Ñi rupan Carmelo pingechi mahuida mu

Israel ñi 10 troquiñche nierpui fentren huesaque lonco ülmen, huelu quiñe tati doi huesa femlu feita Acab. Acab niefi ta Jezabel, quiñe huesa domo poyequefilu ti coila dios Baal. Fei engu tañi duam mu fentren che poyefi ta Baal. Cafei langümfingu fentren huerquen ñi nieel Chau Jehová. ¿Chumi Chau Jehová? Huercüfi ta Elías.

Elías feipifi Acab: “Huesa lonco ülmen-ngeimi, feimu mahunhuelayai Israel mu”. Doi 3 tripantu mu chem no rume hueflai mapu mu, fei ti pu che fillalefui. Feimu Chau Jehová ca huiño huercüfi ta Elías. Fei Acab feipieyu: “¡Eimi tami duam mu cutrancaumequeiñ ca huesaque dungu rupaquei!”. Elías feipi: “Iñche nielan culpa ñi mahunhuenon. Doi mai, eimi poyequefimi Baal, feimu ancülei mapu. Carmelo mahuida mu trahulafimi pu che ca Baal ñi pu huerquen, fei quimaiñ inei ñi rüfngen”.

Pu che trahuluhui mahuida mu, fei Elías feipi: “Rüfngele Chau Jehová, inayafimün. Huelu rüfngele Baal, inayafimün. Femaiñ tüfa taiñ quimal: pu 450 huerquen ñi nieel Baal pepicayaingün quiñe chalintucun, fei mütrümafimün tañi dios. Iñche ca pepicayan quiñe chalintucun, fei mütrümafiñ Chau Jehová. Feichi Dios cütraltufile ti chalintucun, pengelai ñi rüfngen”. “Felepe” feipingün tati pu che.

Baal ñi pu huerquen pepicaingün ti chalintucun. Com antü mütrümfingün tañi dios: “¡Ahuem, Baal, huiñoldungumuiñ!”. Huelu huiñoldungunolu, Elías ayentui: “Doi nehuentu mütrümafimün. ¿Umaucülepelai? ¿Duamniepelai ñi trepelngeal?”. Epe conlu ti antü, petu mütrümniefingün, huelu chem rume rupalai.

Elías elcünufi ti chalintucun altar mu, fei tuculelfi fentren co. Fei, llellipui: “Ahuem, Chau Jehová, com che quimpe tami rüf Dios ngen”. Fei müten nagpai cütral, fei Chau Jehová lüpümfi ti chalintucun. Pu che nehuentu feipi: “¡Chau Jehová ta rüfngei!”. Feimu Elías feipi: “Lefmauquilpe Baal ñi pu huerquen”. Feichi mu langümngei 450 huerquen poyequefilu Baal.

Huefparumei quiñe pichi tromü lafquen meu, fei Elías feipifi Acab: “Fülcülepai cürüftucu mahun. Pepicafinge tami carretela tami amutual”. Tromüi ti antü, fei cürüftucu mahuni. Acab matu amutui tañi carretela mu. Huelu Elías doi matu lefi, Chau Jehová quellueyu ñi doi matu amual. Huelu, ¿afpei mai huesaque dungu ñi rupan Elías? Inaduamafiyiñ.