CHAFTUAFUIMI ESTRES CUTRAN

¿Chem am tati estres?

Rupamequelu iñchiñ quiñe huesa dungu, taiñ cuerpo hulquei estres taiñ chaftuafiel. Fei ti müllo huercüfi fentren hormona com taiñ cuerpo meu. Feimu ti piuque doi matu amulequei, cangechileafui ti presion, doi cüme neyüafuiñ cam doi cüdautuafuiñ ñi neyüal ca yafüquei taiñ musculo. Femngechi taiñ cuerpo llihuatulei, cüme quimnofiliyiñ rume chem taiñ rupamequen. Rupalu ti estres, ti cuerpo llihuatulequelai, fei tüngcülehuetuquei.

¿RUMEL HUESALCAPEIÑMU MAI TI ESTRES?

Taiñ cuerpo deumangequei ñi hulal estres rupalu iñchiñ cuñihun dungu. Taiñ müllo ngüneniequei tüfa. Ti estres quelluafeiñmu taiñ matu chaftual quiñeque mu. Cafei quelluafeiñmu taiñ diturpual taiñ ayünieel cam doi cüme cüdahual, por ejemplo, ñi cüme tripayal prueba mu, ñi peal quiñe cüdau cam cüme entual quiñe deporte.

Huelu rumel nieliyiñ estres, huesalcayafeiñmu. Taiñ cuerpo rumel llihuatulele, cutranafuiñ, huesa duamcüleafuiñ cam cutrancüleafui taiñ raquiduam. Cafei cangentungeafui taiñ femmequen ca chumngechi duamelquefiyiñ ta caquelu. Quiñe che rumel niele estres conafui huesaque huimtun mu, fei doi amulcünuafui ñi putuquen ca ñi lahuentuquen, drogatuafui, pütremtuafui ca icauqueafui. Feitichi che ca hueñancühuafui, rume ürcüleafui ca raquiduamafui ñi langümuhual cütu.

Caquerumei chumngechi taiñ huesalcaqueteu ti estres, contuafeyu fillque cutran ca huesalcayafui tuchi püle rume tati cuerpo.

TI ESTRES, ¿CHUMNGECHI HUESALCAQUEIMU TAMI CUERPO?

Fillque nervio taiñ nieel

Tati fillque nervio hulquei hormona, quiñe ta tüfa adrenalina ca cortisol pingelu. Fei ta doi trefcüquei piuque, doi alün-ngei ti presion arterial ca ti glucosa mollfüñ meu, femngechi ñi matu femal cuñihun dungu rupale. Quiñe che rume estres cutrancülele:

nieafui ansiedad ca depresion cutran, cutranafui tañi lonco ca cüme umautulayafui

Fillque musculo taiñ nieel

Tati musculo huinüfquei taiñ incañpeaeteu, femngechi taiñ allfünoal. Quiñe che rume estres cutrancülele:

cutrantuleafui tañi cuerpo, cutranafui tañi lonco ca trücohuafui chi musculo

Neyen

Doi matu neyüliyiñ, doi nieafuiñ oxigeno. Quiñe che rume estres cutrancülele:

cüdautuafui tañi neyüal, llicarumeafui mülenon mu rume cuñihun dungu

Piuque ca mollfüñ

Ti piuque doi matu nengümquei, femngechi ñi yeafiel ti mollfüñ com cuerpo mu. Tati vaso sanguineo mülelu ponhui taiñ cuerpo mu huinüfquei cam trücouquei, femngechi ñi yeal mollfüñ cheu ñi doi duamniengen, por ejemplo, musculo meu. Quiñe che rume estres cutrancülele:

lalatuafui, nieafui hipertension cutran cam accidente cerebro vascular

Tiroides ca caquelu organo trür femngelu

Tati fillque glandula hulquei tati hormona adrenalina ca cortisol pingelu. Tüfa quelluquefi ti cuerpo ñi chaftuafiel ti estres. Tati que doi amulquei azucar cuerpo meu taiñ eluaeteu doi nehuen. Quiñe che rume estres cutrancülele:

nieafui diabetes cutran, müte nielayafui nehuen, femngechi contuafeyu fillque cutran. Caletuafui tañi chum duamcülen, ca femngechi rume faneafui

Pütra ca cüllche

Conpuyüm iyael pütra mu, rume estres niele quiñe che cutranafui, fei:

ülnguncüleafui, rapiafui, pechayafui ca ancüñmayafui tañi cüllche

Pepi niepüñeñal

Quiñe che niele estres, cüpa cudumlayafui ñi afcadi ca pepil-layafui ñi cudumuhual. Rume estres cutrancülele:

pu huentru pepil-layafui ti cudumuhun. Ca pu domo huesalcayafeyu tañi menstruacion