Chau Jehová nehuentucufi ta Elías

Quimlu Jezabel chem ñi rupan Baal ñi pu huerquen, rume huesa duami. Fei huercüi ñi feipingeal ta Elías: “Hule langümngeaimi, Baal ñi pu huerquen reque”. Elías rume llicai, fei lefmahui huellin mapu meu. Puulu, llellipui: “Chau Jehová, yafüngehuelan, müntuñmaen tañi mongen”. Elías rume cansalefui, fei umaunagi miñche anümca mu.

Huelu quiñe cüme püllü ñochi dungun mu feipifi ta Elías: “Huitrapürange, mülei tami iyal”. Elías adquintui, pefi quiñe eñum cofque huente arelechi cura mu ca quiñe metahue co. Fei ifi ca pütocoi, fei ca huiño umaunagi. Ti cüme püllü ca huiño trepelfi ca feipifi: “Mülei tami iyal. Rume camapu amuaimi, duamnieimi tami yafüluhual”. Elías ca pichin icünui. Fei hula, namuntu amui 40 antü ca 40 pun ñi puhual Horeb huincul mu. Fei conpui quiñe lolo meu ñi umautual. Chau Jehová feipieyu: “¿Chumpaimi, Elías?”. Elías feipi: “Pu Israel che femlaingün tami feipicünueteu. Fillque altar tami niefel apümngei ca langümngei tami pu huerquen. Feula ca ayünieingün ñi langümngeal iñche”.

Chau Jehová feipifi ta Elías: “Tripange ca huitracünuhuaimi huincul mu”. Fei fütra cürüf mülerpui, nüyüi ti mapu ca üiyümuhui cütral. Fei hula ñochi dungungei Elías. Feimu, tacucünufi ñi ange ca huitracünuhui huecuntu lolo meu. Chau Jehová ramtueyu: “¿Chumngelu lefmahuimi?”. Elías feipi: “Langümngeingün tami pu huerquen, iñche müten mülehuen”. Huelu Chau Jehová feipieyu: “Quisulelaimi. Petu mülehuei 7 mil che tañi poyequeteu Israel mu. Feipimeafimi ta Eliseo ñi dullicünungen iñche tañi huerquen-ngeal, fei inancüleai eimi mu”. Müchai müten femi Elías. Eimi cai, ¿quellupeaimu mai Chau Jehová inaniefilmi ñi feipin? ¿Chem pimi? Femai llemai. Feula inaduamaiñ quiñe dungu ñi rupan filla mu.