Pu papeltuquelu ñi ramtuqueel

¿Tunte puhuai taiñ amuldungun cüdau?

Jesús feipi: “Tati cümeque dungu Chau Dios ñi ngünenietual ta mapu amuldungungeai huall mapu püle, femngechi com troquiñche ñi quimal engün. Fei hula afai mapu meu müleyechi dungu” (Mat. 24:14). Tüfachi versiculo ca ti versiculo 6 ca 13 feipilei ñi afal mapu meu müleyechi dungu, fei griego quehun mu feipilei tañi afal Huecüfü ñi ngünenieel Armagedón mu (Apoc. 16:14, 16). ¿Chem quimeltuqueiñmu tüfa? Petu acunole Armagedón, amuldunguleaiñ ti cümeque dungu. Tüfa quiñe hue dungu. Cuifi femngechi adümquelafuiñ, huelu feula doi cüme adümfiyiñ ti quimeltun.

Cuifi raquiduamquefuiñ apümcangele ti Fütra Babilonia ca conle ti fütra cutrancahun, feichi mu amuldunguhuelayaiñ ti cümeque dungu piquefuiñ (Apoc. 17:3, 5, 15, 16). Ca feipiquefuiñ conle ti fütra cutrancahun, Jehová eluhuelayafi pu che tañi llohual ti cümeque dungu (Is. 61:2). Ca raquiduamquefuiñ pu serfiquefilu Jehová petu ñi acunon ti fütra cutrancahun fei engün müten mongetripayafui. Cuifi trürümquefuiñ feichi pu che tati pu judio mongetripalu 607 tripantu mu. Fei engün poyequefingün Jehová ca üdequefingün huesaque dungu, feimu marcacünungeingün reque tañi mongetripayal petu ñi apümcangenon Jerusalén (Ezeq. 5:11; 9:4). Huelu taiñ adümquefel nüucülelai tañi feipin Jesús Mateo 24:14 mu. ¿Chumngelu feipiafuiñ? Jesús feipi tati pu che quimafui tati cümeque dungu petu ñi acunon Armagedón.

Doi cüme adümfilu ñi feipin Mateo 24:14, doi cüme adümfiyiñ Apocalipsis 16:21 nütramcalu ti fütraque pire cura reque felelu. Ngüneduamiyiñ tüfachi epu versiculo nüucülei. Mür nütramcai caque rume dungu ñi femal pu che allcütufiel mu ti cümeque dungu. Tati pu cüme piuquengelu cüme dungu troquiquefi taiñ amuldungun, huelu Chau Dios tañi pu caiñe huesa dungu troquiquefi ca üdequefi (2 Cor. 2:15, 16). ¿Chumngelu? Taiñ amuldungun quimfalcünuquei tüfachi mapu meu müleyechi pu che ngünenieyu Huecüfü, tañi huesalcamequen ca ñi pürüm apümcangeal engün (Juan 7:7; 1 Juan 2:17; 5:19).

Apocalipsis 16:21 ca feipi tati pire mu com huesalcaletui, tüfa pengeli ñi nagpan fentren fütraque pire com püle. Tüfa feipiafui chi tati fütra cutrancahun mu taiñ amuldungun doi nehuen-ngeai ca com püle puhuai, femngechi doi quimniengeai Jehová tañi üi (Ezeq. 39:7). Feichi deu apümcangele ti Fütra Babilonia, ¿cüme lloupeai mai quiñeque che taiñ amuldungun? Fempelayai. Feichi pu che acordayafuingün chi cam quimürpuafuingün pu testigo fentren tripantu ñi amuldungumequen ñi afal ti coilaque religion, fei ngüneduamaingün ñi femtripan.

Ca femngechi dungu rupai Egipto mu. Tañi juzgayafiel ca cutrancayafiel pu Egipto che ñi pu dios, Chau Jehová huercüi tati 10 plaga. Fei hula, fentren catripanche quiñehui pu Israel che engün (Éx. 12:12, 37, 38). Pu catripanche pefiel mu chumngechi ñi femtripan ti 10 plaga, feimu peno quiñehuingün pu Israel che engün.

Deu apümcangele ti Fütra Babilonia, quiñeque che eluhuafuingün ñi poyeafiel Jehová ca pepi quelluntucuafuingün pu dullin cristiano petu mülecalu mapu mu, femngechi ufisa troquingeafuingün (Mat. 25:34-36, 40). Pichilehuele ñi acual Armagedón, tati pu dullinque cristiano yengeaingün huenu meu. Huelu petu ñi acunon feichi antü, tati pu che eluhuafui tañi poyeafiel Jehová, femngechi ñi ufisa troquingeal engün.

Taiñ doi cüme adümfiel tüfachi quimeltun, doi cüme pengelcünui Jehová tañi fütra piuqueyechen ca tañi cutranpiuqueyechen. Felei llemai, Chau Jehová “ayünielai ta inei no rume ñi apümcangeal. Ayüniei ta com pu che ñi nor raquiduamtual” (2 Ped. 3:9).