“Fülconmün Chau Ngünechen mu, fei fülconai ta eimün meu” (Santiago 4:8).

¿Rüf allcütupeiñmu mai Chau Dios?

Fentren che ramtuuquei: “¿Rüf allcütuqueneu Chau Dios?”. Eimi, ¿ca femngechi ramtuupeimi chi? Fentren che ngillatuquefi ta Chau Ngünechen tañi entuñmayaeteu ñi huesa rupan, huelu amulecai müten ñi huesa rupamequen. Fei tüfa ¿pengelquepei mai taiñ allcütuquenoeteu ta Chau Dios? Femlai llemai. Biblia feipi cüme llellipuliyiñ, Chau Dios allcütuafeiñmu. Ngüneduamaiñ Biblia ñi feipin.

**CHAU DIOS ALLCÜTULEI LLEMAI**

“Eimi Allcütuquelu tati llellipun, eimi mu cüpayai fillque tuhun-ngechi che” (Salmo 65:2).

Fentren che maneluuquelai Chau Dios ñi allcütuqueteu. Femngechi raquiduamlu rume, ca ngillatuquefingün ñi doi cüme duamcüleal. Rüfngei llemai, llellipufiliyiñ ta Chau Dios, doi cüme duamcüleafuiñ, huelu fei ca müten no. Biblia feipi: ‘Jehováa fülmaniefi com ñi pu mütrümqueteu, com pu mütrümqueteu rüf dungu mu. Llellipuquelu engün quellun mu, quisu allcütuquefi ca montulquefi’ (Salmo 145:18, 19).

Felei llemai, Chau Jehová eluucülei ñi allcütuafiel tañi pu feyentuqueteu. Tüfa ñi feipin Chau Dios: “Eimün mütrümmuan ca ngillatumuan, fei iñche allcütuhuaiñ” (Jeremías 29:12).

**CHAU DIOS AYÜQUEI TAMI LLELLIPUAFIEL**

Quiñe chau adquintulei chumngechi aucantulei tañi pichi malen.

“Fentecünulayaimün tamün llellipuquen” (Romanos 12:12).

Fentren rupa, tati Biblia ngülamtuqueiñmu taiñ ngillatuafiel ta Chau Dios. Tüfa pengeli Chau Jehová ayüquei taiñ ngillatuafiel (Mateo 26:41; Efesios 6:18).

Huelu eimi ramtuhuafuimi: “Chau Dios, ¿chumngelu fente ayüquei taiñ ngillatuafiel?”. Raquiduamnge tüfa: quiñe chau cüme quimniei chem ñi duamnieel tañi pichiche. Fei tañi pichiche quelluen feipifile tañi chau, ¿chum duamnagai ti chau? Rume ayühuai. ¿Chumngelu? Ti pichiche pengeli ñi maneluucülen tañi chau mu. Ca femngechi iñchiñ ngillatufiel mu ta Chau Jehová, pengelqueiñ taiñ maneluucülen quisu meu (Proverbios 15:8; Santiago 4:8).

CHAU DIOS RÜF DUAMTUNIEIMU

Quiñe lladcülechi huentru anülei. Niei quiñe caja apolelu fillque dungu ñi cüdau meu.

“Chau Ngünechen duamtunieimünmeu. Fei tañi cuhu mu elcünuafimün com tamün fill raquiduamelnieteu” (1 Pedro 5:7).

Chau Dios rume piuqueyeiñmu ca duamtunieiñmu, feimu ayüquei taiñ ngillatuafiel. Quisu fente cüme quimniei com taiñ rupamequen, fei cüpa quelluqueiñmu.

Cuifi mu mülequefui quiñe rey, David pingelu. Quisu rume ngillatulequefui ta Chau Dios mu. Nütramcalelquefi tañi chum duamcülen ca quimelelfi tañi chem raquiduamcülen (Salmo 23:1-6). ¿Allcütupei mai ta Chau Dios? Femi llemai. Chau Dios rume piuqueyequefui ta David ca eluucülequefui ñi allcütuafiel (Hechos 13:22). Ca femngechi Chau Dios rume piuqueyeiñmu, feimu eluucülei taiñ allcütuaeteu.

‘PIUQUEYENIEFIÑ TA JEHOVÁ QUISU CAI ALLCÜTUÑMAQUENEU TAÑI DUNGUN’

Cuifi meu quiñe huentru huirintucui tüfa Biblia meu: “Piuqueyeniefiñ ta Jehová. Quisu cai allcütuñmaqueneu tañi dungun”. Felei llemai, tüfachi huentru quimniefui Chau Dios ñi allcütuñmaeteu ñi ngillatun, fei tüfa rume yafültucueyu. Feimu hueñancülelu tüfachi huentru, llellipuquefui ta Chau Dios, fei doi yafüluucülequefui ca fülmaucülequefui quisu meu (Salmo 116:1-9).

Ngoimalayaiñ Chau Dios allcütuquei taiñ llellipuqueel. Loncontucufiliyiñ tüfa, fentecünulayaiñ taiñ ngillatuquefiel. Peaiñ ñi femün quiñe huentru, Pedro pingelu, España mapu meu mülei. Quiñe antü tañi fotüm 19 tripantu nielu, miyaulu auto mu, chocai, fei lai. Rume lladcülehuetui tañi piuque tüfachi huentru. Huelu, ¿chumi? com piuque mu ngillatufi ta Chau Ngünechen fei quelluen, yafültucuen pifi. Fei, ¿chem rupai? Pedro feipi: “Tañi pu peñi ca pu lamngen chaf feyentulu yafültucueneu iñche ca tañi domo. Quimtucun Chau Jehová huiñoldungueneu tañi llellipuqueel”.

Quiñe huentru yafültucueyu quiñeque tañi pu hueni. — Taiñ pu hueni fente taiñ piuqueyeteu yafültucuqueiñmu. Quimfali Jehová taiñ huiñoldungueteu taiñ llellipuel.

Pedro ngillatui rume, tañi fotüm huiñomongetulai. Huelu ngillatun mu Pedro ca tañi familia, doi cüme duamcületui. Pedro tañi domo, María Carmen pingelu, feipi: “Rume hueñancülefun, huelu ngillatufiñ ta Chau Jehová, fei doi cüme duamcülequetun ca tüngduamcületun. Chau Dios rüf pepilqueneu llemai”.

Fillque dungu ñi rupan ta che ca Biblia ñi feipin, pengeli Chau Dios allcütuquefi pu che ñi llellipuqueel. Huelu Chau Dios com che huiñoldunguquelafi tañi llellipuqueel. ¿Chumngelu am? Peafiyiñ.

a Chau Dios, Jehová pingequei (Salmo 83:18).