TROQUIÑ ÑI CHILLCATUNGEAL 9
ÜLCANTUN 51 Elufiyiñ taiñ mongen ta Jehová
Alüñmalayaimi tami fautizahual
“¿Chumngelu alüñmamequeimi? Huitrapürange, fautizaunge” (HECH. 22:16).
¿CHEM QUIMAIÑ?
Inaduamaiñ ñi femün pu Samaria che, Saulo Tarso mu tuulu, Cornelio ca pu Corinto che, fei yafültucuafeimu tami fautizahual.
1. ¿Chumngelu cümei tami fautizahual?
JEHOVÁ eluqueimu mongen ca com tami duamnieel, ¿piuqueyequefimi? ¿Chumngechi pengelelafuimi tami piuqueyeniefiel? Hulaimi tami mongen ca fautizahuaimi. Femülmi tüfa, coneltuaimi Chau Jehová ñi familia mu. Jehová ngen-ngeai eimi mu, chauyeafimi ca hueniyeafimi, feimu adnieaimu ca dapinieaimu (Sal. 73:24; Is. 43:1, 2). Ca rumel mongen nierpuafuimi (1 Ped. 3:21).
2. ¿Chem quimaiñ tüfachi troquiñ mu?
2 ¿Mülei quiñeque dungu tami catrütumequeteu tami fautizahual? Eimi müten no, ca femngechi rupai fentrenque che. Duamniefuingün cüme elcünutual ñi mongen ca ñi raquiduam ñi fautizahurpual engün. Ca feula serfiniefi engün Jehová com piuque mu ca ayühun mu. Tüfachi troquiñ mu, peaiñ chem dungu mu ñi rupan pu hunenque cristiano ñi fautizahual engün ca chem quimeltuqueiñmu iñchiñ.
PU SAMARIA CHE FAUTIZAHUI
3. Pu Samaria che, ¿chem dungu cüdautui chi ñi femal tañi fautizahual engün?
3 Jesús ñi antü meu, pu Samaria che niei quisu ñi religion. Fentren engün mülequefui Judea norte püle. Quisu engün feyentuquefui quechu hunenque lifru mülelu Biblia mu, Génesis puulu Deuteronomio. Ca feyentuquefuingün chi Josué tañi huirintucuelchi lifru mu. Huelu petu ñi fautizaunon engün, mülefui ñi feyentual com ti huiriconcülelu cüpalu Chau Dios meu. Cafei quisu engün petu üngümniequefui ti Mesías, chumngechi ñi feipicünungeel Deuteronomio 18:18, 19 (Juan 4:25). Huelu mülefui ñi feyentual engün Jesús ñi Mesías ngen tañi fautizahual engün. Fentren Samaria che femngechi femi engün (Juan 4:39). Cafei pu Samaria che mülefui ñi cüme elcünutual ñi raquiduam ñi illamcahuenoafiel pu judio (Luc. 9:52-54).
4. Quiñeque Samaria che, ¿chumi engün allcütufilu Felipe? (Hechos 8:5, 6, 14).
4 ¿Chem quellueyu pu Samaria che tañi fautizahual? Felipe amuldungulelfilu pu Samaria che Cristo ñi dungu, quiñeque cüme lloufi engün (papeltunge Hechos 8:5, 6, 14). Felipe judio tuhun-ngefui, huelu pu Samaria che allcütueyu engün. ¿Acordapelai engün quiñeque texto Dios ñi dullintuchequenon? (Deut. 10:17-19). Quisu engün “cüme ngüneduamquefui chem ñi feipieteu Felipe” tati Cristo meu. Felipe femi fentren afmatun dungu, tremoltufi cutran ca huemünentufi huecüfü (Hech. 8:7). Femngechi cüme quimtucui engün Felipe ñi huercüeteu Chau Dios.
5. ¿Chem quimeltueimu ñi femün pu Samaria che?
5 Pu Samaria che ayüquelafui pu judio ca allcüquelafui engün Cristo ñi dungu. Feimu cüdautupelaingün ñi feipieteu Felipe, huelu allcütufingün. Pu Samaria che cüme quimtuculu ñi rüfngen ñi quimeleteu Felipe, alüñmalaingün ñi fautizahual. Biblia feipi: “Felipe huldungulelfi engün ti cümeque dungu Jesucristo ñi üi mu ca Chau Ngünechen ñi ngünenietual mapu, fei feyentuingün. Fei pu huentru ca pu domo fautizahui engün” (Hech. 8:12). Eimi cai, ¿cüme maneluucüleimi ñi rüfngen Chau Dios ñi Dungu? Jesús feipi ti pu rüf cristiano ñi piuqueyehual engün. ¿Chem pimi? ¿Femngechi pengelquei pu testigo ñi rüf piuqueyehun engün? (Juan 13:35). Feimu alüñmaquilnge tami fautizahual, Jehová cümelcayaimu.
6. ¿Chumngechi quelluqueimu Ruben ñi rupan?
6 Ruben, Alemania tuhui. Tañi familia testigongefui. Huelu huechengelu, müte quimniequelafui ñi mülen Dios. Feimu, ¿chumi? Quimtucui ñi doi ngüneduamal. Quisu feipi: “Papeltun, femngechi ñi ngüneduamal chem ñi feingen ca chem ñi coilangen. Fentren rupa papeltun evolucion dungu meu”. Ruben papeltufi chi lifru feipilelu ¿Existe un Creador que se interese por nosotros? Tüfachi lifru quellueyu ñi doi feyentuleal Jehová mu. Quisu raquiduami: “¡Ahuem, Jehová rüfngei ñi mülen!”. Ruben amulu ti fütra Betel mu, fei doi piuquentucufi ñi quiñeucülen Jehová ñi pu che. Huiñotulu Alemania, fei fautizahui nielu 17 tripantu. Eimi müte feyentunolmi tami quimürpuel, ¿chumafuimi? Taiñ publicacion mu chillcatuaimi. Doi cüme quimülmi, doi feyentuaimi (Efes. 4:13, 14). Cafei, allcülmi ñi quiñeucülen ca piuqueyeucülen pu peñi ca lamngen huall mapu mu ca tami trahunche meu, doi piuqueyeafimi Jehová ñi troquiñche.
SAULO TUULU TARSO FAUTIZAHUI
7. Saulo, ¿chumngelu mülefui ñi norümtual ñi raquiduam?
7 Peaiñ chem dungu ñi rupan Saulo tuulu Tarso. Quisu rume cüme quimniequefui pu judio ñi ley ca rume falintungequefui pu judio mu (Gál. 1:13, 14; Filip. 3:5). Feichi mu, pu judio apostata piquefui pu cristiano, feimu Saulo inantucuquefui engün. Quisu raquiduamquefui ñi ayühulquefiel Dios ñi femngechi femün, huelu huelulcaucülefui (Hech. 8:3; 9:1, 2; 26:9-11). Saulo feyenturpule Jesús mu ca fautizaule, mülefui ñi eluucüleal ñi inantucungeal.
8. 1) ¿Chem quellueyu Saulo ñi fautizahual? 2) ¿Chumngechi quellufi Ananías ta Saulo? (Hechos 22:12-16; ca inaduamnge ti adentun).
8 ¿Chem quellueyu Saulo ñi fautizahual? Huenu meu Jesús dungunacümpafi Saulo, fei Saulo cüla antü mu pelohuelafui (Hech. 9:3-9). Ca feichi cüla antü ilai, ¿raquiduampelai tüfachi dungu meu ñi rupan? Saulo feyenturpui Jesús ñi Mesías ngen, fei ngüneduami ti cristiano ñi rüf religion-ngen. ¿Huesa duampelai ñi quelluntucun ñi langümngen Esteban? (Hech. 22:20). Afchi cüla antü, quiñe cristiano pepaeyu, Ananías pingei. Piuqueyenquechi quellueyu, huiño pelotui ca feipingei ñi pürüm fautizahual (papeltunge Hechos 22:12-16). Saulo ñom piuque mu allcütufi Ananías ca fautizahui (Hech. 9:17, 18).
Saulo yafültucungelu ñi fautizahual, eluhui. ¿Eimi ca femaimi? (Inaduamnge parrafo 8).
9. Ñi femün Saulo, ¿chumngechi quelluafeimu?
9 ¿Chem quimeltuqueimu Saulo ñi rupan? Saulo mallma piuquengele ca llicafile pu huentru, fautizaulayafui, huelu femlai. Quisu ñom piuquengefui ca eluucülei ñi cüme elcünutual ñi mongen, dulli inayafiel Jesús (Hech. 26:14, 19). Saulo eluucülefui ñi cristianongeal tunte quimlu rume ñi inantucungeal (Hech. 9:15, 16; 20:22, 23). Deu fautizaulu Saulo, amulei ñi maneluucülen Jehová mu ñi quelluaeteu chaftuafiel chem huesa dungu rume (2 Cor. 4:7-10). Fautizahulmi tami testigongeal, caiñetungeafuimi, huelu maneluhuaimi Jehová ca Jesús tami rumel quellunieaeteu tami nehuentuleal (Filip. 4:13).
10. ¿Chumngechi quelluqueimu Anna ñi femün?
10 Tüfa ñi rupan Anna. Tañi familia niequefui quisu ñi huimtun. Deu fautizaulu ñi ñuque, Anna ca ayüi ñi papeltual Biblia. Ailla tripantu nielu, tañi chau elueyu permiso. Anna tañi familia quiñe ruca mu mülequefuingün. Feimu Anna papeltulu Biblia, caquelu ñi familia caiñetueyu. Yehuelcaeteu troquihuingün ñi elcünun mu tañi cuifiqueche ñi religion. Anna puhul-lu 12 tripantu, feipifi ñi chau ñi eluaeteu permiso tañi fautizahual. Ti chau ramtufi: ¿chumngelu cüpa fautizahuimi? ¿Eimi tami pin mu cam caquelu pu che tami feipieteu? Anna huiñoldungui: “Iñche piuqueyefiñ Jehová”. Feimu ñi chau elueyu permiso tañi fautizahual. Deu fautizaulu Anna, tañi familia amulei ñi caiñetumequeteu. Tañi abuelo feipieyu: “Doi cümeafui tami yenieal pod mongen ca tami pütremtual tami testigongeal”. ¿Chem quellueyu Anna? Quisu feipi: “Jehová nehuentucueneu. Tañi ñuque ca tañi chau quelluntucueneu”. Anna huirintucuniei com chumngechi ñi quellueteu Jehová. Quiñeque mu ngüneduamquefi tañi huirintucuel, femngechi ñi loncontucunieal chumngechi ñi quellueteu Jehová. Eimi, llicalelmi tami caiñetungeal, acordanieaimi Jehová rumel quelluaimu (Heb. 13:6).
CORNELIO FAUTIZAHUI
11. ¿Chumngelu cüdautuafui Cornelio ñi fautizahual?
11 Ca quimürpuafuiñ Biblia meu ñi femün Cornelio. Quisu loncolequefui 100 soltau romano mu (Hech. 10:1, nota). Tañi loncolechi soltaungen mu, falin chengefui tañi lof mu ca pu soltau mu. Quisu ca “quelluquefui tati pu pofre” (Hech. 10:2). Jehová huercüfi Pedro ñi amuldungulelafiel Cornelio. Tañi falin chengen mu Cornelio, ¿chumi am? ¿Cüdautupei mai ñi fautizahual?
12. ¿Chem quellueyu Cornelio ñi fautizahual?
12 ¿Chem quellueyu Cornelio ñi fautizahual? Cornelio tañi pu che engün püramyequefi ta Chau Ngünechen. Cafei, Cornelio rumel llellipuquefi ta Chau Dios (Hech. 10:2). Pedro amuldungulelfilu Cornelio, quisu ca tañi pu che feyentui Jesús meu ca pürüm eluhuingün ñi fautizahual (Hech. 10:47, 48). Cornelio cüme duam mu cüme elcünupetulai ñi mongen ñi familia engün ñi serfiafiel Jehová (Jos. 24:15; Hech. 10:24, 33).
13. ¿Chem quimeltun entuafuimi Cornelio mu?
13 Saulo ca Cornelio ñi falin chengen mu engu catrütuafeyu ñi cristianongerpual, huelu femlai engu. Eimi cai, ¿ca femngechi mülei tami cüme elcünutual tami mongen tami fautizahual? Femngechi femülmi, Jehová quelluaimu. Eluucülelmi inayal com ñi feipilen Biblia, Jehová cümelcayaimu.
14. ¿Chumngechi quelluaimu Tsuyoshi ñi rupan?
14 Tüfa ñi rupan quiñe peñi Japón mülelu Tsuyoshi pingei. Tañi femqueel ñi cüdau mu catrütuquefeyu ñi fautizahual. Quisu cüdauquefui quiñe falin colegio mu. Tüfa meu pepicangequefui flor ñi cüme adcüleal. Layüm che coneltulelu budista religion, ti ngen cüdau elmequefui flor ñi cüme adcüleal ca coneltuquefui coilaque religion ñi huimtun mu. Ti ngen cüdau pepi amunoyüm, Tsuyoshi huercüngequefui. Tsuyoshi quimürpulu ti rüf dungu, ca quimürpui chumlequetun ti pu la, fei quimtucui ñi pepi fautizaunoal coneltumequele coilaque religion mu. Feimu femhuelayan pi (2 Cor. 6:15, 16). Tsuyoshi dungufi ti ngen cüdau, ¿chem dungu rupai? Feipingei ñi amuleal ñi cüdau, huelu coneltuhuenoal budista huimtun meu. Fei quiñe tripantu rupai ñi papeltufiel Biblia, fei fautizahui.a Eimi cai, ayülmi ayühulafiel Jehová, ¿duamfali cacünutual tami cüdau? Femülmi, maneluucülenge Jehová mu eluaimu eimi ca tami familia tami duamnieel tamün mongeluhual (Sal. 127:2; Mat. 6:33).
PU CORINTO CHE FAUTIZAHUINGÜN
15. Pu Corinto che, ¿chem catrütuafeyu ñi fautizahual?
15 Cuifi mu, pu Corinto che ayüquefuingün ñi nieal fentren plata ca pod mongen yeniequefui engün. Fentren pu che mülelu feiti mu femquefui Chau Dios ñi ayüquenoelchi dungu. Feimu feitichi pu che ayülu ñi serfiafiel Jehová, ¿rume cüdautupelai? Pablo amuldungulelfilu pu Corinto che Cristo meu, “fentren Corinto che allcütuingün ti huercün dungu. Fei feyentuingün ca fautizahuingün” (Hech. 18:7-11). Jesús peufaluufi Pablo, fei feipi: “Fentren che nien tüfachi huaria mu”. Feimu Pablo amulei ñi amuldungulen feichi huaria meu quiñe tripantu rangiñ.
16. ¿Chem quellueyu quiñeque pu Corinto che ñi fautizahual? (2 Corintios 10:4, 5).
16 ¿Chem quellueyu pu Corinto che ñi fautizahual? (Papeltunge 2 Corintios 10:4, 5). Chau Dios ñi Dungu ca ñi nehuen quellueyu engün ñi cüme elcünutual ñi mongen (Heb. 4:12). Quiñeque tüfa engün hueñefengequefui ca cudumuuquefui chaf huentru ca ngollifengequefui. Huelu feyentulu Cristo meu, elcünui ñi huesaque mongen engün (1 Cor. 6:9-11).b
17. ¿Chem quimeltueimu pu Corinto che?
17 Pu Corinto che fentren huesaque dungu mülefui ñi elcünual engün ñi norümtual ñi mongen, huelu rume cüdautuan ñi cristianongeal pilai engün. Rume yafüluhui engün ñi inayafiel chi pichi rupachi rüpü ñi llohual rumel mongen (Mat. 7:13, 14). Eimi, ¿yafüluuqueimi tami cüme elcünutual tami mongen ñi fautizahual? Amulepe tami yafüluucülen. Llellipuafimi Jehová tami eluaeteu ñi nehuen tami quelluaeteu, femngechi chaftuafimi huesaque raquiduam.
18. ¿Chem quimeleimu Monika ñi rupan?
18 Peaiñ chem dungu ñi rupan Monika, Georgia mapu mu. Fei rume huesa hun niefui. Tañi cüme rupaleal, allcütuquefui ca pequefui huesaque dungu. Huelu rume yafüluhui ñi elcünuafiel com feichi huesaque dungu tañi fautizahual. Monika feipi: “Petu tañi fautizaunon, llellipuquefuiñ Jehová tañi eluaeteu nehuen ñi norümtual tañi mongen. Jehová quimniefui iñche tañi ayünien tañi femal cümeque dungu. Rumel quelluquefeneu ca adniequefeneu”. Monika fautizahui 16 tripantu nielu. ¿Nieimi quiñeque dungu tami elcünuafiel, femngechi tami serfiafiel Jehová? Amulepe tami llellipuniefiel Jehová tami eluaeteu nehuen, femngechi norümtual tami mongen. Ayühunquechi Jehová eluaimu tañi nehuen (Juan 3:34).
FEYENTULMI, FÜTRAQUE DUNGU CHAFTUAFIMI
19. ¿Chem quelluafeimu ñi chaftuafiel fütraque dungu? (Ca inaduamnge ti adentun).
19 Chem dungu rume nielmi tami catrütumequeteu tami fautizahual, maneluunge Jehová mu. Tami piuqueyenieteu, Jehová ayülei tami coneltual quisu ñi familia meu. Jesús feipifi quiñeque tañi pu discipulo: “Quiñe pichi fün reque fantefule tamün feyentun, feipiafuimün tüfachi huincul ‘Doi üye püle nengümuunge’, fei nengümuhuai tati. Chem rume topayafuimün tamün femal” (Mat. 17:20). Tüfachi pu che allcütulu tüfachi dungu yeniei quiñeque tripantu müten Jesús engün, feimu doi duamniei engün ñi feyentuleal. Jesús cüme feipicünueyu doi feyentulele engün, Jehová quelluayu chem cüdaungechi dungu rume, quiñe fütra huincul mu trürümngeafui ñi chaftuafiel engün. Jehová quelluqueyu, iñchiñ ca quelluafeiñmu.
Maneluucüleaimi tami piuqueyeteu Jehová ca ayüniei tami conal quisu tañi troquiñche mu. (Inaduamnge parrafo 19).c
20. Tati pu hunenque cristiano ñi femün ca famülque mu, ¿chumngechi quelluafeimu?
20 ¿Nieimi quiñeque dungu tami catrütumequeteu tami fautizahual? Pürüm famentuafimi. Ñi femün pu hunenque cristiano ca famülque mu quelluafeimu ca yafültucuaimu. Yafüluunge tami hultucual tami mongen Jehová mu ca fautizaunge. Tüfa tati doi cüme dungu tami femal.
ÜLCANTUN 38 Jehová nehuen eluaimu
a Ñi rupan taiñ peñi Tsuyoshi Fujii, tripai ti revista ¡Despertad! 8 agosto, 2005 tripantu, pagina 20-23.
b Peafimi jw.org ti video ‘Alüñmakilnge tami fautisawal’.
c ¿CHEM PENGELI TI ADENTUN? Pu peñi ca lamngen ayühunquechi lloufi pu hue fautizaulu.