Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais
OKPA ONYAN̄ 3-9
INU UNYE OTU EWE OKUP ME USEM AWAJI | EBI OYEREBET 15-16
“Ileleke Ene—Ichubọk Ire Atalek Ijo Inu!”
w12 4/15 8 ¶4
Ileleke Ene—Ire Oriọọn̄ Eyi Ota Mgbọ!
4 Me adasi, keek nu Dilaila ogwu ofian̄, ogwu Samsin ogwu Oyerebt okaan̄be ima me lek. Samsin ikaan̄ me ejit ititim ebi Filisia akọn̄ me lek me ibot ebi eyi Awaji. Mije ibe ebi ibot ebi Filisia go cha eriọọn̄be ibe ke Dilaila ikachubọk ima Samsin me otutuuk ejit kan̄, ema echechieek ogọt ata ikpoko ilile ufuna iweek iriọọn̄ ubọk ikisa ikaan̄ unye mè ema efaan̄ mè ekọt ekaan̄ ogọt ere ubọk. Dilaila ochechieek ibọbọkọ ikpoko ya mè ikap Samsin otu, ọmọ isa iweweek iriọọn̄ inu okinyi Samsin unye otuuk mgbọ ita ire, ikakọt iweek iriọọn̄. Ọmọ okpọkpọ ikup inye ikisisaak Samsin ibe mè “itumu inyi ọmọ ma.” Me ota kan̄, “efuuk otata Samsin me owot igbet mkpa.” Ikpitumu inyi ogọt ibe ke kperarak ikwọkọ ọmọ ijeek me ibot, mè ire ikwọkọ ọmọ ijeek me ibot ke unye kan̄ mota. Eyi Dilaila onọbe ikeya, ikwọkwọkọ Samsin ijeek me ibot me mgbọ itoon̄be ibot me owut ukot kan̄ mè ilaak, mè ikana ọmọ itap me ubọk ebi ochicha kan̄ ufuna esa ọmọ erọ inu geelek oneneme ema. (Oyer. 16:4, 5, 15-21) Inu irọbe yi ire eyi ochubọk isak enenen! Mije chieen̄ ile kan̄, Dilaila oleleke ogwu keya omama ogọt.
w05 1/15 27 ¶5
Ikpakpa Isibi Inu Okup Me Ikpa Ebi Oyerebet
14:16, 17; 16:16. Ikekisa me unaan̄-ejit ito ito mè ikinunuun̄ ikisa isisaak ene mokọt ifiat mbat-olom.—Urọk 19:13; 21:19.
w12 4/15 11-12 ¶15-16
Ileleke Ene—Ire Oriọọn̄ Eyi Ota Mgbọ!
15 Ike owa ke ebi irere olom mè nwa ebekọt isa igbe utoon̄-ejit inyi ebi melek kiban̄? Awaji itumu ibe: “Bele ejit me lek nwa [mè iyaka ire olom] mgbọ nsabọn̄ irieen̄ kwun̄” mè, “Rie ugwem melek nwa [mè iyaka ire nlom] kwun̄, ogwu owu omabe.” (Urọk. 5:18; Etip. 9:9) Ike ubọk olom mè nwa yi ekebikan, ema ire ebi keya “eberiọọn̄ ubọk iriọọn̄ lek kiban̄ ijaan̄,” me irọrọ melek nkeek. Eyi osibi ibe ke ema mekiche ulọk kiban̄ inyi ge mè ge, ikikaan̄ mgbọ inyi ge mè ge, mè ikitaba lek iriaak me lek ge mè ge. Ema ire ebi ibemọnọ isun̄ ufiak inanama mbat-olom mè mgbaan̄je kiban̄ melek Jioba inye. Mege ema ekan, olom mè nwa ire ebi ibekigbaan̄ ikween̄ Baibul, ikigbaan̄ isibi uko me mgbọ geelek, mè ikigbaan̄ iraak uriaak ikibeek ugbana kè Jioba.
KUP NYE KIGBE UTOON̄-EJIT SA NYI JIOBA
16 Ikaan̄ usini ebi ikup me ntitiin̄ ebi irọrọ atalek ijo inu omimin ebi esabe ‘ida ònyenye igana inyi, inyi ema ekeke enye me emen ichechieek.’ (Taitọs 1:13) Isa inyi usini ebi ene, irọrọ kiban̄ iweek ibe esan̄a ema me emen ntitiin̄. Isa inyi “ebi geelek ìkwekween̄ inu inan̄a me lek osusut cha,” osusut cha irọ ufuna ema ekpọk ekaan̄ ata mgbaan̄je me lek Jioba. (Iburu. 12:11) Mgbọ, ire misan̄a ogwu ulọk kiji mè iyaka ire ogwu unene kiji me ntitiin̄ ye? Me mgbọ keyi iweek ibe eji ekup enye ekegbe utoon̄-ejit, ikare isa inyi ene ya ire, esa enyi Awaji. Jioba okikpọ mè eji mesiki ibot inyi ntọ-ubọk kan̄ eyi ibe me eji ekakaan̄ mgbaan̄rọ geege me lek ogwu geelek esan̄abe me emen ntitiin̄.—Fuk Ebi Kọrint Eyi Adasi 5:11-13.
Week Inu Unye Otu Ewe Okup Me Usem Awaji
w05 3/15 27 ¶6
Samsin Itim Ikpan̄ Inan̄a me Unye kè Jioba!
Samsin isasa otutuuk ejit kan̄ ikigọọk mkpọ itobe me isi, ititim akọn̄ me lek ebi Filisia. Ọmọ ikup me uwu ogwu ojeyet me ama Gaza ufuna ọmọ ikọt itim akọn̄ me lek ebi ochicha Awaji. Samsin iweek ere ibokup me eririeen̄ ya me emen ama ebi ochicha kiban̄, ire uwu ogwu ojeyet ya ore ere ibokọt ikup. Samsin ikakaan̄ ulọk barabat me ejit. Ọmọ inan̄a me uwu ogwu enenwaan̄ ya me ejit eririeen̄, mè isi ijim otu-nchit ama ya melek okwukwut iba kan̄ isa ije isi inyọn̄ ogoon̄ okup iraak lek Eburọn eyi ojọjọn̄ọ ere iso akọp ewuuk ije gweregwen (37 miles [60 km]). Eyi ire eyi Awaji obieen̄be inye mè inyi ọgọt si unye isabe irọ.—Ebi Oyerebet 16:1-3.
OKPA ONYAN̄ 10-16
INU UNYE OTU EWE OKUP ME USEM AWAJI | EBI OYEREBET 17-19
“Ikpakpaka Ibot Inyi Ikan Awaji Ikisa Ufialek Ijet Ene”
it-2 390-391
Maika
1. Ogwu owot iman kè Iferem. Ije ikeme òso Ikan jeeta me lek Akọp Ikan kè Mosis (Isis 20:15). Maika imọnọ obop ikpoko alata okuket mè efit ge (1,100) me lek ikpoko ogwu uga. Mgbọ isabe ikpoko ya inu mè itumu isibi ibe ke ire ọmọ omọnọ, ogwu uga otutumu ibe: “Me atikọ, nsun̄ ikpoko yi me mbuban inyi [Jioba NW ], mè isa ubọk n̄a ikana ikpoko yi inyi gwun̄ n̄a ibe isa irọ mkpọmfaka eyi ebọbọn̄ mè eyi etọtọkọ. Mgbọ keyi, ǹkiyaka ikpoko yi inyi owu.” Ineninyi ogwu òtọkọ-inu efit ikpoko alata okuket iba (200) isasa irọ “mkpọmfaka eyi ebọbọn̄ mè eyi etọtọkọ” ekpukpulu isi itap me uwu kè Maika. Maika, ogwu okakaan̄ “isi-ijọn̄ inyi lek kan̄,” onenichim mgbidim ofọnti ikwaan̄ ebi ngwugwa, mè ikaan̄ si owuwa mkpọmfaka, mè inisa ene ge me etete bọn ebirieen̄ kan̄ ito kubọk ogwu ngwugwa kan̄. Ikerere ibe ema erọ inu yi me erieen̄ isasa itọbọ ebum inyi Jioba, ikare inu ogbegbe ibe erọ me mgbọ geege, mije ije ikeme ikan obe ekatọbọ ebum inyi mkpọmfaka (Isis 20:4-6) mè ififala si uwu mbuban Jioba melek irek ebi ngwugwa. (Oyer 17:1-6; Ikan 12:1-14) Me mgburudun̄, Maika onenibọkọ Jonatan, ogwu owot iman kè Gesiọm, gwun̄ kè Mosis itap me uwu kan̄, mè ibọkọ gwun̄ enerieen̄ ogwu Libai me ọkọ isa irọ ogwu ngwugwa kan̄. (Oyer 18:4, 30) Me ikatetge ijaan̄, Maika okakaan̄ ujot-owot mè itumu ibe: “Mgbọ keyi, nriọọn̄ ijaan̄ lek ibe ke [Jioba NW ] ìbonwọnwọn melek n̄a.” (Oyer 17:7-13) Ire, Jonatan ikare ogwu owot iman kè Erọn eya orọ ikagbe irere ogwu ngwugwa, eyi irọ si ibe Maika iriọọn̄ ikirọ mkpọ olọlọ.—Ifuk 3:10.
it-2 391 ¶2
Maika
Sọntitiik mgbọ iraraka me lek, Maika osasa ebi ene ilibi igọọk ebi otoko kè Dan. Mgbọ ema erebe lek ife cha, ife cha edodo ema ibe ire keke ọrọ? Maika ofọfo̱ọk ibe: “Enyi mîkpulu ebi kè awaji n̄a, echi emi nrombe, mè itet si ogwu ngwugwa n̄a igbaalek isa ifo. Ìre keke ke nyaka ikaan̄?” Ebi otoko kè Dan etutumu inyi Maika mbet mfufiat oborọn̄ itet ogọt mè ebi melek kan̄ mè ire ikpọk ikigugọlọ melek kiban̄. Eyi imun̄be ibe ke ebi otoko kè Dan minye lek igak ema, Maika mè ebi melek kan̄ egwugwu ikom ifon. (Oyer 18:22-26) Ebi otoko kè Dan egbugbugbọ ama Layis, me inama ama kè Dan me akpat kan̄. Jonatan mè nsabọn kan̄ ekakana ebi ngwugwa inyi ebi otoko kè Dan, ema “ekekitọbọ ebum inyi mkpọmfaka ebọbọn̄ cha Maika orọbe, otutuuk mgbọ Uwu Mbuban Awaji okupbe me Silo.”—Oyer 18:27-31.
Week Inu Unye Otu Ewe Okup Me Usem Awaji
w15 12/15 10 ¶6
Usem Awaji Eyi Ekababe Okukup Ire Chereyi
6 Inu eyi okijeen̄ erieen Awaji me emen Baibul ikachep, kpan̄asi ikeya ikisisibi utoon̄. Baibul New World Translation eyi ekpọkbe ige me acha 2013 iben erieen̄ Awaji iso obop jaaba, efit iba mè akọp mè gweregwen (7,216) eyi orere isa mgbọ gweregwen (6) iwa igak eyi acha 1984. Go me lek ire eyi emun̄be me emen ikpa Samien Eyi Adasi 2:25; 6:3; 10:26; 23:14, 16. Etap me ere chi mije ibe ke ikpa eyi egwenbe Dead Sea Scrolls, ire echi odadasi ikup mkpọ oraraka obop acha ge (1,000) sabum eyi ekigwen Hebrew Masoretic text osibibe, iben erieen̄ ya me ere Baibul chi. Ikeya si ke etap ge me ikpa Ebi Oyerebet 19:18 me mgbọ eyakabe ikpọk iriọọn̄ ubọk ikween̄ ikpa ekakat echi oka ukot cha.
OKPA ONYAN̄ 17-23
INU UNYE OTU EWE OKUP ME USEM AWAJI | EBI OYEREBET 20-21
“Kup Nye Kiweek Ntọ-Ubọk Kè Jioba”
w11 9/15 32 ¶2
Ire Omokọt Ibet Lek Fineyas Me Mgbọ Osikikaan̄ Rumurumun̄ Nje?
Eyi ebirieen̄ ebi Gibia ebi otoko kè Benjamin esabe me unye-ubọk ilaak ogwu ugan ogwu Libai mè ikpan̄ ogwu enenwaan̄ ya, orọ otutuuk ebi otoko kechilọ ekpititiin̄ ibesi itim akọn̄ me lek ebi Benjamin. (Oyer. 20:1-11) Ema miriaak uriaak ibeek ntap-ubọk kè Jioba sabum esibe akọn̄ ya, ire, akọn̄ ifiek ema otuuk mgbọ iba mè irie owuwa kiban̄. (Oyer. 20:14-25) Ire ema mekana igwook ibe ke uriaak kiban̄ ikatet mun̄ nje? Ire Jioba ichubọk ikaan̄ ulọk imumun̄ ubọk ema esabe icha ijo inu ya obọbọkọ irek ni?
w11 9/15 32 ¶4
Ire Omokọt Ibet Lek Fineyas Me Mgbọ Osikikaan̄ Rumurumun̄ Nje?
Keke ke eji ebekọt ikween̄ inan̄a me lek eyi? Usini ufialek ekikaan̄ me emen ntitiin̄ ikekikup ifiin̄ ubọk geelek ibe ke ebi ugane ntitiin̄ mekitap efuuk mè ikibeek ntap-ubọk kè Jioba. Ire ikup ikeya, monwọn ibe ebi ugane ntitiin̄ ekeek usem kè Jisọs obe: “Ìbeek, [mè iyaka ire iriaak uriaak] ke mênyi enyi. Ìweek, ke enyi mêweek imun̄. Ìtọbọ ubọk me isotu, ke mêgwuku inyi enyi.” (Luk 11:9) Ikerere ibe ke ufọọk-otu uriaak ya ikikekukọbọ, ebi ugane ntitiin̄ mechieek ijaan̄ ibe ke Jioba mofọọk otu uriaak ya me mgbọ mgbọ kan̄ isikem.
Week Inu Unye Otu Ewe Okup Me Usem Awaji
w14 5/1 11 ¶4-6
Ire Oriọọn̄ Ni?
Ike owa ke ekisa olik mgbọlọ itim akọn̄ me ukot ikaan̄?
Ire olik mgbọlọ ke Debit osa ikpan̄ ogwu ujọn̄ọ ile Goliyat ya. Kpolọlọ ibe Debit ikween̄ ubọk ekisa olik mgbọlọ yi irọ mkpọ me mgbọ irebe sọn̄ gwun̄ enerieen̄ okpukpo arọọn̄.—Samien Eyi Adasi 17:40-50.
Ekikpa mkpọ ofo me lek ebi Ijipiti melek ebi Asiria kubọk ire ebi Ekisa olik mgbọlọ itim akọn̄ me ukot mgbọ Baibul. Olik mgbọlọ yi ire eyi ekisa ikpa anam mè iyaka ire ekwut ibọp ikaan̄ me agbagba olik iba. Ogwukaan̄ olik mgbọlọ ya motap ewuuk orọrọt lek mè iyaka ire okup obot obot obomin ikilap me lek owut akpọ me uwele kan̄ [two to three inches (5 to 7.5 cm)] eyi ulobo kan̄ si mosobe ulobo ibot ulaja ge (250 g). Moneniyak olik mgbọlọ ya ikana ibene isaba ibot kan̄ mè isan̄a ubọk me lek agan̄ ibot olik ya ge, eya morọrọ ufuna ewuuk ya isa me unye iwulu isibi mè ije itat ike eweekbe.
Mimun̄lek owuwa ewuuk olik mgbọlọ ekisa itim akọn̄ me ukot ikaan̄ me agan̄ Middle East. Ebi ikakaan̄ usọ-ubọk me lek olik mgbọlọ mekọt iyak mè mgbọlọ kan̄ ogwat lek oje mkpọ oboso efit ewuuk ije mè akọp gweregwen isa ire efit ewuuk ije iba mè akọp ini (100 to 150 miles) (160 to 240 km/h) me mbubak mgbọ ge. Ebi ikwekween̄ mkpọ ofolek kpekana igwook mè ire olik mgbọlọ ya ikije ije kubọk oraan̄, ire, olik mgbọlọ ire eyi okikpan̄ ene.—Ebi Oyerebet 20:16.
OKPA ONYAN̄ 24-30
INU UNYE OTU EWE OKUP ME USEM AWAJI | RUFU 1-2
“Kikaan̄ Ima Ogbegbe Utoon̄-ejit”
w16.02 14 ¶5
Mọnọ Akpat Ukot Ata Ebi Unene kè Jioba
5 Rufu ke okọt okeek ibe ke ọmọ ikaan̄ ebi uwu kan̄ me Mowabu—uga melek ebi uwu kan̄ ebi mebọkọ ogọt itap kubọk nwakpa mè ikikpọ chieen̄ me lek kan̄. Mowabu ore ama kan̄. Ọmọ iriọọn̄ orọmijọn̄ kiban̄, iriọọn̄ itumu usem kiban̄ mè ikaan̄ ene me ere ya si. Nomi kpobokọt inyi ogọt inu chi me Beteleyem. Ọmọ ichubọk ibe Rufu ibia me Mowabu. Nomi ikaan̄ ukpook ibe ke ọmọ kpobokọt inyi nwa gwun̄ kan̄ yi olom ikerere si uwu. Keke ke Rufu oborọ? Kpọ nu esese okup inyi ogọt melek Opa, ogwu ‘òfofo igọọk ebi kan̄ mè awaji ema ekiriaak.’ (Rufu 1:9-15) Ire Rufu iweek igwugwu ikom isi itọbọ ebum inyi ataak ataak awaji ama kiban̄ cha nje? In̄-in̄, ikaweek.
w16.02 14 ¶6
Mọnọ Akpat Ukot Ata Ebi Unene kè Jioba
6 Ibet lek Rufu ikween̄ mkpọ ofolek Jioba me ubọk ogwu olom mè iyaka ire me ubọk kè Nomi. Jioba ikabet lek awaji ebi Mowabu. Rufu iriọọn̄ ibe ke ire Jioba ogbe ogwu ọmọ oboma mè ikitọbọ ebum inyi. Ikakpọkpọk ire ikakaan̄ iriọọn̄-inu gaalek. Rufu morọ ntumumfieek. Ire mogobo Jioba kubọk ire Awaji kan̄ ni? Rufu irọ ntumumfieek okakaan̄ iriọọn̄-inu. Itumu inyi Nomi ibe “Ebi kwun̄ mêre ebi n̄a. Awaji kwun̄ si, môre Awaji n̄a” (Rufu 1:16) Igbe ibe ekekeek mkpọ ofolek ima Rufu ojeen̄be Nomi, ire, ima ikaan̄be me lek Jioba ore eyi omimin ichit. Me mgburudun̄, Bowaji ogwukaan̄ uko itọn̄ Rufu me inenitap ibot me irak uwop kè Jioba ikwek lek kan̄. (Fuk Rufu 2:12.) Eya mokeek eji ubọk gwun̄ unọn okikwek lek kan̄ me irak uwop ogwu uga. (Itọn̄. 36:7; 91:1-4) Mbet ute okup ikeya ke Jioba okana isa inyi Rufu. Ikpe ọmọ mkpukpe eyi ichechieek kan̄, ọmọ si ikabọnọ lek me lek ntumumfieek kan̄.
Week Inu Unye Otu Ewe Okup Me Usem Awaji
w05 3/1 27 ¶1
Ikpakpa Isibi Inu Okup Me Ikpa Rufu
1:13, 21—Ire Jioba orọ ufuna ugwem ijat me lek Nomi mè inyi ogọt ufialek ni? In̄-in̄, Nomi si ikatumu ibe ke ikaan̄ inu Awaji orọbe ọmọ ilọ. Ire, mije otutuuk ufiak cha orọrọn̄ itet ogọt, orọ ikikeek ibe ke Jioba ikekeke ikeme ogọt. Ijat ogọt me lek mè iwọ ichechieek kan̄. Isọkọ me lek si, imaman gwun̄ ire eyi ekimun̄ kubọk ire ugbana Awaji ogbanabe ene me ukot mgbọ ya, mè emun̄ si ene irere ora kubọk ire ogbo. Bọn ebirieen̄ iba kan̄ ikwakwaan̄ me kpekakaan̄ge nsabọn geege, morọ ibe Nomi ikikeek ibe ke Jioba irọ ọmọ mkpọ esip.
OKPA ONYAN̄ 31–ONYAN̄ IBA 6
INU UNYE OTU EWE OKUP ME USEM AWAJI | RUFU 3-4
“Kaan̄ Mè Sun̄ Ata Erieen̄”
w12 10/1 22 ¶5
“Atalek Enenwaan̄ Òsusun̄ Lek Itap Me Irek”
Kpolọlọ ibe ke eyi Bowaji osabe esuuk esuuk ida itumu ikọ inyi Rufu, mokat ogọt ejit. Itumu ibe: “[Jioba NW ] igbana owu gwun̄ n̄a enenwaan̄. Ata ejit eyi mgburudun̄ owu okaan̄be îgak eyi adasi mgbọ, mije, owu òkagọọk nsabọn irieen̄, mè ìre ebi ubọọn̄ mè ìyaka ire ebi ugbọọn̄.” (Rufu 3:10) “Eyi adasi mgbọ” ikitọ ubọk ifolek igbegbe utoon̄-ejit Rufu ojeen̄be Nomi mè igọọk ọmọ ika mè ikikpọ ọmọ chieen̄ me lek. “Eyi mgburudun̄” ore eyi okimọmọnọ irek me ubọk. Bowaji iriọọn̄ ibe ke Rufu kubọk ogbat enenwaan̄ ke oma ibabat olom nsabọn irieen̄, mè irere ubọọn̄ sa iyaka ire ugbọọri. Kpan̄asi ikeya, iweek irọrọ nnwọn isa iny Nomi melek ogwu olom ogwu okwukwu si, ufuna erieen̄ ogwu enerieen̄ ya okwukwu ikachep me ama kan̄. Eyi irọ ufuna emun̄ ejaan̄ mkpọ orọrọ Bowaji obak lek ikaan̄ ima me lek gwun̄ enenwaan̄ ogwu ikakaan̄ge ulọk akpalek kan̄ gaalek.
w12 10/1 23 ¶1
“Atalek Enenwaan̄ Òsusun̄ Lek Itap Me Irek”
Kpọ nu ubọk Rufu mosabe ikaan̄ ujot-owot me ikekikeek ikọ Bowaji otumube—ibe ke otutuuk ebi ene miriọọn̄ ogọt kubọk ire “atalek enenwaan̄ òsusun̄ lek itap me irek”! Kpolọlọ ibe ke olilọk kan̄ me irọriọọn̄ Jioba ijaan̄ mè itọbọ ebum inyi ogọt orọ ibe ikaan̄ mbet ukama eru okup ikeya. Ọmọ si ijeen̄ ikpele ata ejit mè igobo irek Nomi mè ebi kan̄ itet ijaan̄, mè isa me ulọk imen̄e lek igọọk aya irek melek orọmijọn̄ echi ikawuuk lek iriọọn̄. Ire eji ebọkọ akpat ukot kè Rufu, eji mekiweek ijejeen̄ udọk udọk ulibi me lek ubọk iluk ugwem melek orọmijọn̄ ebi ofifi ife. Ire eji erọ ikeya, eji mekaan̄ si ukama eru mè isun̄ lek kiji itap me irek.
w12 10/1 24 ¶3
“Atalek Enenwaan̄ Òsusun̄ Lek Itap Me Irek”
Bowaji imọnọ Rufu me lek nwa. Mgbọ ema ebatbe, Baibul ibe: “[Jioba NW ] orọrọ, ininin̄ owot, mè iman gwun̄ enerieen̄.” Ebibaan̄ ebi Beteleyem migbana Nomi mè itọn̄ Rufu ibe ke inwọn isa inyi Nomi igak ikakaan̄ bọn ebirieen̄ jaaba. Me mgburudun̄, eji eyaka ikween̄ ibe ke ikpele ogwu Ubọọn̄ Debit ire ogwu owot iman gwun̄ kè Rufu. (Rufu 4:11-22) Jisọs Karais oyaka inire ogwu owot iman kè Debit.—Matiyu 1:1.
Week Inu Unye Otu Ewe Okup Me Usem Awaji
w05 3/1 29 ¶3
Ikpakpa Isibi Inu Okup Me Ikpa Rufu
4:6—Me oniin̄ okukup ke ogwu ìrie àkpa mokọt isa “ijijaka” irot inu kan̄ inan̄a me ìrerie àkpa? Me adasi, ire ke ene inin̄ ugbọọri mè inyam irot ijọn̄ kan̄, ogwu ìrie àkpa kan̄ mosa ikpoko inilep ijọn̄ ya me otu-ewe efukbe igọọk me otu-ifuk acha osisik eyi acha ijọk utelelek morebe. (Libitikọs 25:25-27) Sa me ikeya, mkpọ nkaan̄ kan̄ ibokigegele. Ire, ire Rufu iman gwun̄ enerieen̄, ire gwun̄ ya obokaan̄ ijọn̄ ìrie àkpa ya me irot kpan̄si ge me lek ebi ìrie àkpa cha irariak me lek kan̄.
ONYAN̄ IBA 7-13
INU UNYE OTU EWE OKUP ME USEM AWAJI | SAMIEN EYI ADASI 1-2
“Sa Otutuuk Ejit Kwun̄ Riaak Uriaak Nyi Jioba”
ia 55 ¶12
Ọmọ Isa Otutuuk Ejit Kan̄ Iriaak Uriaak Inyi Awaji
12 Ana isun̄ ata akpat ukot ofolek uriaak isa inyi otutuuk ebi eyi Awaji. Jioba isa me ata ejit kan̄ igwen ebi eyi kan̄ ibe esa otutuuk ejit eriaak uriaak enyi ọmọ, mè ekalet inu geege, ekpa otutuuk ufialek kiban̄ enyi ogot kubọk ata gwun̄ okikpa ufialek kan̄ inyi ute okakaan̄ ima. (Fuk Okwa Itọn̄ 62:8; Ebi Teselonaika Eyi Adasi 5:17.) Ogwu ikwaan̄ Pita ire ogwu ekwukwu mbuban onyibe unye ufuna ige usem ukarajit yi ofolek irariaak uriaak inyi Jioba: “Ìkpulu otutuuk uyọrọlek kinyi ìtọp ìgwook ọmọ me lek, mije, îre ọmọ okikpọ enyi chieen̄ me lek.”—1 Pita 5:7.
w07 3/15 16 ¶4
Ike Owa Ke Ana Osa Ikaan̄ Esuuk?
Keke ke eji ebekọt ikween̄ me lek otutuuk inu chi? Eji esikiriaak uriaak inyi Jioba ofolek ufialek kiji, eji mekọt ikpa inyi ogọt ubọk ikupbe eji me lek, mè ibeek ogọt mbeek inan̄a me ejit. Ire kpunu ubọk eji ebekọt isa isan̄a ufialek ya, eji mejuuk ufialek itele inyi ogọt. Kpunu ubọk geege oyaka inwọn igak ikeya.—Urọk 3:5, 6.
Week Inu Unye Otu Ewe Okup Me Usem Awaji
w05 3/15 21 ¶5
Ikpakpa Isibi Inu Okup Me Ikpa Samien Eyi Adasi
2:10—Keke orọ Ana oriaakbe uriaak ibe mè Jioba “inyi ogwu ubọọn̄ kan̄ unye” me mgbọ ebi Ijeren kpekakaan̄ge ubọọn̄ eyi ebilene? Ikan kè Mosis iwuulek itumu ibe ke ebi Ijeren mekaan̄ ubọọn̄ eyi ebilene. (Ikan Òso Mgbọ Iba 17:14-18) Me nriran eyi Jekọp obenbe me inyọn̄ ufo mkpa kan̄, itumu ibe: “Okuba ubọọn̄ [eyi okeke ichit chieen̄ unye ntọ-ikọ ogwu ubọọn̄] ikponan̄a me ubọk kè Juda.” (Ibebene 49:10) Ogakge, ofo me lek Sera—ogwu ebi Ijeren enan̄abe me owot iman kan̄—Jioba itumu ibe: “Owuwa bọn kan̄ mêre ebi ubọọn̄.” (Ibebene 17:16) Isibi ibe ke Ana ikiriaak uriaak ifolek ogwu ubọọn̄ okinu me isi.
ONYAN̄ IBA 14-20
INU UNYE OTU EWE OKUP ME USEM AWAJI | SAMIEN EYI ADASI 3-5
“Jioba Ire Ogwu Okirọ Ene Nsan”
w18.09 24 ¶3
Ọmọ Okaan̄ Unye Ichit, Ire, Ikirọ Ene Nsan
3 Samien ibene ‘ikisi ikwaan̄ inyi [Jioba NW ]’ me akpatan̄ mbuban me mgbọ irebe sọn̄ gwun̄. (1 Sam. 3:1) Me eririeen̄ usen ge mgbọ Samien okebilaak, imumun̄ mkpọ eyi ikawuuge lek imun̄. (Fuk Samien Eyi Adasi 3:2-10.) Inọ ida ge ogwenbe erieen̄ kan̄. Ikikeek ibe ire ida Ilai Ogwu Ibot Ngwugwa oninin̄ ugane, Samien okpigwat lek ilibi isi lek kan̄ mè ibe ọmọ: “Ke owu ogwen emi, kpọ emi gwu.” Ilai obebe ke ọmọ ikagwen ogọt. Mgbọ inu ya orọbe ikeya si ofifi mgbọ iba, Ilai orọriọọn̄ ibe ke ire Awaji okigwen Samien. Itutumu inyi gwun̄ ya ubọk ibosa ifọọk otu, Samien orọrọ ikeya. Keke orọ Jioba ikakpọkge mbum lek kan̄ inyi Samien me adasi mgbọ itibi me ubọk ebi osat kan̄? Baibul ikakpa, ire ubọk inu yi oyakabe isa isibi utoon̄ ikijeen̄ ibe ke irọ ikeya me isasa ijeen̄ sọn̄ gwun̄ Samien nsan. Ijeje ire ikeya?
w18.09 24 ¶4
Ọmọ Okaan̄ Unye Ichit, Ire, Ikirọ Ene Nsan
4 Fuk Samien Eyi Adasi 3:11-18. Jioba inyi me Ikan ibe nsabọn ekelibi ebi ikakan, ogakge ebi ibot otoko. (Isis. 22:28; Lib. 19:32) Ire okeek ibe Samien mokọt ikpọkpọk ije isi isi kè Ilai me ewelegwe mè ikat ejit ikilook ogọt etip eyi itip oyerebet Awaji nje? Ikarọ ikeya! Me atikọ, Baibul ibe ke Samien “ìkakpa inu ya [Jioba NW ] otumube inyi ọmọ ìnyi Ilai, mije ufieek-owot.” Ire, Awaji irọ me Ilai iriọọn̄ ijaan̄ ibe ke ire ọmọ okigwen Samien. Sa me ikeya, Ilai otutumu inyi Samien ibe me ikpa inyi ọmọ. “Kalet inu ge ikeyi me lek otutuuk inu cha geelek [Jioba NW ] otumube inyi owu.” Samien gwun̄ okisiki ibot ‘okpakpa otutuuk inu cha inyi ogọt.’
Week Inu Unye Otu Ewe Okup Me Usem Awaji
w05 3/15 21 ¶6
Ikpakpa Isibi Inu Okup Me Ikpa Samien Eyi Adasi
3:3—Ire Samien Ichubọk Ilaak Me Ere Okup Mbuban Ichit Ni? In̄-in̄, ikalaak. Samien ire ogwu otoko Libai onan̄a me owot iman kè Koyat. (Mfufuk Eyi Adasi 6:33-38) Ọmọ orọ, kpebechieek ibe ‘inin̄ isi ikpọ mgbọ ekichit inu òkup mbuban cha.’ (Otu Ifuk 4:17-20) Gaalek ere Samien okaan̄be irek ininin̄ ire emen oyet egep akpatan̄ mbuban. Ibore ere ilaakbe ireya. Mokọt ire si ibe ke Ilai ilaak me ere ge me emen oyet egep ya. Ida usem obe “ere okop inyan̄a-ibot Awaji okupbe” ikitọ ubọk ifo lek ere akpatan̄ mbuban.
ONYAN̄ IBA 21-27
INU UNYE OTU EWE OKUP ME USEM AWAJI | SAMIEN EYI ADASI 6-8
“Ekene Ore Ogwu Ubọọn̄ Kwun̄?”
it-2 163 ¶1
Ama Ubọọn̄ Awaji
Mido Ubọọn̄ Eyi Ebilene. Sọntiik me lek efit acha ini (400) ibene me mgbọ Esibibe me Ijipit mè mkpọ oraraka efit acha jeeta (800) ibene me mgbọ Awaji onyan̄abe ibot melek Ebereyam, ebi Ijeren edodo ibe enyi ema ubọọn̄ eyi ebilene, ike ubọk ebi ofifi ido ekaan̄be ubọọn̄. Inu ema ekido isibi si ibe ke ema kpeyaka iweek mkpulu kè Jioba. (1 Sam 8:4-8) Me atikọ, ebi Ijeren mikikpọ chieen̄ ibe Awaji isa ama ubọọn̄ inu igọọk me lek use Awaji ochieekbe Ebereyam melek Jekọp, kubọk ewuubelek ikpa. Inu ogọgọọk irọ ibe ema ekaan̄ ikpọchieen̄ yi ire nriran Jecọp obenbe me inyọn̄ ufo mkpa kan̄ ofolek Juda (Ibeb 49:8-10), usem Jioba otumube inyi ebi Ijeren me mgbọ ema Esibibe me Ijipit (Isis 19:3-6), usem okup me emen Ikan inyan̄a-ibot (Ikan 17:14, 15), melek si usini me lek etip Awaji osabe ogwu nriran Balam ilook (Ifuk 24:2-7, 17). Ana nga kè Samien ogwu ogbegbe utoon̄-ejit ijeen̄ ikpọchieen̄ keyi me emen uriaak kan̄. (1 Sam 2:7-10) Ire, Jioba ikakpọkpọk mbum “nlelet inu mbuban” kan̄ ofo me lek Ama Ubọọn̄ ya, ikatutumu si okike mgbọ eyi ibotọbọ ọdọ mkpulu ya mè iyaka ire ubọk mkpulu ya obosa ikup—mè ibore me inyọn̄ ijọn̄ yi sa ire emen inyọn̄. Eya orọ ire me rakaraka lek ke ebi Ijeren ekisa ido ubọọn̄ eyi ebilene.
w11 1/1 27 ¶1
Ọmọ Ikaan̄ Ime Ikerere Ibe Ikaan̄ Ntọbọ-nlọ
Kpọ nu ufọọk-otu Jioba onyibe me mgbọ Samien okpabe inu ya inyi ogọt me uriaak: “Gban̄ utọn̄ me ida ebi ife cha, mè rọ otutuuk inu geelek etumube inyi owu, mije, ìkare owu ke ema ejit. Îre emi ke ema ejit, ibe emi nkayaka ìkikpulu ema.” Eyi ikat Samien ejit, ire, ichubọk ire atalek unyechieen̄ ke ife chi erọ Awaji Okakaan̄ Unye Ichit! Jioba itumu inyi ogwu nriran kan̄ ibe itaba ebi Ijeren ubọk me utọn̄ ofo me lek mkpukpe ema ebekaan̄ me ikakaan̄ ubọọn̄ eyi ebilene. Mgbọ Samien otumube inyi ema, ema etetet lek inye ikibe: “In̄-in̄, eji ekiweek ogwu ubọọn̄ ogwu òbokikpulu eji.” Mije Samien okebisiki ibot inyi Awaji kan̄ mgbọ geelek, ijeje isi itọkọ aran̄ me ibot ogwu ubọọn̄ ogwu Jioba ogobobe.—Samien Eyi Adasi 8:7-19.
w10 1/15 30 ¶9
Mkpulu Jioba Ore Eyi Onwọnwọn!
9 Mfufuk ijeen̄ ibe ke ntaba-ubọk me utọn̄ Jioba onyibe ire atikọ. Mkpulu eyi ubọọn̄ ebilene isa ogbogbo ufialek ijet ebi Ijeren, ogakge isi ire ibe ke ogwu ubọọn̄ ya ikagbe utoon̄-ejit inyi Jioba. Me ikekikeek ubọk ikupbe inyi ebi Ijeren, isibi utoon̄ mkpọ orọrọ mkpulu eyi ebilene ebi kperiọọn̄ge Jioba me otutuuk ukot geelek kpekebikọt irọ ufiak ebilene. Me atikọ, usini ebi mkpulu ekibeek ibe Awaji igbana ema ufuna ema ekọt etap esuuk mè ekaan̄ si utelelek, ire, Awaji iborọrọ igbana ebi kecha kpesikibe ibot inyi mkpulu eyi kan̄?—Itọn̄. 2:10-12.
Week Inu Unye Otu Ewe Okup Me Usem Awaji
w02 4/1 12 ¶13
Keke Orọ Ekikaan̄ Ntap-me-mun̄?
13 Ene mogwu ikom sabum onokaan̄ ntap-me-mun̄ kubọk ire ogwu Ata-ikọ Jioba. Igwugwu ikom ire ene isasa ejit kan̄ irọ ntumumfiek mè igobo isasa otutuuk ejit kan̄ igọọk Jisọs Karais. Ebi ikup ikeya mijit oka ugwem kiban̄ mè itumu ifieek ikekirọ inu onenen me chieen̄ Awaji. Usem Iburu melek Girik esabe irọ mkpọ me emen Baibul ofolek igwugwu ikom, ikijeen̄ ene igwugwu isi ikom, igba udun̄ ifit. Eyi ikijeen̄ igwugwu ikom igọọk Awaji mè itele ijo oniin̄. (Ebi Ubọọn̄ Eyi Adasi 8:33, 34) Igwugwu ikom ikirọ ibe ebi ene ekerọ “irọrọ echi òkijeen̄ ibe ke ema mîgwu ikom.” (Ikwaañ 26:20) Isibi ibe ke ene mojit ataak ntọbọ ebum itele, ikirọ inu igọọk me lek ikan Awaji, mè ikitọbọ ebum inyi Jioba gaalek. (Ikan Òso Mgbọ Iba 30:2, 8-10; Samien Eyi Adasi 7:3) Igwugwu ikom ikirọ ibe ene inwene me ubọk ikikeek inu, inu itobe me isi, melek irọrọ kan̄. (Ijikien 18:31) Eji ‘ekigwu ikom’ me mgbọ eji esitele ijo irọrọ mè iyaka initap ayaya ugwem.—Ikwaan̄ 3:19; Ebi Efesọs 4:20-24; Ebi Kọlọsi 3:5-14.
ONYAN̄ IBA 28–ONYAN̄ ITA 6
INU UNYE OTU EWE OKUP ME USEM AWAJI | SAMIEN EYI ADASI 9-11
“Sọọlu Ire Ogwu Okisiki Lek Me Adasi Mgbọ”
w20.08 10 ¶11
Sa Me Usikilek Mè Ata Eru Kisi Ikwaan̄ Nyi Awaji
11 Keek mkpọ ofolek ogwu Ubọọn̄ Sọọlu. Ọmọ ire ogwu okakaan̄ usikilek me mgbọ ikupbe ijija. Ọmọ iriọọn̄ ere unye kan̄ oyakabe mè ijit ibọbọkọ akpan ikwaan̄ isọkọ me lek. (1 Sam. 9:21; 10:20-22) Ire, me mgburudun̄, Sọọlu ibene ikigumu lek. Ijeen̄ eru kan̄ yi me sọntitiik mgbọ irarak eyi erọbe ogọt ubọọn̄ isan̄a. Me ike mgbọ ge, ikakọt ikaan̄ ime ikup ikpọ ogwu nriran Samien. Kpan̄asi ibosa me usikilek ikup mè itoon̄ ejit ibe ke Jioba monyan̄a ebi kan̄, Sọọlu isigwa ngwugwa ewọwọp ikerere ibe ke kpenyi ogọt unye ibe irọ. Sa me ikeya, Sọọlu ikayaka ikaan̄ nnwọn isi kè Jioba mè ichep si irek ubọọn̄ ya. (1 Sam. 13:8-14) Ire eji ikween̄ mkpọ inan̄a me lek inu yi orọrọ mè ijit rakarakalek, isibi ibe ke eji miriọọn̄ inu.
w14 3/15 9 ¶8
Ubọk Ebekọt Ikup Inye Ikikaan̄ Ekwukwu Isasa Lek Igwa Ngwugwa
8 Ogwu Ubọọn̄ Sọọlu ire inu ijejeen̄ isa inyi eji ibe ke ikakaan̄ olilọk eyi lek ene mokọt irọ mè ene ikayaka ikaan̄ ekwukwu isasa lek igwa ngwugwa. Mgbọ Sọọlu obenebe ikpulu ikamọnọ lek kan̄ ibene. (1 Sam. 9:21) Ikachieek inyinyi ebi Ijeren ebi itutumu usem ikeme irek ubọọn̄ kan̄ osusut, ikerere ibe ke ikaan̄ unye isasa inyi ema osusut me isasa ibem irek eyi Awaji onyibe ogọt. (1 Sam. 10:27) Ogwu Ubọọn̄ Sọọlu ichieek ibe ekwukwu mbuban Awaji iban ọmọ mè isi itim akọn̄ ikeme ebi Amọn, mè itim igak. Mgbọ ema ekabe, isa me usikilek itọn̄ Jioba me irọrọ ibe akọn̄ inwọn ema.—1 Sam. 11:6, 11-13.
w95 12/15 10 ¶1
Ebi Amọn—Ebi Isa Ochicha Ikpe Nsan Ejit
Ebi Amọn mikpọk isa ochicha inikpe nsan ejit eyi Jioba ojeen̄be ema. Jioba ikakpọ chieen̄ ilọ me lek atalek ikpak inu yi ema erọbe. “Sọọlu inọnọ etip [ebi Nayas] ya, Ekwukwu Awaji oninin̄ ijot ọmọ emen. Ejit onanaan̄ ọmọ enenen.” Igọọk me ntọ-ubọk eyi ekwukwu mbuban Awaji, Sọọlu otititiin̄ efit obop ebi akọn̄ ita mè akọp obop ita (330,000) ebi isi isikpan̄ ebi Amọn mege “ene iba kpegbaan̄ isik me ere ge.”—Samien Eyi Adasi 11:6, 11.
Week Inu Unye Otu Ewe Okup Me Usem Awaji
w05 3/15 22 ¶8
Ikpakpa Isibi Inu Okup Me Ikpa Samien Eyi Adasi
9:9—Keke ore mkpọ usem yi mokọtbe isibi “ebi ekigwen ebi nriran me ukot keyi, me ukot mgbọ ya, ebi ene ekigwen ema ebi ìmọọn̄ inu”? Usem yi mokọt ikijeen̄ ibe ke ike ubọk ebi nriran esabe ikup me ufiak enenen me mgbọ ukot kè Samien melek ukot mgbọ ebi ubọọn̄ me Ijeren, ke eyaka ikigwen ida usem “ìmọọn̄ inu” “nriran”.—Ikwaan̄ 3:24.