1 Crónicas
14 Tiro ñi lonco ülmen, Hiram pingelu, huercülelfi huerquen ta David. Cafei huercüi cedro mamüll, pu che cüdauquelu cura* ca mamüll meu, fei ñi deumalelafiel quiñe ruca* ta David. 2 David ngüneduami Chau Jehová ñi elueteu tañi rumel ngünenieal Israel mu. Cafei tañi pu che* Israel ñi duam mu, Chau Dios quellueyu ñi rume afmatufalngeal tañi ngünenieel.
3 David doi nierpui domo Jerusalén huaria mu. Cafei doi nierpui fotüm ca ñahue. 4 Tüfa tañi üi David ñi pu fotüm choyüngelu Jerusalén huaria mu: Samúa, Sobab, Natán, Salomón, 5 Ibhar, Elisúa, Elpélet, 6 Noga, Néfeg, Jafía, 7 Elisamá, Beeliadá ca Elifélet.
8 Pu Filistea che allcüingün ñi dullingeel David tañi lonco ülmen-ngeal com Israel mu, fei com lefcontumefingün. Quimlu David, tripai ñi hueichayafiel engün.* 9 Fei hula acuingün pu Filistea che ca lefcontufingün pu che mülelu Refaím ñi laf mapu mu.* 10 David ramtufi ta Chau Ngünechen: “¿Mülei ñi hueichameafiel pu Filistea che? ¿Hultucuafimi tañi cuhu mu?”. Chau Jehová huiñoldungueyu:* “Mai, amunge. Rüfcünu, hultucuafiñ engün eimi tami cuhu mu”. 11 Feimu David amui Baal-Perazim lof mu, üyeu hueufi engün. Fei David feipi: “Chau Ngünechen hueufi tañi pu caiñe, chumngechi ti mangin co trafolniefi ti cura malal”. Feimu Baal-Perazim* pingei tiyechi lof. 12 Pu Filistea che tiye mu elcünufingün tañi pu dios ñi adentun.* David huercülu, lüpümtucungei ti adentun cütral mu.
13 Fei hula pu Filistea che huiño quehuaingün laf mapu meu. 14 David huiño ramtufi ta Chau Dios, huelu Chau Dios feipieyu: “Fei engün ñi adquiñ mu hueichalayafimi. Doi mai hualloñmayafimi,* fei furi püle lefcontuafimi engün, itrotripa bacá* pingechi anümca mu. 15 Eimi allcülmi trecan hueichafe huente bacá pingechi anümca meu, fei quimaimi, iñche Chau Ngünechen tripayan eimi tami adquiñ mu ñi huehuafiel pu Filistea che. Feica müten lefcontuafimi engün”. 16 Feimu David femi com ñi huercüeteu ta Chau Ngünechen, fei Gabaón puulu Guézer huaria mu hueufingün pu Filistea hueichafe. 17 Com pu troquiñche mu cüme quimniengei ta David. Fei Chau Jehová tañi pin mu com pu troquiñche llicafingün ta David.