Isaías
18 ¡Aungeai ti mapu apolelu saltamonte mu ñi raracümequen engün!
Feiti mapu fülcülei* Etiopía ñi fillque leufü meu.
2 Tüfachi mapu huercüyefi huerquen amulelu lafquen püle,
farcu mu deumangelu papiro mu amuleingün co meu, fei feipi:
“Eimün, pu huerquen, matumatu amumün,
puhuaimün quiñe troquiñ mapu mu cheu ñi mülen alüpürachi che ca pañushngelu ñi trahua,
tüfachi troquiñche nehuen-ngei ca hueuquefi caquelu troquiñche,
tüfachi pu che fill püle llicaniengei,
feitichi mapu mu rupaquei fillque leufü”.
3 Com eimün mülelu huall mapu meu,
peaimün quiñe orcon reque ñi elcünungeel huente mahuida mu,
ca allcüaimün quiñe cullcull reque ñi dungulmequengen.
4 Tüfa tañi feipieteu Chau Jehová:
“Tüngcülean,* adquintuafiñ tañi mülehue.*
Tüngcülen mu adquintuan ti antü ñi pelon reque pañitumequefilu ti mapu.
Quiñe füshcülechi tromü reque felean arengechi cosecha meu.
5 Fülcülepale ñi tungeal ofad,
deu ütrüfnagle ti rayen ca amulele ñi afülen ti ofad,
rosehue mu catrüngeai ti yul*
ca ti choyün* catrünentungeai.
6 Com tüfa elcünungeai ñi iyaeteu pu üñüm* ilotuquelu mahuida mu miyauquelu
ca tati pu culliñ mapu mu mülelu.
Pu üñüm ilotuquelu imequeafingün com hualüng antü meu,
ca pu culliñ miyauquelu mapu mu imequeafingün com cosecha antü mu.
7 Feichi mu Chau Jehová Ñidolcülelu pu hueichafe mu* elungeai quiñe yehun*
cüpalu quiñe troquiñ mapu mu cheu ñi mülen alüpürachi che ca pañush trahuangelu,
tüfachi troquiñche nehuen-ngei ca hueuquefi caquelu troquiñche,
tüfachi pu che fill püle llicaniengei,
feitichi mapu mu rupaquei fillque leufü.
Tüfachi yehun yengeai Sion huincul mu cheu ñi mülen Chau Jehová ñi üi, tati Ñidolcülelu pu hueichafe mu”.