Josué ca pu Gabaón che

Canaán mu mülefui caquelu troquiñche, fei quimürpuingün ñi rupan ta Jericó. Feimu pu lonco ülmen quiñehuingün ñi huehuafiel ta Israel. Huelu pu Gabaón che ca dungu femingün. Tucutuhuingün huesaque ropa, fei pemefingün ta Josué ca feipifingün: “Rume camapu cüpaiñ. Feipingeiñ Jehová ñi dungu ca tañi femquen eimün tamün duam mu Egipto ca Moab mu. Fürenemuiñ, lefcontumulaiñ. Fei, eimün tamün cüdaufengeaiñ iñchiñ”.

Josué maneluhui tañi feipin mu engün, feimu feipicünufi tañi lefcontunoafiel. Huelu 3 antü rupalu, Josué quimürpui ca mapu ñi cüpanon engün, doi mai Gabaón chengefuingün, fei Canaán mu mülefuingün. Feimu, Josué ramtufi engün: “¿Chumngelu coilatulmun?”. Fei huiñoldunguingün: “Llicalefuiñ. Quimnieiñ tamün Chau Jehová quehuaquei eimün tamün duam mu. Fürenemuiñ, langümulayaiñ”. Josué femi tañi feipicünuel, feimu huesalcalafi engün.

Quiñe rupa, 5 lonco ülmen Canaán mu quiñehuingün ñi lefcontuafiel pu Gabaón che. Josué ca tañi pu hueichafe trecaingün com quiñe pun ñi quellumeafiel pu Gabaón che. Hunlu, eluhuingün ñi hueichayal. Pu Canaán che fill püle lefmahuingün, huelu Chau Jehová ütrüfnacümelfi fütraque pire, cura reque felelu. Josué llellipufi ta Chau Jehová ñi mülenagal ti Antü cheu tañi mülen. Fill antü conquei ti Antü, huelu feichi antü Josué raquiduami ñi connoal ti Antü, ¿chumngechi fel ñi raquiduam? Rume maneluuquefui Chau Jehová mu, feimu feipifi tañi femal. Fei ti Antü ellcaulai. Hueulu pu Israel che, fei hula coni ti Antü.