Isaías
19 Tüfachi juician dungu feipicünulelngei ta Egipto:
“¡Tüfei! Chau Jehová püralei quiñe tromü mu matu miyaulu, Egipto mu conpui.
Egipto ñi pu falinochi dios müllmüllaingün quisu ñi duam mu.
Llihuai* pu Egipto che ñi piuque.
2 Femcünuan chaf Egipto che* ñi quehuatuhual,
hueluquentu hueichahuaingün,*
chaf peñi, chaf carucatu,
chaf huaria ca chaf lonco ülmen.
3 Pu Egipto che quimlayaingün ñi chumal.
Iñche huelucünuafiñ ñi ayünieel engün.
Utuafingün* tati pu falinochi dios,
pu calcu che, pu ramtuquefilu pu la ca pu pelontuchefe.
4 Hultucuafiñ Egipto quiñe huesa ñidol ñi cuhu meu,
quiñe lonco ülmen huesa piuquengelu ngünenieayu engün” feipi tati Ñidol, Chau Jehová Ñidolcülelu pu hueichafe mu.
5 Ti lafquen co arcüai,*
ti leufü co afnagai ca arcüai.
6 Pu leufü co nümüai,
ti huitrunco Egipto ñi Nilo leufü mu afnagmequeai ca arcüai.
Alüpürachi cachu ca ti rüme* funanagai.
7 Ancüai ti anümca mülelu inaltu Nilo leufü, cheu ñi conpupeyüm lafquen mu.
Ca femngechi ancüai com ti mapu ngan-ngelu inaltu Nilo leufü.
Com yetuayu ti cürüf, fei ngehuelayai.
8 Pu challhuafe hueñancüleaingün,
pu ütrüftucuquefilu anzuelo Nilo leufü mu eyütuaingün,
ca pu ünifcünuquefilu ñi challhuahue co mu doi pichin-ngetuaingün.
9 Yehuelcangeai pu deumaquelu tacun lino mu
ca tati pu deumaquelu ligngechi ngüren* huitral mu.
10 Tañi pu ngürecafe cutrantupiuqueleaingün,
com pu cullingequeelchi cüdaufe rume huesa duamcüleaingün.
11 Zoan ñi pu principe hueluduamngeingün.
Faraón ñi doi quimque ngülamtufe hulqueingün huesaque ngülam.
¿Chumngechi am feipimequefimün ti Faraón
“Iñche quimque che mu cüpan,
tañi cuifiqueche yem lonco ülmen-ngefuingün”?
12 Fei, ¿cheu mülei tami quimque che?
Quimle engün, feipipe chem ñi femngeal ta Egipto chumngechi ñi dulliel Chau Jehová Ñidolcülelu pu hueichafe mu.
13 Zoan tañi pu principe hueluduam reque femürqueingün.
Nof* tañi pu principe ngünencangerqueingün.
Pu loncolelu caque quiñeque ñi troquiñche meu huelulcafingün ta Egipto.
14 Chau Jehová femcünui pu Egipto che ñi hueluraquiduamcüleal.
Pu loncolelu femcünuingün Egipto ñi huesa miyahual com tañi femün meu.
Egipto quiñe ngollilelu reque felei trayafquiyaulu* tañi rapin meu.
15 Egipto chumlayafui rume.
Ti lonco ca ti cülen, ti choyün* ca ti rüme ca chumlayai rume.*
16 Feichi antü Chau Jehová Ñidolcülelu pu hueichafe mu huitrañpüramai tañi cuhu ñi aneltuafiel* pu Egipto che. Feimu domo reque feleaingün, müllmüllcüleaingün ca pellqueleaingün.* 17 Chau Jehová Ñidolcülelu pu hueichafe mu dullicünui chem ñi femngeal ta Egipto. Feimu Judá llicalcayafi ta Egipto, üitungele müten, rume llicaleaingün.
18 Feichi antü müleai 5 huaria Egipto mapu meu, Canaán ñi quehun dunguaingün ca eldungucünuaingün ñi poyeafiel ta Chau Jehová müten, tati Ñidolcülelu pu hueichafe mu. Quiñe ta tüfa Tati Huaria Teifücaquelu pingeai.
19 Feichi antü rangiñ Egipto mapu mu müleai quiñe altar ñi püramyengeal Chau Jehová ca cheu ñi fentepuhun tañi mapu müleai quiñe huitracünuelchi cura ñi püramyengeal Chau Jehová. 20 Pu che peaingün tüfachi dungu Egipto mapu mu, fei loncontucunieafingün ta Chau Jehová Ñidolcülelu pu hueichafe mu. Llellipuafingün ta Chau Jehová tañi pu cutrancamequeteu mu, fei huercülelafi engün quiñe montulchefe, quiñe fütra montulchefe, ñi montulafiel engün. 21 Pu Egipto che quimafingün ta Chau Jehová, feichi antü pu Egipto che quimafingün ta Chau Jehová, eluafingün chalintucun* ca regalo. Eldungucünulelafingün ta Chau Jehová ca huechunenturpuafingün. 22 Chau Jehová cutrancayafi ta Egipto, cutrancayafi, fei tremoltuafi.* Huiñotuaingün Chau Jehová mu, fei quisu huiñoldungulelafi* tañi llellipun ca tremoltuafi engün.
23 Feichi antü quiñe rüpü tripayai Egipto mu, fei puhuai Asiria mu. Asiria conpuai Egipto mu, Egipto cai conpuai Asiria mu. Fei Egipto engu Asiria quiñentrür cüdahuelafingu ta Chau Dios. 24 Feichi antü Israel quiñehuai Egipto ca Asiria engün. Quiñe cümelcan-ngeai tati mapu mu. 25 Chau Jehová Ñidolcülelu pu hueichafe mu cümeque dungu feipiafi: “Egipto, iñche tañi pu che. Asiria fei tati troquiñche iñche ñi deumael. Iñche ngen-ngen Israel mu. Com engün cümelcangepe”.