Pu papeltuquelu ñi ramtuqueel

¿Cümepeafui mai taiñ quintual afcadi internet mu?

Chau Jehová ayüniei pu curehuen ñi ayüucüleal ca ñi rumel quiñeucüleal (Mat. 19:4-6). Ayülmi tami curengeal cam fütangeal, ¿chumngechi peafuimi quiñe cüme afcadi? Inayafimi Biblia tañi ngülam. Chau Jehová eli tati pu che, feimu quimniei chumngechi ñi ayüucüleal pu curehuen. Peafiyiñ chem pin ta Biblia.

Mülei taiñ loncontucunieal “tati piuque doi ngünencachefengei chem dungu mu rume, ca ngünefalngelai” (Jer. 17:9). Epu che daqueluule, pürüm müten mür ayühuafuingu, fei ñi piuque hueluraquiduamelafeyu. Nieufule engu, cüme tripalayafui ñi curehuen (Prov. 28:26). Feimu hue daqueluule epu che, cümelayafui ñi pürüm feipihual ñi piuqueyehun. Ca femngechi petu cüme quimuunole engu, cümelayafui ñi eldunguhual.

Proverbios 22:3 feipi: “Feichi che quimün nielu ngüneduamquei ti cuñihun dungu, fei ellcauquei, huelu tati nienolu quimün fei mu rupaquei ca cutrancauquei”. ¿Chumngelu cuñihun-ngeafui quintual füta cam domo internet mu? Quiñeque quimquefi che internet mu, daqueluuquei. Fei rupachi antü mu ngünencangequei, fei huesa duamcülequetui. Cafei internet mu mülei huesaque che. Ngünencaquefi pu quintuyaulu afcadi, fei ñi hueñeñmayafiel plata. Quiñeque feichi huesaque che feipiqueingün ñi testigongen, huelu re coila tati.

Cafei tüfachi sitio de internet ca aplicaciones ñi daqueluhual ta che pünequei programa de computador ñi doi cüme trapümafiel tati pu che. Huelu, ¿rüf cüme trapümquefi tati pu che? Quimngelai. Rume falin-ngei cüme dullial taiñ afcadi, feimu ¿cümepeafui mai quiñe computador taiñ quintulaeteu? ¡Femlayafui llemai! Quiñe programa de computador anca puuquelai Biblia tañi quimeltun mu (Prov. 1:7; 3:5-7).

Proverbios 14:15 feipi: “Ti quim chengenolu feyentuquei com ñi feipingeel, huelu ti adümuhun-ngelu cüme raquiduamquei tañi chem chumal”. Petu taiñ dullinon quiñe afcadi, hune mülei taiñ cüme quimürpuafiel. Internet mu cüdaungei ñi femngechi femal. Epu che quimuule internet mu müten, rume nütramcaule, ¿rüf cüme quimuupeingu mai? Quiñeque quimquefi quiñe che internet mu, piuqueyerpuquefi. Fei traf angeucülelu, feipitripai: “¡Ahuem, caletui! Trürlai chumngechi ñi pengelngeel internet mu”.

Biblia feipi: “Iñche hueniyequelafiñ tati pu huentru coilatuquelu, ca quiñepülecünuquefiñ tati pu ellcanielu ñi ineingen” (Sal. 26:4). Fentren che coilatuquei müten internet mu ñi afmatufaluhual, “huesa dungu no tati” piqueingün. Ellcaquei chumngechi chengen. Tañi huirintucuel mu quimfalngelai ñi chumngen engün. Ca quiñeque che feipiqueingün ñi testigongen, huelu cümei taiñ ramtuhual: “¿Rüf fautizalepei mai? ¿Cüme hueniyepefi mai ta Jehová? ¿Cüme acordangequei ñi trahunche mu? ¿Cam cümelayafui ñi hueniyengeal? (1 Cor. 15:33; 2 Tim. 2:20, 21). Ñi feipin ta Biblia, ¿curengeafui ca fütangeafui feichi che?”. Petu taiñ dullinon afcadi, rume falin-ngei taiñ huiñoldungual com tüfachi ramtun. Huelu cüdaungeafui nütramcanofiliyiñ tati pu che ñi cüme quimnieteu (Prov. 15:22). Cafei pu poyequefilu ta Jehová turpu nieulayafui quiñe fautizalenolu engu (2 Cor. 6:14; 1 Cor. 7:39).

Chumngechi taiñ ngüneduampeel, rume cuñihun-ngei taiñ quintual afcadi internet mu cam aplicaciones mu. Fei, ¿chumngechi am quintuafuiñ quiñe cüme huentru cam quiñe cüme domo? Petu ñi acunon tati coronavirus, trahuquefuiñ taiñ pu peñi ca lamngen iñchiñ. Feimu Trahunhue Ruca mu, fütraque trahun mu doi cüme quimafuiñ quiñe che.

Huelu feula ñi mülen coronavirus pingechi cutran, trahuluuqueiñ internet mu. Feitachi trahun mu ca quimafuiñ quiñe peñi, lamngen nienolu afcadi. Allcütuafuiñ ñi feipin engün trahun mu, fei peafuiñ tunte ñi maneluhun Jehová mu (1 Tim. 6:11, 12). Fentepun mu ti trahun, pu peñi ca pu lamngen hudaquei doi pichique troquiñche mu. Fei doi cüme nütramcayafuiñ quisuque engün. Cafei quiñeque pu peñi ca pu lamngen, trahuluuqueingün internet mu ñi cüme rupayal. Feichi mu peafuimi chumquei ti che tami ayüfiel, femngechi quimafuimi chumngechi ñi dunguquefiel pu peñi ca pu lamngen ca ñi rüf chumngechi chengen (1 Ped. 3:4). Rupachi antü mu doi cüme quimuhulmi tati che engu, quimafuimu ñi quiñeucülen tamu raquiduam fei ñi cüme curehuen-ngeal.

Tati pu cristiano inafile Biblia ñi ngülam ñi quintual afcadi, doi ayühun-ngeafui tañi curehuen. Chumngechi feipi Proverbios, quiñe che nielu quiñe cüme domo cam quiñe cüme huentru niei quiñe tesoro reque, fei cümelcaqueyu Jehová (Prov. 18:22).