Ti lantu domo ñi püñeñ huiñomongetui

Petu ñi mülen filla, Chau Jehová feipifi ta Elías: “Amuaimi ta Sarepta. Üyeu quiñe lantu domo eluaimu iyael”. Conpulu ti huaria mu, Elías pefi quiñe lantu domo ñimitumequelu mamüll, fei “eluafen pichin co” pifi. Cüpalngelu co, Elías ca feipifi: “Füreneen, ca eluafen pichin cofque”. Huelu huiñoldungueyu: “Nielan cofque, chem no rume elulayafeyu. Pichin rüngo ca aceite nien ñi pepicayal iyal tañi püñeñ iñchiu”. Elías feipifi: “Chau Jehová feipicünui, elueli quiñe pichi cofque, eimi nieaimi rüngo ca aceite tunte puule filla”.

Ti lantu domo conpui tañi ruca mu, fei deumalelfi cofque. Feimu huechurpui ñi feipicünuel Chau Jehová, ti lantu domo ca tañi püñeñ nieingu iyael tunte puulu ti filla. Aflai tañi rüngo ca aceite no rume.

Fütra hueñancün dungu rupai. Ti lantu domo ñi püñeñ lai fente tañi cutranün. Feimu ti domo llellipufi ta Elías ñi quelluaeteu. Elías metayefi ti pichi huentru quiñe pieza mu huente ruca mu mülelu. Cuducünufi tañi ngütantu mu, fei llellipufi ta Chau Jehová: “Chau Jehová, füreneen, huiñomongeltuafuimi ti pichi huentru”. Afmatufali tüfa ñi llellipufiel ta Chau Jehová, ¿quimimi cai chumngelu? Feichi mu, inei no rume huiñomongetulafui. Cafei ti lantu domo ca tañi pichi huentru Israel chengelafui.

Ti pichi huentru huiñomongetui. Elías feipifi ti lantu domo: “¡Tüfei! Tami pichi huentru huiñomongetui”. Rume ayühui ti domo ca feipi: “Feula queta quimnien eimi Chau Dios ñi huerquen-ngeimi. Tami feipin Chau Jehová mu cüpai, feimu huechutripaquei”.