INU NKWEEN̄ 11

Ubọk Obosa Ikaan̄ Oruru Ichit Inan̄a Me Lek Ifufuk Baibul

Printed Edition

Ire owuuk lek ikaan̄ ikpele ikwaan̄ oborọ eyi okikeek ibe ke imalek iyọt ni? Owu ora ikirọ ikwaan̄ ya sọnja sọnja inyi ikọt ifet me lek kwun̄. Ikeya ke ikweek me lek ifufuk Baibul. Omokọt ikido ibe, ‘Kpa ubọk ke mbasa ibene ikpele inu yi?’ Me emen inu nkween̄ yi, eji mekpa usini asabọn mkpọ obokọt irọ, echi obotap ubọk inyi owu okọt onwọọn̄ ifufuk mè ikwekween̄ Baibul.

1. Keke orọ eji ebekifuk Baibul usen geelek?

Ene geelek okifuk Baibul, mè iyaka ire ‘ikan kè Jioba’ usen geelek, ibokikakaan̄ ubelejit mè nje-nnyi-isi. (Fuk Okwa Itọn̄ 1:1-3.) Me ibebene, sa nkikek mgbọ inen mè inen kifuk Baibul usen geelek. Ike okiriọọn̄ Usem Awaji ijaan̄, ikeya ke obokinwọọn̄ ifufuk Baibul kwun̄.

2. Keke obotap ubọk inyi owu okọt okaan̄ oruru me lek ifufuk Baibul?

Inyi eji ekọt ekaan̄ ata oruru enan̄a me lek Baibul, igbe ibe eji etet ekaan̄ mè ekeek mkpọ eji ekebifuk. Eji ebekifufuk mè ‘ikigwu nkeek ikom me lek.’ (Josuwa 1:8) Ike okifuk, kido lek kwun̄ mbet lek idodo chi: ‘Keke ke inu yi okijeen̄ emi ofolek Jioba? Ike owa ke mbasa inu yi irọ mkpọ me ugwem n̄a? Kpa ubọk ke mbasa ere chi itap ubọk inyi ebi ofifi ife?’

3. Ike owa ke obokọt isan̄a mgbọ isibi ikisa ifuk Baibul?

Ire ikekiyọt me lek kwun̄ isasan̄a mgbọ isibi ikisa ifuk Baibul ni? Ikeya ke ikup isa inyi owuwa kiji. Nye lek kisa ‘mgbọ kwun̄ kirọ mkpọ onwọnwọn ichit.’ (Ebi Efesọs 5:16) Omokọt irọ eyi ire okisan̄a ọkpọkpọ mgbọ isibi isasa ifuk Baibul usen geelek. Usini ene ekifuk Baibul me otu ewelegwe. Usini ene ekifuk me ikarek, mokọt ire me mgbọ ekitap efuuk me ere ikwaan̄. Ire, ebi ofifi ife ekifuk eyi kiban̄ me ikakwun̄ sabum enelaak. Kpa mgbọ obonwọn ichit inyi owu?

KWEEN̄ GBAALEK

Kween̄ ubọk obosa irọ inyi ifufuk Baibul ikitop owu me lek. Mè kween̄ si ubọk obosa ineen̄ lek ijaan̄ inyi okọt okaan̄ oruru omimin onan̄a me lek nkween̄mkpọ Baibul kwun̄.

Collage: Gwun̄ enerieen̄ ge okikween̄ inwọnwọọn̄ ayaya inorie ge. 1. Gwun̄ ya ikisa inorie ya ifit ifit. 2. Ike mgbọ orakabe, gwun̄ ya ibene ikirie inorie ya. 3. Mgbọ keyi iminbe sọnja, gwun̄ ya okinwọọn̄ irerie inorie ya. — Ike eji ekikween̄ inwọnwọọn̄ esese esese inorie, eji mekọt ikween̄ inwọnwọọn̄ ifufuk Baibul si

4. Kween̄ ubọk obosa ikinwọọn̄ ifufuk Baibul

Usini mgbọ, ikpofet ibebene ikifuk Baibul. Ire, omokọt ikween̄ inwọnwọọn̄ ikekifuk Baibul ike obokọt ikween̄ inwọnwọọn̄ irerie ayaya inorie. Fuk Pita Eyi Adasi 2:2, mè igbaan̄ ikpa idodo yi:

Ire okeek ibe ke ire okifuk Baibul usen geelek, ke omobene ikinwọọn̄ mè ikiweek ifufuk igbaalek ni?

Fit FIDIO yi inyi omun̄ ubọk usini ene ebenebe ikinwọọn̄ ifufuk Baibul. Mè igbaan̄ ikpa idodo chi.

FIDIO: Ebi Ijija Ikikween̄ Imama Usem Awaji (5:33)

Kpasi rumurumun̄ ke ebi ijija me emen fidio yi etim igak?
Keke otap ubọk inyi ema ekọt ekweek enye ekefuk Baibul usen geelek?
Keke ke ema erọ inyi ulọk ema ekaan̄be me lek ifufuk Baibul ikimin?

Mkpọ echi obokọt itap ubọk inyi owu:

Gobo Baibul otatat, eyi esabe ida usem chereyi ige. Kpọ-nu New World Translation mè ire ikup me ida usem kwun̄ mè iyaka ire ofifi ida usem oriọọn̄be ijaan̄.
Dasi bene me lek ere echi okaan̄be ulọk me lek ichit. Omokọt ikpọ chart obe “Bene Kifuk Baibul.”
Inyi okawuuk ere ofukbe. Sa chart obe “Taba Iman̄ Me Lek Ere Ofukbe Iyaka” me emen ikpa yi sa rọ mkpọ.
Sa JW Library^® app rọ mkpọ. Me emen okpọ etip kwun̄ mè iyaka ire mbet inu okup ikeya, omokọt isa app yi ifuk Baibul mè igban̄ eyi efukbe isibi me ere geelek okupbe.
Sa appendixes okup me emen New World Translation rọ mkpọ. Echi igọbọ map, chart mè glossary, echi oborọ inyi okonwọọn̄ ifufuk Baibul ogbaalek.

5. Neen̄ lek ban nkween̄mkpọ Baibul kwun̄

Fuk Okwa Itọn̄ 119:34, mè igbaan̄ ikpa idodo yi:

Keke orọ inwọnbe ibe obeek uriaak sabum onofuk Baibul mè iyaka ire, sabum oboneen̄ lek me lek nkween̄mkpọ Baibul kwun̄?

Kpa ubọk ke obosa ikaan̄ oruru ichit inan̄a me lek nkween̄mkpọ Baibul kwun̄? Ike okineen̄ inu nkween̄ ge me emen ikpa yi, sa mè rọ inu chi:

Fuk paragraph echi esabe ibene inu nkween̄ ya.
Week mè fuk ere Baibul egebe isibi, mè sa inyi okọt ogobo otet mgbaan̄ ere cha okaan̄be me lek inu nkween̄ ya.
Taba iman̄ me lek ufọọk-otu idodo cha ge ge; eyi motap ubọk inyi owu me mgbọ enyi ekigbaan̄ ikpa inu nkween̄ ya.

Collage: Ogwu enenwaan̄ ge ikineen̄ lek me lek nkween̄mkpọ Baibul kan̄. A. Ifuk adasi isi ikpa me inu nkween̄ ya. B. Ifuk ere Baibul echi egebe isibi. C. Itaba iman̄ me lek okpan okpan usem me inu nkween̄ ya.

Ire oriọọn̄ ni?

Ebi Ata-Ikọ Jioba misa esese esese Baibul irọ mkpọ. Ire, eji mima New World Translation of the Holy Scriptures enenen mije itat, ifet igogobo itet, mitap erieen̄ Awaji me emen si. —Fuk ibot usem obe “Do Jehovah’s Witnesses Have Their Own Bible?”

USINI ENE EKIBE: “Ikwekween̄ Baibul me iyọt. Nkakaan̄ mgbọ mè iyaka ire efuuk mbasa irọ eya.”

Keke ore nkeek kwun̄?

ME MGBIDIM

Ire okisan̄a mgbọ isibi ikifuk Baibul, ikiriaak uriaak inyi okọt ogobo inu okebifuk otet mè ikineen̄ lek me lek nkween̄mkpọ Baibul kwun̄, mgbọ ya ke obokaan̄ oruru ichit inan̄a me lek Baibul.