Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais
© 2024 Watch Tower Bible and Tract Society of Pennsylvania
ONYAN̄ ITA 3-9
INU UNYE OTU EWE OKUP ME USEM AWAJI URỌK 3
Jeen̄ Utoon̄-Ejit Kwun̄ me lek Jioba
ijwbv article 14 ¶4-5
Urọk 3:5, 6—“Kasa Ngobo-Ntet Eyi Akpalek Kwun̄ Ìbieen̄ Me Lek”
“Sa otutuuk ejit kwun̄ toon̄ me lek Jioba.” Eji ekijeen̄ ibe ke eji mitoon̄ ejit me lek Awaji mgbọ geelek eji ekirọ mkpọ iweekbe. Eji ebesasa otutuuk ejit kiji itoon̄ me lek Awaji. Me emen Baibul usem ejit isibi inu ene erebe me emen, eyi igọbọ ubọk inu okikup me lek ene, inu okibieen̄ ene ibe irọ mkpọ, inu ene okikeek, mè eru ene. Eya orọ, isasa otutuuk ejit kiji itoon̄ me lek Awaji ikare gaalek ubọk inu okup eji me lek. Ire ntumu-mfieek eji ekirọ mije eji michieek inye ibe ke Awaji iriọọn̄ inu onwọnwọn̄ ichit inyi eji.—Ebi Rom 12:1.
“Kasa ngobo-ntet eyi akpalek kwun̄ ìbieen̄ me lek.” Ikup ufiak ibe eji etoon̄ ejit me lek Awaji mije eji kpebekọt iyaka lek imaan̄ me lek ngobo-ntet kiji eyi ikasoge. Ire eji iyaka lek imaan̄ me lek ubọk inu okupbe eji me lek gaalek, eji mekọt irọ ntumu-mfieek echi me adasi mgbọ mokọt ikup kubọk ijajaan̄, ire, me ota kan̄ mosan̄a ufialek isibi. (Urọk 14:12; Jerimaya 17:9) Iriọọn̄-inu Awaji ibene enenen igak eyi kiji. (Asaya 55:8, 9) Mgbọ geelek eji esitele ibe nkeek Awaji ikibem eji, ugwem kiji moje ijaan̄.—Okwa Itọn̄ 1:1-3; Urọk 2:6-9; 16:20.
ijwbv article 14 ¶6-7
Urọk 3:5, 6—“Kasa Ngobo-Ntet Eyi Akpalek Kwun̄ Ìbieen̄ Me Lek”
“Riọọn̄ Jioba me oniin̄ kwun̄ geelek.” Ikup ufiak ibe eji ekemun̄ mkpọ ike Awaji okimun̄ me inu geelek eji ekirọ mè me lek ntumu-mfieek geelek eji ekirọ. Eji eberọ eyi sa me ikekibeek ọmọ me uriaak ibe inyi eji ntọ-ubọk mè sa me ikekirọ inu itumube me emen Usem kan̄ Baibul.—Okwa Itọn̄ 25:4; Timọti Eyi Òso Iba 3:16, 17.
“Ke ọmọ môrọ mè oniin̄ kwun̄ ije itat.” Awaji ikirọ ibe oniin̄ kiji ije itat sa me ikekitap ubọk inyi eji eluk egọọk onineen̄ ata irọrọ kan̄. (Urọk 11:5) Sa me ikeya, eji mikijit usini ufialek mè ikinwọọn̄ ugwem eyi ubelejit.—Okwa Itọn̄ 19:7, 8; Asaya 48:17, 18.
be 76 ¶4
Ro Inyi Nje-Nyi-Isi Kwun̄ Isibi Utoon̄
Mije ijebe itibi owuwa inu me ugwem, ene mokot ikikeek ibe: ‘Nwuuk lek ichichini irek yi me mgbọ oraraka. Nriọọn̄ mkpọ mbarọ.’ Ire, ire ikekikek mkpọ ikeya ijeen̄ iriọọn̄-inu ni? Ikpa Urọk 3:7 itaba eji ubọk me utọn̄ ibe: “Kare ogwu òriọọn̄ inu me chieen̄ kwun̄ gaalek.” Inu eji ejebe itibi me ugwem motap ubọk inyi eji ekeek mkpọ edọk eji esikirọ mkpọ. Ire, me ire eji ekije inyi isi me irek emen ekwukwu, inu eji ejebe itibi ya morọ ibe eji eriọọn̄ ibe ke eji miweek ugbana Jioba inyi eji ekọt ekerọ ejaan̄. Nje-nyi-isi kiji ikisibi utoon̄ ikare me mgbọ eji ekiyaka lek imaan̄ me lek kiji me mgbọ eji esichichini irek ge, kpan̄asi ikeya, ire mgbọ eji ekisi lek Jioba ibe inyi eji ntọ-ubọk. Nje-nyi-isi kiji ikisibi utoon̄ si sa me eji ikakaan̄ unye-ejit ibe ke kpunu inu geege oborọ me ire Jioba ikatele ibe irọ, mè eji ikukup inye ikikaan̄ ata mgbaan̄je melek Nte kiji ogwu okup me emen inyọn̄.
Week Inu Unye Otu Ewe Okup Me Usem Awaji
w06 9/15 17 ¶7
Inu Ekpabe Ofolek Ikpa Urọk
3:3. Eji emọnọ igbegbe utoon̄-ejit mè ata ejit ebene mè ekerọ ibe ebi ene ekemun̄, ike eji eberọ me lek mkpọ-ebek okukup me unye otu ewe inyi eji. Eji si mege eru chi isun̄ me emen ejit kiji sa me ikekijeen̄ ema mgbọ geelek me ugwem kiji.
ONYAN̄ ITA 10-16
INU UNYE OTU EWE OKUP ME USEM AWAJI URỌK 4
“Gbala Chieen̄ Kpọ Ejit Kwun̄”
w19.01 15 ¶4
Ike Owa Ke Obosa Igbala Chieen̄ Kpọ Ejit Kwun̄?
4 Me ikpa Urọk 4:23, usem ekababe “ejit” ikitumu mkpọ ofolek mbet lek ene eji erebe me emen (Okwa Itọn̄ 51:6) Eyi isibi ibe ke usem ekababe “ejit,” ikiyana ubọk ifolek inu eji ekikeek me emen ejit kiji, ubọk mkpọ okikup eji me lek, inu okibieen̄ eji ibe erọ mkpọ, mè ulọk kiji. Ire ogwu eji echubọk ire me emen, ikare ogwu ebi ene ekimun̄ ibe eji ere.
w19.01 17 ¶10-11
Ike Owa Ke Obosa Igbala Chieen̄ Kpọ Ejit Kwun̄?
10 Ire eji ebekọt igbala chieen̄ ikpọ mè iyaka ire ibem ejit kiji, eji ebedadasi imun̄ ufialek okinu mè irọ mkpọ ugwat ugwat isasa ibem lek kiji. Usem ekababe “gbala chieen̄ kpọ” mè iyaka ire bem me ikpa Urọk 4:23 ikikeek eji ikwaan̄ ebi mbem ekirọ. Me usen Ogwu Ubọọn̄ Solomọn, ebi mbem ekikeke me inyọn̄ mgban ama ikibem ere mè etaba ebi ene ubọk me utọn̄ mgbọ geelek ema esimun̄ ufialek okinu. Ikekikeek inu yi motap ubọk inyi eji egobo etet inu eji eberọ isasa ikput Setan ibe ikajijaka nkeek kiji.
11 Me ukot ikan̄, ebi ikibem ere mè ebi ikibem otunchit ekigbagban̄ ikwaan̄ isi. (2 Sam 18:24-26) Ema urum iba ekitap ubọk ibem ama sa me imumun̄ ibe ke michit otunchit mgbọ geelek ebi ochicha ekinu. (Neyem 7:1-3) Nkeek kiji esabe Baibul ikpukpo mokọt ikup kubọk ogwu mbem mè itaba eji ubọk me utọn̄ mgbọ geelek Setan isi iweek ijijijaka ubọk eji ekikeek mkpọ, ubọk inu okikup eji me lek, inu okibieen̄ eji, mè iyaka ire ulọk kiji. Mgbọ geelek nkeek kiji isi itaba eji ubọk me utọn̄, ikup ufiak ibe eji egban̄ mè erọ inu geelek eji ebekọt inyi ufialek ya ikare eji lek.
w19.01 18 ¶14
Ike Owa Ke Obosa Igbala Chieen̄ Kpọ Ejit Kwun̄?
14 Isasa ibem ejit kiji, ikare gaalek ibe ke eji mechit ejit kiji inyi ijo mkpọ ikanin̄, ire, eji si mechili ejit kiji inyi ata mkpọ ikinin̄. Yaka keek-nu mkpọ ofolek inu ntọt me lek ofolek ama enamabe mgban ikana. Ogwu okibem otunchit ikichichit otuchit inyi ebi ochicha ekanin̄ ama, ire, mochili otuchit ya inyi mekọt isa inorie mè ofifi mkpọ inu me ama ya. Ire kpechili otuchit ama ya uraafiọọn̄ mokpan̄ ebi ikup me emen ama ya. Ubọk yaage si, ire eji iweek ibe ubọk Awaji okikeek mkpọ ikikaan̄ mgbaan̄ me lek kiji, eji ebekichichili ejit kiji inyi ata mkpọ ikinin̄.
w12 5/1 32 ¶2
“Gbala Chieen̄ Kpọ Ejit Kwun̄!”
Keke orọ eji ebegbala chieen̄ ikpọ ejit kiji, orere ogwu eji erebe me emen ni? Inan̄a me unye Awaji, Ogwu Ubọọn̄ Solomọn ige ibe: “Gbala chieen̄ kpọ ejit kwun̄ gak inu geelek, mije, îre emen kan̄ ke inu òkinyi ene ugwem okigbuk isibi.” (Urọk 4:23) Mbet lek ugwem eji ekiluk me mgbọ keyi mè ikpọchieen̄ iluluk ugwem me mgbọ okinu me isi iyaka imaan̄ me lek ubọk ejit kiji orere ogwu eji erebe me emen okupbe. Bak lek eke ni? Mije, Awaji ikikpọ ene me ejit. (Samien Eyi Adasi 16:7) Ire mbet lek ene eji erebe me emen okitumu ubọk Awaji okimun̄ eji.—Pita Eyi Adasi 3:4.
Week Inu Unye Otu Ewe Okup Me Usem Awaji
w21.08 8 ¶4
Ire Okup Me Mbem Lek Ikukup Ikpọ Jioba Ni?
4 Ikpa Urọk 4:18 itumu inyi eji ibe ke “oniin̄ ebi ata irọrọ ìkup kubọk egwe òkitotoon̄ inu, eyi òkpọkpọ ikitoon̄ ifo isi, mege egwe òwele ònye.” Ere Baibul yi irọ ibe isibi utoon̄ ibe ke Jioba ikichili nkeek kan̄ ijeen̄ ebi kan̄ sọnja sọnja. Ire, ere Baibul yi si mokọt itap ubọk inyi eji emun̄ ubọk ogwu eyi Karais okisa irọ unwene me ugwem kan̄ mè ikitaba lek iriaak me lek Jioba. Irọrọ uwene mè itataba lek iriaak me lek Awaji ikakirọ me ugwat ugwat ikeya, ire mkpọ okimọnọ mgbọ. Ire eji ekiriọọn̄ ubọk ikween̄ mkpọ mè ikitap nteme eji ekibọkọ inan̄a me ntitiin̄ Jioba me ikwaan̄, sọnja sọnja eji mekaan̄ mbet lek eru kè Karais. Iriọọn̄-inu kiji ofolek Awaji si mokimin igbaalek. Kpọ-nu ubọk Jisọs osa inu ntọt-me-lek ge isa ikpa eyi iwele.
ONYAN̄ ITA 17-23
INU UNYE OTU EWE OKUP ME USEM AWAJI URỌK 5
Da Lek Bọkọ Jọn̄ọ Ere Me Lek Ugwem Barabat
w00 7/15 29 ¶1
Omokọt Ikup Me Utana Me Inyọn̄ Eyi Barabat
Me urọk yi ekpa mkpọ ofolek ene yi kubọk “enewaan̄ barabat” mè iyaka ire ogwu oje oyet. Usem ikisa ifiaan̄ ene ikinin̄i kubọk aran̄ akwọọk mè okup eriook eriook kubọk aran̄ olifu. Ire ubọk uleke irọrọ barabat okikup owuwa mgbọ ire ya? Kubọk inu njeen̄ kpọ-nu ukpatu enewaan̄ akọp acha iba mè jaaba ojajaan̄ uja okisi ikwaan̄ kubọk ogwu uti ikpa ekigwen Amy. Amy itumu ibe: “Ogwu enerieen̄ yi me ere ikwaan̄, ikijeen̄ emi ulọk enenen mè ikitọn̄ emi mgbọ geelek. Itop emi me lek enenen si irọriọọn̄ ibe ke mekimun̄ inu nkirọ. Ire, mmun̄ ibe ke ulọk kan̄ ire iweweek ilaak gaalek. Kpabachieek ibe usem mè ulọk kan̄ ifiaan̄ emi.” Usem unin̄i-otu ebi ikiweek ileleke ene me ire inan̄a me otu enerieen̄ mè iyaka ire enewaan̄ ikitotop ene me lek, itata eji egwagwat lek iriọọn̄ ibe ke ire uleke. Ufuna eji ekọt ekwat lek eriọọn̄, eji ebekakaan̄ ata nkeek.
w00 7/15 29 ¶2
Omokọt Ikup Me Utana Me Inyọn̄ Eyi Barabat
Ufialek okinan̄a me lek ugwem barabat ikijajat kubọk olulut mè oreke kubọk oge isi iba—ikitap ene me unaan̄, mokọt ikpan̄ ene si. Owuwa mgbọ ejit okifieek ene ikọ, owot ekaweekbe mè orukan̄ ore ijo mkpukpe okinan̄a isibi me lek ugwem barabat. Keek si ikpele unaan̄ olom mè iyaka ire nwa ogwu nwa kan̄ mè iyaka nlom kan̄ orọbe barabat okije itibi. Barabat erọbe mgbọ ge gaalek mokọt itap ikpele unaan̄ eyi obokọt ibia mege ene okwu. Me atikọ, ugwem barabat ichubọk ikisak ene unan.
w00 7/15 29 ¶5
Omokọt Ikup Me Utana Me Inyọn̄ Eyi Barabat
Ikup ufiak ibe eji eda lek ebọko ejọnọ ere me lek ebi ibekọt irọ ibe eji ebubat. Eji ekabook lek kiji inyi ugwem barabat sa me ikekigban̄ okwa ikatanage, ikekikpọ inu inwọọn̄ lek echi ikatanage, mè iyaka ire ikekikpọ ogugo njak? (Urọk 6:27; Ebi Kọrint Eyi Adasi 15:33; Ebi Efesọs 5:3-5) More inu burubut si itataba ulọk kiban̄ inu me lek kiji sa me ichachat lek me lek kiban̄ iraka ubọk mè iyaka ire, itatap mkpọ ubọk ikagbege!—Timọti Eyi Adasi 4:8; Pita Eyi Adasi 3:3, 4.
Week Inu Unye Otu Ewe Okup Me Usem Awaji
Keke Ke Baibul Otumu Ofolek Ilaak
Ilaak ire uche onan̄a me ubọk Jioba. Iweek ibe enerieen̄ mè enenwaan̄ ibabat enwọọn̄ uche yi. Ikare gaalek ikakaan̄ nsabọn ke uche yi okup inyi, ire, ikinyi olom mè nwa irek isasa ijeen̄ ima me lek ge ge me oniin̄ onwọnwọn. Eya orọ Usem Awaji obe: “Bele ejit me lek nwa mgbọ nsabọn̄ irieen̄ kwun̄.” (Urọk 5:18, 19) Jioba iweek ibe ebi eyi Karais ibabat ekegbe utoon̄-ejit enyi ge ge inyi ema ekarọ ugan-nwa—Fuk Ebi Iburu 13:4
ONYAN̄ ITA 24-30
INU UNYE OTU EWE OKUP ME USEM AWAJI URỌK 6
Keke Ke Eji Ebekọt Ikween̄ Inan̄a Me Lek Atat?
it-1 115 ¶1-2
Atat
‘Iriọọn̄-inu Awaji Otapbe Me Emen Kiban̄.’ Iriọọn̄-inu ebi kè atat ikare inan̄a me lek ikwekween̄ mkpọ, ire, ire ubọk Awaji orombe ema ire ya. Baibul ibe ke ebi kè atat “ekisa mgbọ ura ibọm inorie igwook, mè ikisa mgbọ ekirọkọ uko ititiin̄ inu irerie kiban̄ isun̄.” (Urọk 6:8) Ge me lek atat eyi emalek iriọọn̄ mkpọ ofolek okup me Palestine, ire eyi ekigwen harvester, mè iyaka ire agricultural, ant me ebeke (Messor semirufus), ema ekisun̄ owuwa inorie me mgbọ ura ere okiyok inyi ema mekọt ikirie me mgbọ ibot, mgbọ ikakaan̄ inorie okiyọt. Ekimalek imun̄ atat yi me ere igen̄ akpa, ere akpa okiwa. Ire ibot irọ ibe mfut ema esun̄be ya itọọk, atat chi meben isibi inyi ura ichat. Mimun̄ si ibe ke ema mikilom agan̄ geelek obebene ijọ me lek mfut isan̄a inyi mfut ya ikatibi me ere ekisun̄ ema. Urum atat chi ire echi ekimun̄ ike ema ekije ge me udun̄ ge melek okpọkọ inorie okikup me otu udọn̄ kiban̄.
Ata Eru Eyi Ebekọt Ikween̄ Mkpọ Inan̄a Me Lek. Sontiik inu yi eji emun̄be ofolek atat itap unye me lek usem Solomọn obe: “Owu ogwu ugbek, je si lek ebi kè atat, kpọ ubọk ema ekirọ inu, mè sa kween̄ inu nyi lek kwun̄.” (Urọk 6:6) Ikare gaalek ibe ke ebi kè atat mikineen̄ lek iban mgbọ okup me isi, ire, ema ekitetet lek inye, owuwa mgbọ ema ekitaba mkpọ echi ololobo igak ema mgbọ iba. Ema ekirọrọ inu geelek okukup ufiak isasa irọ ikwaan̄ kiban̄ iso, ema kpekigwu ikom ikerere ibe minan̄a irọn̄. Ebi kè atat ekigbagbaan̄ ikwaan̄ isi. Ema ekisusun̄ udọn̄ kiban̄ me utana mè ekaan̄ ulọk me lek ebi melek kiban̄ ekigbaan̄ isi ikwaan̄, usini mgbọ ema mikitaba ebi unan osakbe me lek mè iyaka ire ebi efuuk otabe me owot iyaka inu me udọn̄.
w00 9/15 26 ¶3-4
Bem Erieen̄ Kwun̄
Kubọk atat, ikup ufiak ibe eji eketap efuuk esi ikwaan̄? Ikekitap efuuk isi ikwaan̄ mè ikekirọ ijaan̄ me ikwaan̄ eji ekisi morọ eji oruru, me ire ekikpọkpọ eji sa kpekpọ eji. Me ire me uwu kiji, ere ikwaan̄ kiji mè mkpọ eji ekirọ me ntitiin̄, eji erọ eyi efuuk kiji obokọt. Ike atat okikaan̄ oruru inan̄a me lek ikekitap efuuk isi ikwaan̄, ikeya si, Awaji iweek ibe eji ‘ekemun̄ nnwọn̄ me lek ikwaan̄ kiji.’ (Ogwu Etip 3:13, 22; 5:18) Utọn̄ọ nkeek mè ikakaan̄ ujot-owot ore mkpukpe okinan̄a me lek itatap efuuk isi ikwaan̄.—Ogwu Etip 5:12.
Solomọn isa idodo iba isa iweek itatap ubọk inyi ebi ugbek, ido ibe: “Jei, ogwu ugbek, kpa mgbọ ke owu obolaak inyana ire? Ìre kpa mgbọ ke obobolo chieen̄ me ilaak okilaak?” Ogwu Ubọọn̄ Solomọn itumu ibe: “Owu môkup me lek ilalaak-nu sọnja, mè inyenyieen̄-nu sọnja, mè igbagba-nu ubọk ikat isiki efuuk sọnja, ugbọọri môkakana isibi owu me uwuuk-lek kubọk ogwu ije; una ubọk mônunu kubọk ogwu inọ afa inichan owu irak” (Urọk 6:9-11) Ike ogwu ugbek okilaak ibia me inyọn̄ mkpilaak, ugbọọri motet ọmọ me uwuuk-lek, una ubọk monu inyi ọmo kubọk ogwu inọ afa. Mbubet mè abọm egbe ikigwagwat lek itibi ijot uko ogwu ugbek. (Urọk 24:30, 31) Ewe geelek ikiyam ikigwagwat lek ichep. Ire ekene ogwu nte uwu obotele ogwu ikwaan̄ ogwu ugbek me lek ikwaan̄? Sa gwun̄ uwu ikpa ogwu ikakima ikwekween̄ mkpọ ibojeje iro ijaan̄ me uwu ikpa ni?
Week Inu Unye Otu Ewe Okup Me Usem Awaji
w00 9/15 27 ¶3
Bem Erieen̄ Kwun̄
Inu jaaba ekpabe mkpọ ofolek me ikpa urọk yi, iben agan̄ ilile me lek otutuuk ijo inu. “Chieen̄ òkikpọ ene isiki” mè “ejit òkitọt otitọt ijo inu” ire ijo inu ekirọ me ekiket ene. “Otu alọm òkikan̄ ataak” mè “ogwu ata-ikọ òkikan̄ ataak ataak igwook” ire ijo inu ekirọ inan̄a me lek usem ene okitumu. “Ubọk òkifiat eje ogwu ǹkalọ” mè “ukot òkifet ililibi inin̄ emen ijo inu” ire inu ikpak. Jioba ichubọk icha ebi geelek ikima itatap ufialek me etete ebi ikiluk me esuuk. Itatap ijo inu cha isọkọ inan̄a melek gweregwen ifo lek jaaba ijeen̄ ibe ke ijo inu ekpabe me ere yi ikaben otutuuk inu Jioba ochabe, eyi irebe ibe ke inu ikpak ebilene ikiwawa igbaalek.
ONYAN̄ ITA 31–ONYAN̄ INI 6
INU UNYE OTU EWE OKUP ME USEM AWAJI URỌK 7
Jit Irek Echi Obotap Owu Me Ntọ-Mkpọ
w00 11/15 29 ¶5
“Sun̄ Ikọ Ntọbe, mè Gat Ugwem”
Usini mgbọ otu nruruk eyi Solomọn okikpọ itibi ikaan̄ mkpọ egonbe ikana. Ike egwe okifit, lek oniin̄ okidun. Solomọn imun̄ ogwu nsabọn̄ irieen̄ ge ikakaan̄ge nden̄. Usini mgbọ iriọọn̄ mbet lek ere ọmọ ojebe iniin̄ mè mkpọ obokọt irọ ọmo me ere ya. Ogwu nsabọn irieen̄ ya ije ifo agan̄ uwu ene ge. Ekene ore ene ya? Keke ke ibokọt irọ?
w00 11/15 30 ¶4-6
“Sun̄ Ikọ Ntọbe, mè Gat Ugwem”
Ogwu enewaan̄ yi ikaan̄ unin̄i otu. Me kpunube esip me isi ikitmu usem kan̄ melek unye-ejit. Otutuuk inu geelek ikitumu irọriọọn̄ ubọk ineen̄ isasa ileke ogwu nsabọn irieen̄ ya. Sa me itutumu ibe ke ọmọ igwa ngwugwa esuuk me usen ya mè irọ inyan̄a-ibot kan̄ iso, ogwu enenwaan̄ ya ikijeen̄ ibe ke ọmọ ire ogwu ata irọrọ, ke ọmọ ikaan̄ ata mgbaan̄je melek Awaji. Ngwugwa esuuk ekigwa me uwu mbuban me Jeruselem igobo anam, akpa ekọkọk, aran̄, mè miin̄. (Libtikọs 19:5, 6; 22:21; Otu Ifuk 15:8-10) Eyi irebe ibe ke ogwu ogwagwa ngwugwa esuuk mè ebi ototun̄ ukan̄ kan̄ mekọt igọọk ikaan̄ uche me lek ngwugwa ya, ogwu enenwaan̄ ya ikitumu ibe ke owuwa inorie mè miin̄ ọmọ owa me uwu kan̄. Eyi isibi ibe ke ogwu nsabọn irieen̄ ya monwọọn̄ lek me uwu kan̄. Ogwu enenwaan̄ ya itumu si ibe ke ọmọ inan̄a me uwu kan̄ inu iniweek ogwu nsabọn irieen̄ ya. Mokup nsan nsan enenen ire ikaan̄ ogwu ochechieek mbet ikọ ya. Ene ge ogwu okikween̄ Baibul itumu ibe: “Ire atikọ ibe ke ogwu enenwaan̄ ya ikiweek ene, ire, ire ichubọk ibak lek ogwu nsabọn irieen̄ ya inu ni? Ire ogwu mbubut kubọk mbet lek ogwu nsabọn irieen̄ ya obochieek ikọ kan̄.”
Me mgbọ irọbe ibe ogwu nsabọn̄ irieen̄ ya ibene ikikaan̄ ulọk me lek kan̄ inan̄a me lek mkpọ itapbe, usem unin̄i otu kan̄, ikakat ọmọ mè ififip otu kan̄ isan̄a, ogwu enenwaan̄ ya obene ikitumu mkpọ oborọ ibe ogwu nsabọn̄ irieen̄ ya ikikeek mkpọ okiduku utop utop olu. Itumu ibe: “Mwele ujuja ekwut mkpilaak me inyọn̄ mkpilaak n̄a, ekwut lilin̄ kpa chieen̄ kpa chieen̄ ònan̄a me Ijipiti ke mwele. Nnyan aran̄ òkibubaan̄ olu eyi uti mâa, mè uti alò, mè uti sinamọn me lek mkpilaak n̄a.” (Urọk 7:16, 17) Irọriọọn̄ ubọk isa ekwut lilin̄ ònan̄a me Ijipiti ineen̄ inyọn̄ mkpilaak kan̄ mè iyan aran̄ maa, alo, mè sinamọn okitop olu me inyọn̄.
Ogwu enenwaan̄ ya itumu si ibe: “Na, mè eji elaak ejot, mege ere ewelegwe; eji ebele lek kiji ejit me ima.” Ogwen yi ikakpọkpọ ire ene iba ikwekweek igbaan̄ irie inorie. Ogwu enenwaan̄ ya ichieek ọmọ use ibe ke ema melaak. Isa inyi ogwu nsabọn̄ irieen̄ ya eyi ikup kubọk mkpọ obotop! Isasa ileke ọmọ igbaalek, ogwu enenwaan̄ ya otutumu ibe: “Nlom n̄a kpunu me uwu; îkọp uran̄ isi ujọn̄ọ ere. Îben akpa ikpoko kan̄ isa igbaalek ije, ikaka kan̄ ìbore me etete onyan̄.” (Urọk 7:18-20) Itumu inyi ọmọ ibe ke kpunu ufialek geege, mije, ke nlom kan̄ ikọp uran̄ isi ujọnọ ere, ke ikpobogwat lek ika. Ogwu enenwaan̄ yi ichubọk ifiaan̄ ogwu nsabọn irieen̄ yi! “Isasa ogbogbo unin̄i otu ikọ irọ gwun̄ enerieen̄ ya ichieek, mè isa otu ofiaan̄ kan̄ ileke ọmọ.” (Urọk 7:21) Iboweek mbet lek enerieen̄ obet lek Josefu isasa ikọt ijit uleke yi. (Ibebene 39:9, 12) Ire ogwu nsabọn irieen̄ yi mokọt ijit ni?
w00 11/15 31 ¶2
“Sun̄ Ikọ Ntọbe, mè Gat Ugwem”
Ogwu nsabọn̄ irieen̄ yi ikakọt ijit ogwen ya. Me ikakekeek inu geege, ibebene ikigọọk ogwu enenwaan̄ ya “kubọk eriembuuk ebesa isi ikpan̄.” Ike ogwu etapbe mkpọn ikpobokọt iwọnọ osusut, ogwu enerieen̄ yi itele ibe ijo inu ileke ọmọ. Ikamun̄ unan obonan̄a isibi me lek “mege oraan̄ ofuun̄ ònin̄ ọmọ ejit,” orere, mege ibọkọbe unan eyi obokọt isa mkpa ijit ọmọ. Mkpa yi mokọt ire mkpa eyi anam akpalek, mije, mokọt iben ijo orukan̄ eyi obokọt ikpan̄ ọmọ. Unan yi mokọt irọ ibe ọmọ ikwu mkpa me irek emen ekwukwu; “ìkariọọn̄ ibe ke ugwem kan̄ môje igọọk.” Inu yi ikaan̄ ikpele mgbaan̄ me lek otutuuk ugwem kan̄, irọ ijo inu omimin ikeme Awaji. Ikije ugwat ugwat ifo lek mkpa kubọk unọn okiwulu isi inin̄ emen ufe!
Week Inu Unye Otu Ewe Okup Me Usem Awaji
w00 11/15 29 ¶1
“Sun̄ Ikọ Ntọbe, mè Gat Ugwem”
Ogwu Ubọọn̄ Solomọn ige ibe “Bọp ema [ikan n̄a] kam me otubọk kwun̄, mè ge ema sun̄ me emen emen ejit kwun̄.” (Urọk 7:3) Otubọk ire ere chieen̄ kiji okimun̄ mgbọ geelek, ema mikup ufiak si eji isasa irọ inu eji ekaan̄be me nkeek. Inu eji ekween̄be me Ikpa Mbuban inan̄a me ubọk nte kiji mè nga kiji mè iyaka ire iriọọn̄-inu eji ekaan̄be inan̄a me emen Baibul ire mkpọ eji ebekikeek me inu geelek eji ekirọ. Eji ebegege ema isun̄ me emen ejit kiji sa me ikekijeen̄ ema mgbọ geelek me ugwem kiji.
ONYAN̄ INI 7-13
INU UNYE OTU EWE OKUP ME USEM AWAJI URỌK 8
Gban̄ Utọn̄ Melek Iriọọn̄-Inu Kè Jisọs
cf 131 ¶7
“Emi Mma Nte N̄a”
7 Me agba eyi 22, iriọọn̄-inu itumu ibe: “Jioba ìdadasi irom emi sabum înibebene ikwaan̄ kan̄, emi nre adasi inu îsan̄abe isibi bene me atalek ibebene.” Ikare iriọọn̄-inu ikike ke ekitumu mkpọ ofolek me ere yi, mije iriọọn̄-inu ikare mkpọ erorom. Ikukup karake, mije, Jioba ikukup mgbọ geelek ọmọ si ikakaan̄ iriọọn̄-inu. (Okwa Itọn̄ 90:2) Ire Gwun̄ Awaji ore ‘adasi inu Awaji orombe.’ Erorom ọmọ; ọmọ ore adasi me lek otutuuk inu geelek Jioba orombe. (Ebi Kọlọsi 1:15) Jisọs ọmọ owa sabum erombe inyọn̄ me ijọn̄, ike ekpabe me ikpa Urọk. Kubọk Ikọ Ya, orere Ogwu Okitmu Otu Awaji, ire ọmọ okijeen̄ iriọọn̄-inu Awaji me oniin̄ ososo.—Jọn 1:1.
cf 131-132 ¶8-9
“Emi Mma Nte N̄a”
8 Keke ke Jisọs okirọ me owuwa acha eyi ikupbe me emen inyọn̄ sabum inube me inyọn̄ ijọn̄ ni? Agba eyi 30 itumu inyi eji ibe ke ikup me agba lek Awaji kubọk “ogwu usọ.” Keke ke usem yi osibi? Ikpa Ebi Kọlọsi 1:16 ikpa iwele: “Mije, Awaji ìsa me ubọk kè Karais irom otutuuk inu geelek, echi òkup me emen inyọn̄, mè echi òkup me linyọn̄. . . Otutuuk inu chi ìnan̄a me ubọk kè Karais.” Eya isibi ibe ke Jioba Ogwu Orom isa Gwun̄ kan̄ orere Ogwu Usọ Ikwaan̄ isa irom ofifi inu geelek irọmbe —bene me lek ebi osat ikup me emen inyọn̄ si re lek mkpọ echi eji ekisa chieen̄ imun̄ me isinyọn̄ mè inyọn̄ ijọn̄ yi melek esese esese uti mè aman ikup me emen, mè ebilene orere inu ojajaan̄ ichit me lek inu Awaji orombe me inyọn̄ ijọn̄. Eji mekọt isa ubọk Jioba mè Jisọs esabe igbaan̄ isi ikwaan̄ isa itọt me lek ike ogwu okigwook uwu mè ogwu okinama uwu okakaan̄ usọ ubọk ikekọt inama inu geelek ogwu okigwook uwu ya ogwookbe. Mgbọ geelek eji esimun̄ inu nrọm ge okeke eji chieen̄, eji mikitọn̄ Jioba. (Okwa Itọn̄ 19:1) Ire, ikikeek eji si ujọn̄ọ ujọn̄ọ mgbọ eyi Ogwu Orom mè Ogwu Usọ Ikwaan̄ kan̄ esabe me ubelejit igbaan̄ ikwaan̄ isi
9 Mgbọ geelek ene iba ebi ekasoge ekigbaan̄ ikwaan̄ isi, owuwa mgbọ ema mikikaan̄ ufialek. Ire, ikakup ikeya me lek Jioba mè Ogwu Gwun̄! Jisọs igọọk Ogwu Ute igbaan̄ isi ikwaan̄ me owuwa acha ekariọọn̄ge otu ifuk me itumu ibe: ‘Nkiwọnwọọn̄ unwọọn̄ me isi kan̄ mgbọ geelek’ (Urọk 8:30) Jisọs ikinwọnwọọn̄ ikukup me agba lek ogwu Ute, ikeya si ke Jioba Okinwọọn̄ ikukup me agba lek Gwun̄ kan̄. Mije ema ekigbaan̄ ikwaan̄ isi, Jisọs ikikaan̄ eru Ogwu Ute, mè ikikween̄ ikekijeen̄ eru echi Awaji okaan̄be. Ọmọrọ, ikake eji chieen̄ ibe ke obọp ge okup me etete kiban̄ Ute mè Gwun̄ inye enenen! Mekọt igwen obọp yi kubọk obọp eyi ima okukup ifiin̄ ichit mè inye ichit me otutuuk linyọn̄ yi.
w09 4/15 31 ¶14
Mọnọ Jisọs—Ogwu Ominini Igak Debit mè Solomọn Bene
14 Ire ene ge gaalek okaan̄ iriọọn̄-inu igak Solomọn. Ene ya ire Jisọs Karais, ogwu okpa mkpọ ofolek kan̄ kubọk “ogwu òmimin igak ogwu ubọọn̄ Solomọn.” (Mat 12:42) Jisọs ikitumu “ikọ òkinyi ene ugwem ikakaan̄ge itata.” (Jọn 6:68) Kubọk inu njeen̄, Ijejeen̄ Jisọs Ojeen̄be me Inyọn̄ Ogọọn̄ ikpa iwele usini onineen̄ okup me emen usini urọk kè Solomọn. Solomọn ikpa owuwa mkpọ obokọt isa ubelejit ijet ebi usun̄ Jioba. (Urọk 3:13; 8:32, 33; 14:21; 16:20) Jisọs ijeen̄ ibe ke ata ubelejit ikinan̄a me lek mkpọ echi okaan̄ mgbaan̄ me lek ntọbọ-ebum kiji isa inyi Jioba mè nrọ-nso use Awaji. Itumu ibe: “Uga ubelejit okup inyi ebi geelek ìrọriọọn̄ ibe, isan̄a me lek Awaji, ke ema kpekup me lek inu geege, mije, ebibi ke mkpulu eyi Awaji okup inyi.” (Mat 5:3) Ebi geelek ikitap onineen̄ okup me emen ijejeen̄ Jisọs me ugwem kiban̄ mikitaba lek iriaak me lek Jioba, ogwu orere, “ogbuuruk ere ugwem okinan̄a isibi.” (Itọn̄ 36:9; Urọk 22:11; Mat 5:8) Ire Karais ore “iriọọn̄-inu eyi Awaji.” (1 Kọr. 1:24, 30) Kubọk Ogwu Ubọọn̄ Ama Ubọọn̄ Awaji, Jisọs Karais ikaan̄ “ekwukwu eyi iriọọn̄-inu.”—Asaya 11:2.
Week Inu Unye Otu Ewe Okup Me Usem Awaji
Mbet Lek Ene Okukup ke Jisọs Ore?
▪ Baibul ibe ke Jisọs “ikibele ejit melek bọn ebilene.” (Urọk 8:31) Jisọs ijeen̄ ima kan̄ sa me itatap ebi ene efuuk me owot mè itatap ubọk inyi ema. Irọ owuwa ikwaan̄ ukechieen̄, echi okijeen̄ ibe ke ikakpọkpọ ikaan̄ unye gaalek, ire, ikaan̄ njijin si. (Mak 1:40-42) Jisọs ikisa ata ejit irọ mkpọ melek ebi ene, ikagobo ene isi. Usem kan̄ inyi ebi isasa me ata ejit igban̄ ọmọ ukarajit mè ikpọchieen̄. Mije ima Jisọs okaan̄be, ichieek ibọbọkọ ukwook mè ikwu mkpa me ibot otutuuk ene. Ire, ire ebi ikigọọk ijejeen̄ kan̄ ke ima ichit.—Fuk Jọn 15:13, 14.
ONYAN̄ INI 14-20
INU UNYE OTU EWE OKUP ME USEM AWAJI URỌK 9
Re Ogwu Oriọọn̄ Inu, Kare Ogwu Okirọ Ene Ochak
w22.02 9 ¶4
“Gban̄ Ikọ Ebi Ìriọọn̄ Inu”
4 Itutumu atikọ, mokọt iyọt eji me lek ibọbọko nteme itap. Usini mgbọ nteme mokọt irọ ibe eji enaan̄-ejit. Bak lek keke ni? Ikerere ibe ke eji michieek ibe eji kpeso, mokọt iyọt eji me lek ibọbọkọ nteme me mgbọ ene otumube iny eji inu ge eji erọbe ilọ. (Fuk Ogwu Etip 7:9.) Eji mekọt isa inwọnwọn̄ lek kiji ikọ. Eji mekọt ikikeek me ire ene ya isa me ata ejit inyi eji nteme ya mè iyaka ire, ikinaan̄ ejit me lek ubọk isabe inyi eji nteme ya. eji si mekọt ibene ikiweek agan̄ ogwu oteteme eji ya okirọ ilọ, me ikikeek ibe: ‘Ọmọ ikakup me irek iteteme emi. Eyi kan̄ si ikanwọn̄wọn̄!’ Ire eji kpema nteme enyibe eji, eji mekọt ikpọ chieen̄ ilọ me lek mè iyaka ire isiweek ofifi ene ogwu obotumu inyi eji mkpọ eji eweekbe inọnọ.
w22.02 12 ¶12-14
“Gban̄ Ikọ Ebi Ìriọọn̄ Inu”
12 Keke obotap ubọk inyi eji ekebọkọ nteme? Ikup ufiak ibe eji ekesiki lek mè ekekeek ibe ke eji kpeso, ke eji si mekọt irọ mkpọ eyi ikajeen̄ge iriọọn̄-inu usini mgbọ. Ike eji ewuukbe lek ikpa, Jobu ikaan̄ lọlọ nkeek. Ire, ike mgbọ ojebe inwene nkeek kan̄, Jioba si ogbagbana ọmo. Keke orọ Jioba ogbanabe ọmọ ni? Mije Jobu isikilek. Ijeen̄ nsikilek kan̄ sa me ibọbọkọ nkan̄-inu Eliyu onyibe ọmọ ikerere ibe ke Eliyu ire nsabọn me lek kan̄. (Jobu 32:6, 7) Ubọk yaage si, nsikilek motap ubọk inyi eji ebọkọ nkan̄-inu etap, ikerere ibe ke eji kpekeek ibe ke nkan̄-inu ya itat mè iyaka ire ogwu onyinyi ire nsabọn me lek kiji. Ogwu ugane ntitiin̄ ge me Canada itumu ibe, “Eyi irebe ibe ke eji kpekimun̄ lek kiji ike ebi ofifi ene ekimun̄ eji, ike owa ke eji ebesa irọ ijaan̄ me ire ene kpeteme eji?” Ire ekene me lek kiji ikaweek irọrọ ijaan̄ me ikakaan̄ eru echi ekwukwu mbuban okitap ubọk inyi ene ekaan̄ mè mirọrọ ikwaan̄ kiji kubọk ebi eyi Karais ni?—Fuk Okwa Itọn̄ 141:5.
13 Kimun̄ nteme kubọk oniin̄ Awaji okisa ijeen̄ owu ima. Jioba ikiweek inu onwọnwọn ichit isa inyi eji. (Urọk 4:20-22) Mgbọ geelek isi isa Usem kan̄, ikpa ntitiin̄ mè iyaka ire gwun̄ ute ge omimin iniin̄ ene isa inyi eji nteme, ikijeen̄ eji ibe ke ima eji. Ikpa Ebi Iburu 12:9, 10 ibe ke ikirọ ikeya “inyi inwọn inyi eji.”
14 To chieen̄ melek nteme ya, ikare ubọk esabe inyi. Usini mgbọ mokọt ikikup me lek kiji kubọk kpenyi eji nteme me oniin̄ otatat. Atikọ ibe ke ene geelek obonyi nteme mosa irọrọ inyi nteme kan̄ ifet ibọbọkọ itap. (Gal 6:1) Ire, me ire eji ke ekinyi nteme, ikup ufiak ibe eji eto chieen̄ melek inu ekitumu inyi eji, ikerere ibe ke ikup melek kiji kubọk ike esabe inyi nteme ya ikanwọn. Eji mekọt ikido lek kiji ibe: ‘Ikerere ibe nkama ubọk esabe inyi emi nteme yi, ire atikọ ọmọ owa me emen usem ekitumu inyi emi ni? Ire makọt ikpo isaba ekasoge ogwu onyinyi nteme ya mè ikaan̄ oruru inan̄a me lek inu itumube ni?’ Mojeen̄ iriọọn̄-inu me ire eji ekitọ chieen̄ me lek oruru eji ebekaan̄ inan̄a me lek nteme geelek eji ebọkọbe.—Urọk 15:31.
w01 5/15 30 ¶1-2
‘Iriọọn̄-Inu, Morọ Ibe Usen Ugwem Kiji Iwa’
Ubọk ogwu oriọọn̄-inu okirọ mkpọ mgbọ geelek esi kan̄ inu inyi ọmọ ikup esese me lek ogwu okirọ ene ochak. Solomọn itumu ibe: “Kan̄ inu nyi ogwu òriọọn̄ inu, môma owu. Teme ogwu òriọọn̄ inu nteme, ìborọriọọn̄ inu igak ubọk îriọọn̄be.” (Urọk 9:8b, 9a) Ogwu oriọọn̄ inu iriọọn̄ ibe ke “kpunu osusut geege òkitotop mgbọ ekisulu ene. Kpan̄asi ikeya, ìkinanaan̄ ene. Ire, me mgburudun̄ mgbọ, ebi geelek ìkwekween̄ inu inan̄a me lek osusut cha mîkikaan̄ mkpukpe eyi ugwem ata irọrọ, mè esuuk.” (Ebi Iburu 12:11) Ubọk geelek ibe ke nteme ya mokọt ikup kubọk ikinanaan̄ ene, keke orọ eji ebenaan̄ ejit mè iyaka ire ijit ibọbọkọ nteme ya me mgbọ eji eriọọn̄be ibe ke morọ ibe eji eriọọn̄ inu egbaalek ni?
“Jeen̄ ogwu ata irọrọ inu, môkween̄ inu isọkọ lek,” inu ogwu ubọọn̄ okakaan̄ iriọọn̄-inu ya otumube isọkọ ire ya. (Urọk 9:9b) Kpunu ogwu orọriọọn̄ inu mè iyaka ire ikan ire lek ikpokọt iyaka ikween̄ mkpọ igbaalek. Ikitop eji me lek enenen imumun̄ ebi ikakan ekikween̄ atikọ mè isa ugwem kiban̄ inyi Jioba me acha ukan! Kè eji si ekup enye ekekaan̄ ulọk ikukup inye ikikween̄ mkpọ mè ikekirọ ayaya mkpọ.
w01 5/15 30 ¶5
‘Iriọọn̄-Inu, Morọ Ibe Usen Ugwem Kiji Iwa’
Itatap efuuk isasa ikaan̄ iriọọn̄-inu ire ikwaan̄ eji ge ge ebero inyi lek kiji. Solomọn igon aban me lek inu yi me mgbọ itumube ibe: “Ire oriọọn̄ inu, òriọọn̄ inyi lek kwun̄; ire okirọ ene ochak, owu gaalek obobeme ufialek kan̄.” (Urọk 9:12) Ogwu oriọọn̄ inu iborọ lek kan̄ oruru, ire ogwu okirọ ene ochak gaalek si ke ebefieek ikọ me lek ufialek geelek ikibọkọ. Me atikọ eji eberọkọ inu geelek eji ewopbe. Eya orọ kè eji ‘esa utọn̄ kiji enyi iriọọn̄-inu.’—Urọk 2:2.
Week Inu Unye Otu Ewe Okup Me Usem Awaji
w06 9/15 17 ¶5
Inu Ekpabe Ofolek Ikpa Urọk
9:17—Keke ore “mun̄ echichiin̄ inwọ,” keke orọ ikikup kubọk ikisisiki ene lek mè iyaka ire ikitotop? Eyi irebe ibe ke Baibul isa ilaak okibọkọ irek me etete enerieen̄ mè enenwaan̄ ibabat lek kiban̄ isa itọt me lek mun̄ okisiki ene lek echibibe inan̄a me emen udọn̄ mun̄ ene, mun̄ echichiin̄ inwọ isibi ilaak okibọkọ irek me etete ebi ikibubat. (Urọk 5:15-17) Nkeek ibe ema menwọọn̄ lek kiban̄ okirọ ibe mun̄ ya ikup kubọk ikisisiki ene lek mè iyaka ire ikitotop.
ONYAN̄ INI 21-27
INU UNYE OTU EWE OKUP ME USEM AWAJI URỌK 10
Ike Owa Ke Eji Ebesa Ikaan̄ Ata Ubelejit Me Ugwem?
w01 7/15 25 ¶1-3
‘Ugbana Ikup Inyi Ebi Ata Irọrọ’
Ogwu ata irọrọ ire ogwu egbanabe me ofifi oniin̄. “Ogwu ugbek ìkinin̄ ugbọọn̄, ire, ogwu òkaan̄ efuuk ikwaan̄ môbọọn̄ ubọọn̄. Gwun̄ òriọọn̄ lek ìkirọkọ uko me ibot mgbọ kan̄, ire, gwun̄ òkilalaak mgbọ ekirọkọ uko ìkisa esip itet ene.”—Urọk 10:4, 5.
Usem ogwu ubọọn̄ otumube ofolek ebi ikisi ikwaan̄ me mgbọ ekirọkọ inu me uko ichubọk itet mun̄. Mgbọ ekirọkọ inu me uko ikare mgbo ebikilaak. Ire mgbọ ebekitap efuuk isi ikwaan̄ ijọn̄ọ mgbọ. Iin̄, ire mgbọ ebekirọ mkpọ ugwat ugwat.
Jisọs ikaan̄ me ejit irọrọkọ ebilene ikare irọrọkọ akpa, me mgbọ itumube inyi ebi udun̄ kan̄ ibe: “Inu eberọkọ me uko îwa me atikọ, ire, ebi ikwaan̄ ìre ene inen mè inen gaalek. Eya orọ, ìbeek Jioba, ogwukaan̄ ikwaan̄ irọrọkọ inu me uko, ibe iria owuwa ebi ikwaan̄ itap me uko kan̄, mè enerọkọ inu me uko.” (Matiyu 9:35-38) Me acha 2000, mkpọ oraraka akọp mè efie ene ini enu Orirọ Isasa Ikeek Mkpa Kè Jisọs—eyi iwa igak otu ifuk Ebi Ata-Ikọ Jioba mgbọ iba. Ire ekene obokọt itumu ibe ke ‘mfut ikaren̄e isan̄a me uko mè ikikup ikpọ ibe enerọko ni’? (Jọn 4:35) Ebi usun̄ Awaji mekibeek Jioba ibe iria owuwa ebi ikwaan̄ itap me uko kan̄, mè ikirọ mkpọ igọọk me lek uriaak kiban̄ sa me itatap efuuk me ikwaan̄ irọrọ ene ebi udun̄ kè Karais. (Matiyu 28:19, 20) Jioba ichubọk igbana efuuk kiban̄ enenen! Me acha ikwaan̄ eyi acha 2000, mkpọ oraraka efit obop ene iba mè akọp obop ene jeeta ekaan̄ ntap-me-mun̄. Ebibi si mekisa irere ebi ikijeen̄ Usem Awaji. Kè eji ekaan̄ unwọọn̄ mè ujot-owot me mgbọ irọrọko inu me uko yi sa me itatap lek kiji ojot ojot me ikwaan̄ irọrọ ene ebi udun̄ kè Karais.
w01 9/15 24 ¶3-4
Je Me Oniin̄ Ebi Ata Irọrọ
Solomọn itumu inu orọrọ ata irọrọ okupbe ufiak. Itumu ibe: “Ogwu òbọbọọn̄ ubọọn̄ ìkisa inu ubọọn̄ kan̄ itọm lek, ire, una ubọk, ọmọ okitap ogwu ugbọọn̄ ifin me otu. Ubọk ikwaan̄ ogwu ata irọrọ ìkisa ugwem ijet ogwukaan̄, ire, mkpukpe ikwaan̄ ogwu ikpak ìre osusut ijo inu òkinu inyi ogwukaan̄.”—Urọk 10:15, 16.
Inu ubọọn̄ mokọt inyi ene ikput-lek isan̄a me lek usini ufialek obokọt irọ ene me ugwem, ike ama etọmbe obokọt inyi ebi ikup me emen ama ya sọntiik ikput-lek. Una ubọk si mokọt itap ene ifin me otu me mgbọ inu ekakeekge orọbe ene. (Ogwu Etip 7:12) Ire, Solomọn itumu si unan okukup me lek ibọbọọn̄ ubọọn̄ mè irere ogwu una ubọk. Ogwu obọbọọn̄ ubọọn̄ mokọt ikitoon̄ otutuuk ejit kan̄ me lek inu ubọọn̄ kan̄ me ikikeek ibe ke inu cha ire “mgban ikwek lek.” (Urọk 18:11) Ogwu una ubọk mokọt ikikaan̄ lọlọ nkeek ibe ke mije irek kan̄ kubọk ogwu ugbọọn̄ ke ọmọ ikakaan̄ ikpochieen̄ geege ofolek mgbọ okup me isi. Eya orọ, ema ene iba kpekọt ikaan̄ ata erieen̄ melek Awaji.
it-1 340
Ugbana
Jioba Igbagbana Ebilene. “Ugbana Jioba—ìkitap ene ubọọn̄, ubọọn̄ keya ìkakaan̄ ufieejit me lek.” (Urọk 10:22) Jioba ikigbana ebi ikakaan̄ nnwọn-isi kan̄ sa me ikekibem ema, irọ ibe inu geelek ema erọbe ije ijaan̄ mè ikekikpọ chieen̄ me lek ufiak kiban̄ me kpunube unan geege obore ema lek.
Week Inu Unye Otu Ewe Okup Me Usem Awaji
w06 5/15 30 ¶18
Unwọọn̄ Okinan̄a Me Lek Igbegbe Utoon̄-Ejit
18 “Ugbana Jioba”—ore mkpọ okirọ ibe ebi kan̄ ekebọọn̄ me irek emen ekwukwu. Awaji irọ ibe eji eriọọn̄ si ibe ke “ubọọn̄ keya ìkakaan̄ ufieejit me lek.” (Urọk 10:22) Ire ikeya, keke orọ ntọ-mkpọ mè ufialek okichichini owuwa ebi ikigbe utoon̄-ejit inyi Awaji, mè okorọ ibe ema ekekaan̄ ikpele unaan̄ mè ekebọkọ ukwook ni? Ufialek ikirọn itet eji mije ibot ibot mkpọ ita. (1) Ijo inu okup eji me emen. (Ibebene 6:5; 8:21; Jemis 1:14, 15) (2) Setan mè ebi ijo ekwukwu. (Ebi Efesọs 6:11, 12) (3) Inyọn̄ eyi mkpikpak. (Jọn 15:19) Ikerere ibe ke Jioba ikekitele ibe ijọ inu ikirọ, ikare ọmọ okirọ ijo inu cha. Atikọ ire, “atata inu geelek, mè uche geelek ònwọnwọn isan̄a ìkinan̄a me emen inyọn̄, me ubọk Awaji ogwu òrorom otutuuk inu geelek òkinyi utoon̄ me isinyọn̄.” (Jemis 1:17) Ugbana Jioba ikakaan̄ ufieejit geege me lek.
ONYAN̄ INI 28–ONYAN̄ GO 4
INU UNYE OTU EWE OKUP ME USEM AWAJI URỌK 11
Katumu!
w02 5/15 26 ¶4
Igbegbe Utoon̄-Ejit Okijeen̄ Ebi Ata Irọrọ Oniin̄
Igbegbe utoon̄-ejit ebi ata irọrọ mè mkpikpak ebi ijo irọrọ ikikaan̄ mgbaan̄ me lek ebi ofifi ene. Ogwu ubọọn̄ Solomọn itumu ibe: “Ogwu ijo ene ìkisa otu ifiat ogwu melek kan̄, ire, ogwu ata irọrọ môsa ifuk-ibot inwọnọ.” (Urọk 11:9) Ire ekene obokọt igwaka ibe ke itutumu ene ifiat, ilolo ene mè usem ten̄ten̄ mokọt isak unan me lek ebi ofifi ene? Ire, usem ogwu ata irọrọ ikitatana, ikikekeek mkpọ ijaan̄ si sabum otumu mè okokeek mgbaan̄ ibokaan̄ me lek ebi ofifi ene. Ogwu ata irọrọ mosa ifuk-ibot inwọnọ, mije, igbegbe utoon̄-ejit kan̄ monyi ọmọ mkpọ ibosa ijeen̄ ibe ke usem ebi ikitumu ikeme ọmọ cha ire ataak.
w02 5/15 27 ¶2-3
Igbegbe Utoon̄-Ejit Okijeen̄ Ebi Ata Irọrọ Oniin̄
Ebi ama ebi ikiluk ugwem ata irọrọ ekirọ ibe esuuk mè nje-nnyi-isi ikup me emen ama mè ikinanama ge ge inye. Sa me ikeya ama ya ibokijijibi ibene. Ebi geelek ikitumu ijo usem okifiat erieen̄ ene mè usem okinaan̄ ene ekirọ ibe ufialek mè nche-lek ikup me ere. Ema si ekirọ ibe ebi ene ekakikaan̄ ubelejit. Eyi ichubọk ire ikeya ogak ge me irere ebi ikakaan̄ irek ntọ-ikọ ekiro eyi. Mkpọ ikpoje ijaan̄ me mbet ama okup ikeya, eru ebi ene mè ubọk iluk ugwem me ama ya si mosak enenen.
Onineen̄ okup me ikpa Urọk 11:11 ikaan̄ mgbaan̄ me lek ebi eyi Jioba, mije, ema ekigbagbaan̄ irọ mkpọ melek ge ge me emen ntitiin̄ kubọk ebi iluk me ama ge. Ntitiin̄ geelek eyi ebi ata irọrọ ikitele ibe igbegbe utoon̄-ejit ikijeen̄ ema oniin̄ ekupbe me emen, ire ere ebi ikibele ejit irọ ikwaan̄ ikitap ubọk inyi ge ge mè ikisa itọn̄ ijet Jioba ekikup. Jioba ikigbagbana ntitiin̄ ya, mè ikirọ inyi ikije inyi isi me irek emen ekwukwu si. Ire, usini ene ebi unye-ibot ebi kpekaan̄ ujot-owot me lek irek kiban̄ me ntitiin̄ mekọt ibene ikinun̄un̄, mè ikitumu ijo usem ofolek ubọk ekirọ mkpọ me emen ntitiin̄. Ema ekup kubọk “ujat mfut” echi obokọt isa ujat kan̄ itobo ebi ofifi ene, ebi me adasi mgbọ kpekaan̄ ijo eru cha. (Ebi Iburu 12:15) Owuwa mgbọ mbet ebi ikup ikeya ekiweek ikakaan̄ unye ntọ-ikọ mè iyaka ire isisibi isi. Ema mekọt ibene ikitumu ibe ke ubọk ekirọ mkpọ me emen ntitiin̄ ikanwọn, ke ebi ugane ntitiin̄ mekirọ ene ikaan̄ mè iyaka ire igobo ene isi. Otu alọm kiban̄ mokọt itap nche-lek me emen ntitiin̄. Inwọn ibe eji ekagban̄ inu ema ekitumu, kpanasi ikeya, esa irọrọ inyi mgbaan̄je kiji melek Jioba ikinye mè ekerọ inyi esuuk mè obọp ge ikup me emen ntitiin̄?
w02 5/15 27 ¶5
Igbegbe Utoon̄-Ejit Okijeen̄ Ebi Ata Irọrọ Oniin̄
Ogwu ikakikeek mkpọ ijaan̄ mè iyaka ire “ogwu una ngobo-ntet” ikitap ikpele unan! Ikitumu ikọ ubọk geelek ire lek mokọt ifiat erieen̄ ene. Ebi ugane ntitiin̄ megwat lek itap uyaka me lek mbet ijo eru okup ikeya. Ire, ogwu okikeek mkpọ ijaan̄ ikakisan̄a amọn, ikakup kubọk “ogwu una ngobo-ntet.” Kpan̄asi, ikpọkpọk mbum inu ekpabe inyi ọmọ me nlelet, ogwu okikeek mkpọ ijaan̄ ikichichit inu ya. Mije iriọọn̄be ibe ire ene ikatet otu alọm kan̄ ikaan̄ ke mokọt itap ikpele unan, ogwu okikeek mkpọ ijaan̄ ikigbegbe utoon̄-ejit. Ikigbegbe utoon̄-ejit inyi ebi bọn Nte kan̄ ikakikpọk mbum inu okup me nlelet echi obotap ema me ufialek. Mbet ebi ikup ikeya echubọk ire ugbana inyi ntitiin̄!
Week Inu Unye Otu Ewe Okup Me Usem Awaji
g20.1 11, box
Ubọk Obosa Irọ Mkpọ Me Mgbọ Okaan̄be Saasaak
“SA ATA EJIT SA KPAN̄ SAASAAK KWUN̄”
“Ogwu ata ejit ìkirọ nnwọn inyi ugwem kan̄, ire, ogwu nnaan̄ ìkitap ufialek inyi akpalek kan̄.”—URỌK 11:17.
Ikpa Overcoming Stress ikaan̄ ibot ikpa me emen eyi ibot usem kan̄ orebe “Kill Your Stress with Kindness.” Dr. Tim Cantopher, ogwu ogege ikpa ya itumu ibe ke ikekijeen̄ ene ata ejit morọ ibe ene ikaan̄ unye akpalek mè ubelejit. Ire, ogwu nnaan̄ ikpobokaan̄ ubelejit mije ikidada lek kan̄ ibọkọ me lek ebi ofifi ene.
Eji si mekọt irọ ibe saasaak kiji igele sa me ikekirọ mkpọ melek kiji me ata ejit. Kubọk inu njeen̄, eji kpebeweek irọrọ mkpọ echi eji kpebekọt irọ. Eji si kpebekikpọ chieen̄ igele me lek kiji mè iyaka ire ikitumu ijo usem inyi lek kiji. Jisọs ibe: “Ma ogwu ebilene ogbo kwun̄ kubọk omabe akpalek kwun̄.”—Mak 12:31.