¿Chem raquiduamquei quiñeque che?
María feipi: “Llellipufiel mu ta Chau Dios, inafülcülelu quisu mu troquiuquen. Rüf nünieñmaeneu reque tañi cuhu. Quimnon mu chem chumal, quisu adnieneu”.
Raúl feipi: “Tañi domo contueyu cancer cutran. Fei rupalu 13 tripantu, lai. Iñche rume hueñancülequefun. Fill antü llellipuquefun ta Chau Dios ca quisu allcütueneu, feimu tüngnagquefui tañi piuque”.
Quiñe huentru Arne pingelu feipi: “Chau Dios eli taiñ llellipuafiel, tüfa tati doi cüme regalo llemai”.
María, Raúl, Arne, ca fentren che müna falintuquefingün llellipuafiel Chau Dios. Tüfa engün ngillatun meu nütramcafingün ta Chau Dios, mañumtuquefingün, ca quelluen piquefingün. Tüfa engün rüf maneluucüleingün tüfachi dungu ñi feipin Biblia: “Tüfachi dungu maneluucülequeiñ: chem rume nüucülelu Chau Dios tañi ayünieel mu llellipuafuiñ, fei allcütuqueiñmeu” (1 Juan 5:14).
Huelu caquelu che feyentuquelai tüfachi dungu ñi feipin Biblia, fei “iñche, ¿allcütupeafeneu Chau Ngünechen?” piquei. Peaiñ chem ñi raquiduamquefel quiñe huentru, Esteban pingelu. Quisu feipi: “Huechengelu iñche, quiñe tañi hueni petu miyahui tañi auto mu fei chocai, latripai. Cangelu epu hueni ürfingu lafquen mu” pi. Müna huesa dungu mu rupai, ¿chumi cai Esteban? Quisu ca feipi: “Ngillatufiñ ta Chau Dios, ‘¿chemu anta rupai ta tüfachi huesa dungu?’ pifiñ. Huelu inei no rume huiñoldungulaeneu. Feimu raquiduamün ‘refalta ngillatuquen’” pi. Ca femngechi fentren che ngillatufiel mu ta Chau Dios, ramtuuqueingün: “¿Allcütupeafeneu ta Chau Dios?” piquei.
Caquelu che müte ngillatuquelai. ¿Chumngelu? Raquiduamqueingün Chau Dios deu quimniei tañi duamnieel ca tañi rupamequen. Fei, ¿chumal am ngillatuafuiñ? piquei.
Caquelu che raquiduamquei: “Iñche müna huesa femün cuifi meu. Feimu Chau Dios eluucülelai tañi allcütuaeteu” piquei. Quiñe domo Jenny pingelu feipi: “Rume huesaque dungu femquefun cuifi, müte falinolu troquiuquen. Culpantucuuquen, feimu Chau Dios allcütulayaeneu piquen”.
¿Eimi cai? ¿Ca femngechi duamquepeimi mai? Femngechi raquiduamülmi, müna yafültucuafeimu ñi feipin Biblia. Quimeltuquei falinque dungu tati ngillatun meua ca quelluafeimu tami huiñoldungual feitachi ramtun:
¿Rüf allcütupeiñmu mai Chau Dios?
Chau Dios, ¿chumngelu allcütulayafui ñi llellipuel quiñe che?
Tami allcütuaeteu Chau Dios, ¿chumngechi llellipuafuimi?
Llellipulmi, ¿chumngechi quelluafeimu?
a Biblia pengeli fentren llellipun ñi entuel pu poyequefilu ta Chau Dios, cafei mülei quiñeque dungu ñi ngillatuel Jesús. Ti Antiguo Testamento meu, doi 150 llellipun mülei.