1 Crónicas

15 David amulei ñi deumamequen ruca David ñi Huaria mu. Pepicai quiñe mülehue ca elcünui quiñe tolto ruca* ñi müleal Chau Ngünechen ñi Falin Caja. 2 Feichi mu David feipi: “Inei no rume ngelai ñi yeafiel Chau Ngünechen ñi Falin Caja, pu Leví che müten mülei tañi femal. Chau Jehová dullieyu engün tañi yeal Chau Jehová ñi Falin Caja ca tañi rumel cüdahuelaeteu”. 3 Fei hula David trahulfi com pu Israel che Jerusalén mu, fei ñi yeafiel Chau Jehová ñi Falin Caja ti mülehue mu tañi pepicacünuel.

4 David trahulfi Aarón ñi pu cüpanche ca pu Leví che: 5 pu Cohat che meu ti loncolelu Uriel ca 120 tañi pu peñi. 6 Pu Merarí che meu ti loncolelu Asaya ca 220 tañi pu peñi. 7 Guersom ñi pu cüpanche mu ti loncolelu Joel ca 130 tañi pu peñi. 8 Elizafán ñi pu cüpanche mu ti loncolelu Semaya ca 200 tañi pu peñi. 9 Hebrón ñi pu cüpanche mu ti loncolelu Eliel ca 80 tañi pu peñi. 10 Uziel ñi pu cüpanche mu ti loncolelu Aminadab ca 112 tañi pu peñi. 11 Cafei David mütrümfi* ti sacerdote Sadoc ca Abiatar. Cafei tati pu Leví che, tüfa ta Uriel, Asaya, Joel, Semaya, Eliel ca Aminadab. 12 Feipifi engün: “Eimün loncoleimün pu Leví che ñi familia mu. Eimün ca tamün pu peñi liftuumün.* Tati mülehue mu tañi pepicacünuel iñche, yeafimün Chau Jehová ñi Falin Caja, fei Israel ñi Chau Ngünechen. 13 Ti hunen rupa eimün yelafimün ti Falin Caja, feimu taiñ Chau Ngünechen Jehová rume illcutueiñmu iñchiñ.* Ngüneduamlaiñ chumngechi cüme yeafiel ti Falin Caja”. 14 Feimu pu sacerdote ca pu Leví che liftuhuingün, femngechi tañi yeafiel Chau Jehová ñi Falin Caja, fei Israel ñi Chau Ngünechen.

15 Fei hula pu Leví che yefingün Chau Ngünechen ñi Falin Caja, fara mu meñcu yefingün chumngechi huercüi Moisés, Chau Jehová tañi pin mu. 16 David nütramcafi pu Leví che ñi pu loncolelu. Feipifi ñi elfalcünuafiel tañi pu peñi ülcantuquelu ñi ayühunquechi ülcantual fillque dungulhue mu: dungulhue nielu cuerda, arpa ca cimbalo.*

17 Feimu pu Leví che tañi troquiñche mu üitufingün ta Hemán, tüfa Joel ñi fotüm, cafei Asaf, tüfa Berekías ñi fotüm, ca Etán, tüfa Cusayá ñi fotüm, Merarí ñi familia mu tuhui. 18 Compañeyu engün cangelu troquiñche tañi pu pariente. Coneltulei Zacarías, Ben, Jaaziel, Semiramot, Jehiel, Uní, Eliab, Benaya, Maaseya, Matitías, Elifelehu, Micneyá, cafei 2 huentru cuidaquelu puerta, tüfa ta Obed-Edom ca Jeiel. 19 Pu ülcantufe Hemán, Asaf ca Etán mülefui ñi dungulafiel ti cimbalo cobrengelu. 20 Cafei Zacarías, Aziel, Semiramot, Jehiel, Uní, Eliab, Maaseya ca Benaya dungulquefui dungulhue nielu cuerda pepicangelu ñi pichirumechi triliuhual.* 21 Ca Matitías, Elifelehu, Micneyá, Obed-Edom, Jeiel ca Azazías dungulquefui arpa pepicangelu ñi alürumechi trahuauhual.* Femngechi adniequefuingün ti ülcantun. 22 Kenanías loncolei pu Leví che mu, tüfa adümuuquefui, feimu ngüneduamquefui chumngechi yengeal ti Falin Caja. 23 Berekías ca Elcaná cuidaquefui ti Falin Caja. 24 Pu sacerdote Sebanías, Josafat, Netanel, Amasái, Zacarías, Benaya ca Eliezer nehuentu dungulquefui ti trompeta adquiñ püle Chau Ngünechen ñi Falin Caja mu. Obed-Edom ca Jehías ca cuidaquefui ti Falin Caja.

25 David, Israel ñi pu loncolelu ca pu loncolelu mil hueichafe mu* ayühun mu yemefingün Chau Jehová ñi Falin Caja Obed-Edom ñi ruca mu, femngechi tañi yetuafiel. 26 Chau Ngünechen quellufi pu Leví che yequefilu ti falin caja pengelquelu Chau Jehová ñi eldungu, feimu pu Leví che chalintucuingün 7 hue toro ca 7 caniru.* 27 David tucuniei quiñe tacun nienolu cuhul,* cüme pañu meu deumangei. Ca femngechi tucutuucülei com pu Leví che yequelu ti Falin Caja, pu ülcantufe ca Kenanías, tüfa loncolefui chumngechi ñi yengeal ti Falin Caja ca pu ülcantufe. David ca tucuniei quiñe falin tacun* lino deumangelu. 28 Com pu Israel che yeniefingün ti falin caja pengelquelu Chau Jehová ñi eldungu. Ayühunquechi huirarquefuingün, dungulingün ti cullcull, ti trompeta ca ti cimbalo. Nehuentu dungulnieingün ti dungulhue nielu cuerda ca ti arpa.

29 Huelu conpulu ti falin caja pengelquelu Chau Jehová ñi eldungu David ñi Huaria mu, Mical, Saúl ñi ñahue, nagquintui ventana mu, fei pefi ti lonco ülmen David rincüyaulu ca fiestamequelu chem ñi rupamequen, fei eluhui ñi illamcayafiel tañi piuque mu.