ILULUK UGWEM KUBỌK EBI EYI KARAIS
Week Riọọn̄ Nkeek Awaji
Ikup ufiak ibe eji ekerọ inu obokineme Jioba mgbọ geelek. (Urọk 27:11) Inyi eji ekọt ekerọ ikeya, kè eji ekerọ ntumu-mfieek echi ojeje ikike me lek nkeek kan̄ ikerere ibe ke kpunu ọkpọkpọ ikan geege okup me emen Baibul ofolek inu ya. Keke obotap inyi eji ekọt ekerọ eya ni?
Kikween̄ Baibul usen geelek. Mgbọ geelek eji ekifuk Baibul, eji ekifiat mgbọ melek Jioba. Eji mekọt ikween̄ ubọk Jioba okikeek inu sa me ikwekween̄ ubọk irọbe eru me lek ebi eyi kan̄ mè ikwekween̄ mkpọ ofolek ebi irọrọ ata inu mè iyaka ire ijo inu me chieen̄ kan̄. Eji isiberọ ntumu-mfieek, ekwukwu mbuban Awaji mokọt itap ubọk inyi eji ekọt ekeek inu eji ekween̄be me emen Baibul.—Jọn 14:26.
Kiwọlọ inu kpọ. Osiborọ ntumu-mfieek, do lek kwun̄ ibe, ‘Kpasi ere mè iyaka ire mfufuk Baibul obokọt itap ubọk inyi emi nkọt ngobo ntet ubọk inu yi obokup me lek Jioba.’ Beek ntap-ubọk Jioba me uriaak, mè wọlọ ikpa mè fido echi ntitiin̄ osan̄abe isibi, echi okup me ida usem kwun̄ kpọ inyi okọt omun̄ onineen̄ Baibul obokọt itap ubọk inyi owu me irek kwun̄.—Itọn̄ 25:4.
IKPỌ FIDIO EJI “EBEKILIBI MELEK IME”—RIE ATA INORIE, MÈ IFỌỌK IDODO CHI:
Kpasi ukeme ke gwun̄ ute enenwaan̄ ijija me emen fidio ya okwek isi me lek?
Ike owa ke obokọt isa inu eji ekisa iwọlọ mkpọ ikpọ irọ inu mè ire okichichini mbet lek irek cha?
Kpasi oruru ke eji ekikaan̄ mè ire eji ikisan̄a mgbọ isibi ikiwọlọ mè ikikween̄ mkpọ echi obokọt itap ubọk inyi eji ekọt ekerọ ata ntumu-mfieek?—Iburu 5:13, 14