¿Tunten mu ngünenierpui Chau Dios ñi Gobierno? (Troquiñ 2)

PICHI NGÜNEDUAMAIÑ NABUCODONOSOR ÑI PEUMA

Julio: Mari mari peñi, cümei tayu pehun. Iñche rume ayüquen tami nütramcalelafiel Biblia ñi dungu.a ¿Chumleimi?

Ernesto: Cümelcalen, chaltu.

Julio: Cüme dungu. Nehue chumül nütramcahuiyu tüfachi ramtun: pu testigo, ¿chumngelu feipiqueiñ 1914 coni ñi ngünenieal Chau Dios ñi Gobierno?b Daniel capitulo 4 mu, ngüneduamiyu quiñeque dungu pengelquelu tüfa. ¿Acordapelaimi?

Ernesto: Mai, ¿Nabucodonosor ñi peuma?

Julio: Felei tati. Peumai quiñe fütra anümca mu, huenu meu puhui. Fei allcüi quiñe cüme püllü feipilu ñi catrüngeal ti fütra anümca, re mülehuei tañi folil ca tañi mutrung. Fei hula, rupai regle medin antü, fei huiño tremtui ti anümca.c Cafei, ngüneduamiyu epu rupa ñi femtripan tüfachi dungu. ¿Acordaqueimi ti hunen rupa ñi femtripan?

Ernesto: Tüfa ñi rupan ta Nabucodonosor, ¿felelai? Locolerquei regle tripantu mu.

Julio: Feingei. Locoi ca lonco ülmencülelai feichi mu. Ti epu rupa ñi femtripan ti profecia, feichi catrütungelu Chau Ngünechen tañi Gobierno mapu mu regle medin antü. Feichi mu, apümcangei ta Jerusalén 607 tripantu petu ñi mülepanon Jesús. Feichi mu, niehuelai quiñe huentru no rume ñi dulliel ta Jehová ñi ngünenieal. Aflu feichi medin antü, Chau Dios dullifi quiñe hue lonco ülmen ñi ngünenieal huenu mu. Feichi mu, Chau Dios eluhui ñi ngünenieal huenu mu. Deu ngüneduamiyu chumül ellaconi tüfachi regle medin antü. Feula ngüneduamayu tunteñmai ti regle medin antü, fei quimayu chumül eluhui ñi ngünenieal Chau Dios. ¿Acordaqueimi tüfa?

Ernesto: Mai, acordaquen tayu nütramcapeel.

Julio: Müna cümei. Feula ngüneduamayu tunteñmai ti regle medin antü. Cüdaungei quimürpual com tüfa. Iñche petu ñi acunon fau, mülefun tañi huiño inaduamafiel. Ñochiquechi inaduamafiyu.

Ernesto: Felei.

FENTEPUHUI TI REGLE MEDIN ANTÜ, ELLACONI TI AFAELCHI ANTÜ

Julio: Ti hunen rupa ñi femtripan tüfachi feipicünuelchi dungu Nabucodonosor ñi antü meu regle tripantu rupai, huelu ti epu rupa ñi femtripan tüfachi profecia doi alüñmai. Coneltulei Chau Jehová tañi Gobierno.

Ernesto: ¿Chumngelu quimimi?

Julio: Hunelu, apümcangelu Jerusalén 607 tripantu petu ñi mülepanon Jesús, ellaconi ti regle medin antü. Rupalu regle tripantu, puhuiyiñ 600 tripantu petu ñi mülepanon Jesús. Feichi tripantu, chem dungu no rume rupalai coneltulelu Chau Dios tañi Gobierno mu. Cafei ngüneduamiyu, mülepalu Jesús Mapu mu feipi petu ñi afnon feichi regle medin antü.

Ernesto: Mai, acordaniefiñ.

Julio: Regle tripantu müten no. Doi alüñmai.

Ernesto: ¿Tunteñmai?

Julio: Apocalipsis ñi lifru mu ca mülei quiñe profecia, nüucülelu Daniel tañi feipin mu. Tüfa quelluaiñmu taiñ quimal tunteñmai ti regle medin antü. Tüfachi profecia pengeli cüla medin antü ca rangiñ adentulei 1.260 antü.d Feimu regle medin antü adentulei 2.520 antü. ¿Pepi loncontucuqueimi?

Ernesto: Mai. Huelu, ¿chumngelu feipiqueimün Chau Dios tañi Gobierno eluhui ñi ngünenieal 1914 tripantu mu? Nehue adümlan.

Julio: Felei, peafiyiñ. Quiñeque feipicünuelchi dungu Biblia mu, quiñe antü, quiñe tripantungei.e Feimu tüfachi profecia ti regle medin antü mu, 2.520 antü, feita 2.520 tripantu tati. Tüfachi regle medin antü ellaconi 607 tripantu mu. Raquifiliyiñ 2.520 tripantu, puhuafui 1914 tripantu.f Feimu lle feipiafuiñ tüfachi regle medin antü, puhui 1914 tripantu. Fei Jesús elfalcünungei ñi Ñidolcüleal Ngünechen ñi Gobierno mu. Feimu 1914 tripantu eluhui ñi rupayal ñi feipicünuel Biblia afaelchi antü mu.

Ernesto: ¿Chem dungu feipi?

Julio: Mateo 24:7 mu, Jesús feipicünui chem dungu ñi rupayal eluulu ñi ngünenieal huenu meu: “Quiñe troquiñ mapu ta hueichayalu cangelu troquiñ mapu engu ca fütra troquiñ mapu hueichayai cangelu fütra troquiñ mapu engu. Ca müleai ta ngüñün, ca müleai nüyün fill troquiñque mapu meu”. Ngüneduamnge: Jesús feipi ñi müleal ngüñün ca fütraque nüyün. Com tüfachi dungu rupamequei ellaconlu 1914 tripantu mu, ¿felei no am?

Ernesto: Mai, rüfngei.

Julio: Jesús ca feipi ñi müleal ta hueichan. Ti lifru Apocalipsis feipi: pecan hueichan no tati, huelu mai fillque hueichan mülealu huall mapu mu.g ¿Acordaimi chumül rupai ti Hunen Fütra Hueichan huall mapu mu?

Ernesto: 1914 mu. ¡Tüfei! Rüfcünu tamün feipin. Jesús ellaconi ñi ngünenieal 1914 tripantu mu. Chumcaunorume femngechi raquiduamlafun.

Julio: Felei llemai. Quimfali ñi quiñeucülen tüfachi epu profecia. Tati regle medin antü quiñeucülei ti afaelchi antü mu. Iñchiñ pu Dunguquelu Ineingen Jehová feyentuleiñ Jesús eluhui ñi ngünenieal 1914 tripantu mu. Feichi mu puhui llemai taiñ mongelen afaelchi antü mu.h

Ernesto: Müna cüdaungei ñi ngüneduamal tüfa.

Julio: Femi llemai. Iñche ca cüdautun ñi ngüneduamal hue feipingelu iñche. Huelu, ¿quellupelaeyu tayu nütramcapeel? Biblia feipinole rume 1914 tripantu, iñchiñ pu Dunguquelu Ineingen Jehová quimtucuiñ tüfa: Jesús eluhui ñi ngünenieal 1914 tripantu mu. Ca falin-ngei tami quimal, com taiñ feipiel tripaquei Biblia mu.

Ernesto: Mai. Fei rume afmatulqueneu. Eimi cüme quimeltuen chem ñi feipin ta Biblia. Chem ramtungelmi rume, eimi feipiquelaimi “iñche feyentun”, “iñche feipiquen”. Rumel feipiqueimi chem pin ta Biblia. Huelu, ¿chemu fente cüdaungei ñi adümal? ¿Chumngelu feipifemlai Dios ñi Ñidolcüleal Jesús 1914?

Julio: Cüme ramtun Ernesto. Fentren dungu mülei Biblia mu, cüdaungei ñi adümafiel. ¿Chumngelu Chau Ngünechen femngechi femi? Fei, ¿chumngelu cüdaungei taiñ adümafiel? ¿Ayüafuimi tayu nütramcayal cüpalechi semana mu?

Ernesto: Mai, ayüfun. Üngümnieayu.