Isaías

20 Sargón, Asiria ñi lonco ülmen, huercüfi quiñe loncolechi hueichafe* ñi amual Asdod huaria mu, fei quehuamefi ti huaria ca nüfi. 2 Feichi mu Chau Jehová adniefi ta Isaías ñi dungual, tüfa ta Amoz ñi fotüm. Feipifi: “Amunge, entunge ti sacu tacun tami yenieel cintura mu ca tami ocota”.* Fei quisu femngechi femi, triltrangcülen miyahui* ca triltrang namuncünuhui.*

3 Fei Chau Jehová feipi: “Isaías, iñche tañi cüdaufe, triltrangcülen miyahui ca triltrang namuncünuhui 3 tripantu mu, femngechi pengelcünui ca cüme quimfalcünui chem ñi rupayal Egipto ca Etiopía. 4 Fei Asiria ñi lonco ülmen presuyetuafi pu Egipto che ca Etiopía che, huechequeche ca füchaqueche, triltrangquiyahuaingün, tañi anühue ca namun cafei. Femngechi yehuen dungu mu rupayai Egipto. 5 Fei engün maneluhuingün Etiopía mu ca afmatulefuingün Egipto ñi cüme adngen mu, huelu llicaleaingün ca yehueaingün Etiopía ca Egipto ñi duam mu. 6 Feitichi antü tati pu che mülelu tüfachi mapu meu inafülcülelu lafquen mu feipiaingün: ‘Tüfei ñi rupamequen taiñ maneluupeyüm, üye mu lefmaupeiñ taiñ quellungeal ca taiñ montulngeal Asiria ñi lonco ülmen mu, ¿chumngechi lefmahuaiñ feula?’”.