Isaías
21 Tüfachi juician dungu feipicünulelngei tati huellin mapu* lafquen reque felelu:*
Tüfachi dungu cüpalei quiñe cürüftucu mahun reque sur püle.*
Huellin mapu mu cüpalei, quiñe llicafalchi mapu meu.
2 Pengelelngen quiñe llicafalchi dungu:
ti troquiñche manelfalngenolu tañi femün mu pengelquei ñi manelfalngenon.
Ti troquiñche apümcaquelu amulei tañi apümcamequen.
¡Amunge, ahuem, Elam! ¡Hueichamenge,* ahuem, Media!
Fentecünuan com ti cutrancahun ñi mülen fei ñi duam mu.
3 Feimu rume cutrantupiuquelen.*
Lalatumequen
quiñe domo reque choyümequelu.
Trücohui ñi piuque,* feimu allcüquelan.
Fill raquiduamcülen, feimu peloquelan.
4 Cümelcalelai ñi piuque, müllmüllquen fente tañi llican.
Ti pun tañi üngümquefel,* feula müllmüllelqueneu.
5 ¡Pepicayafimün ti mesa ca cüme elcünuafimün huancu!
¡Imün, putumün!*
¡Eimün, pu principe, huitrapüramün! ¡Ti escudo hutrulelfimün* aceite!
6 Tüfa tañi feipieteu Chau Jehová:
“Amunge, elcünunge quiñe soltau ñi adquintuleal, fei feipiai ñi pefiel”.
7 Quisu pei quiñe hueichan carretela* ñi huitranieteu 2 cahuellu,
quiñe hueichan carretela ñi huitranieteu burro
ca quiñe hueichan carretela ñi huitranieteu camello.
Ti soltau cüme adquintulerquei, com cüme ngüneduami.
8 Fei trapial reque huirari, feipi:
“Ahuem, Chau Jehová, adquintuhue mu huitralequen antü mu,
fillque pun mülequen cheu tañi adquintuleal.
9 Tüfei ñi cüpalen tüfa püle:
¡pu huentru püralei 1 hueichan carretela mu, huitranieyu 2 cahuellu!”.
Fei huirardungui:
“¡Hueungei Babilonia! ¡Hueungei llemai!
¡Quisu trafocafi mapu mu com tañi pu dios ñi adentun!”.*
10 Ahuem, tañi troquiñche, quetran reque pünocangeimün,
eimün tati cachilla tripalu cheu ñi pünoquetran-ngequen.
Feipihuiyiñ chem ñi allcütufiel ta Chau Jehová Ñidolcülelu pu hueichafe mu, Israel ñi Chau Dios.
11 Tüfachi juician dungu feipicünulelngei ta Dumá:*
Quiñe che mülelu Seír mu huirarelmequeneu:
“Eimi, soltau adquintulelu, ¿tuntelehuei ti pun?
Eimi, soltau adquintulelu, ¿tuntelehuei ti pun?”.
12 Ti soltau adquintulelu feipi:
“Epe aculei ti pulihuen, ti pun cafei.
Cüpa ramtulmün, ramtumün.
¡Huiño cüpamün!”.
13 Tüfachi juician dungu feipicünulelngei tati huellin mapu:*
Ahuem, eimün pu Dedán che miyauquelu tamün pu culliñ eimün,
rulpapunaimün cheu ñi mülen anümca huellin mapu mu.
14 Ahuem, eimün pu mülelu Temá mapu mu,
amümün, yelelfimün co tati huihulelu
ca cofque tati lefmaumequelu.
15 Lefmahuingün tati fütra cuchillo mu, feiti pepicaucülelu ñi hueichayal.
Lefmahuingün tati arco mu, feiti pepicaucülelu ñi ütrüftual flecha ca lefmahuingün ñi cutrancaunoal hueichan mu.
16 Tüfa tañi feipieteu Chau Jehová: “Quiñe tripantu mu Quedar ñi afmatufalngen afai. Tüfachi tripantu raquingeai chumngechi ñi raquiqueel tati pu cüdaufe cullingequelu. 17 Quedar ñi pu hueichafe mu pichilehueai tati pu adümquefilu ti arco, femngechi feipilu am ta Chau Jehová, Israel ñi Chau Dios”.