Julio

Jesús com ñi feipin mu ca ñi femün mu, inayentufi tañi Chau ñi raquiduamcülen ca ñi chem duamcülen (Juan 14:9). ¿Chem quimürpuafuiñ Jesús ñi femün afmatun dungu? Jesús ca tañi Chau rume piuqueyenieiñmu. Mülepalu mapu mu, Jesús femi fentren afmatun dungu ñi quelluafiel pu cutrancaucülelu, femngechi pengeli ñi rume piuqueyechequen. Quiñe rupa epu trauma llellipueyu ñi quelluafiel (Mat. 20:30-34). Jesús ñi cutranpiuqueyefiel mu engu, tremolfi. Griego quehun mu, tüfa raquiduameleiñmu Jesús pefilu tüfachi epu trauma, cutrantui ñi piuque. Jesús ca elufi iyael pu ngüñülelu ca tremoltufi pu lepra cutran nielu (Mat. 15:32; Mar. 1:41). ¡Felei llemai! Jesús reque, Jehová ca cutranpiuqueyequeiñmu. Fei engu rume piuqueyenieiñmu iñchiñ, ca rume hueñancüqueingün taiñ cutrancahun mu (Luc. 1:78; 1 Ped. 5:7). Jehová ca Jesús rume ayüniefi ñi afal com taiñ cutrancaqueteu. w23.04 pag. 3 parr. 4, 5

Mülei taiñ famentuucüleal huesaque dungu meu. Papeltulayafiyiñ ca allcütulayafiyiñ Huecüfü ñi pengelqueelchi huesaque dungu. ¿Chumafuiñ taiñ cuñiutucunieal taiñ piuque ca nieal cümeque raquiduam? Papeltual ta Biblia, amual trahun mu ca taiñ amuldungual. Femliyiñ tüfa, Jehová quelluaiñmu taiñ femconnoal huesaque dungu meu (1 Cor. 10:12, 13). Famülque mu afaelchi antü meu, doi mülei taiñ llellipuafiel Jehová taiñ fülconcüleal quisu meu. Jehová ayüquei taiñ nülanentual reque taiñ piuque llellipufiliyiñ (Sal. 62:8). Püramyenieafiyiñ ca mañumnieafiyiñ com taiñ cümelcaqueteu. Llellipuafiyiñ taiñ eluaeteu nehuen, femngechi taiñ amuldungual ca taiñ quelluaeteu chaftual com huesa rupan ca taiñ connoal huesaque dungu mu. Chem no rume ca inei no rume catrütuquenoeliyiñmeu taiñ llellipuafiel Jehová. w23.05 pag. 7 parr. 17, 18

¿Chumngelu am amuqueiñ trahun mu? Taiñ püramyeafiel ta Jehová (Sal. 26:12; 111:1). Ca femngechi taiñ hueluconque yafültucuhual (1 Tes. 5:11). Taiñ femngechi femal rume falin-ngei taiñ huiñoldungual trahun mu. Huelu quiñeque mu cüdautuafuiñ taiñ huiñoldungual, ¿chumngelu? Quiñeque iñchiñ yehuequeiñ taiñ huitrapüramal taiñ cuhu. Ca quiñeque iñchiñ ayüliyiñ rume taiñ huiñoldungual, elungequelaiñ ta comentario. Fei ¿chem quelluafeiñmu? Pablo feipi taiñ hueluconque yafültucuhual (Heb. 10:24, 25). Loncontucuaiñ: pichin huiñoldungufuliyiñ rume, yafültucuafuiñ taiñ pu peñi ca pu lamngen. Cafei fente elungenoliyiñ rume taiñ huiñoldungual, ayüucüleafuiñ caquelu ñi huiñoldungual (1 Ped. 3:8). w23.04 pag. 20 parr. 1-3

Tati rey feipicünui quiñe falin dungu. 70 tripantu mu pu judio mülequefui Babilonia mu, huelu feula ti rey feipieyu ñi huiñotual tañi mapu mu, Israel mu (Esd. 1:2-4). Jehová müten femafui tüfa. Pu Babilonia che lifrecünuquelafuingün pu che mülepulu fei mu (Is. 14:4, 17). Huelu hueungelu am pu Babilonia che, feimu neicümfi tati pu judio. Feimu com pu judio, doi mai pu ngen familia, mülefui ñi dullial tañi mülenagal cam tañi tripayal Babilonia mu. Quiñeque engün cüdautuquefui ñi tripayal engün. Quiñeque engün müna füchalefuingün ñi tripayal Babilonia mu, Israel am alü camapulefulu. Ca fentren pu judio choyüngeingün Babilonia mu, ca huaria quimlafuingün, feimu Israel quisu tañi mapu troquiquelafuingün. Ca quiñeque judio ricupupelafuingün chi Babilonia mu, feimu cüdautuquefuingün ñi elcünuafiel chi mapu, tañi ruca ca tañi negocio. w23.05 pag. 14 parr. 1, 2

Biblia feipieiñmu taiñ nehuencüleal, taiñ cutranpiuqueyecheal ca piuqueyecheal. Lucas 21:19 feipi: “Nehuentuucülemün, fei montuai tamün mongen”. Colosenses 3:12 feipi: “Cutranpiuqueyecheaimün”. Ca 1 Tesalonicenses 4:9, 10 feipi: ‘Chau Ngünechen mai ta quimeltueimünmeu tamün hueluconque piuqueyehual. Huelu pu peñi, yafültucuhuiyiñ, doi amulepe tamün piuqueyehun’. Feichi mu pu cristiano nehuencülefuingün, cutranpiuqueyechequefuingün ca piuqueyechequefuingün, huelu ngülamtungeingün femngechi dungu ñi femmequeal engün. Iñchiñ ca femngechi mülei taiñ femal. Feimu inaduamafiyiñ ñi femquefel pu hunenque cristiano ca chumngechi inayentuafuiñ engün. Femliyiñ, pepicaucüleaiñ acule ti fütra cutrancahun. Feula nehuencülelmi, fei acule ti fütra cutrancahun eluucüleaimi tami nehuencüleal. w23.07 pag. 3 parr. 4, 8

Taiñ miyahun mu feitachi rüpü mu, quelluqueiñmu taiñ serfinieafiel ta Jehová fachantü ca cüpalechi antü mu ngünenietule Jehová. Feimu pu dullin cristiano ca tati caquelu ufisa mülei ñi inanieafiel feitachi rüpü (Juan 10:16). Feichi 1919 tripantu ca fantepu mu, fentren huentru, domo, ca pichiche tripatuingün coilaque religion mu Fütra Babilonia pingelu, fei miyautuingün feitachi “Lifngechi Rüpü” mu. Jehová liftufi reque ti rüpü, femngechi pu judio ñi cüme puhual Israel mu (Is. 57:14). ¿Taiñ antü mu cai? ¿Jehová ca femngechi liftupefi mai ti rüpü taiñ miyahual? Mai, 1919 tripantu mu, fentren pu che tripaingün ti Fütra Babilonia mu, fei tati coilaque religion. Huelu fentren tripantu cuifi mu, Jehová pünequefi quiñeque huentru ñi pepicayafiel ti rüpü fei ñi tripayal engün ti Fütra Babilonia mu (ca inaduamnge Isaías 40:3). ¿Chemu mülefui ñi pepicangeal ti rüpü? Femngechi fentren che cüme piuquengelu ñi tripayal coilaque religion mu, fei ñi cüme poyetuafiel ta Jehová tañi pu che engün. w23.05 pag. 15, 16 parr. 8, 9

Jehová ayüniei taiñ cüdahuelafiel ayüucülen mu ca com taiñ piuque mu (2 Cor. 9:7). Huelu, ¿cümepei mai taiñ dirpuafiel taiñ ayünieel müte yafüluucülenoliyiñ rume? Peafiyiñ ñi femün apostol Pablo. Fei feipi: “Cutrancaquefiñ reque tañi cuerpo, tañi esclavo reque ngüneniequefiñ” (1 Cor. 9:25-27). Pablo yafüluucülenolu rume, huelu obligahui tañi femal Jehová tañi feipieteu. Fei Jehová ayüucülefui chumngechi ñi serfieteu Pablo, fei elufi cümelcan (2 Tim. 4:7, 8). Eluuliyiñ taiñ dirpuafiel taiñ ayünieel müte yafüluucülenoliyiñ rume, rume ayühuai ta Jehová. ¿Chumngelu ayüucüleai? Ayünofiliyiñ rume taiñ dirpuafiel taiñ ayünieel, huelu Jehová quimniei taiñ femquen fente taiñ piuqueyeniefiel. Chumngechi ñi cümelcafiel ta Pablo, ca femngechi cümelcayaiñmu iñchiñ nehuentu cüdauliyiñ (Sal. 126:5). Fei pefiliyiñ chumngechi taiñ cümelcaqueteu Jehová, doi yafüluhuaiñ taiñ dirpuafiel taiñ ayünieel. w23.05 pag. 29 parr. 9, 10

Pu che mongetripanoalu Jehová ñi antü mu ti apostol Pablo trürümfi engün quiñe che umaucülelu mu. Quiñe che umaucülelu quimlai chem ñi rupamequen ca quimlai chumngechi ñi rupan ti hora. Quimnolu am chem dungu ñi rupamequen, feimu ngelai tañi chumal engün. Famülque mu, fentren pu che umaucülechi che reque feleingün (Rom. 11:8). Ngüneduamlaingün taiñ mülen afaelchi antü mu ca ñi epe aculen ti fütra cutrancahun (2 Ped. 3:3, 4). Huelu iñchiñ quimnieiñ fill antü doi falin-ngei taiñ llihuatuleal (1 Tes. 5:6). Tüngcüleliyiñ, conlayaiñ politico dungu mu. Doi püllelepale Jehová ñi antü, pu che doi ngüchaltucuaiñmu taiñ conal fei engün ñi femqueel mu. Huelu müte fill raquiduamcülelayaiñ, Chau Jehová tañi nehuen tüngduamelaiñmu ca quelluaiñmu taiñ cüme femal (Luc. 12:11, 12). w23.06 pag. 10 parr. 6, 7

Nütramcangen mu Sansón mu, ¿raquiduampelaimi fente ñi nehuen-ngen? Huelu Sansón fütra huelulcahui, feimu huesaque dungu mu rupai. Huelulcaufulu rume, Jehová loncontucuquefi Sansón chumngechi tañi cüme serfiquefeteu, feimu huirintucucünufi Biblia mu. Jehová elufi nehuen ta Sansón ñi femal afmatufalchi dungu ñi quelluafiel pu Israel che. Feimu Jehová elcünui ñi huirintucungeal Sansón ñi rume feyentulen (Heb. 11:32-34). Tañi femün ta Sansón yafültucuafeiñmu. Cüdaungechi dungu mu rume rupaquefulu, maneluuquefui Jehová mu. Ñi femün ta Sansón entuafuiñ cümeque quimeltun taiñ quelluaeteu. w23.09 pag. 2 parr. 1, 2

¿Chem quelluaiñmu taiñ nehuentuleal? Llellipunieafiyiñ ta Jehová fill antü ca feipiafiyiñ chem mu taiñ raquiduamcülen (1 Tes. 5:17). ¿Feula huesa rupalepelaimi chi? Huelu huesa duamcülelmi cam illculelmi, ¿llellipuquefimi mai ta Jehová tami quelluaeteu? Llellipufilmi Jehová pichiquen dungu mu, fei ruparumelmi huesaque dungu mu cüpalechi antü mu, llellipufemafimi. Ca maneluucüleaiñ Jehová mu taiñ cüme quelluaeteu (Sal. 27:1, 3). Fachantü nehuencüleliyiñ taiñ rupan huesaque dungu mu, fei doi cüdaungelayai taiñ nehuentuleal acule ti fütra cutrancahun (Rom. 5:3). ¿Chumngelu? Quiñeque peñi ca lamngen ñi aguantan mu huesaque dungu, doi nehuencünuhuingün ñi chaftuafiel cüpalechi doi huesaque dungu. Ñi pefiel mu Jehová chumngechi ñi quellueteu, doi maneluhuingün ñi quelluaeteu cüpalechi antü mu (Sant. 1:2-4). w23.07 pag. 3 parr. 7, 8

Jehová ñom piuquengei ca cutranpiuqueyechequei, feimu cüme allcütuquei. ¿Chumngechi pengeli ñi ñom piuquengen? Petu ñi apümcanofiel pu huesaque che Sodoma mu mülelu, Jehová, quiñe cüme püllü mu, feipifi Lot tañi lefmahual huincul püle. Huelu Lot ayülafui tañi amual üye mu, llicalefui. Feimu feipifi Jehová, ¿lefmahuafun Zoár mapu mu? pifi. Huelu Jehová ca ayüfui ñi apümcayafiel Zoár pingechi huaria, fei ¿chumi? “Femlayaimi. Deu feipipeyu amuaimi huincul püle” ¿pipefi mai? Femlai. Jehová cüme allcütufi tañi feipieteu Lot, fei apümcalafi Zoár huaria (Gén. 19:18-22). Jehová, ¿chumngechi pengeli ñi cutranpiuqueyechequen? Nínive mu re huesaque che mülequefui. Feimu Jehová huercüfi Jonás ñi feipiafiel engün ñi apümcangeal ti huaria. Huelu Nínive che repentiuhuingün com ñi huesa femquen mu, feimu Jehová cutranpiuqueyeyu engün ca apümcalafi ti huaria (Jon. 3:1, 10; 4:10, 11). w23.07 pag. 21 parr. 5

Quiñe anümca müte nienole folil, cülüyahuafui, nehuencülequelai. Duamniefui quiñe mamüll ñi cülüyaunoal. Jehoás feitachi anümca reque felefui. Quisu tañi duam mu nehuencülelafui, duamniefui ti sacerdote Jehoiadá tañi ngüneduamnieaeteu, femngechi tañi nehuencüleal. Lalu ta Jehoiadá, Jehoás eluhui ñi allcütuafiel coilaque dungu pu apostata mu cüpalu, femngechi püntütriparpui Jehová mu. ¿Chem enseñaleiñmu ñi femün ta Jehoás? Feyentulayafiyiñ ta Jehová taiñ familia cam ti trahunche ñi femün mu müten. Caque quiñeque iñchiñ mülei taiñ cüme hueniyeafiel ta Jehová. ¿Chumngechi femafuiñ? Papeltufiliyiñ ta Biblia, raquiduamliyiñ taiñ papeltuel mu ca llellipufiliyiñ Jehová fill antü. Femngechi doi piuqueyerpuafiyiñ ca yamnierpuafiyiñ ta Jehová (Jer. 17:7, 8; Col. 2:6, 7). Jehová turpu feipilayaiñmu taiñ femal fütraque dungu taiñ pepilnoel. Quisu feipieiñmu müten taiñ femal tañi huiriconcülen Eclesiastés 12:13 mu: “Rume yamniefinge tati rüfngechi Ngünechen ca inaniefinge tañi huercün dungu, tüfa müten mülei ñi femal com pu che”. Yamniefiliyiñ ta Jehová chem huesaque dungu rume rupaliyiñ, chaftuafuiñ ca nehuencüleafuiñ. Femliyiñ, inei no rume püntünentulayaiñmu Jehová mu. w23.06 pag. 18, 19 parr. 17-19

Chau Dios feipicünulu tañi chumal, hune feipi: “Tati anülelu ülmen huancu mu feipi” (Apoc. 21:5a). Apocalipsis lifru mu, Chau Jehová cüla rupa dungui afmatun dungu mu, tüfa ta quiñe. ¿Inei feipicünui tüfachi dungu? ¿Quiñe cüme püllü? ¿Jesús pemai? Femlai, ¡Chau Jehová llemai! Jehová am coilatuquenolu, feimu feipiafuiñ tañi huechutripayal tañi feipicünuel (Tito 1:2). Quimfali llemai, ñi feipin Apocalipsis 21:5, 6 müna manelfali. Fei hula, Chau Jehová feipi: “Huecünumequetufiñ com dungu”. Rüfcünu llemai, Chau Jehová nütramcai chumngechi feleai ta dungu cüpalechi antü mu. Huelu fente ñi rüfngen tüfachi dungu, Chau Dios feipicai reque ñi deu femtripan (Is. 46:10). w23.11 pag. 3, 4 parr. 7, 8

Ti apostol Pedro huelulcauquefui. Peafiyiñ quiñeque dungu. Jesús feipilu tañi sufrial ca tañi layal chumngechi ñi feipin Biblia, fei Pedro feipieyu: “Eimi femngechi dungu mu rupalayaimi” pieyu (Mar. 8:31-33). Cafei fentrequen rupa, Pedro ca caquelu apostol notucauquefuingün inei tañi hunencülen (Mar. 9:33, 34). Feichi pun petu ñi langümngenon Jesús, Pedro entui tañi espada, fei catrünentuñmafi ñi pilun quiñe huentru (Juan 18:10). Feichi pun, Pedro cüla rupa quimlafiñ ta Jesús pi (Mar. 14:66-72). Inaduamlu ñi femün, Pedro ngümacahui fente tañi hueñancün. Pedro rume huesa duamcülefui tañi femün mu, huelu Jesús quisucünulaeyu. Huiñomongetulu ta Jesús, pengelelfi ta Pedro fente tañi piuqueyeniefiel, ¿chumngechi? Feipifi tañi cuidañmayafiel tañi pu ufisa (Juan 21:15-17). Pedro eluucülefui tañi femal, feimu Pedro mülerpui ti Pentecostés pingechi fiesta mu Jerusalén mapu mu. Ca feichi mu, dullingei ñi amual huenu mu. w23.09 pag. 22 parr. 6, 7

Ti apostol Pedro feipifi pu loncolelu: “Camañfe reque cuidanieafimün Chau Ngünechen ñi pu ufisa” (1 Ped. 5:1-4). Pu loncolelu piuqueyeniefi tañi pu peñi, pu lamngen, feimu ayünieingün tañi cuidayafiel. Huelu fente tañi cansalen ca fentren cüdau tañi nieel engün, quiñeque mu femnoalu troquihuafuingün. Femngechi dungu mu rupalmi, ¿chumafuimi? Llellipuafimi ta Jehová tami chumlen. Pedro huirintucui: “Tati serfiquefilu ta caquelu che, recüluupe Chau Dios ñi nehuen mu” (1 Ped. 4:11). Quiñeque peñi ca lamngen ñi huesa rupan fentecünulayai, hue mapu mu müten cüme elcünungetuai. Huelu Jesús tati “fütra camañ ufisa” doi quelluafui pu huesaque dungu rupamequelu, quelluafeyu fachantü ca ti hue mapu mu. ¿Chem ayüquei ta Jehová ñi femal pu loncolelu? Mülei ñi piuqueyeafiel tañi pu peñi ca pu lamngen, camañafiel ca ñi inayentufalngeal. w23.09 pag. 29, 30 parr. 13, 14

Inalayaiñ ñi raquiduamquen pu poyequenofilu Jehová. Raquiduamliyiñ fei engün reque, püntütripayafuiñ Jehová mu ca inahuelayafuiñ tañi huercün dungu (1 Cor. 3:19). Pu che inaquefilu tüfachi “mapu mülechi quimün” feyentuquelafi Chau Dios ñi feipin. Peafiyiñ ñi rupan cuifi mu Pérgamo ca Tiatira trahunche mu. Feichi mu pu che conquefui pod cudumuhun mu ca poyequefuingün coilaque dios, fei quiñeque cristiano inayenturpueyu engün. Feimu Jesús nehuentu ngülamtueyu engün tañi famentunofiel mu ti pod cudumuhun (Apoc. 2:14, 20). Famülque mu, pu che poyequenofilu Jehová huelulcayafeiñmu tañi raquiduamürpual fei engün reque. Quiñeque mu taiñ familia cam caquelu che feipiafeiñmu taiñ inayal quisu taiñ ayüqueel ca taiñ inanoafiel Jehová ñi huercün dungu. Feipiafeiñmu taiñ conal müten pod cudumuhun mu, huesa dungu no piafeiñmu ca ñi feipin Biblia serfihuelai fachantü, cuifi am huirintucungelu piafui chi. Quiñeque mu raquiduamafuiñ Jehová com feipilaeiñmu taiñ chumal. Feimu doi amulcünuafuiñ taiñ huercüeteu Jehová, huelu tüfa cümelai (1 Cor. 4:6). w23.07 pag. 16 parr. 10, 11

María, Jesús tañi ñuque, duamniefui nehuen ñi inayal Jehová ñi feipin. Ti cüme püllü Gabriel feipifi ta María ñi niepüñeñal petu ñi fütangenon. María, ¿fill raquiduamcülefui peno? Quimlafui chumngechi ñi tremümafiel quiñe pichiche, huelu feula ti Mesías ñi ñuquengearquelu. Ca mülefui ñi feipiafiel tañi novio José ñi niepüñencülen. Fütra cüdaungechi dungu rupafui María (Luc. 1:26-33). ¿Cheu entui nehuen ta María? Eluhui ñi quellungeal. Feipifi ta Gabriel ñi quelluaeteu, femngechi ñi doi quimafiel ti dungu tañi elfalcünungeel (Luc. 1:34). Cafei müchai müten pemefi tañi pariente Elisabet, fei amui “huinculcülechi mapu püle” Judá mapu mu. Puulu üyeu Elisabet saquieyu, ca feipieyu Jehová ñi feipicünuel (Luc. 1:39-45). Feimu María feipi Jehová “afmatun dungu femquei quisu tañi nehuen meu” (Luc. 1:46-51). Gabriel ca Elisabet meu, Jehová nehuentucufi ta María. w23.10 pag. 14, 15 parr. 10-12

Quiñeque cristiano dullingei ñi sacerdotengeal Jesús engu: 144.000 che. Fei engün müleai huenu meu, Chau Dios tañi saquin fotümngeai engün (Apoc. 14:1). Ti Yamfal Mülehue mu adentucünungei pu dullinque cristiano Chau Dios ñi fotümyefiel engün petu mülelu mapu meu (Rom. 8:15-17). Tati Doi Yamfal Mülehue adentulei ta Chau Jehová ñi mülen huenu meu. ¿Chem adentulei ti cortina püntüniefilu ti epu mülehue? Tüfa ta Jesús ñi cuerpo mapu meu. Petu nielu tañi cuerpo mapu meu, elungelai ñi conpual huenu meu. Tañi hunen lonco sacerdotengerpual Jehová ñi adcünuelchi ruca mu, mülefui ñi elcünual tañi cuerpo. Jesús hulcünulu tañi cuerpo chalintucun reque, eluñmafi pu cristiano dullingelu ñi conpual huenu meu. Fei engün ca mülei ñi elcünual tañi cuerpo mapu mu, fei ñi conal huenu mu (Heb. 10:19, 20; 1 Cor. 15:50). w23.10 pag. 28 parr. 13

Pu Efraín che ñi huesa pieteu, Gedeón tüngcülei (Juec. 8:1-3). Illcufemlai, huelu mai cüme allcütufi engün. Ñi femün mu Gedeón, com engün ñomcületuingün. Pu loncolelu, ¿chumngechi inayentuafuingün ta Gedeón? Pu loncolelu ñi huesa pieteu mu caquelu pu che, mülei ñi tüngcüleal ca cüme allcütuafiel (Sant. 3:13). Femngechi femle pu loncolelu, ti trahunche tüngcüleai. Gedeón hueufilu pu Madián che, pu che saquieyu. Huelu Gedeón püramyefi Jehová müten (Juec. 8:22, 23). Pu loncolelu, ¿chumngechi inayentuafuingün ta Gedeón? Jehová müten mülei ñi püramyeafiel engün femle cümeque cüdau (1 Cor. 4:6, 7). Quiñe loncolelu saquingele tañi cüme quimeltun mu, quisutu saquiulayai. Huelu mai, ti cüme quimeltun Chau Dios mu müten cüpai ca tañi troquiñche mu piafui. Pu loncolelu mülei tañi ramtuhual: “Tañi quimeltun mu, ¿püramyepefiñ mai ta Jehová cam quisutu püramyeuquen?”. w23.06 pag. 4 parr. 7, 8

Elungenoliyiñ taiñ ngillatuel, ramtuhuafuiñ: “¿Cümepei mai chem tañi llellipumequen?”. Llellipumequeiñ chi chumngechi ñi cüme elcünutual quiñeque dungu. Huelu chem taiñ ngillatuel cümelcalayafeiñmu, ¿doi cüme dungu mülepelai fei taiñ cüme tripayal? Cafei chem taiñ pedifiel ta Chau Jehová nüucülelai chi quisu tañi ayünieel mu (1 Juan 5:14). Quiñe chau ca quiñe ñuque llellipufingu ta Jehová tañi pu yall ñi püntütripanoal fei meu. Cüme dungu piafuiñ. Huelu Jehová dicümtucuquelafi inei no rume ñi serfiafiel. Chau Dios ayüniei com pu che ñi serfiaeteu quisu ñi duam mu, pu pichiqueche cafei (Deut. 10:12, 13; 30:19, 20). Feimu doi cümeafui feichi pu chau ñi ngillatuafiel ta Jehová chumngechi puhual tañi pichiqueche ñi piuque mu, femngechi piuqueyerpuafuingün ta Chau Jehová ca cüpa hueniyeafingün (Prov. 22:6; Efes. 6:4). w23.11 pag. 21 parr. 5; pag. 23 parr. 12

Yafültucucheliyiñ, ¿chumngechi pengelqueiñ taiñ piuqueyen? Quiñe lifru nütramcai Biblia ñi feipin griego quehun mu, tüfachi palabra “yafüluhun” cüpa feipi “huitracünuhual inafül quiñe che mu taiñ yafültucuafiel rupalu huesaque dungu mu”. Feimu yafültucufiliyiñ quiñe peñi, quiñe lamngen cutrancaucülelu, quelluquefiyiñ ñi amuleal ti cüme rüpü mu, fei ñi nieal rumel mongen. Feimu yafültucunieafiyiñ pu peñi ca pu lamngen, quisucünulayafiyiñ engün. Femliyiñ, pengelelafiyiñ tunte taiñ piuqueyefiel (2 Cor. 7:6, 7, 13). Cutranpiuqueyecheal ca yafültucucheal nüucülequei. ¿Chemu femngechi feipiqueiñ? Pefilu iñchiñ quiñe che cutrancaucülelu, cutranpiuqueyefiyiñ. Ayünieiñ taiñ yafültucuafiel ca quelluafiel. Hune, cutranpiuqueyeafiyiñ ta che, fei hula, yafültucuafiyiñ. Ca femngechi femi Jehová. Pablo nütramcai Chau Ngünechen cutranpiuqueyechequei, feimu yafültucuchequei. Fei feipi: “Taiñ Fütra Chau rume cutranpiuqueyechequei. Chau Ngünechen itrofill dungu mu yafültucuchequei” (2 Cor. 1:3). w23.11 pag. 9, 10 parr. 8-10

Com pu cristiano quimiyiñ ñi rupayal huesaque dungu, Pablo feipifi pu Tesalónica che: “Quiñentrür mülelu iñchiñ, feipicünuhuiyiñ taiñ cutrancahual. Femngechi rupai tati” (1 Tes. 3:4). Ca feipifi pu Corinto che: ‘Cüpa nütrameluhuiyiñ chem taiñ rupan. Fütra huesa dungu mu rupaiñ, yafüngehuelaiñ, layaiñ pilefuiñ’ (2 Cor. 1:8; 11:23-27). Fachantü ca quimnieiñ taiñ rupayal huesaque dungu (2 Tim. 3:12). Eluulu eimi tami inayafiel ta Jesús, ayentuqueimu chi tami pu hueni ca tami pu che. Tami nor chengen mu caiñetueimu chi tami jefe cam tami compañ cüdau (Heb. 13:18). ¿Inantucueimu mai ti gobierno ti amuldungun ñi duam mu? Chem huesaque dungu rume rupafuliyiñ, ayühuaimün pi Pablo. w23.12 pag. 11 parr. 9, 10

Jacob rupai huesaque dungu. Quiñe rupa, epu tañi fotüm, Simeón ca Leví, huesa femlu engu, huesa dunguyengei tañi familia ca Jehová tañi üi. Ca tañi saquin domo Raquel lai petu choyülu tañi püñeñ. Ca rume füchalu ta Jacob, quiñe fütra ngüñün ta rupai, feimu amuingün ta Egipto mapu mu (Gén. 35:16-19; 37:28; 45:9-11, 28). Rupafulu rume huesaque dungu mu, Jacob maneluucülefui müten Jehová mu, ca Jehová pengeleleyu tañi ayüucülen quisu mu. Jehová elueyu fentren chemcün ca culliñ. Ca huiño petufilu tañi fotüm José, ¿rume mañumcülepelafui Jehová mu? Jacob tañi cüme hueniyefiel mu ta Jehová, chaftufi com huesaque dungu (Gén. 30:43; 32:9, 10; 46:28-30). Jacob reque iñchiñ cüme hueniyefiliyiñ ta Jehová, ca chaftuafiyiñ huesaque dungu taiñ raquiduamquenofel. w23.04 pag. 15 parr. 6, 7

Salmo 23 mu, David pengeli tañi maneluucülen Jehová tañi piuqueyenieteu ca ñi cuidanieteu. David feipi tañi fülmaucülen Jehová mu, ca iñche tañi Camañfe pieyu. David quimniefui Jehová tañi adnieteu, feimu tüngduamcülefui. Feimu recüluucülefui tañi Huenu Chau mu, quimniefui tañi piuqueyenieaeteu tunte puule tañi mongen. Peaiñ chumngelu fente maneluuquefui Chau Jehová mu. David ngüneduamquefui ñi cuidanieteu Chau Ngünechen. Rumel eluqueyu com tañi duamnieel. Ca quimniefui tañi hueniyenieteu ca ñi fürenenieteu. Chem rupafule rume, David maneluucülefui Jehová tañi cuidanieaeteu. Feimu David fill raquiduamcülequelafui ca ayüucülefui (Sal. 16:11). w24.01 pag. 28, 29 parr. 12, 13

Aflu ti Segunda Guerra Mundial ta fantepu mu, Jehová tañi pu che amuldungumequei fillque troquiñ mapu mu. Feimu huall mapu püle fentren che quimürpufi ta Jehová. Famülque mu ti Troquiñ Adniechequelu ca eluuqueingün ñi adnieaeteu Cristo. Tañi quimeltuafiel pu peñi ca pu lamngen, hune quintuqueingün Jehová ca Jesús ñi raquiduam. Tañi chem piel ti Troquiñ Adniechequelu, tati pu huitran-ngepaquechi loncolelu ca pu loncolelu quimelelquefi engün ti pu trahunche. Jesús adniefi com pu loncolelu, feimu Biblia feipi ñi mülen engün Jesús tañi man cuhu mu (Apoc. 2:1). Com pu loncolelu culpafe chengelu engün cai, feimu huelulcaqueingün quiñeque mu Moisés, Josué ca pu apostol reque (Núm. 20:12; Jos. 9:14, 15; Rom. 3:23). Femlu rume, Jesús adniequefi ti Troquiñ Adniechequelu ca pu loncolelu. Feimu llemai rüf maneluhuafuiñ tüfachi pu peñi mu taiñ adnieteu. w24.02 pag. 23 parr. 13, 14

¿Chumngechi püramyeafuiñ ta Jehová? Taiñ nütramcan mu pengelaiñ taiñ piuqueyeniefiel ca mañumniefiel. Amuldungun mu ayüqueiñ pu che ñi cüpa fülmayafiel ta Chau Ngünechen ca ñi piuqueyeafiel engün chumngechi piuqueyefiyiñ iñchiñ (Sant. 4:8). Ayühuelmaqueiñmu Biblia mu ñi pengelelafiel ta che Jehová ñi piuqueyechen, norngen, ñi nehuen ca quimün. Yafüluhuaiñ taiñ inayentuafiel ta Chau Jehová, femngechi ca püramyeafiyiñ ca ayühuelafiyiñ. Inayentufiliyiñ Jehová cheu rume miyauliyiñ, tati pu che ramtuhuafui chumngelu taiñ trürngenon caquelu che meu iñchiñ (Mat. 5:14-16). Fei feipiafiyiñ femngechi chengeiñ taiñ poyequefiel mu ta Jehová, feimu pu che cüme piuquengelu cüpa fülmayafi ta Chau Jehová. Femngechi taiñ poyeafiel ta Jehová, ayühuelmapiuqueafiyiñ (1 Tim. 2:3, 4). w24.02 pag. 10 parr. 7

Eimi hueche, ayülmi tami cüme cristianongeal, mülei tami adümuhual fillque dungu mu. Tüfa quelluaimu tami doi nieal cüdau trahunche mu, tami peal cüdau ñi mongeluhuam, ca tami cüme yehual caquelu engün. Por ejemplo, quim cüme papeltuaimi ca cüme huiriaimi. Biblia feipi quiñe che cüme papeltufilu Biblia ca raquiduamquelu tañi feipin mu, ayüucüleai (Sal. 1:1-3). Quiñe che fill antü papeltufile Biblia, quimai chem ñi raquiduamquen ta Jehová. Femngechi cüme raquiduamai ca cüme inayafi (Prov. 1:3, 4). Pu peñi ca pu lamngen duamnieingün ñi ngülamtungeal ca ñi quimeltungeal Biblia mu. Feimu eimi, cüme quim huirilmi ca cüme papeltulmi, cüme pepicayafuimi tami hueupin ca hulafuimi cümeque comentario tami yafültucuafiel ta caquelu che. Cafei petu estudialmi, huirintucuafuimi ti doi falinque dungu tami ayüfiel, fei ca antü inaduamafuimi. Tüfa quelluaimu tami doi maneluhual Jehová mu, ca tami yafültucuafiel caquelu che. w23.12 pag. 26, 27 parr. 9-11

Llicalelmi, raquiduamaimi tañi chumal Jehová cüpalechi antü mu, mülehuetunole ta Huecüfü. Ti fütra trahun 2014 tripantu mu, quiñe chau papeltulelfi tañi familia 2 Timoteo 3:1-5. Huelu cacünutui ñi feipin ñi pengelal chumletuai ta mongen hue mapu mu. Feipi: “Ti hue mapu mu müleai re cümeque dungu ca ayühun-ngeai ta mongen. Tati pu che huelucontu piuqueyehuai, piuqueyeafi tati rüf dungu, checahun-ngelayaingün, doi falin che troquiulayaingün, poyeafingün ta Chau Dios, feyentuafi tañi fütaqueche, mañum chefengeaingün, quisucünulayafi tañi pu chafche, piuqueyeafi com tañi pu che, eluucüleaingün tañi cümelcautual caquelu che engün, cüme dunguaingün caquelu che mu, quim ngünehuaingün, illcufe chengelayaingün, piuqueyeafi ti cümeque dungu engün, manelfal chengeaingün, inayaingün chem pin ta Jehová, ñom piuquengeaingün. Fülmanieafimi feichi che”. Iñchiñ cai, ¿nütramcaquefiyiñ taiñ pu familia, trahunche mu chumletuaiñ ti hue mapu mu? w24.01 pag. 6 parr. 13, 14

Rume cüme dungu taiñ quimfiel “Jehová ayühuelqueyu tañi pu che” (Sal. 149:4). Huelu quiñeque che huesa duamafui chi, fei feipiafui: “Chau Jehová ayüucülei tañi pu che mu, huelu ¿iñche cai? ¿Ayühuelquefiñ ta Jehová?”. Ca femngechi ramtuhuingün quiñeque poyequefilu ta Jehová cuifi mu (1 Sam. 1:6-10; Job 29:2, 4; Sal. 51:11). Biblia feipieiñmu culpan chengefulu rume ta iñchiñ, huelu ayühuelafuiñ ta Jehová. ¿Chumngechi femafuiñ? Feyentuleaiñ Jesús mu ca fautizahuaiñ (Juan 3:16). Femngechi pengelafiyiñ ta caquelu che taiñ repentiutun taiñ culpan mu ca taiñ serfiafiel ta Jehová com taiñ mongen mu (Hech. 2:38; 3:19). Femün mu, hueniyerpuquefiyiñ ta Jehová ca ayühuelquefiyiñ. Serfiniefiliyiñ ta Jehová chumngechi taiñ feipicünufiel, quisu füreneaiñmu ca hueniyeaiñmu (Sal. 25:14). w24.03 pag. 26 parr. 1, 2

Pu autoridad feipieliyiñmu taiñ amuldunguhuenoal, inayentuafuiñ ñi chumün pu discipulo cuifi mu, fei amuldunguleaiñ. Maneluhuafuiñ Jehová taiñ quelluaeteu taiñ amuldunguleal. Feimu llellipuafiyiñ Jehová taiñ eluaeteu nehuen ca quimün cafei taiñ chaftuafiel huesaque dungu. Com iñchiñ rupaleiñ fill cutrancahun dungu mu. Quiñeque iñchiñ layeluuhuiyiñ, cutrancüleiñ, hueñancüleiñ cam inacangequeiñ. Ca com tüfa doyelcülei ñi rupan ti pandemia ca ñi mülen hueichan. Feimu nülalelfinge tami piuque ta Jehová. Quiñe hueni reque feipifinge ta Jehová chem tami raquiduamcülen, fei maneluhuaimi Jehová meu tami quelluaeteu (Sal. 37:3, 5). Fentecünunoliyiñ taiñ llellipuafiel Jehová, quelluaiñmu taiñ chaftuafiel chem huesaque dungu rume (Rom. 12:12). Jehová quimniei chumngechi ñi rupalen tañi pu serfiqueteu ca allcütuñmaquefi tañi llellipuqueteu engün (Sal. 145:18, 19). w23.05 pag. 5, 6 parr. 12-15

Taiñ dullial chem chumal taiñ mongen mu, mülei taiñ ngüneduamal chem ñi ayünieel ta Chau Jehová, fei eluhuaiñ taiñ femal (Efes. 5:17). Quintuaiñ Biblia mu chem ngülam quelluafeiñmu, femngechi quimaiñ chem ayüquei Jehová tañi femal. Inaniefiliyiñ tüfachi cümeque ngülam, cüme dulliaiñ taiñ chumal. Huecüfü ayüquei fentren duam taiñ nieal, femngechi taiñ nienoal tiempo taiñ serfiafiel ta Jehová (1 Juan 5:19). Quiñeque cristiano tañi ngüneduamnon mu rume doyümürpuafui tati plata, tañi nieal doi estudio ca ñi doi cüdahual, fei raquiduamhuelayafui chi chumngechi ñi doi serfiafiel ta Chau Jehová. Femngechi rupaliyiñ, pengelafuiñ taiñ raquiduamcülen chumngechi ñi raquiduamquen pu poyequenofilu ta Chau Jehová. Tati plata, ti cüdau ca tati estudio huesa dungu no fel tati. Huelu ngelafui taiñ doyümafiel taiñ mongen mu. w24.03 pag. 24 parr. 16, 17