Tele Ibe Ukpatu Ije Me Lek Kan̄

Inu Filip Orọbe

FIDIO: Filip Ilook Ata Etip inyi Ogwu Etiopia

1. Kpọ FIDIO yi, mè iyaka ire fuk Ikwaan̄ 8:​30, 31. Mè fọọk idodo chi ogọgọọk:

1. Ike owa ke Filip osa ibene ukpatu ya?

2. Keke orọ eyi ochubọk ire oniin̄ ogbegbe isasa ibene ukpatu mè ijeen̄ ene ya ayaya atikọ?

Keke Ke Eji Ekween̄ Inan̄a Me Lek Filip?

2. Ire eji itele ibe ukpatu ya ije me lek kan̄, ejit ogwu eji ekikpa usem inyi mokup dii, moweek si igọgọọk eji ikpa usem.

Gọọk Akpat Ukot Filip

3. Kiriọọn̄ ubọk kpọ ere. Ubọk isi ene okupbe mè ubọk ene ya okirọ akpalek kan̄ mokọt ijeen̄ eji owuwa mkpọ ofolek ene ya. Ire ikup kubọk ene ya iweek igọgọọk owu ikpa usem ni? Omokọt ibene ikitumu mkpọ ofolek atikọ Baibul sa me idodo ibe, “Ire oriọọn̄ ibe ke . . . ?” Jit ikukup inye ikikpa usem melek ogwu ikaweek igọgọọk owu ikpa usem.

4. Kaan̄ ime. Kakeek ibe ke obokpọkpọ ibene ikitumu mkpọ ofolek atikọ Baibul mgbọ yaage. Kup ikikpọ mgbọ otatat inyi ukpatu ya ije me lek kan̄. Usini mgbọ, eyi moweek ibe okup okpọ ofifi mgbọ obogọọk ene ya ikpa usem.

5. Kinwene ibot usem kwun̄. Usini mgbọ, ukpatu ya mokọt ije me ubọk okakeekge. Eya orọ, bem lek ikpakpa ofifi mkpọ eyi ogwu okigọọk ikpa usem okaan̄be ulọk me lek, ikerere ibe ke eyi mosibi ibe okpa ofifi atikọ kpan̄asi eyi okaan̄be me ejit.