echichi ìre inu echi Jisọs Karais ochilibe ijeen̄ ebi ikwaan̄ Awaji. Îre Awaji onyi Jisọs Karais inu chi ibe isa ijeen̄ ebi kan̄, inyi ema eriọọn̄ inu òborọrọ me sọntiik mgbọ òkup me isi. Jisọs Karais oraria ogwu osat kan̄ ibe inichili inu cha ijeen̄ Jọn ogwu ikwaan̄ kan̄. 2 Jọn oneniben otutuuk inu cha îmun̄be itumu isibi, mè isa me ikeya ikirọ inye ibe ke ikọ Awaji eyi Jisọs Karais ochilibe ijeen̄ ọmọ ìre atikọ. 3 Uga ubelejit okup inyi ene geelek òfufuk ikọ nriran egebe me ikpa yi. Uga ubelejit okup si inyi ebi geelek ìnọnọ etip chi, mè ikirọ inu etumube, mije, mgbọ inu chi oborọ iso îgbet enenen. 4 Îre emi Jọn nkige ikpa yi ijet enyi ebi ntitiin̄ Awaji jaaba òkup me agan̄ Esia. Atata nnwọn mè esuuk ikup inyi enyi inan̄a me ubọk Awaji ogwu òkukup karake akat, mè ikup si me mgbọ keyi, ogwu òbokup ire mgbọ geelek. Atata nnwọn mè esuuk ikup si inyi enyi inan̄a me ubọk ekwukwu jaaba òkekeke me isi ogboon̄ ubọọn̄ Awaji, 5 mè ubọk kè Jisọs Karais, ogwu ata-ikọ ògbegbe utoon̄-ejit, ogwu Awaji odasi ijomo me mkpa. Ọmọ si ore ogwu òkikpulu otutuuk ebi ubọọn̄ linyọn̄ keyi. Ọmọ îmun̄ eji me chieen̄. Sa me mkpa kan̄ ke înyan̄a eji isibi me emen ijo kiji. 6 Îkpulu eji isa irọ ebi Awaji okikpulu, mè isa eji irọ ebi ngwugwa, inyi eji ekesi ikwaan̄ enyi Awaji ogwu òrere Nte kan̄. Itọn̄ mè mkpulu ikup inyi Jisọs ire mgbọ ikakaan̄ge itata! Ikup ikeya! 7 Ìkpọ, òkinu! Ìboje melek oduku inyọn̄ inu. Chieen̄ geelek mômun̄ ọmọ, ìrere ebi ìsasa otunwa ichim ọmọ, ema si mêmun̄ ọmọ. Otutuuk ebi ido geelek òkup me linyọn̄ keyi mêto ito ufieejit mije kan̄. Iin̄, ikeya ke îbokup! Ikup ikeya! 8 Okumugwem Awaji Ogwu Òkaan̄ Unye Geelek, ogwu òkukup karake akat, mè ikup me mgbọ keyi, ogwu òbokup ire mgbọ geelek, ìtumu ibe, “Emi nre Ibebene mè Itata inu geelek.” 9 Emi Jọn nkige ikpa yi ijet enyi. Emi ìre gwun̄ Nte kinyi, ogwu melek kinyi ekigbaan̄ ibọkọ ufialek, mè igbaan̄ ikup me mkpulu kè Jisọs Karais, mè ikigbaan̄ ikat ejit ikime ufialek òkukup inyi eji mije kè Jisọs. Îre mije nkitumu ikọ Awaji, eyi Jisọs orọbe inye ibe ke îre atikọ, eya orọ etetbe emi inito me inyọn̄ achọ Patimọs. 10 Mgbọ nkupbe me inyọn̄ achọ ya, me Usen Okaan̄-ene ge, Ekwukwu Awaji okakana ichit emi, nnọnọ ida ge okitaan̄ unye unye me udun̄ n̄a kubọk ida otita, 11 mè ikitumu ibe, “Ge otutuuk inu omun̄be tap me ikpa, mè ria jet ntitiin̄ Awaji jaaba òkup me Efesọs, mè Simaina, mè Pegamọm, mè Tiyatira, mè Sadis, mè Filadefia, mè Lawodisia.”
AKỌP MÈ ONYAN GE 25–AKỌP MÈ ONYAN̄ IBA 1
INU UNYE OTU EWE OKUP ME USEM AWAJI | ICHICHILI 4-6
“Ene Ini Ebi Ikikọp Inyinya”
(Ichichili 6:2) Nraraan̄ chieen̄, mè imun̄ inyinya okuket ge okinu. Ogwu òkweek me inyọn̄ inyinya ya îkaan̄ ogbaan̄ me ubọk. Enenikwuun̄ ọmọ okpibot ubọọn̄. Ọmọ olilibi me inyọn̄ inyinya kan̄ inan̄a kubọk ogwu òtitim ikpan̄ me akọn̄, mè iben me ejit ikpọkpọ ikitim si ikpan̄ ifo isi.
wp17.3 4 ¶3
Ebi Owa Ere —Ene Ini Ebi Ikikọp Inyinya?
Ekene ore ogwu okikọp inyinya eyi okuket? Ikpa Ichichili yaage otap ubọk inyi eji eriọọn̄ ogwu irebe me mgbọ igwenbe ene ya “Ikọ Awaji.” (Ichichili 19:11-13) Jisọs Karais ore Ikọ ya mije ọmọ ore ogwu okibọkọ ikọ me otu Awaji itumu. (Jọn 1:1, 14) Igbaalek si, migwen ọmọ “Ubọọn̄ ebi ubọọn̄ mè Okaan̄ ebikaan̄-ene” melek “Ogwu ògbe utoon̄ ejit mè ire si Atikọ.” (Ichichili 19:16) Ikpọk mbum ibe ke Jisọs ikaan̄ unye isasa itim akọn̄ kubọk ogwu ubọọn̄, ikakisa unye kan̄ irọ nnaan̄ mè iyaka mkpọ ikatatge. Ire, ikaan̄ usini idodo eji mekọtbe ido.
wp17.3 4 ¶5
Ebi Owa Ere —Ene Ini Ebi Ikikọp Inyinya?
Ire mgbọ owa ke ebi ikikọp inyinya cha ebene ikikọp inyinya kiban̄? Taba iman̄ ibe ke adasi ogwu obene ikikọp, Jisọs, ibene ikikọp eyi kan̄ mgbọ enyibe ọmọ ogboon̄ ubọọn̄. (Ichichili 6:2) Ire mgbọ owa ke Jisọs okana Ogwu Ubọọn̄ me emen inyọn̄? Ikare mgbọ yaage ijomobe me mkpa mè ifo emen inyọn̄. Baibul ijeen̄ ibe ke ikup ikikpọ mgbọ eya mobọkọbe irek. (Ebi Iburu 10:12, 13) Jisọs itumu inyi ebi udun̄ kan̄ ubọk ebesa iriọọn̄ ibe ke mgbọ ikupbe ikikpọ ya iyaka mè ubọk ebesa iriọọn̄ ibe ke ibene ikikpulu me emen inyọn̄. Itumu ibe ke ọmọ isibene ikikpulu, ke inu ibororiọọn̄ ikifiat igak ubọk ikweekbe me linyọn̄ yi. Akọn̄, akan̄, mè owuwa chieen̄ orukan̄ mokup. (Matiyu 24:3, 7; Luk 21:10, 11) Mgbọ Adasi Akọn̄ Etimbe Me Otutuuk Linyọn̄ obenebe me 1914, ke ikpọk mbum ibe ke ebilene minin̄ mgbọ ya, mgbọ ufialek eyi Baibul ogwenbe “mgburudun̄ mgbọ.”—Timọti Eyi Òso Iba 3:1-5.
(Ichichili 6:4-6) Ofifi inyinya onanan̄a isibi inu, mè inin̄ ikeya ikup araran̄ kubọk alọm ukan̄. Eneninyi ogwu òkup me inyọn̄ kan̄ unye ibe isan̄a esuuk isan̄a me linyọn̄, inyi ebi ene ebene ekekpan̄ lek kiban̄. Mînyi si ogwu òkup me inyọn̄ inyinya araran̄ yi ikpele oge akọn̄ ge. 5 Gwun̄ Arọọn̄ ya onenikama òso irek agba ita. Mgbọ îkamabe, nnọnọ ida inu òkup me ugwem eyi òso ita otumube ibe, “Na!” Nraraan̄ chieen̄, mè imun̄ inyinya ofifit ge osibibe inu. Ogwu òkup me inyọn̄ kan̄ îkaan̄ okwukwut itọ-inu me ubọk. 6 Nneninọ inu ge òtaan̄ kubọk ida ene onan̄abe me etete inu ini cha òkup me ugwem ikitumu ibe, “Ebi ene mêsa dinari ge ilep ewop akpa wit ge gaalek, mè isa si dinari ge ilep ewop akpa balì ita gaalek. Ire, ikajijaka uko olifu mè uko gerep, inyi aran̄ mè miin̄ ikanan.”
wp17.3 5 ¶2
Ebi Owa Ere—Ene Ini Ebi Ikikọp Inyinya?
Ogwu okikọp inyinya yi ikeke ichit chieen̄ akọn̄. Taba iman̄ ibe ke isan̄a esuuk me otutuuk linyọn̄, ikare ido inen mè inen gaalek. Me 1914, adasi mgbọ me mfufuuk ebilene, ke akọn̄ eyi ogọbọ otutuuk linyọn̄ obene. Akọn̄ etimbe me otutuuk linyọn̄ eyi òso iba ogọọk, eyi ifiat mkpọ igak eyi adasi. Usini ifuuk erọbe ikijeen̄ ibe ke otutuuk ebi ikwakwaan̄ inan̄a me lek akọn̄ karake 1914 miwa iraka efit efie ene! Isọkọ me lek si, owuwa ene miben unan omimin enenen me akọn̄ cha.
wp17.3 5 ¶4-5
Ebi Owa Ere—Ene Ini Ebi Ikikọp Inyinya?
“Nraraan̄ chieen̄, mè imun̄ inyinya ofifit ge osibibe inu. Ogwu òkup me inyọn̄ kan̄ îkaan̄ okwukwut itọ-inu me ubọk. Nneninọ inu ge òtaan̄ kubọk ida ene onan̄abe me etete inu ini cha òkup me ugwem ikitumu ibe, “Ebi ene mêsa dinari ge ilep ewop akpa wit ge gaalek, mè isa si dinari ge ilep ewop akpa balì ita gaalek. Ire, ikajijaka uko olifu mè uko gerep, inyi aran̄ mè miin̄ ikanan.”—Ichichili 6:5, 6.
Ogwu okikọp inyinya yi ikeke ichit chieen̄ akan̄. Ere yi ikijeen̄ ibe ke akan̄ mokup ire lek mesabe dinari ge ilep ewop akpa wit ge (1.08 L), orere, ikpoko usen ge ekikpe inyi ogwu ikwaan̄ me ukot ikaan̄! (Matiyu 20:2) Ikpoko yaage ke ebesa ilep ewop akpa balì ita (3.24 L), ebi ene ekimọnọ wit ibene igak balì. Ire sọntitiik inorie ya mokọt iso uwu ene ewabe? Enenitaba ebi ene ubọk me utọn̄ ibe ekajijit inu ekisa irọ mkpọ usen geelek kubọk aran̄ olifu mè miin̄.
(Ichichili 6:8) Nraraan̄ chieen̄, mè imun̄ inyinya ge òkpọkpọ ikup joon̄ kubọk ene ogwu orukan̄ ofiakbe ifiin̄ enenen. Ogwu òkup me inyọn̄ inyinya ya, ekigwen Mkpa. Ama Ekwukwu [Udọn̄ Ufuun̄] okekigọọk ọmọ me udun̄. Eneninyi ema unye ibe esa oge akọn̄, mè akan̄, mè orukan̄, mè ijo anam oron ekpan̄ ebilene, irek ge me etete irek ini, me otutuuk linyọn̄.
wp17.3 5 ¶8-10
Ebi Owa Ere— Ene Ini Ebi Ikikọp Inyinya?
Ogwu okikọp inyinya òso ini ikeke ichit chieen̄ mkpa ebi ene ekwube inan̄a me lek orukan̄ mè ofifi ofifi inu. Me ikafiin̄ge mgbọ, eyi 1914 orakabe, orukan̄ ekigwen Spanish flu ikpan̄ efie efie ebi ene. Mokọt ire ibe ke efit efie ene go eben orukan̄ ya, orere, ene ge me etete ene ita me lek otutuuk ebi iluk me mgbọ ya!
Ire, Spanish flu ire sọntitiik. Ebi inyinyi ifuuk ofolek orukan̄ ekigwen smallpox etumu ibe ke efie efie ene mikwaan̄ inan̄a me lek orukan̄ yi bene me acha 1901 sa re 2000. Mege inire chereyi, efie efie ene mekikwu inan̄a me lek orukan̄ AIDS, tuberculosis, mè malaria, ikerere ibe ke mekitap efuuk enenen me iweweek ugwun̄ ebesa igwa orukan̄ cha.
Ire inu yaage ke akọn̄, akan̄ mè orukan̄ ekisan̄a isibi—orere mkpa. Ebi ene ekpọkpọk ikikwaan̄, mè ekakaan̄ge ikpọchieen̄ geege
Week Inu Unye Otu Ewe Okup Me Usem Awaji
(Ichichili 4:4) Ofifi akọp ogboon̄ ubọọn̄ iba mè ini okukup ikana ogboon̄ ubọọn̄ ya. Akọp ebi ugane iba mè ini ìtatap ofọnti okuket, mè ikwuun̄ okpibot ubọọn̄ alata araran̄ me ibot ekwekweek irek me inyọn̄ akọp ogboon̄ ubọọn̄ iba mè ini cha.
(Ichichili 4:6) Inu ge òbet lek okwaan̄ òwa me isi ogboon̄ ubọọn̄ ya. Mun̄ òkup me okwaan̄ ya ìkpọkpọ igen ikup kubọk umọọn̄ eyi mêkọtbe imọọn̄ inu itibi. Inu ini òkup me ugwem, mè ikaan̄ chieen̄ chieen̄ ijot lek me agan̄ isi, mè agan̄ udun̄ onenikeke ikana me agan̄ ini eyi ogboon̄ ubọọn̄ ya.
re 76-77 ¶8
Umin Ogboon̄ Ubọọn̄ Kè Jioba
8 Jọn iriọọn̄ ibe ke ekigobo ebi ngwugwa ibe ekesi ikwaan̄ me uwu mbuban, me ukot ikaan̄. Eya orọ, ira ike ọmọ chieen̄ mgbọ imun̄be inu yi ikpabe: “Ofifi akọp ogboon̄ ubọọn̄ iba mè ini okukup ikana ogboon̄ ubọọn̄ ya. Akọp ebi ugane iba mè ini ìtatap ofọnti okuket, mè ikwuun̄ okpibot ubọọn̄ alata araran̄ me ibot ekwekweek irek me inyọn̄ akọp ogboon̄ ubọọn̄ iba mè ini cha.” (Ichichili 4:4) Iin̄, kpan̄asi ebi ngwugwa, imun̄ akọp ebi ugane iba mè ini, ebi ikwuun̄ okpibot ubọọn̄ mè ikweek irek me inyọn̄ ogboon̄ ubọọn̄ kubọk ebi ubọọn̄. Ebi ugane chi ire ebi owa ni? Ema ire ebi eyi Karais ekenbe aran̄, ema mijomo me mkpa mè ibọkọ irek kiban̄ me emen inyọn̄ ike Jioba ochieekbe ema me use. Ike owa ke eji esa iriọọn̄ eyi?
re 80 ¶19
Umin Ogbọọn̄ Ubọọn̄ Kè Jioba
19 Keke ke inu nrom chi ekeke ichit chieen̄? Ilaak ọkpọchieen̄ ofifi ogwu nriran, orere Ijikien omun̄be motap ubọk inyi eji eriọọn̄ ufọọk-otu idodo yi. Ijikien imun̄ Jioba me inyọn̄ uji akọn̄ kan̄, me emen inyọn̄, melek inu ini òkup me ugwem Jọn okpabe inu ofolek, ikigọọk uji akọn̄ ya. (Ijikien 1:5-11, 22-28) Ofifi mgbọ, Ijikien ikpọk imun̄ inu ini òkup me ugwem chi ekigọọk uji akọn̄ ya. Ire, mgbọ keyi, igwen ema ebi mbem emen inyọn̄. (Ijikien 10:9-15) Ikpolọlọ ibe ke inu ini òkup me ugwem cha Jọn omun̄be ekeke ichit chieen̄ owuwa ebi mbem emen inyọn̄ Awaji okaan̄be—ebi irek kiban̄ ominbe me etete ebi osat Kan̄. Ikpoke Jọn chieen̄ imumun̄ ike ebi mbem cha ekupbe iriaak me lek Jioba, mije, me akpatan̄ mbuban ukot ikaan̄, etoto ebi mbem iba, esabe alata araran̄ irom me iyọn̄ ochichit okop inyan̄a-ibot, eyi okekeke ichit chieen̄ ogboon̄ ubọọn̄ Jioba. Ire inan̄a me etete ebi mbem iba cha ke Jioba okinyi ebi Ijeren ikan.—Isisibi 25:22; Okwa Itọn̄ 80:1.
(Ichichili 5:5) Ene ge me etete akọp ebi ugane iba mè ini cha onenitumu inyi emi ibe, “Kayaka ìto ito! Kpọ, Egbe Àtat otoko kè Juda, òrere Ugwun̄-ijọn̄ kè Debit îra itim ikpan̄. Îre ọmọ obokọt ikama irek agba jaaba cha, mè ichili ikpa ya.”
cf 36 ¶5-6
“Kpọ, Egbe Àtat Otoko kè Juda”
5 Ekimalek isa ukarajit itọt me lek egbe atat. Ire owuuk lek ikeke me isi orie egbe atat omimin ni? Ire ikeya, mokọt ire ibe ke minama mgban ikana ere esun̄be anam ukpook ya, me ere ekisun̄ anam, inyi ikasak ene unan me lek. Ire, mbet chinichini okup ikeya ikekitet ene ukpook enenen. Ike okikpọ emen isi anam ilile okakaan̄ unye ya, mè ike ikikpọ owu si, okpokeek ibe ke ikaan̄ mkpọ geege egbe atat obomun̄, itet ukpook me lek mè ilibi. Baibul itumu ibe ke “egbe àtat, ogwu unye me lek otutuuk anam geelek, ìkakichichini melek inu geege mè oje okpebe.” (Urọk 30:30) Mbet lek ukarajit Karais okaan̄be ire eya.
6 Kè eji ekpa-nu oniin̄ ita Jisọs osabe ijeen̄ ukarajit kubọk egbe atat: me ikekeke inye inyi atikọ, me isasa unen oyerebet irọ inu mè mgbọ ichichinibe tukutuku. Eji memun̄ si ibe ke otutuuk kiji—ebi emanbe kubọk ebi ukarajit mè ebi ekamange ikeya—mekọt igọọk akpat ukot kè Jisọs me ijejeen̄ ukarajit.
Ifufuk Baibul
(Ichichili 4:1-11) Mgbọ eya orakabe, nnenibene chieen̄ ikpọ, mè imun̄ isotu ge ogwukube ibook me emen inyọn̄. Ida ya òkitaan̄ kubọk otita, eyi òtutumu ikọ inyi emi me adasi mgbọ ya onenitumu inyi emi ibe, “Nene na me ere keyi, inyi ǹjeen̄ owu inu òborọ me mgbọ òkup me isi.” 2 Mgbọ yaage, Ekwukwu Awaji okakana ichit emi, mmumun̄ ogboon̄ ubọọn̄ ge okupbe me emen inyọn̄, mè imun̄ ene ge osikibe ikweek me inyọn̄ ogboon̄ ubọọn̄ ya. 3 Isi ogwu òkup me inyọn̄ ogboon̄ ubọọn̄ ya okekitana okuket mè araran̄ kubọk ewuuk unye otu ewe ekigwen jasipa, mè eyi ekigwen kanelian. Egop ubọọn̄ ge òninin̄ ikup njijoon̄ inwan̄ njijoon̄ inwan̄ kubọk ewuuk unye otu ewe ekigwen emeran, okakana ichit ogboon̄ ubọọn̄ ya. 4 Ofifi akọp ogboon̄ ubọọn̄ iba mè ini okukup ikana ogboon̄ ubọọn̄ ya. Akọp ebi ugane iba mè ini ìtatap ofọnti okuket, mè ikwuun̄ okpibot ubọọn̄ alata araran̄ me ibot ekwekweek irek me inyọn̄ akọp ogboon̄ ubọọn̄ iba mè ini cha. 5 Utoon̄ okekikebe mèrèmèrèp ikana me lek ogboon̄ ubọọn̄ ya. Isinyọn̄ okekigbugbut, mè ikisook si me ere ogboon̄ ubọọn̄ ya okupbe. Mkpukan̄ jaaba okekeke me isi ogboon̄ ubọọn̄ ya, mè ikilomo. Mkpukan̄ jaaba chi ìre ekwukwu jaaba eyi Awaji. 6 Inu ge òbet lek okwaan̄ òwa me isi ogboon̄ ubọọn̄ ya. Mun̄ òkup me okwaan̄ ya ìkpọkpọ igen ikup kubọk umọọn̄ eyi mêkọtbe imọọn̄ inu itibi. Inu ini òkup me ugwem, mè ikaan̄ chieen̄ chieen̄ ijot lek me agan̄ isi, mè agan̄ udun̄ onenikeke ikana me agan̄ ini eyi ogboon̄ ubọọn̄ ya. 7 Me lek inu ini cha, eyi adasi ìbet lek egbe àtat, eyi òso iba obet lek orie eriembuuk, eyi òso ita okaan̄ isi ebilene, sà eyi òso ini obet lek igo òkiwuwulu. 8 Me etete inu ini chi òkup me ugwem, geelek îkaan̄ uwop gweregwen, mè ikaan̄ chieen̄ chieen̄ iso otutuuk lek, mè ikaan̄ si ire irak uwop cha. Ikarek mè eririeen̄, ema kpekiriaan̄ otu, ekpọkpọ ikikọt okwa itọn̄ Awaji ibe, “Mbuban, mbuban, mbuban, Okumugwem Awaji Ogwu Òkaan̄ Unye Geelek ìkup me mbuban, ọmọ ogwu òkukup karake akat, mè ikup me mgbọ keyi, môkup si ire mgbọ geelek.” 9 Mgbọ geelek inu ini cha òkup me ugwem ekikọt okwa eyi ujamgbugbo mè itọn̄ isa ikitik ogwu òsisiki ikweek me inyọn̄ ogboon̄ ubọọn̄ ya, ogwu òkup me ugwem ire mgbọ geelek mgbọ geelek, 10 akọp ebi ugane iba mè ini cha mîra ikigwook ekpe me ijọn̄ me isi ogwu òkup me inyọn̄ ogboon̄ ubọọn̄ ya, ogwu òkup me ugwem ire mgbọ geelek mgbọ geelek, mè ikitọbọ ebum inyi ọmọ, mè ikichili okpibot ubọọn̄ kiban̄ ito me isi ogboon̄ ubọọn̄ ya, mè ikikọt okwa ibe, 11 “Ogwukaan̄ kiji mè Awaji kiji, owu ogbe ibọbọkọ itọn̄, mè umin, mè unye, mije, owu orom otutuuk inu. Ìneneme owu ke owu orom ema, mè irọ inyi ema egat ugwem.”