¿Chumafui pu chau tañi fülmanieafiel tañi pu yall?

“AHUEM chau, ¿chumngechi fente quimimi?”. Quiñeque rupa, ¿afmatuleimu tami fotüm femngechi tami ramtueteu? Feichi mu, ¿ayühuelmapelaimu tami piuque tami chaungen? Huelu doi ayüupelaimi tami fotüm inafilu tami ngülam (Proverbios 23:15, 24).a

Tüfa tremlu tami fotüm cai, ¿petu quimchengelu troquiniepeimu mai? Cam, ¿müte femhuelai? Petu tremcülelu tami fotüm, ¿chumafuimi tami petu cüme hueniyerpuafiel? Hunelu mu, peaiñ cüla dungu chumngelu ñi cüdaungeafel tüfa.

Cüla dungu ñi cüdaungeafel

1. RUME NIEI DUAM: Fentren mapu mu, ti chau cüdauquei ñi nieal iyael engün. Com antü reque cüdauqueingün, feimu pepi müte mülequelai tañi pu fotüm cam ñahue engün. Quiñeque paises mu feipingei ti chau rume pichin rupaquei tañi fotüm cam ñahue engu, ti antü mu 15 minuto müten cam doi pichin chi.

RAQUIDUAMNGE EIMI: ¿Tunteñma mülequeimi tami fotüm engu? Quiñe cam epu semana mu huirintucucünuafuimi chumten tiempo rupaqueimi tami fotüm cam ñahue engu fill antü. Afmatulafeimu tami pichin tiempo rupaquen quisu engün mu.

2. CÜME HUENIYEUNOLE TAÑI CHAU ENGU: Quiñeque huentru müte fülmaucülequelafui tañi chau engu. Quiñe huentru mülelu Francia mapu mu feipi: “Müte nütramcauquelafuyu tañi chau engu”. ¿Chumngechi huesalcaeyu tüfa? Quisu feipi: “Cüdautuquen ñi nütramcayal rüf piuque mu tañi pu yall engün”. Caquelu huentru doi nütramcaquefui tañi chau engu, huelu müte hueniyehurpulaingu. Felipe nielu 43 tripantu, feipi: “Tañi chau müte pengelelquelafeneu ñi piuqueyenieteu, feimu iñche ca cüdautuquen tañi fotüm meu piuqueyeyu ñi piafiel”.

RAQUIDUAMNGE EIMI: Chumngechi tami femqueteu tami chau, ¿ca femngechi femqueimi tami pu yall engün? Feingele, ¿inayentuquefimi tami chau ñi cüme femün cam tañi huesa femün?

3. MÜLELE QUIÑEQUE HUIMTUN: Quiñeque mapu mu feipingequei tati chau coneltulelai ñi quimeltuafiel pichiqueche. Lucas tremlu Europa mu, feipi: “Ti pu che feipiquefui ti ñuque müten mülei ñi dapiafiel pichiqueche”. Cañpüle cai feipingequei chau ñi cüdau cutrafcayafiel ti pichiqueche huesa femle engün. Jorge tremlu África mapu mu, feipi: “Tañi mapu mu, tati pu chau aucantuquelai tañi pichiqueche engün. Femfule, yamngehuenoalu troquiuqueingün. Feimu rume cüdautuquen ñi pichi aucantual tañi fotüm engu”.

RAQUIDUAMNGE EIMI: Eimi tami lof mu cai, ¿quimeltungequei pu ñuque müten inaduamal tañi pu pichiqueche? Pu chau, ¿feipiquefingün tañi pu yall ñi piuqueyefiel cam feipingequei ñi femngechi femnoal?

Eimi chaungelmi ca quiñequentu tüfachi cüla dungu chaftumequefilmi, ¿chem quelluafeimu? Cüme ngüneduamnge tüfachi cüla ngülam.

Fülmanieafimi petu pichicalu tami fotüm

Tati pu pichiqueche pichicalu müten inayentuquefingün ñi chau, feimu fill antü mülequeaimi tami pichiche engu, femngechi cüme inayenturpuaimu. ¿Chumngechi femafuimi fentren duam nielu rume eimi?

Pepi femfule, eluunge tami quelluaeteu tami fotüm. Lepümequelmi, eluafuimi quiñe lepühue tami quelluaeteu. Tami fotüm rume ayüucülepelayai tañi cüdahual eimi engu ca inayentuaimu. Doi pichi alüñmayaimi chi entual tami cüdau, huelu doi fülmanieafimi tami fotüm ca quimeltuafimi ñi cüdaufengeal. Fütra cuifi mu, Biblia feipifi pu chau ñi quiñeucülen cüdahual tañi pu fotüm engu. Ca feichi mu ti chau nütramcalelafui ca quimeltulelafui tañi fotüm (Deuteronomio 6:6-9). Feichi ngülam petu falin-ngei famülque mu.

Cüdaunge tami fotüm engu, huelu ca aucantumu. Cüme rupayaimu, huelu ca entuaimu fentren cümelcan. Tati pu chau aucantuquelu ñi pichiqueche engün quelluquefingün ñi llican chengenoal ca ñi pepilafiel hueque dungu.

Huelu ca dungu nüucülei chumngelu ti pu chau aucantuafel ñi pu pichiqueche engu. Quiñe experto feipi: “Ti pu pichiqueche aucantumequele ñi chau engu, doi eluucüleai ñi feipiafiel ñi chau chem ñi mülen tañi piuque mu. Petu aucantulu engu ti chau pengelelquefi ñi piuqueyeniefiel, femngechi ca femafui ñi pichiqueche”. Andrés mülelu Alemania mapu mu, feipi: “Tañi fotüm pichicalu, rume aucantuquefuyu. Iñche pancocaquefuiñ, femngechi quisu ca inayentui ñi pengelal piuqueyen”.

Umahuelfilmi tami pichiqueche pun, doi quiñeucüleaimu. Chillcatulelafimi quiñe nütram ca allcütuafimi nütramelelmu chem ñi rupan feichi antü, femngechi cüdautulayai nütramcalaeteu petu tremcülelu.

Quiñentrür femaimün quiñeque duam

Quiñeque huechequeche müte eluucülelaingün ñi nütramcayaeteu tañi chau. Tami pu hueche allcütunoelumu troquihulmi, pürüm raquiduamlayaimi ñi cüpa nütramcanon chem dungu meu no rume. Huelu cacünufilmi chumngechi tami nütramcafiel, femngechi doi eluucüleafui ñi nütramcayal.

Jacques quiñe chau mülelu Francia mapu mu, cüdautuquefui ñi nütramcayal tañi fotüm Jérôme pingelu. Huelu tüfachi chau dicümtuculafi tañi fotüm ñi nütramcayal, doi mai eluhui ñi pelotatual engu, femngechi doi cüme nütramcaingu. Jacques feipi: “Af aucantulu, anücünuuquefuyu cachu mu, femngechi petu ürcütulu doi cüme nütramcaqueyu. Elcünulu am tiempo tayu trür aucantual, rume cüme hueniyehurpuyu”.

Huelu, ¿tami fotüm ayüquenole tañi aucantual? Caque dungu femafuimi llemai. Andrés ayühunquechi acordaquei ñi puquintuquefiel huangülen tañi fotüm engu. Quisu feipi: “Entuquefuyu huancu ca anücünuuquefuyu adquintual pu huangülen. Nütramcaquefuyu feiti deumafilu ti huangülen ca chem taiñ raquiduamelnieteu. Epe fillem dungu nütramcaqueyu” (Isaías 40:25, 26).

Huelu ayüquenolmi chem ñi ayüqueel tami fotüm, doyümuulayaimi eimi tami ayüqueel (Filipenses 2:⁠4). Quiñe chau mülelu Sudáfrica mapu mu, feipi: “Iñche doi ayüquefuiñ deportetual, huelu tañi fotüm rume ayüquei chi aviones ca computador, feimu iñche yafüluhun tañi inaduamal tañi fotüm ñi ayüqueel. Iñche yequefuiñ ñi peafiel chi aviones ca aucantuquefuyu computador mu. Feimu fente cüme rupaquefulu am tañi fotüm engu, quisu doi nütramelquefeneu”.

Quellufinge tañi doi falintuhual

“Chau, tüfei tañi femmequen”, femngechi feipiqueimu chi tami fotüm hue adümuhun femürpulu. Deuma tremle tami fotüm, femngechi feipihuelaeimu chi, huelu petu duamniei tami falintuafiel.

Inayentufali ñi femün Jehová. Mülepalu Jesús mapu mu, Chau Dios feipieyu: “Tüfa ta iñche tañi poyen Fotüm, iñche tañi ayühuelqueteu” (Mateo 3:17; 5:48). Rüfngei, eimi mülei tami quimeltuafiel ca norümafiel tami fotüm (Efesios 6:4). Huelu ca femngechi mülei tami saquiafiel ñi cümeque femün mu.

Quiñeque chau cüdautuqueingün ñi saquiafiel tañi pu fotüm ca feipial ñi piuqueyeniefiel. Quisu tañi chau peñmaqueyu tañi huesa femün müten, turpu saquiquelafeyu, feimu peno quisu ca saquiquelafi tañi pu fotüm. Femngechi tremümngeimi chi, feimu rume yafüluhuaimi tami ca femnoal tami pu fotüm mu. ¿Chumngechi femafuimi? Lucas deu nütramcapefiyiñ, liftuquei ñi ruca tañi fotüm Manuel engu 15 tripantu nielu. Lucas feipi: “Quiñeque mu feipiquefiñ tañi fotüm ñi quisu entual quiñeque cüdau ruca mu. Duamülmi quellu, mütrümaen pifiñ. Quiñeque mu duamquelai rume quellu, feita cüme duamelqueyu. Cüme enturpule ñi cüdau, saquiquefiñ. Huelu pepi tripanole chumngechi ayülefel quisu, mañumquefiñ tañi cüpa quellulen”.

¿Ca chumngechi cüme duamelafuimi tami fotüm? Quelluafimi ñi diturpual falinque dungu tañi mongen mu. Huelu loncontucunienge: tami fotüm doi alüñmayafui chi ñi femal chem tañi raquiduamcülen, cam chem ñi cüpa femün tami fotüm trürlayafui chi eimi tami ayünieel mu. Femngechi rupale, dicümtuculayafimi tami fotüm ñi trürngeal ñi raquiduam eimi mu. Jacques taiñ nütramcapeel feipi: “Quelluquefiñ ñi fotüm ñi diturpual cümeque dungu tañi pepilnieel. Huelu ñi femnoal iñche tañi ayünieel, quisu tañi ayünieel llemai. Feipiuquen ñi dicümtucunoafiel ñi fotüm, doi mai ñi quisutu huechunenturpual ñi cüdau”. Feimu tami quelluafiel tami fotüm ñi diturpual cümeque dungu, allcütuafimi chem ñi raquiduamquen. Saquiafimi ñi cüme femquen ca yafültucuafimi ñi afeluunoal cüme tripanole rume.

Ca feingei llemai, quiñeque mu quiñeulayafui chi tamu raquiduam. Huelu yafüluhulmi tami quelluafiel ca cüme duamelafiel tami fotüm, quisu piuqueyenieaimu ca rume mañumnieaimu.

[Quimngeal dungu]