Troquiñ Adniechequelu ñi carta

Saquin pu peñi ca pu lamngen:

Piuqueyefiyiñ Chau Dios ca tati pu che, feimu inaquefiyiñ tüfachi huercün dungu ñi feipin Jesús: “Amumün ca quimeltuafimün [pu che] iñche tañi inayaeteu engün. Fei ti Chau, ti Fotüm ca Chau Ngünechen ñi nehuen tañi üi meu fautizayafimün engün” (Mat. 28:19, 20; Mar. 12:28-31). Rüf piuqueyecheliyiñ, rume quelluafiyiñ pu che. Nengümüñmayafuiñ ñi piuque “pu che ayünielu ñi llohual ti rüf dungu, fei ñi nieal rumel mongen” (Hech. 13:48).

Cuifi re loncontucuquefuiñ chem taiñ nütramcayal ca hulquefuiñ publicacion. Huelu tüfa hula doi adümniefiyiñ taiñ nütramcayafiel pu che. Nütramcaquefiel mu chem ñi duamnieel tati pu che, pengelelquefiyiñ taiñ piuqueyeniefiel. Feimu nütramcayafiyiñ tati pu che chem tañi ayünieel. Fei ayünole taiñ nütramcafiel, ca dungu mu nütramcayafuiñ. Ngoimalayaiñ, caquerumei tati pu che. Tüfachi folleto rume quelluaimu.

Tüfa mu mülei mari epu quimeltun, caque quiñeque pengelquei chumngechi taiñ doi cüme cristianongeal. Femngechi piuqueyenquechi quimeltucheaiñ. Caque quiñeque quimeltun pengelquei ñi chumngechi chengen amuldungun mu Jesús cam quiñe cristiano ti hunen siglo mu. Feula re loncontucuquelaiñ chem taiñ nütramcayal, doi mai cüpa pengelelquefiyiñ pu che taiñ piuqueyefiel. Com ñi feipin tüfachi folleto quelluqueiñmu amuldungun mu, huelu quiñeque quimeltun doi quelluqueiñmu hue nütramcafiliyiñ quiñe che, huiño pemetufiliyiñ cam chillcatulelfiliyiñ Biblia.

Estudiafilmi caque quiñeque quimeltun, cüme raquiduamaimi chumngechi inayafuimi tami amuldunguafiel pu che tami lof mu. Fente taiñ piuqueyeniefiel ta Chau Jehová ca ti pu che doi fali chem pepiluhun mu rume. Feimu yafüluunge tami doi piuqueyeafiel ta Chau Jehová ca tati pu che. Femülmi, quimeltuafimi pu che ñi inayafiel engün ta Jesús.

Rume ayüfali taiñ quiñentrür cüdahual (Sof. 3:9). Eluucüleimün tamün piuqueyenquechi quimeltucheal. Feimu Chau Jehová cümelcape tamün cüdaumequen.