“Nehuen piuquecünuunge”

1, 2. ¿Chumngelu Pablo deu quimniefui ñi caiñetungeal Jerusalén mu?

FENTREN che illculefui, ayüfui ñi langümafiel ta Pablo, huelu mongetripai. Femlu rume, ca huiño presuntucungei Pablo. Jerusalén mu caiñetungei, huelu quimniequefui ñi femngechi rupayal, Chau Dios ‘fentren rupa feipieyu ñi presungeal ca ñi cutrancahual’ (Hech. 20:22, 23). Cüme quimlai chem tañi femngeal, huelu quimniei ñi cutrancangeal Jesús ñi üi mu (Hech. 9:16).

² Chau Dios ñi pu huerquen deu feipicünufi ta Pablo ñi traringeal ca ñi hultucungeal “pu catripanche ñi cuhu meu” (Hech. 21:4, 10, 11). Quiñe troquiñ judio deu cüpa langümfui ta Pablo. Fei hula, notucadungulu ti Sanedrín, ca epe langümngefui. Feimeu Roma ñi pu soltau presuyeyu ñi ca huiño juiciantucungeal, feimu mülefui ñi incañpehual tañi dalluntucungen (Hech. 21:31; 23:10). Com tañi rupan mu rume duamniei ñi yafültucungeal.

3. ¿Chumngechi yafültucungequeiñ taiñ amuldunguleal?

³ Epe puucülei ñi afal ta antü, feimu “ca caiñetungeai com pu inaniefilu ta Cristo Jesús ayünielu ñi püramyeafiel ta Chau Dios tañi mongen meu” (2 Tim. 3:12). Pablo reque, com duamnieiñ yafültucungeal taiñ amuldunguleal. Feimu tati “quim manelfal cüdaufe” yochi eluniequeiñmu yafüluhun taiñ trahun mu ca fillque publicacion mu, ¡rume mañumcüleiñ! (Mat. 24:45). Chau Jehová feipicünueiñmu ñi apümcangenoal tañi troquiñche ca ti amuldungun cüdau no rume (Is. 54:17; Jer. 1:19). ¿Pablo cai? ¿Yochi yafültucungepei mai ñi amuleal tañi cüdau caiñetungelu rume? ¿Chem quellu llohui, fei chumi? Peafiyiñ.

“Feipicünuhuingün ñi langümafiel ta Pablo” (Hechos 23:11-34)

4, 5. ¿Chumngechi yafültucungei Pablo? Feichi pun meu ñi femngen, ¿chumngelu fente cümei?

⁴ Pablo entungei ti Sanedrín mu ñi langümngenoal, fei yochi cüme yafültucungei feichi pun mu müten. ¿Chem rupai? “Ñidol [Jesús] peufaluhui Pablo ñi inafül püle, fei feipifi: ‘Nehuen piuquecünuunge. Deu cüme huldunguimi iñche meu Jerusalén huaria mu. Ca femngechi huldunguaimi Roma huaria mu’” (Hech. 23:11). Feipilu tüfa Jesús, Pablo quimtucui ñi langümngenoal, fei ñi puhual ta Roma tañi huldungual Jesús mu.

⁵ Rume cümei ñi femngechi feipingen Pablo feichi mu, ca antü mu müten 40 judio huentru “quiñehuingün ñi langümafiel ta Pablo”. Feipicünuingün: “Ilayaiñ ca pütocolayaiñ rume, langümfiliyiñ hula ta Pablo”. Huechunentungenole tañi feipicünuel engün, “iñchiñ mu cüpape ti malisian dungu” pingün (Hech. 23:12-15). ¿Chumngechi raquiduamingün ñi langümafiel? Pu judio quiñehuingün pu sacerdote ca pu loncolequelu engün, ayüniefuingün ñi huiño yengeal ta Pablo tati Sanedrín ñi adquiñ meu, fei ñi doi ramtucadunguafiel pingün, huelu coila dungu tati. Doi mai, rüf ayüniefuingün ñi lefcontuafiel ta Pablo petu ñi yengen tati Sanedrín mu, femngechi ñi langümafiel.

6. Pablo, ¿chumngechi quimtucui ñi cüpa femeteu pu judio? Tüfachi rupan mu, ¿chem quimürpuafui pu huechequeche?

⁶ Pablo tañi hueche sobrino quimtucui chem ñi femngeal ta Pablo, feimu amufemi ñi feipimeafiel. Quimlu Pablo, huercüfemi ñi feipimeafiel tati hunen loncolechi soltau Claudio Lisias pingelu (Hech. 23:16-22). ¡Fente nehuen piuquengefui tüfachi hueche huentru! Famülque mu, fentren huechequeche ca üllchaque domo ca femngechi femqueingün, doyümqueingün ñi cümelcaleal pu peñi ca pu lamngen, ca yafüluuqueingün ñi femal Chau Jehová tañi ayüqueel, ¡Chau Jehová rume piuqueyeniefi com engün!

7, 8. ¿Chumi Claudio ñi langümngenoal ta Pablo?

⁷ Claudio Lisias adniequefui mil soltau. Quimlu ñi cüpa langümngen ta Pablo huercüi 470 soltau ñi cuñiutucuafiel, quiñeque adümquefui huaiqui, caquelu cahuellu mu amuquefui. Feichi pun mu müten, com feichi soltau yefingün Pablo ta Cesarea. Üye mu, Roma niefui quiñe troquiñ gobierno ñi ngüneniefiel Judea mapu. Pablo elcünungei üye mu, fei ñi juiciantucuaeteu Félix.a Cesarea mu, fentren judio mülefui, huelu doi mülefui caque tuhun che inaquefilu pu judio ñi huimtun. Jerusalén mu tati pu che pofolcauquefui fentren rupa tañi religion ñi duam mu, huelu Cesarea mu doi tüngcülequefui ti dungu, ca mülequefui fentren Roma hueichafe.

⁸ Claudio inafi Roma ñi ley, feimu huercülelfi quiñe carta ta Félix ñi quimelafiel chem ñi rupamequen Pablo. Feichi carta mu feipi ñi montulfiel quimlu ñi Roma chengen Pablo ca ñi epe langümngen. Ca feipi Pablo ñi ‘chumnon rume tañi langümngeal ca ñi carceltucungeal’, huelu quimniefui ñi cüpa langümeteu pu judio, feimu feipifi ta Félix ñi huercülelfiel, “eimi tami juiciantucuafiel” pifi (Hech. 23:25-30).

9. 1) Claudio rulpacünui Roma ñi ley, ¿chumngechi? 2) Quiñeque mu duamnieafuiñ taiñ incañpehual ley dungu mu, ¿chumngelu?

⁹ ¿Rüfngepei mai ñi feipin Claudio tañi carta mu? Femlai. Hunelu mu, Claudio feipi ñi montulfiel Pablo tañi Roma chengen mu, huelu rüfngelai tañi feipin. Cafei, feipilai tañi huesa femün, huercüfui “ñi traringeal epu cadena meu” ca “ñi ramtucadungungeal ca ñi huimacangeal” (Hech. 21:30-34; 22:24-29). Roma ñi ley condenaquefui ñi femngechi femngeal pu Roma che, feimu Claudio quiñepülecünufi tati ley. Tüfa raquiduamelqueiñmu Claudio huirintucui ti carta tañi cüme troquiaeteu müten ti gobernador. Famülque mu, Pablo reque rupayafuiñ. Fentren che mallmauquei tañi religion mu ca ti Huecüfü allmalltuquei tüfa, feimu caiñetungei Chau Dios tañi troquiñche ca cüpa catrütungequei tañi cüdau. Huelu quiñeque mu tati ley dungu cuñiutucuafeiñmu, fei Pablo reque, incañpehuaiñ.

“Cüme duam mu incañpehuan” (Hechos 23:35–24:21)

10. ¿Chem dungu mu dalluntucungei Pablo?

¹⁰ Pablo yengei Cesarea mu, fei “ñi llihuatuniengeal Herodes ñi ülmen ruca meu” petu acunolu tañi pu dalluntucuaeteu (Hech. 23:35). Quechu antü rupalu, acui ti hunen lonco sacerdote Ananías ca compañeyu quiñeque loncolelu ca Tértulo abogadongelu. Tértulo eluhui ñi püramyeafiel ta Félix tañi cüme dungu femün pu judio ñi duam mu. Femi tüfa ñi ayühulcünuafiel, fei ñi cüme troquiaeteu.b Fei hula feipi: “[Pablo] quiñe huesa cutran reque felei. Ngüchaltucuquefi com pu judio huall mapu mülelu ñi caiñetuafiel pu autoridad. Cafei loncolei ti troquiñche inaquefilu pu nazareno ñi quimeltun. Cafei illamcafi Chau Ngünechen ñi ruca, feimu presufiyiñ”. Caquelu pu judio quiñehuingün, fei “feipingün ñi rüfngen com tüfachi dungu” (Hech. 24:5, 6, 9). Rume cuñihun-ngefui ñi femngechi dalluntucungen Pablo, langümngerpuafui chi.

11, 12. ¿Chumngechi incañpehui Pablo?

¹¹ Pablo elungei ñi incañpehual, fei feipi: “Cüme duam mu incañpehuan”. Ca feipi ñi coiladungumequen tañi pu dalluntucueteu, feipi “caiñetuquelafiñ Chau Dios ñi ruca ca illculcaquelafiñ pu che”. Doi mai, feipi “fentren tripantu” ñi mülenon Jerusalén mu. Ca feipifi engün “huiñotun ñi cüpalal plata ñi quelluafiel tañi pu che fillalelu, tañi caiñetungen mu”. Cafei cüme feipi ñi lifcülequefel petu ñi conpunon Chau Dios tañi ruca mu. Ca femngechi feipi: “Fill antü yafüluuquen ñi lif raquiduam nieal Chau Dios ñi adquiñ meu ca pu che ñi adquiñ mu” (Hech. 24:10-13, 16-18).

¹² Pablo rüf entudungui: “Iñche inaquefiñ feichi rüpü, pu nazareno ñi quimeltun ñi feipifiel engün. Feimu serfiquefiñ tañi pu cuifiqueche ñi Ngünechen”. Cafei feipi ñi “feyentuquen com ñi feipilen Moisés ñi ley ca ñi huirintucuel Chau Ngünechen ñi pu huerquen”. Pablo ca feipi ñi feyentuquen “ñi huiñomongetual pu norngechi che ca pu norngenochi che”, chumngechi ñi feyentuquen fentren tañi pu dalluntucueteu. Feimu Pablo feipi “cüme quimfalcünungepe chemu rüfngei tañi dalluntucumequengen”. Famngechi feipifi: “Ti pu huentru fau mülelu entudungupe chem huesa dungu peñmaeneu engün Sanedrín mu mülelu iñche. Quiñe dungu mu müten dalluntucuafeneu engün, tribunal mu mülelu iñche nehuentu feipin: ‘Maneluuquen ñi huiñomongetual tati pu layelu, feimu juiciantucungen fachantü’” (Hech. 24:14, 15, 20, 21).

13-15. Duamfalngefule taiñ incañpehual pu autoridad mu, ¿chumngechi inayentuafuiñ ta Pablo?

¹³ Taiñ testigongen mu, coila dalluntucungeafuiñ, Pablo reque. Feipintucungeafuiñ taiñ pofolcamequefiel pu che ñi caiñetuafiel tati gobierno, ca feipintucungeafuiñ taiñ coneltulen quiñe cuñihun-ngechi troquiñche mu. Fei, müleafui taiñ incañpehual pu autoridad ñi adquiñ meu. Femngechi rupafuliyiñ, ¿chumngechi inayentuafuiñ ta Pablo? Pablo püramyelafi tati gobernador ñi ayühulcünuafiel, calei ñi femün ta Tértulo. Doi mai, Pablo yamün meu incañpehui, rüf dungufi tati gobernador, tüngcülen mu ca piuqueyenquechi feipifi tañi dungu. Ca feipifi “tüfa mu mülefui ñi dungupayal pu judio Asia mapu tuulu tañi dalluntucueteu”. Feichi pu judio feipintucufuingün Pablo ñi illamcafiel Chau Dios ñi ruca, huelu amulaingün tati tribunal mu. Fei Pablo pepi allcütulai chem dungu mu tañi dalluntucumequengen, femngechi tañi incañpehual (Hech. 24:18, 19).

¹⁴ Doi ngüneduamfali: Pablo llicalai ñi quimeltual chem tañi feyentuquen. Sanedrín mu, Pablo feipi ñi feyentuquen tati huiñomongetun mu, pu che rume illcui. Femngechi rupalu rume, ca huiño dungupai tüfa mu nehuen piuque mu (Hech. 23:6-10). ¿Chumngelu feipi tüfa tañi incañpehual? Pablo tañi quimeltun feita Jesús ñi rüf dungu ca ñi huiñomongetun, fei tañi pu caiñe feyentuquelafui tüfa (Hech. 26:6-8, 22, 23). Feichi duam mu llemai juiciantucungei, feyentuquefui tati huiñomongetun mu, doi mai ñi huiñomongetun ta Jesús, feimu cüpa juiciantucungei.

¹⁵ Pablo reque, iñchiñ llicalayaiñ taiñ huldungual tati cümeque dungu. Taiñ doi nehuen piuquengeal raquiduamafuiñ ñi feipifiel Jesús tañi pu discipulo: “Iñche ñi üi mu com pu che üdeaimünmeu. Huelu tuchi nehuentulele puule ñi afal ti müleyechi dungu mapu meu, fei engün montuai”. ¿Cümepei mai taiñ fill raquiduamal chem taiñ pial? Femlai, feimu Jesús feipi: “Hultucungelmün pu autoridad meu, fill raquiduamcülelayaimün tamün chem pial. Feichi mu feipiaimün chem tamün raquiduameleteu Chau Ngünechen ñi nehuen. Eimün ta dungulayaimün, Chau Dios ñi nehuen quelluaimünmeu tamün dungual” (Mar. 13:9-13).

“Félix llicai” (Hechos 24:22-27)

16, 17. 1) Félix, ¿chumi, ca chem feipi petu ñi juiciantucungen ta Pablo? 2) ¿Chumngelu llicai Félix? Ca, ¿chumalu fentren rupa nütramcafi ta Pablo?

¹⁶ Tati gobernador Félix deu allcütuquefui Chau Dios ñi rüpü, femngechi üitungequefui tati cristiano trahunche feichi antü meu. Biblia feipi: “Félix cüme quimniefui com ti dungu coneltulelu Chau Dios ñi rüpü mu, feimu huercüfi engün ñi amutual. Fei feipi: ‘Cüpale hula ti hunen loncolechi soltau Lisias, fei ngüneduaman ñi chumal’. Fei huercüi ti loncolechi soltau ñi presuafiel ta Pablo, huelu com dungu mu catrütungelai. Cafei quisu tañi pu che eluafeyu tañi duamnieel” (Hech. 24:22, 23).

¹⁷ Rupalu quiñeque antü Félix huiño pefi ta Pablo, compañeyu tañi domo Drusila, judio tuhun-ngelu. “Félix huercüi ñi cüpalelngeal ta Pablo”, fei nütramelngei “chem mülei ñi femal ti feyentulu Cristo Jesús meu” (Hech. 24:24). Huelu nütramelngelu “chem am ti nor dungu, chumngechi quim ngüneniehual ta che, ca ñi juiciantucungeal ta che cüpalechi antü mu”, “Félix llicai”. Pablo tañi feipin, ¿raquiduamelpelaeyu tañi huesaque femün? Fei, ¿huesa duampelai? Feimu feipifi ta Pablo: “Amucange müten. Ca rupa hula huiño mütrümayu”. Fentren rupa Félix nütramcafi ta Pablo, huelu rüf ayünielafui ñi quimürpual tati rüf dungu, doi mai ayüniefui Pablo ñi eluaeteu plata (Hech. 24:25, 26).

18. Pablo, ¿chumngelu feipi “chem am ti nor dungu, chumngechi quim ngüneniehual” ca ñi “juiciantucungeal ta che”?

¹⁸ Pablo, ¿chumngelu feipifi ta Félix ca tañi domo “chem am ti nor dungu, chumngechi quim ngüneniehual” ca ñi “juiciantucungeal ta che cüpalechi antü mu”? Félix tañi domo engu ayüniefuingu quimal chem tañi femquen pu feyentuquelu Cristo Jesús mu. Cafei, Pablo quimniefui ñi huesa yenien tañi mongen engu, huesa chengefuingu, femquefuingu norngenochi dungu, feimu cüme feipifi chem tañi femafel pu rüfngechi cristiano. Femngechi cüme pengeli ñi doi cümen Chau Dios ñi chumngechi adniequefiel tañi pu che, trürlafui chumngechi ñi adniequefiel tañi mongen Félix tañi domo engu. Cüme adümürpuingu llemai Chau Dios ñi juiciantucuafiel com che chem tañi raquiduamquen mu, tañi feipin ca chem tañi femün meu engün. Feichi mu, Félix niefui autoridad ñi juiciantucuafiel ta Pablo, huelu falin-ngelafui. Félix quimürpui, quisu ca tañi domo, ñi juiciantucuaeteu Chau Dios. ¡Feimu lle “Félix llicai”!

19, 20. 1) Pu che rüf ayünole cüme elcünutual tañi mongen, ¿chumaiñ iñchiñ? 2) ¿Chem pengeli Félix ñi hueniyenofiel ta Pablo?

¹⁹ Amuldungun mu, peafuiñ quiñeque che Félix reque felelu: ayünielu ñi quimürpual tati rüf dungu troquifalngeafui, huelu femlai, piquelaingün cüme elcünutual tañi mongen. Rüf quimquelaiñ chem ñi mülen tañi piuque mu engün. Fei, Pablo reque, yamquechi quimeltuafuiñ chem tañi femafel engün tañi ayühulafiel ta Chau Dios. Quimlaiñ, tati rüf dungu puhuafui tañi piuque mu. Huelu ayünole engün ñi elcünual huesaque huimtun, dicümtuculayafiyiñ. Doi mai, quintuafiyiñ pu che rüf ayünielu ñi quimürpual tati rüf dungu.

²⁰ ¿Chem mülefui Félix tañi piuque mu? Inaduamaiñ ñi femün. “Epu tripantu rupalu, Porcio Festo hueluconi Félix mu ñi gobernadorngeal”, huelu “Félix cüpa ayühuelfi tati pu judio, feimu carcel mu elcünufi ta Pablo” (Hech. 24:27). Tüfa pengeli ñi hueniyenofiel ta Pablo. Félix quimniefui pu inaquefilu “Chau Dios ñi rüpü” ñi pofolcachequenon, ca quimniefui Pablo ñi chaftuquenofiel Roma tañi ley (Hech. 19:23). Quimlu rume, presucünufi ta Pablo, fei ñi ayühulcünuafiel pu judio.

21. Gobernadorcünungelu Porcio Festo, ¿chem dungu mu rupai Pablo? Fei, ¿chem quellueyu ñi nehuencüleal?

²¹ Chumngechi papeltupeiñ Hechos 24, versiculo 27 mu, Porcio Festo hueluconi Félix mu ñi gobernadorngeal, huelu Pablo presucünungei. Fei hula, Pablo eluhui ñi ramtucadungungeal fillque ülmen che ñi adquiñ mu. Tüfachi llicaquenochi apostol fentren rupa ‘yengei pu lonco ülmen ca pu gobernador meu’ (Luc. 21:12). Femngelu rume, nehuencülefui tañi feyentun meu. Doyelchi mai, nütramcarpufi ta Roma ñi lonco ülmen, tati doicülechi gobernante ñi mülen feichi antü meu. Fill rupa, loncontucuniepelai ñi feipin Jesús: ¡“Nehuen piuquecünuunge”!