Chumngechi taiñ piuqueyehun doi nehuencüleafui

1, 2. 1) ¿Chumngelu ti apostol Pablo feipi “doi falin-ngei” ti piuqueyen? 2) ¿Chem ramtun inaduamaiñ?

TATI apostol Pablo nütramcai tati feyentun, maneluhun ca ti piuqueyehun. Fei hula, feipi: “Doi falin-ngei ti piuqueyehun” (1 Cor. 13:13). ¿Chumngelu femngechi feipi? Ti hue mapu mu maneluuhuelayaiñ ñi femtripayal Jehová ñi feipicünuel, com femtripayalu am. Huelu amuleai taiñ piuqueyefiel ta Chau Jehová ca tati pu che. Rumel mu doi nehuentuleai taiñ piuqueyen.

² Fill antü mülei taiñ pengelal piuqueyehun. Feimu feula ngüneduamaiñ cüla ramtun. Quiñe, ¿chumngelu mülei taiñ hueluquentu piuqueyehual? Epu, ¿chumngechi pengelafuiñ taiñ piuqueyehun? Ca cüla, ¿chumngechi nehuentuleafui taiñ piuqueyehun?

¿CHUMNGELU MÜLEI TAIÑ HUELUQUENTU PIUQUEYEHUAL?

3. ¿Chumngelu mülei taiñ hueluquentu piuqueyehual?

³ ¿Chemu duamfali taiñ hueluquentu piuqueyehual? Femngechi femliyiñ, pengelaiñ taiñ rüf cristianongen. Jesús feipifi tañi pu apostol: “Femngechi hueluquentu piuqueyehulmün, com pu che quimai tamün inaniemufiel ta iñche” (Juan 13:35). Cafei ti piuqueyen quelluqueiñmu taiñ quiñeucüleal. Feimu Pablo feipi: “Piuqueyehun mu rüf quiñeucülequei pu che” (Col. 3:14). ¿Ca chumngelu mülei taiñ piuqueyehual? Tati apostol Juan feipi: “Tati piuqueyefilu ta Chau Dios ca mülei ñi piuqueyeafiel tañi peñi” (1 Juan 4:21). Feimu piuqueyefiliyiñ taiñ pu peñi, taiñ pu lamngen, ca pengelqueiñ taiñ piuqueyefiel ta Chau Jehová.

4, 5. Taiñ piuqueyefiel ta Chau Dios ca taiñ piuqueyefiel pu peñi ca pu lamngen, ¿chumngelu nüucülei? Feipinge quiñe ejemplo.

⁴ ¿Chumngelu taiñ piuqueyefiel ta Chau Dios nüucülei taiñ piuqueyefiel pu peñi, pu lamngen? Taiñ quimal, raquiduamaiñ chumngechi quiñeucülequei taiñ piuque ca taiñ troquiñ cuerpo. ¿Chem femi quiñe doctor ñi peal ñi chumlen quiñe che ñi piuque? Topañmayafi tañi lipang, fei peai chumngechi trefcüquei tañi piuque. Tüfachi dungu, ¿chem quimeleiñmu?

⁵ Quiñe doctor ngüneduamafui chumngechi trefcüquei quiñe che ñi piuque, femngechi quimai ñi cümelcalen cam ñi cümelcalenon tañi piuque. Ca femngechi ngüneduamliyiñ tunte taiñ piuqueyefiel caquelu che, ca quimaiñ tunte taiñ piuqueyefiel ta Chau Jehová. Ngüneduamliyiñ taiñ nehue piuqueyenofiel pu peñi, pu lamngen, ca nehue piuqueyelayafuiñ chi ta Chau Jehová. Huelu pengelelfiliyiñ pu peñi, pu lamngen tunte taiñ piuqueyefiel, ca pengelaiñ taiñ rume piuqueyefiel ta Chau Jehová.

6. Müte piuqueyenofiliyiñ pu peñi, pu lamngen, ¿chumngelu cuñihun-ngei? (1 Juan 4:7-9, 11).

⁶ Müte piuqueyenofiliyiñ pu peñi, pu lamngen, ¿chumngelu cuñihun-ngei? Femngechi hueniyehuelayafuiñ ta Chau Jehová. Tüfachi dungu pengeli ñi huirintucuel ti apostol Juan, feipi: “Quiñe che peniefi tañi peñi, huelu piuqueyequelafi. Fei, ¿chumngechi piuqueyeafui ta Chau Dios tañi pequenofiel?” (1 Juan 4:20). ¿Chem quimeleiñmu? Tuteafiyiñ ta Chau Jehová, hueluquentu piuqueyeuliyiñ (papeltunge 1 Juan 4:7-9, 11).

¿CHUMNGECHI PENGELAFUIÑ TAIÑ PIUQUEYEHUN?

7, 8. ¿Chumngechi pengelafuiñ taiñ piuqueyehun?

⁷ Fentren rupa papeltuiñ Biblia mu tüfachi huercün dungu: “Hueluquentu piuqueyehuaimün” (Juan 15:12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Huelu ti piuqueyen tremquei piuque mu, inei no rume pequelafi. Fei, ¿chumngechi pengelafuiñ taiñ piuqueyefiel pu peñi ca pu lamngen? Taiñ dungun mu ca taiñ femün mu.

⁸ Fentren dungu femafuiñ taiñ pengelelafiel pu peñi, pu lamngen taiñ piuqueyefiel. Biblia feipi chem femafuiñ. Feipi: “Caque quiñeque eimün mülei ñi rüf dunguafiel tañi chafche” (Efes. 4:25). “Hueluquentu cüme tuteucülemün” (Mar 9:50). “Huneleaimün tamün huelucontu yamuhual” (Rom. 12:10). “Hueluquentu llouniehuaimün ayühun mu” (Rom. 15:7). “Hueluquentu perdonahuaimün” (Col. 3:13). “Hueluconque quelluniehuaimün cüdaungechi dungu mu” (Gál. 6:2). “Hueluconque yafültucuniehuaimün” (1 Tes. 4:18). “Hueluquentu nehuentucuhuaimün” (1 Tes. 5:11). “Hueluconque […] ngillatuñmahuaimün” (Sant. 5:16).

9. Yafültucucheliyiñ, ¿chumngechi pengelqueiñ taiñ piuqueyen? (Ca inaduamnge ti adentun).

⁹ Feula doi cüme ngüneduamaiñ quiñe dungu tripalu rupachi parrafo mu, fei taiñ pengelal piuqueyen. Pablo feipi: “Hueluconque yafültucuniehuaimün”. Yafültucucheliyiñ, ¿chumngechi pengelqueiñ taiñ piuqueyen? Quiñe lifru nütramcai Biblia ñi feipin griego quehun mu, tüfachi palabra “yafüluhun” cüpa feipi “huitracünuhual inafül quiñe che mu taiñ yafültucuafiel rupalu huesaque dungu mu”. Feimu yafültucufiliyiñ quiñe peñi, quiñe lamngen cutrancaucülelu, quelluquefiyiñ ñi amuleal ti cüme rüpü mu, fei ñi nieal rumel mongen. Feimu yafültucunieafiyiñ pu peñi ca pu lamngen, quisucünulayafiyiñ engün. Femliyiñ, pengelelafiyiñ tunte taiñ piuqueyefiel (2 Cor. 7:6, 7, 13).

10. Cutranpiuqueyecheal ca yafültucucheal, ¿chemu nüucülei?

¹⁰ Cutranpiuqueyecheal ca yafültucucheal nüucülequei. ¿Chemu femngechi feipiqueiñ? Pefilu iñchiñ quiñe che cutrancaucülelu, cutranpiuqueyefiyiñ. Ayünieiñ taiñ yafültucuafiel ca quelluafiel. Hune, cutranpiuqueyeafiyiñ ta che, fei hula, yafültucuafiyiñ. Ca femngechi femi Jehová. Pablo nütramcai Chau Ngünechen cutranpiuqueyechequei, feimu yafültucuchequei. Fei feipi: “Taiñ Fütra Chau rume cutranpiuqueyechequei. Chau Ngünechen itrofill dungu mu yafültucuchequei” (2 Cor. 1:3). Pablo feipi Chau Jehová “rume cutranpiuqueyechequei”. Felei llemai, Chau Jehová mu cüpai ti fütra cutranpiuqueyechen. Chau Jehová fente tañi cutranpiuqueyechen, “yafültucuqueiñmeu chem huesa dungu mu rume rupaliyiñ” (2 Cor. 1:4). Tati co tripalu huitrunco meu, tuduamelquefi pu che huihulelu. Ca femngechi Chau Jehová tüngduamelquefi ca yafültucufi pu cutrancaucülelu ñi piuque. ¿Chem quelluaiñmu taiñ cutranpiuqueyecheal ca yafültucucheal chumngechi femquei Jehová? Peafiyiñ.

11. ¿Chem quelluqueiñmu taiñ piuqueyecheal ca yafültucucheal? (Colosenses 3:12 ca 1 Pedro 3:8).

¹¹ Mülei taiñ duamtucheal, piuqueyehual chumngechi piuqueyeuquei pu familia ca cüme piuquengeal, femngechi amuleai taiñ piuqueyeuquen ca yafültucuuquen fill antü (papeltunge Colosenses 3:12; 1 Pedro 3:8). Femngechi chengeliyiñ ca cutranpiuqueyecheliyiñ, yafültucuafiyiñ pu cutrancaucülelu. Jesús feipi: “Chem ñi mülen ta piuque mu, hun meu tripaquei. Tati cüme huentru cümeque dungu nielu ñi piuque, cüme entuquei ñi dungun” (Mat. 12:34, 35). Felei llemai, piuqueyefiliyiñ taiñ pu peñi ca pu lamngen, yafültucuafiyiñ engün.

¿CHUMNGECHI DOI PIUQUEYEHUAFUIÑ?

12. 1) ¿Chumngelu mülei taiñ cuñiutucuhual? 2) ¿Ca chem ramtun ngüneduamaiñ?

¹² Com iñchiñ ayünieiñ inayal tüfachi huercün dungu: “Amulepe taiñ hueluconquechi piuqueyehun” (1 Juan 4:7). Huelu ngoimalayaiñ ñi feipin ta Jesús: “Epe com che niehuetulayai piuqueyehun” (Mat. 24:12). Tüfa mu, Jesús nütramcalai pu cristiano mu. Huelu com iñchiñ mülei taiñ cuñiutucuhual, femngechi taiñ inayentunoafiel pu che piuqueyechequenolu. Feimu ngüneduamaiñ cüpalechi ramtun: ¿chumngechi quimafuiñ taiñ rüf piuqueyefiel taiñ pu peñi ca pu lamngen?

13. ¿Chumngechi quimafuiñ taiñ piuqueyechen?

¹³ Fei, ¿chumngechi quimafuiñ taiñ rume piuqueyefiel taiñ pu peñi ca pu lamngen? Quiñe dungu, chem femqueiñ rupan mu huesaque dungu (2 Cor. 8:8). Feimu ti apostol Pedro feipi: “Doi mai, hueluconque rume piuqueyehuaimün. Tati piuqueyechequelu rumel eluucülequei ñi perdonacheal” (1 Ped. 4:8). Feimu huelulcaule taiñ pu peñi ca pu lamngen ca huesa duameleliyiñmu, femngechi quimafuiñ tunte taiñ piuqueyefiel engün.

14. Chumngechi feipi 1 Pedro 4:8, ¿chem piuqueyen duamnieiñ? Feipinge quiñe ejemplo.

¹⁴ Doi cüme inaduamaiñ ñi feipin Pedro. Ellaconchi ti versiculo 8 mu, feipi “rume piuqueyehuaimün”. Cangelu troquiñ tüfachi versiculo mu, feipi ti piuqueyechequelu rumel eluucülequei ñi perdonacheal. Ñi feipin Pedro griego quehun mu, raquiduamelafeiñmu ñi “huinüfcünungen” quiñe dungu. Feimu feipiafuiñ ti piuqueyen quiñe pañu quechilei huinüfcülelu. Raquiduamnge tüfa: com püle manchalele quiñe mesa, huinüfcünungeafui quiñe pañu, femngechi com tacucünungeafui ti mancha. Ca femngechi, rume piuqueyefiliyiñ taiñ pu peñi, pu lamngen, com tacucünuafiyiñ reque com ñi huelulcan engün, femngechi ‘rumel eluucüleaiñ ñi perdonacheal’.

15. Rume piuqueyecheliyiñ, ¿ca chem chumafuiñ? (Colosenses 3:13).

¹⁵ Rume piuqueyeniefiliyiñ taiñ pu peñi ca pu lamngen, eluucüleaiñ taiñ perdonayafiel ñi huelulcan engün, cüdaungefule rume (papeltunge Colosenses 3:13). Perdonafiliyiñ pu che, pengelqueiñ tunte nehuencülei taiñ piuqueyen ca ayühuelquefiyiñ ta Chau Jehová. ¿Ca chem quelluafeiñmu taiñ rulpacünuafiel caquelu che ñi huelulcan? Quiñe che huesa duameleliyiñmu, ¿chem chumafuiñ?

16, 17. ¿Chem quelluafeiñmu rulpacünuafiel pichique huelulcan? Feipinge quiñe ejemplo. (Ca inaduamnge ti adentun).

¹⁶ Re ngüneduamlayafiyiñ huesaque dungu ñi femquen pu che, huelu mai cümeque dungu tañi femquen. Peaiñ quiñe dungu, eimi müleimi caquelu peñi ca lamngen eimün, fei entuimi quiñe foto. Quiñe müten entulaimi, epu, cüla. Quiñe peñi cüme tripanole quiñe foto mu, borracünuafimi, fei tati cüme tripalu elafimi.

¹⁷ Iñchiñ acordanieiñ ñi cüme rupan taiñ pu peñi, pu lamngen iñchiñ. Huelu acordarumeafuiñ quiñe peñi cam quiñe lamngen huesa entui tañi feipin cam huelulcahui, fei ¿chumafuiñ? Ngoimanentuafiyiñ, borracünuafiyiñ feiti huesa tripachi foto reque (Prov. 19:11; Efes. 4:32). Fentren rupa am cüme rupaquefulu feichi lamngen cam peñi iñchiñ, feimu ngoimanetuafiyiñ müten tañi huelulcan. Loncontucuafiyiñ taiñ cüme rupan, guardacünuafiyiñ tati cüme tripachi foto reque.

¿CHUMNGELU FENTE FALIN-NGEI TI PIUQUEYEN FAMÜLQUE MU?

18. Tüfachi troquiñ mu, ¿chem falin dungu ngüneduamiyiñ?

¹⁸ ¿Chumngelu ayünieiñ taiñ nehuentuleal taiñ piuqueyen? Chumngechi ngüneduampeiñ, piuqueyefiliyiñ taiñ pu peñi ca lamngen, pengelqueiñ taiñ piuqueyefiel ta Jehová. ¿Chumngechi pengelquefiyiñ taiñ pu peñi, pu lamngen taiñ piuqueyefiel? Quiñe tüfa, yafültucufiliyiñ. Taiñ femal, duamnieiñ taiñ cutranpiuqueyeafiel engün. ¿Chumngechi doi piuqueyehuafuiñ? Eluhuaiñ taiñ perdonacheal caquelu che ñi huelulcan.

19. ¿Chumngelu fente falin-ngei ti piuqueyen famülque mu?

¹⁹ ¿Chumngelu fente falin-ngei pengelal taiñ piuqueyen famülque mu? Peaiñ ñi feipin Pedro: “Deu püllelepai ñi afal com ti müleyechi dungu. Feimu [...] hueluconque rume piuqueyehuaimün” (1 Ped. 4:7, 8). ¿Chem dungu rupayai fülpale ti afaelchi antü? Jesús feipifi tañi pu discipulo: “Feyentuqueimün iñche tañi üi mu, feimu com pu troquiñche üdeaimünmeu” (Mat. 24:9). Mülei taiñ quiñeucüleal, femngechi serfinieafiyiñ ta Chau Jehová üdengeliyiñ rume. Huecüfü ayüniei taiñ quiñeucülenoal, huelu hueulayaiñmeu hueluconque piuqueyeuliyiñ. ¿Chumngelu? “Piuqueyehun mu rüf quiñeucülequei pu che” (Col. 3:14; Filip. 2:1, 2).