Ñom piwkengeaymi

¿Chumkey ta che?

Kiñeke che kidu müten sakiwkülekey ñi chumngechi chengen ka doykülelu trokiwkülekey kakelu che mu, fey mallmawkey. Kuñiwtukuwnoliyiñ femngechi rakiduamürpuafuiñ. Kiñe lifru feypi: “Fentren trokiñche Mapu mew mallmawkey ñi takuwün, wimtun mu, tañi religion kam kakelu dungu mu” (Encyclopædia Britannica). Fey, ¿chem kelluafeiñmu taiñ mallmawnoal?

Biblia ñi ngülam

‘Ñom piwke mew kake kiñeke eymün doy kümelu trokiafimün ta kakelu pu che’ (FILIPENSE 2:⁠3).

¿Chem küpa kimeltuy? Ñom piwkengeaiñ femngechi mallmawlayaiñ. Ñom piwkengeliyiñ longkontukuaiñ: kakelu che doy kümekünukey ta iñchiñ mu. Rakiduamnge, ¿mülepey may kiñe che welulkawkenolu? Femlay llemay.

Ngüneduamnge ñi rupan kiñe wentru Esteban pingelu. Kidu pichikalu müten kimeltulelngey tañi pais doyküley kakelu pais mu, feymu eluwi ñi illamkayafiel. Welu rupalu kiñeke tripantu illamkawelafi feyti ka tuwün pu che. ¿Chem kellueyew? Kidu feypi: “Doy kümelu trokifilmi ta kakelu che kelluaeymu tami illamkachenoal. Fewla kimtukun falinke dungu enseñayafenew kake kiñeke pu che”.

Chem tami femafel

Acordanienge, eymi ka welulkawkeymi. Longkontukuaymi, kiñeke dungu mu kakelu che doy adümuwküleafuy eymi mu. Ngoymakilnge, kom tati pu che kakerumey tañi femngen, kiñentrür koneltulele rume kiñe trokiñche mew.

Petu tami weda rakiduamnon kiñe che mew, ramtuwnge:

Longkontukuaymi: kiñeke dungu mu kakelu che doy adümuwküleafuy eymi mu

“¿Weda trokipefiñ may kiñe che ñi rakiduamnon iñche reke?”.
“Tüfachi che ngüneduameli, ¿wedake dungu peñmayafenew chi?”.
“Tüfachi che, ¿chem dungu mew doy adümuwküley iñche mew?”.

Rüf piwke mew wiñoldungulmi tüfachi ramtun, weda rakiduamwelayaymi tüfachi che mew. Welu fey ka müten no, kafey kümeke dungu peafuymi kidu mew.

Ñi rupan kiñe wentru: Nelson (Estados Unidos mapu mu)

Nelson feypi: “Chew tañi mongelekefel iñche, mülekefuy kiñe tuwün pu che müten. Nierpulu 19 tripantu iñche amun kiñe fütra waria ñi küdawal kiñe fabrica mu. Feyti waria mu mongelekefun fillke tuwün che engün, kake wimtun nielu. Ka femngechi kiñentrür küdawkefun kidu engün mu”.

“Doy kimürpufiñ engün, fey doy weniyerpufiñ. Fey kimürpun, ka tuwün niele rume kiñe che, küme entuafuy tañi küdaw ka manelfalngeafuy”.

“Rupalu kiñeke tripantu kureyefiñ kiñe domo ka tuwün nielu. ¡Rume ayüwkülen tañi domo iñchiw! Kidu pengelelenew weke iyael ka weke musica, fey tüfa ka ayüwülkeenew. Fey kimürpun kom pu che welulkawafuy, welu ka kümeke dungu femafuy. Fewla iñche ngüneduamkefiñ feychi ka tuwün pu che ñi küme piwkengen. Fey tüfa kelluenew ñi doy küme chengeal”.