1 Crónicas
13 David ramtufi pu loncolelu mil hueichafe,* pu loncolelu 100 hueichafe ca com pu loncolelu. 2 Fei hula David feipifi com Israel trahunche: “Eimün cümelu troquifilmün ca taiñ Chau Ngünechen Jehová cümelu troquifile, huercülelafiyiñ quiñe huercün dungu pu peñi mülehuelu com Israel mapu mu, cafei pu sacerdote ca pu Leví che mülelu tañi huaria mu ca tañi lelfün cachu, femngechi ñi quiñehual iñchiñ mu. 3 Fei huiño cüpaltuafiyiñ Chau Ngünechen ñi Falin Caja”. Saúl ñi antü mu cuidangelai ti Falin Caja. 4 Com pu che cümelu troquifi tüfachi dungu, feimu com ti trahunche quiñeucülen femingün tüfa. 5 David trahulfi com pu Israel che, Egipto ñi leufü püle* puulu Lebó-Hamat,* femngechi Quiryat-Jearim mu entual ca cüpalal Chau Ngünechen ñi Falin Caja.
6 David ca com pu Israel che amuingün Baalá huaria mu, tüfa Quiryat-Jearim ngen-ngelu Judá, femngechi tiye mu yemeafiel Chau Ngünechen Jehová ñi Falin Caja, fei anülei tañi ülmen huancu mu huente tati pu querubin,* ti Falin Caja cheu püramyengequei Chau Dios ñi üi. 7 Fei hula entuingün Chau Ngünechen ñi Falin Caja Abinadab ñi ruca mu ca tucufingün quiñe hue carreta mu. Uzá ca Ahió yeniefingu ti carreta. 8 David ca com pu Israel che com piuque mu fiestamequei tüfachi dungu Chau Ngünechen ñi adquiñ mu. Ülcantuingün ca dungulingün arpa ca caquelu dungulhue nielu cuerda, cafei pandereta, cimbalo* ca trompeta. 9 Huelu puulu engün cheu ñi liftungequem quetran, Kidón pingelu, ti pu toro epe huaichüfrulpafi ti Falin Caja. Feimu Uzá puhuli ñi cuhu ti Falin Caja mu, fei nüfi. 10 Feimu Chau Jehová rume illcutufi ta Uzá* ca langümfi. Uzá puhuli ñi cuhu ti Falin Caja mu, fei nüfi. Tiye mu lai Chau Dios ñi adquiñ mu. 11 Huelu David illcui,* Chau Jehová rume illcutufilu cai ta Uzá ca langümfi. Fantepu mu feichi lof Pérez-Uzá* pingetui.
12 Feichi antü David rume llicafi ta Chau Ngünechen. Fei feipi: “¿Chumngechi cai cüpaltuan Chau Ngünechen ñi Falin Caja?”. 13 Feimu David cüpaltulafi ti Falin Caja cheu tañi mülen quisu, David ñi Huaria mu. Doi mai huercüi ñi yengeal ti Falin Caja Obed-Edom ñi ruca mu, tüfa ti Gat huentru. 14 Chau Ngünechen ñi Falin Caja mülenagi Obed-Edom ñi familia mu, 3 cüyen mülenagi ñi ruca mu. Ca Chau Jehová amulei ñi cümelcafiel ta Obed-Edom tañi familia ca com tañi nieel.