INU NKWEEN̄ 55
Kigọọk Bieen̄ Ntitiin̄ Kwun̄ Nye
Me otutuuk linyọn̄ yi, efie efie ebi ene ekisa me unwọọn̄ ikitọbọ ebum inyi Jioba me obop obop ntitiin̄. Ema mikibele ejit me lek ntọ-ubọk mè nteme ema ekibọkọ, mè ikisa me uyok uyok ejit ibieen̄ ntitiin̄ inye me owuwa irek. Ire ubọk ntitiin̄ kwun̄ okikup owu me lek ire eya ni?
1. Oniin̄ echi owa ke obokọt ikisa mgbọ mè efuuk kwun̄ ibieen̄ ntitiin̄ inye?
Otutuuk kiji mekọt itap ubọk me ntitiin̄. Kubọk inu njeen̄, ire ikaan̄ ebi lek ikanyege mè iyaka ire ebi ininin̄ ugane me ntitiin̄ kwun̄ ni? Ire omokọt itap ubọk inyi ema enu nkween̄mkpọ ni? Ire omokọt itap ubọk inyi ema me ofifi ofifi irek, kubọk isisi ilep mkpọ inyi ema mè iyaka ire isisi irọ ikwaan̄ inyi ema me uwu kiban̄? (Fuk Jemis 1:27.) Eji mekọt isan̄a lek isibi igọọk ikisun̄ Uwu Ntitiin̄ me utana mè ikikpọ chieen̄ me lek. Kpunu ene geege okitet eji me unye ubọk ibe erọ inu chi. Ima eji ekaan̄be me lek Awaji melek ebi bọn ute okibieen̄ eji ibe ‘ekesan̄a lek esibi.’—Okwa Itọn̄ 110:3.
Ebi ikakaan̄ ntap-me-mun̄ mekọt ibieen̄ ntitiin̄ inye me ofifi oniin̄. Bọn ute irieen̄ imimin isoon̄ mekọt isi ikwaan̄ kubọk ebi ikitap ubọk inyi ebi ugane ntitiin̄, ike mgbọ okije, ema si mekọt ikana ebi ugane ntitiin̄. Bọn ute irieen̄ mè ibaan̄ mekọt itap lek ojot ojot me lek ikwaan̄ ilolook ata etip sa me ikekigbọ oniin̄ ojot mgbọ. Usini ene mekọt ikigọọk itap ubọk inama ere ekitọbọ ebum mè iyaka ire isi ntitiin̄ ere ufiak ominbe isi itap ubọk me esese esese oniin̄.
2. Ike owa ke eji ebekisa inu nkaan̄ kiji ibieen̄ ntitiin̄ inye?
Eji mekọt ikisa “inu ubọọn̄ [kiji]” imin Jioba. (Urọk 3:9) Eji ekimun̄ kubọk irek ile isasa ikpoko mè ofifi inu nkaan̄ kiji isa ikibieen̄ ntitiin̄ kiji mè ikwaan̄ ilolook ata etip me otutuuk linyọn̄ yi inye. (Fuk Ebi Kọrint Eyi Òso Iba 9:7.) Inyinyi kiji si ke ekisa itap ubọk inyi ebi mfufiat orọn̄be itet. Owuwa ene ekekisan̄a “ikpoko isun̄ esese” isasa ikinyi inyinyi. (Fuk Ebi Kọrint Eyi Adasi 16:2.) Eji mekọt inyi inyinyi sa me itatap ikpoko me emen okop okup me ere ntọbọ-ebum kiji mè iyaka ire me emen efet me donate.jw.org. Jioba inyi eji irek isasa ijeen̄ ima eji ekaan̄be me lek kan̄ inan̄a me lek ubọk eji ekisa inu nkaan̄ kiji irọ mkpọ.
KWEEN̄ GBAALEK
Kween̄ usini oniin̄ obokọt isa ikibieen̄ ntitiin̄ inye.
3. Eji mekọt ikinyi inu nkaan̄ kiji
Jioba mè Jisọs ekima ebi ikisa me ubelejit inyi inyinyi. Kubọk inu njeen̄, Jisọs itọn̄ ogwu nwakpa ge ogwu ikakaan̄ge ikpoko iwa, ire, inyi Jioba inyinyi. Fuk Luk 21:1-4, mè igbaan̄ ikpa idodo chi:
Ire ikpoko kiji ibowawa sabum inyinyi kiji onobele Jioba ejit ni?
Ike owa ke ikikup me lek Jioba mè Jisọs eji esinyi inyinyi inan̄a me ejit kiji?
Inyi oriọọn̄ mkpọ ekisa inyinyi kiji irọ, fit FIDIO yi. Mè igbaan̄ ikpa idodo yi ogọgọọk.
Ike owa ke ekisa inyinyi kiji itap ubọk inyi ntitiin̄ me otutuuk linyọn̄ yi?
4. Eji mekọt isan̄a lek isibi
Me ukot ikaan̄, ebi ikitọbọ ebum inyi Jioba misa me uyok uyok ejit isi ikwaan̄ isasa ikpọ chieen̄ me lek ere ntọbọ-ebum kiban̄. Ire, eyi ikakpọkpọ ire inyinyi ikpoko gaalek. Fuk Mfufuk Eyi Òso Iba 34: 9-11, mè igbaan̄ ikpa idodo yi:
Ike owa ke otutuuk ebi Ijeren esa itap ubọk ikpọ chieen̄ me lek uwu Jioba mè iyaka ire ere ntọbọ-ebum?
Inyi omun̄ ubọk Ebi Ata-Ikọ Jioba ekisa igọọk akpat ukot yi, fit FIDIO yi. Mè igbaan̄ ikpa idodo chi ogọgọọk.
Keke orọ ikupbe ufiak ibe eji ekesun̄ Uwu Ntitiin̄ me utana mè ekeriọọn̄ ubọk ekpọ chieen̄ me lek?
Oniin̄ echi owa ke obokọt igọọk itap ubọk?
5. Bọn ute ebirieen̄ mekọt itap efuuk inyi ema emin esoon̄ irọrọ ikwaan̄ igbaalek me ntitiin̄
Ikpa Mbuban itap efuuk me owot ebirieen̄ ebi eyi Karais ibe ekerọ inu geelek ema ebekọt esa ekebieen̄ ntitiin̄ enye. Inyi omun̄ inu njeen̄ ge, fit FIDIO yi. Mè fọọk idodo yi ogọgọọk.
Me emen fidio ya, ike owa ke Ryan osa itap efuuk inyi ọmọ igọọk ibieen̄ ntitiin̄ inye me ojot ojot?
Baibul ikpa inu bọn ute ebirieen̄ eberọ isasa imin isoon̄ irere ebi ikitap ubọk inyi ebi ugane ntitiin̄ mè iyaka ire ebi ugane ntitiin̄. Fuk Timọti Eyi Adasi 3:1-13, mè igbaan̄ ikpa idodo chi:
Keke ke eweek me ubọk bọn ute ebirieen̄ ikitap efuuk irere ebi ikitap ubọk inyi ebi ugane ntitiin̄ mè iyaka ire ebi ugane ntitiin̄?
Keke ke eweek me ubọk ebi ototun̄ ukan̄ kiban̄?—Kpọ agba eyi 4 mè 11.
Bọn ute ebirieen̄ esitap efuuk inyi ema emin esoon̄ irek chi, ike owa ke otutuuk ene me ntitiin̄ ekisa ikaan̄ oruru?
IRE ENE IDO IBE: “Ike owa ke Ebi Ata-Ikọ Jioba ekisa ikaan̄ ikpoko isa irọ ikwaan̄ kiban̄?”
Obofọfọọk?
ME MGBIDIM
Jioba ikinwọnwọọn̄ efuuk eji ekitap isasa ibieen̄ ntitiin̄ kan̄ inye inan̄a me lek mgbọ, efuuk, mè inu nkaan̄ kiji.
Idodo
Ike owa ke eji ebekisa mgbọ mè efuuk kiji ikisa ibieen̄ ntitiin̄ inye?
Ike owa ke eji ebekisa inu nkaan̄ kiji ibieen̄ ntitiin̄ inye?
Me oniin̄ echi owa ke oboma igọgọọk ibieen̄ ntitiin̄ inye?
WEEK
Kween̄ inu orọrọ Awaji ikayaka ikiweek ibe ebi usun̄ kan̄ ekenyi irek ge me akọp irek.
Baibul inyi bọn ute irieen̄ ikakaan̄ ntap-me-mun̄ usini irek. Ire, keke oborọ mè ire gwun̄ ute enenwaan̄ okakaan̄ ntap-me-mun̄ obokpọchieen̄ me lek irek cha?
“Understanding Headship in the Congregation” (The Watchtower, February 2021)
Kpọ ubọk usini bọn ute esa me unye-ejit igwa ngwugwa isasa iben ikpa ntitiin̄ ijet ebi bọn ute ogbo kiban̄.
Week riọọn̄ ubọk ike eji ekisa ikaan̄ ikpoko osabe ikup esese me lek echi ebi ofifi uwu uriaak.
“How Is the Work of Jehovah’s Witnesses Financed?” (Web article)