CAPITULO 35
¿Chumafun ñi hueniyeafiel ta Chau Jehová?
Jeremi rupalu quiñe cüdaungechi dungu mu, quimtucui ñi fente falin-ngen hueniyeafiel ta Jehová. Quisu feipi: “Nielu 12 epu tripantu iñche, tañi chau quisucünueiñmu. Acordafiñ quiñe pun, ngillatufiñ ta Jehová ñi huiñotual tañi chau”.
Jeremi fente hueñancülefui, huelu eluhui ñi papeltuafiel Biblia. Fei pei quiñe troquiñ feipilu: “Eimi ngüneduamqueimi ñi huesa rupaquen ca ñi hueñancülen quiñe che. Pequeimi ca eluucüleimi tami quelluafiel. Feiti che huesa rupamequelu eluuquei ñi fülconal eimi mu; eimi llemai quelluquefimi tati cuñifallcülelu” (Salmo 10:14). Ñi feipin tüfachi texto rüf puhui Jeremi ñi piuque mu. Quisu ca feipi: “Papeltufiel mu tüfachi texto, Jehová feipieneu reque: ‘Iñche quelluayu’ piqueneu, Jehová llemai iñche tañi chau. Quisu, ¿ti doi cüme chau ngenoafulu?”.
EIMI femngechi rupafulmi, fei tüfa acordanienge: Jehová cüpa hueniyeimu. Biblia feipi: “Fülconmün ta Ngünechen meu, fei quisu fülconai ta eimün meu” (Santiago 4:8). Felei llemai, pequenofilmi rume ta Jehová, hueniyeafuimi. ¡Quisu eluucülei tami hueniyeaeteu!
Re femngechi hueniyelayafuimi ta Jehová. Raquiduamnge tüfa: nielmi quiñe pichi anümca ruca meu, ¿chumafuimi ñi cüme tremal? Hutrucoafimi ca elcünuafimi antü meu, femngechi cüme tremai tati. Ca femngechi eimi tami cüme hueniyeafiel Jehová, mülei tami femal quiñeque dungu.
Estudiayafuimi
Epu che cüme hueniyeule, mülei ñi cüme nütramcahual ca cüme allcütuhual. Ca femngechi eimi cüpa hueniyefilmi ta Jehová, cüme nütramcayafimi ca allcütuafimi. Huelu, ¿chumngechi allcütuafuimi? Cüme papeltuafimi Biblia, tüfa mu mülei Chau Jehová ñi feipin (Salmo 1:2, 3).
Eimi müna ayüqueimi adquintual television, aucantual, cam tripayal tami hueni eimün. Fei müte ayülayafuimi estudiayal. Huelu cüpa hueniyefilmi ta Jehová, eluucülenge tami cüme estudiayafiel quisu ñi feipin Biblia meu. Femngechi müten hueniyeafuimi.
Raquiduamquilnge: “Papeltufili Biblia, afeluhuafun”. Rüfcünu, papeltuafiel Biblia afeluhun-ngelai. Fei, ¿chumafuimi? Elantücünuaimi tami papeltuafiel Biblia. Inayentuafimi ñi femün quiñe üllcha, Lais pingelu, quisu feipi: “Hue huitran mu iñche, papeltuquen Biblia, fill pulihuen”. Cangelu üllcha, Maria pingelu, ca dungu femquei, feipi: “Fill pun, petu ñi umautuquenon, papeltuquen Biblia”.
Fei, ¿chumngechi adcünuaimi tami papeltun? Hune, ngüneduamafuimi ti huichulechi dungu feipilelu “Cüme ngüneduamfinge tami Biblia”. Deu tami ngüneduamfiel, fau huirintucuafuimi chem hora mu eluhuafuimi tami papeltuafiel Biblia, 30 minuto rehuall, fill antü.
․․․․․
Müna cümei tami adcünual tami tiempo, huelu fei ca müten no. Doi amulele tami papeltufiel Biblia, quiñeque mu adümlayafuimi tami papeltuel. Huelu fentecünuquilnge. Raquiduamnge ñi feipin quiñe hueche huentru, Jezreel pingelu, quisu feipi: “Quiñeque troquiñ Biblia, doi cüdautuquen ñi adümafiel” pi. Femngechi raquiduamülmi, afeluuquilnge. Acordanienge: papeltufiel mu Biblia, allcütuquefimi reque ta Jehová, tami doi cüme hueni. Rupale ta antü, doi ayürpuafimi tami papeltufiel Biblia. Feimu doi duamtufilmi tami papeltufiel Biblia, cümelcayaimu ca ayühulaimu.
Fentecünuquilnge tami llellipual
¿Chumngechi cai nütramcayafuimi ta Chau Jehová? Quisu eli tati llellipun tami nütramcayafiel. Feimu chuchi rume antü meu nütramcayafuimi ta Jehová engu. Quisu rumel eluucülequei tami allcütuaeteu. Feimu Biblia ngülamtuquei chem dungu rume duamtulmi, ‘ngillatuafimi, quelluen piafimi ca femngechi mañumtuqueafimi’ (Filipenses 4:6).
Feimu llemai, llellipun mu fillque dungu nütramcayafuimi ta Jehová. Catrüduamcülelmi, preocupaucülelmi, ngillatufinge. Ca femngechi mañumtuafimi ta Jehová com tami elueteu mu. Pu cümeque hueni mañumtuuqueingün, femquei ta che. Fei doyelchi mai mañumtuafimi ta Jehová, eimi tami doi cüme hueni (Salmo 106:1).
Fau huirintucuafuimi quiñeque dungu ñi elel ta Chau Jehová, fei tami mañumafiel.
․․․․․
Quiñeque mu fente tami huesa rupamequen, yafüngehuelayafuimi. Fei ¿chem quelluafeimu? Biblia feipi: “Tami fanetunieeteuchi dungu elcünunge Jehová mu, fei quisu am yafülduamnieaimu. Turpu eluñmalayai ñi tranürpual tati nor chengelu” (Salmo 55:22).
Huirintucunge quiñeque dungu tami fill raquiduamelnieteu, fei llellipufinge ta Jehová.
․․․․․
Falinque dungu entuaimi tami rupan mu
Cuifi meu David entui quiñe ülcantun feipilu: “Quimafimün ta Jehová, ca ngüneduamaimün ñi cüme piuquengen” (Salmo 34:8). Yefinge tami raquiduam feichi mu David entulu tüfachi ülcantun. Ti rey Saúl inantucueyu tañi langümaeteu, fei David rume llicai. ¿Chumi David? Ellcahui pu filisteo ñi huaria mu. Huelu pu filisteo ca caiñetufi ta David. Fei tañi langümngenoal, hueluduam femfaluhui tañi ngünencayafiel engün (1 Samuel 21:10-15).
Feichi mu, David montui. Huelu quisu ngünehun montuulai, Jehová quellueyu. Feimu tañi ülcantun mu feipi: “Ramtufiñ ta Jehová, fei quisu huiñoldungueneu. Quisu ta montuleneu com tañi llicalcaqueteu mu” (Salmo 34:4). Felei llemai, com ñi rupan ñi mongen meu David, ngüneduami ñi quelluqueteu Jehová. Feimu feipiquei: “Quimafimün ta Jehová, ca ngüneduamaimün ñi cüme piuquengen”.
Raquiduamnge quiñe dungu tami rupan tami mongen mu, fei chumngechi tami quellueteu Jehová. Ca huirintucuaimi ñi rupan. Raquiduamlayaimi fütraque dungu tami rupan, doi mai pichiquen dungu huirintucuafuimi.
․․․․․
Pichicalu eimi, tami pu chau enseñalpelaeimu Biblia ñi feipin, fei rume cümei ta tüfa. Huelu feula eimi mülei tami cüme hueniyeafiel ta Jehová. ¿Deu eluucüleimi tami hueniyeafiel Jehová? Cam ¿petu femlaimi? Tüfachi capitulo quelluaimu tami femal. Biblia feipi: “Ngillatulemün, fei Ngünechen eluaimünmeu. Quintuaimün, fei peaimün” (Mateo 7:7). Feimu maneluunge tami cümelcayaeteu Jehová.
DOI QUIMÜRPUAFUIMI TÜFACHI DUNGU MEU TATI CAPITULO 38 CA 39 TI LIFRU “LOS JÓVENES PREGUNTAN (VOL. 1)”, HUINCADUNGUN MEU
¿CHEM INADUAMAIÑ CÜPALECHI CAPITULO MEU?
¿Cüdautuqueimi tami amuldungucheal? Peaimi chem quelluafeimu tami amuldungucheal.
FALIN TEXTO
“Ayühun niei tati duamnielu ñi llohual Ngünechen ñi dungu” (Mateo 5:3, Traducción del Nuevo Mundo).
QUIÑE NGÜLAM
Biblia meu 5 pagina papeltufilmi fill antü, quiñe tripantu mu papeltuafuimi ti Biblia.
¿QUIMIMI TÜFA?
Raquiduamnge tüfa: Jehová cüpa hueniyeimu, feimu papeltumequeimi ti fillque ngülam ñi huiriconcülen tüfachi lifru mu (Juan 6:44).
¡FEI TÜFA FEMAN!
¿Chumafun tañi doi cümelcayaeteu tañi papeltufiel Biblia? ․․․․․
¿Chumafun tañi doi ngillatuafiel ta Jehová? ․․․․․
¿Chem dungu ramtuafun tañi pu chau tüfachi dungu meu? ․․․․․
¿CHEM PIMI CAI?
● Ñi doi ayüfalngeal tami papeltufiel Biblia, ¿chumafuimi?
● Culpanchengeliyiñ rume, ¿chumngelu Jehová eluucülei taiñ allcütuaeteu?
● ¿Chumafuimi tami doi cüme entual tami llellipun?
[Feipin]
Eve feipi: Huechengelu iñche, femngechi dungu müten ngillatuquefun. Huelu feula caque dungu ngillatuquefiñ ta Chau Ngünechen, cümeque cam huesaque dungu rume. Fei tüfa quelluqueneu ñi femngechi dungu müten ngillatuhuenoal.
[Huichulechi dungu/Adentun]
Cüme ngüneduamfinge tami Biblia
1. Raquiduamnge quiñe nütram mülelu Biblia meu tami cüpa papeltuel. Ngillatufinge ta Jehová tami quelluaeteu ñi cüme adümafiel.
2. Cüme ngüneduamnienge tami papeltumequen. Cüme raquiduamaimi com tami papeltumequeel meu. Tami raquiduam meu adquintuafuimi reque tami papeltumequeel, allcütuafimi reque feichi pu che tripalu ti nütram mu. Nümü nümütuaimi reque. Femngechi raquiduamaimi com ti dungu nüucülelu ti nütram mu, fei pepilafimi.
3. Fillque dungu ramtuunge. Deu papeltufilmi ti nütram, ramtuhuafuimi:
● ¿Chumngelu chi huiringei tüfachi nütram Biblia meu?
● Tati pu che tripalu ti nütram mu, ¿inei inayentufali? ¿Inei inayentufalngelai?
● Tañi papeltuel, ¿chem enseñayafeneu?
● Tüfachi nütram, ¿chem quimeltueneu Jehová meu?
4. Llellipufinge ta Jehová. Nütramcafinge chem tami quimel ca chem chumaimi tami inayafiel. Ngoimaquilnge: mañumtufinge ta Jehová ñi elcünuel tati Biblia.
[Adentun]
“Tami dungun quiñe cüdetuhue reque felei iñche tañi namun meu, ca quiñe pelon reque felei iñche tañi rüpü meu” (Salmo 119:105).
[Huichulechi dungu/Adentun]
Falinque dungu doyümaimi
“Fillque duam nien, feimu pepi papeltuquelan Biblia, ca ngillatuquelan rume” piafuimi chi. Doyümfilmi ti doi falinque dungu, müna quelluafeimu.
Femafuimi tüfa: quiñe palti (falti) meu tuculelafimi cura ca fei hula apolafimi cuyüm meu.
Feula huellimtufinge ti palti. Ca huiño tucuaimi ti cuyüm, fei hula ti cura. ¿Chem rupai feula? Feilai com tati pu cura. ¿Chumngelu am? Tucufilu am ti cuyüm hunelu meu.
¿Chem quimeltueiñmeu tüfa? Tati cuyüm fei tati fillque duam taiñ nieel. Pu cura fei ta Jehová ñi dungu. Fei taiñ mongen mu huneltucufiliyiñ tati fillque duam taiñ nieel, pepi femlayafuiñ Jehová ñi dungu. Feimu Biblia ngülamtueiñmu taiñ “doyümnieafiel ti doi falinque dungu” (Filipenses 1:10, TNM). Inanielmi tüfachi ngülam, doi cüme elantücünuafuimi tami femal Jehová ñi dungu, huelu ca nieaimi tiempo tami cüme rupaleal. Fei ngoimaquilnge: mülei tami doyümnieafiel Jehová tañi dungu.
[Adentun]
Fillque dungu femqueiñ ñi cüme tremal quiñe anümca ruca mu. Ca femngechi fillque dungu femqueiñ taiñ hueniyeafiel Jehová