¿Tunten mu ngünenierpui Chau Dios ñi Gobierno? (Troquiñ 1)

QUINTUNIEAFIYIÑ QUIMÜN

Julio: Rüf falintuquefiñ tayu nütramcael Biblia meu Ernesto.a Rupachi semana ramtuen Chau Dios tañi Gobierno mu. Ramtuen, ¿chumngelu iñchiñ quimeltuqueiñ Chau Dios eluhui ñi ngünenieal 1914 tripantu mu?

Ernesto: Mai, femngechi papeltun quiñe tamün revista mu, feipi Chau Dios tañi Gobierno eluhui ñi ngünenieal 1914 tripantu mu. Huelu nien quiñe ramtun. “Com taiñ quimeltuel Biblia mu tripai” piqueimün.

Julio: Mai, felei.

Ernesto: Iñche papeltun com tati Biblia, huelu quiñe no rume tripalai ti tripantu 1914. Fei quiñe Biblia internet mu quintufiñ “1914”, huelu tripalai chem no rume.

Julio: Iñche saquieyu peñi, müna cümei tami papeltufiel com ti Biblia. Quimfali tami falintufiel.

Ernesto: Mai, trürümfal-lai tati.

Julio: Felei tati, cafei saquieyu tami ngüneduamfiel Biblia tami doi quimal. Tüfa feipilei Biblia taiñ femal: quintunieafiel quimün.b ¡Müna cüme femimi!

Ernesto: Mañumeyu Julio. Ayünien tañi doi quimal. Doi ngüneduamfiñ ti lifru tayu papeltuel, fei pefiñ quiñe troquiñ nütramcalu 1914 tripantu mu. Feipi ñi mülefel quiñe fütra anümca. Catrüngei huelu huiño tremtui, ¿fei peno?

Julio: Felei, tüfachi dungu tripai Daniel capitulo 4. Nütramcai chem ñi peuman Nabucodonosor, Babilonia ñi lonco ülmen.

Ernesto: Fei ürque, fentren rupa papeltufiñ. Huelu, ¿chumngechi nüucülepei mai Chau Dios ñi Gobierno mu cam 1914? Adümquelafiñ.

Julio: Felei, cüdaungei ñi adümngeal. Daniel no rume adümlafi, feichi huentru huirintucufilu tüfachi dungu Chau Dios mu cüpalu.

Ernesto: ¿Rüfcünu?

Julio: Mai. Ngüneduamnge ñi chem pin Daniel 12:8. ¿Chem huirintucui tüfachi huentru? “Allcün, huelu pepi adümlafiñ”.

Ernesto: ¡Hue! Iñche reque. ¿Rüfcünu cüdaungepelai?

Julio: Daniel, ¿chemu adümlafui tüfachi dungu? Feichi mu petu puulafui Chau Dios ñi elcünuelchi antü ñi quimngeal. Huelu deu puhui llemai, feula adümafuiñ chem ñi huirintucuel Daniel.

Ernesto: ¿Adümpeafuiñ mai?

Julio: Felei, ngüneduamnge ñi chem pin Daniel 12:9: “Tüfachi dungu am ellcacünungealu ca racümcünungeai acule hula ñi afael ta antü”. Feimu tüfachi dungu quimngeafui afaelchi antü mu müten. Biblia pengeli deu puhui feichi antü. Ti lifru tayu papeltuel nütramcai tüfa cüpalechi capitulo mu.c

Ernesto: Eimi, ¿quimeltuafen chem pifel?

Julio: Trür ngüneduamafiyu.

NABUCODONOSOR ÑI PEUMA

Julio: Hune inaduamayu chem peumai Nabucodonosor. Fei hula nütramcayayu ñi chem pifel.

Ernesto: Müna cümeafui.

Julio: Nabucodonosor peumai quiñe fütra anümca, fütra alüpürai, huenu mu puhui. Fei allcüi Chau Dios ñi huerquen. Tüfa feipi ñi catrüngeal ti anümca, re elcünungei ti folil ca ti mutrung. Rupai ‘regle medin antü’ fei huiño tremtui ti anümca.d Ellaca mu tüfachi dungu feipi chem ñi rupayal Nabucodonosor. Rume nehuen-ngefui feichi fütra anümca reque. Huelu catrüngei reque, nehuen-ngelafui ‘regle medin antü’ mu. ¿Acordaimi cai chem rupai?

Ernesto: Acordalan peñi.

Julio: Biblia feipi Nabucodonosor huedhuedcahui. Femngechi felefui regle tripantu peno cam ‘regle medin antü’, feimu loncolehuelai. Fei hula checontui fei elungei ñi huiño ngünenieal.e

Ernesto: Cümei, adümfiñ tati. Huelu, ¿chumngechi nüucülei tüfa Chau Dios ñi Gobierno mu ca 1914 tripantu meu?

Julio: Tüfachi dungu ñi huirintucuel Daniel, epu rupa femtripai. Hunelu mu feichi catrütungelu Nabucodonosor ñi gobierno. Ca rupa catrütungelu ñi ngünenieel feichi pu huentru Chau Dios ñi elcünuel, tüfachi dungu nüucülei Chau Dios tañi Gobierno mu.

Ernesto: ¿Chemu epu rupa femtripai piqueimi?

Julio: Tati versiculo feipi quiñeque dungu. Daniel 4:17 feipi tüfachi dungu feipicünungei “pu che ñi quimürpual engün ti Doi Alüpüralelu, Lonco Ülmencülei pu che ñi ngünenien mu, ca quisu elufi pu che tañi dulliel”. ¿Ngüneduamimi am? Tüfa feipilei “pu che ñi ngünenien”.

Ernesto: Mai, feipilei “ti Doi Alüpüralelu, Lonco Ülmencülei pu che ñi ngünenien mu”.

Julio: ¿Inei am tati “Doi Alüpüralelu”?

Ernesto: ¿Chau Dios peno?

Julio: Felei tati, quimfali ñi nütramcanon Nabucodonosor mu müten. Tüfa mu “pu che ñi ngünenien” cüpa feipi Chau Dios ñi ngüneniefiel tati pu che. Ngüneduamliyu caquelu dungu ñi feipicünuel Daniel, doi adümafimi.

Ernesto: Feipien.

TI DOI FALIN DUNGU ÑI NÜTRAMCAEL DANIEL ÑI LIFRU

Julio: Daniel ñi lifru fentren rupa nütramcai quiñe dungu. Feipi Chau Dios eluhuai ñi ngünenieal, Jesús lonco ülmencüleai. Peayu quiñe pengelün dungu. ¿Papeltuafuimi Daniel 2:44?

Ernesto: Mai, feipilei: “Feichi pu lonco ülmen ñi antü meu, Ngünechen huenu mu mülelu elcünuai quiñe ngünenien, chumcaunorume apümcangelayai. Ca tüfachi ngünenien elcünungelayai caque troquiñche mu. Atemcayafi ca apümcayafi com tüfachi caquelu pu ngünenien, ca quisu müten chumcaunorume aflayai”.

Julio: Tüfachi versiculo, ¿nüucülepei mai Chau Dios tañi Gobierno mu?

Ernesto: Nehue quimlan.

Julio: Ti texto feipi tüfachi Gobierno chumcaunorume aflayai, rumel müleai. ¿Mülepeafui mai quiñe huentru rumel ngüneniealu?

Ernesto: No, femlayafui.

Julio: Mai. Feula ngüneduamayu cangelu dungu nütramcalu Chau Dios tañi Gobierno mu. Peayu Daniel 7:13, 14, tüfa nütramcai tati lonco ülmencülealu. Feipi: “Elungei ñi ngünenieal, püramyengeal ca lonco ülmen-ngeal, femngechi ñi serfiaeteu com pu che, chem tuhun-ngele rume ca chem quehun dungule rume. Tañi ngünenien turpu aflayai ca tañi lonco ülmen-ngen apümcangelayai”. Tüfa mu huiño nütramcangei chem tayu nütramcapeel.

Ernesto: Mai, huiño nütramcangei quiñe Gobierno meu.

Julio: Felei, huelu tüfachi Gobierno rume falin-ngei. Feipi elungei ñi ngünenieal “com pu che, chem tuhun-ngele rume ca chem quehun dungule rume”. Feipi ñi ngünenieal com chi mapu.

Ernesto: Quimquelafun, huelu femngechi feipilei ti Biblia.

Julio: Ca huiño ngüneduamnge ñi feipilen tüfa mu: “Tañi ngünenien turpu aflayai ca tañi lonco ülmen-ngen apümcangelayai”. ¿Chem pimi cai? Daniel 7:13, 14 ca Daniel 2:44, ¿trürcülepei mai ñi feipilen?

Ernesto: Mai, felei tati.

Julio: Cümei. Feula pichi ngüneduamafiyu tayu inaduampeel. Tati profecia mülelu Daniel capitulo 4 mu pengeli Chau Ngünechen, ‘tati Doi Alüpüralelu, Lonco Ülmencülei com pu che ñi ngünenien mu’. Quimfali tati ngüneniealu doicülei ta Nabucodonosor. Cafei Daniel ñi lifru mu fentrelei pu profecia nütramcalu tüfachi dungu: Puuchi antü Chau Jehová eluafi Jesucristo ñi ngünenieal. Quimfali llemai, Daniel capitulo 4 pengeli Chau Ngünechen ñi ngünenietual, ¿felei no am?

Ernesto: Mai, quimfali. Huelu nehue adümlan tüfachi dungu ñi nüucülen 1914 tripantu mu.

RUPAI REGLE MEDIN ANTÜ

Julio: Felei. Huiño inaduamayu Nabucodonosor ñi rupan. Catrüngelu ti fütra anümca, Nabucodonosor ñi gobierno ca catrüconi regle tripantu mu. Huedhuedcahui Nabucodonosor, huelu rupalu hula feichi regle medin antü checontui ca huiño ngünenietui. Cangelu rupa ñi femtripan tüfachi profecia catrütungei Chau Dios ñi ngünenieel, huelu Chau Dios femlai chem huesa dungu rume.

Ernesto: ¿Chumngechi am? Adümlan.

Julio: Biblia feipi fütra cuifi meu Israel ñi pu lonco ülmen anücünuquefui Jehová ñi ülmen huancu meu,f feimu Chau Ngünechen dullieyu engün ñi ngünenieal. Feichi pu huentru femquefuingün Chau Dios ñi piel, huelu rupalu chi tripantu epe com engün furintucufuingün ta Chau Dios. Ca femngechi femingün pu Israel che. Femün mu tüfa, Babilonia ngünenierpueyu engün feichi 607 tripantu mu petu ñi mülepanon Jesús. Feichi mu Jerusalén huaria mülehuetulai lonco ülmen ñi dulliel ta Chau Dios. Jerusalén, fei ta Israel ñi doi falin huaria. Femngechi Chau Dios ñi ngünenieel catrüconi. Cüme amulei, ¿felei?

Ernesto: Mai, adümfiñ tami feipimequen.

Julio: Ti regle medin antü amulei ñi raquingequen 607 tripantu petu tañi mülepanon Jesús. Feichi mu catrüconi Chau Dios tañi ngünenieel. Fei puulu ti regle medin antü Chau Dios dullifi quiñe hue lonco ülmen, huelu ñi ngünenieal huenu mu. Fei fentepuulu feichi regle medin antü femtripai caquelu profecia ñi feipicünuel Daniel. Huelu mülehuei quiñe ramtun: ¿chumül afi ti regle medin antü? Quimliyiñ ti huiñoldungun, ca quimaiñ chumül eluhui ñi ngünenieal Chau Dios.

Ernesto: ¿Chem piafun iñche? 1914 llemai.

Julio: Felei llemai Ernesto, mupimi.

Ernesto: Huelu, ¿chumngelu quimnieimün ñi rupan feichi tripantu mu?

Julio: Mülepalu Jesús mapu mu feipi petu huechutriparpulai feichi regle medin antü.g Feimu rume alüñmai tati piafuiñ. Rume fütra cuifi petu ñi mülepanon Jesús ellaconi ti regle medin antü. Fei hula amutulu Jesús huenu meu, ca amulei fentren tripantu ñi raquingeal. ¿Acordaimi chumül quimngeai Daniel ñi feipicünuel? Biblia feipi “afaelchi antü meu”.h Epe conlu 1900 tripantu quiñeque che cüme piuquengelu yafüluhui ñi ngüneduamal Biblia ñi feipicünuel. Ñochiquechi quimürpuingün ti regle medin antü huechutriparpuafui 1914 tripantu mu. Com ñi rupan feichi mu ca fantepu mu pengeli Chau Dios eluhui ñi ngünenieal huenu mu. Quimfali llemai, ti afaelchi antü meu müleiñ. Epe puucülei ñi afal mapu müleyechi dungu. Fentren dungu ürque tati taiñ adümafiel.

Ernesto: ¡Ahuem! Fentren dungu tati, tañi huiño ngüneduamafiel.

Julio: Feingei, iñche ca cüdautun tañi adümafiel. Ernesto, Chau Ngünechen ngünenietuai ta mapu. Iñche ayülen tami quimal tüfachi dungu ca com ñi quimeltuel pu Dunguquelu Ineingen Jehová Biblia mu tripai.

Ernesto: Felei, rume afmatulqueneu tamün maneluucülen Biblia meu.

Julio: Penieyu reque tami femngechi maneluucülen. Chumngechi feipipeyu fentren dungu tati tami adümafiel. Rüfcünu niepelaimi quiñeque ramtun. Quiñe tüfa feipiyiñ ti regle medin antü ellaconi ti 607 tripantu petu ñi mülepanon Jesús. Quiñeucülei tüfa Ngünechen ñi Ngünenien huelu ¿chumngelu feipiqueiñ ñi huechutriparpun 1914 tripantu mu?i

Ernesto: Mai, fei cüpa quimün.

Julio: Biblia quelluqueiñmeu quimal tunten mai ti regle medin antü. Ca huiño peuliyu, ¿ayüafuimi tayu nütramcayal tüfa?j

Ernesto: Cümei, üngümnieayu.