Yehuen chengelu rume, misionerangerpun

Feichi 1951 tripantu choyüngen Viena, Austria mapu mu. Iñche yehuen chengequefun, huelu yehuequelafun tañi llellipuafiel ta Chau Dios. Tañi pu che catolicongefuingün. Huelu nielu 9 tripantu iñche, tañi chau estudiarpui Biblia pu testigo engün. Ca pichiñma mu, tañi ñuque ca estudiarpui Biblia.

Müchai müten amuiñ trahun Viena huaria mu. Tañi pu che iñchiñ rume quiñeucülequefuiñ. Trür papeltuquefuiñ Biblia, amuquefuiñ trahun mu ca quelluntucuquefuiñ fütraque trahun mu. Com feichi tripantu, tañi chau quellueneu tañi doi piuqueyeafiel Jehová. Tañi llellipun mu rumel feipiquefui tañi lamngen ca iñche tayu precursorangerpual. Huelu feichi mu, iñche eluucülelafun tañi precursorangeal.

ELUHUN TAÑI PRECURSORANGEAL

Fautizahun 14 tripantu nielu iñche 1965 tripantu. Huelu rume cüdautuquefun ñi nütramcayafiel quimnoelchi che amuldungun mu. Cafei, iñche müte falinolu troquiuquefun ca rume ayüquefun tañi tuteafiel tañi chaf huechequeche. Pichiñma fautizaulu iñche, hueniyerpufiñ pu huechequeche poyequenofilu ta Jehová. Cüme duamelquefeneu ñi hueniyefiel, huelu quimniefun tañi cümenon. Huelu rume cüdautufun tañi hueniyehuenoafiel engün. ¿Chem quellueneu?

Feichi tripantu quiñe üllcha lamngen Dorothée pingelu eluhui ñi amuldungual taiñ trahunche mu. Fei rume ayüquefui tañi amuldungual 16 tripantu nielu rume, feita afmatuleneu. Iñche pichi hunencülefun quisu meu, huelu müte amuldunguquelafun. Fei raquiduamün: “Iñche tañi pu chau testigongeingu, huelu Dorothée quisulei trahunche mu. Ca cuidaquefi tañi ñuque cutrancülelu. Huelu rumel tripaquei tañi amuldungual”. Dorothée tañi cüme femün quellueneu tañi doi cüdahuelafiel Jehová. Pichiñma mu, Dorothée iñchiu precursora auxiliarngefuyu. Ca rupachi antü, precursora regularngerpuyu. Dorothée rume ayüquefui tañi amuldungual, feimu iñche ca femün. Feita quellueneu ñi nierpual tañi hunen chillcatuquelu Biblia. Pichiquen antü mu, doi cüdautuhuelan tañi amuldungual fill ruca mu, rüpü mu, com püle.

Yenielu quiñeque cüyen tañi precursora regularngen, taiñ trahunche mu huercüngei quiñe precursor especial, Heinz pingequefui. Quisu quimfi ti rüf dungu Canadá mu huitranmafilu tañi peñi testigongelu. Iñche quimfilu ti lamngen, ayüfemfiñ. Huelu fei raquiduamcülefui tañi misionerongeal, iñche femngechi raquiduamcülelafun. Feimu quimfalcünulan tañi ayüfiel. Huelu doi quimürpuhuiyu, fei niehurpuyu ca amuleyu tayu precursorngen Austria mapu mu.

ELUHUN TAÑI MISIONERANGEAL

Tañi huentru ayünien tañi misionerongeal piquefeneu. Dicümtucuquelafeneu tañi misionerangeal, huelu raquiduamelquefeneu. “Nienolu cai pichiqueche iñchiu, ¿doi cüdahuelafuyu Jehová?” piquefeneu. Yehuen chengefulu rume iñche, precursorangefun. Huelu tañi misionerangeal, rume fütra dungu troquiquefiñ. Huelu tañi füta tüngduamngefui, fei quiñeque mu raquiduamelquefeneu tayu misionerongerpual. Ca quellueneu tañi quisu duamuunoal, doi mai ñi duamtuafiel caquelu che. Rume quellueneu tañi ngülam.

Rupayechi antü mu, ayürpun ñi misionerangeal. Feimu huercüyu ti solicitud tayu amual Galaad pingechi Escuela mu. Huelu ti lamngen adniefilu Betel feichi mu, feipieneu tañi doi adümafiel ingles dungun. Femün tañi feipingeel. Huelu 3 tripantu rupalu, huercüngerumeyu cangelu trahunche ca quehun dunguquelu Austria mu. Regle tripantu amuldungulelquefiyu pu che feichi quehun nielu, quiñe tüfachi tripantu huitranmafiyu pu trahunche. Cüdaungefui feichi quehun, huelu chillcatulelfuiñ Biblia alün che.

Feichi 1979 tripantu, pu lamngen adniefilu Betel feipieiñmu taiñ pichiñma mülepual Bulgaria mapu mu. Catrütungei tañi amuldungungeal üye mu. Feimu feipingeyu tayu amual pasiamealu reque. Feipingeiñ taiñ amuldungumenoal. Huelu mülefui tayu ellca yelelafiel pichique publicacion tati 5 lamngen mülelu Sofía pingechi huaria mu. Rume llicalefun, huelu Jehová nehuentucueneu tañi femürpual feichi falin-ngechi cüdau. Pefilu feichi pu ñaña ñi cüdahuelfiel Jehová cuñihun-ngelu rume tañi carceltucungeal, yafültucueneu tañi femal chem dungu rume tañi feipieteu Jehová ñi troquiñche.

Ca huiño huercüyu ti solicitud tayu amual Galaad pingechi Escuela mu. Feula queta mangelngeyu. Feichi escuela femngequefui Estados Unidos mu, ingles dungun meu. Feimu, ¿üye mu amupelayayu? piyu. Huelu noviembre 1981 tripantu, ca mülerpui Galaad pingechi Escuela Alemania mu. Feichi femngei aleman quehun mu, fei doi adümfiñ. Feichi escuela mu amuyu. Deu tripalu iñchiu, ¿ca cheu huercüngeafuyu?

MISIONERONGEYU CHEU ÑI MÜLEN HUEICHAN

Huercüngeyu Kenia mapu mu. Üye mu ramtungeyu tayu amuafel Uganda mapu mu, inafülcülelu Kenia mu. Doi 10 tripantu mu, quiñe generalcülelu entufi ti presidente. Fei quisu loncocünuhui Uganda mu. Fei ngünenielu, alün che langümngei ca rume fentren che cutrancangei. Feiti 1979 tripantu, feichi general ca femngechi entungei. Quimfilu com tüfachi dungu ñi rupan Uganda mu, llicalefun tañi amual. Huelu Galaad pingechi Escuela mu pepicangeiñ taiñ maneluhual Jehová mu, feimu amuyu müten.

Uganda mu rume huesalcalefui ti dungu. Tati gobierno pepi hulquelafui co, electricidad ca chem tañi duamnieel pu che. Ngelafui señal telefono mu. Tati pu che hueluconque tralcatuuquefui ca hueñeuquefui, doi mai pun mu. Dumiñcülelu, com che rucaconcülequefuingün. Quiñeque llellipuqueingün tañi hueñeñmangenoal tañi nieel ca tañi langümngenoal engün. Cüdaungefulu rume ti mongen, pu lamngen ayühunquechi serfiniefingün Jehová.

Feichi 1982 mu, puhuiyu Kampala huaria mu. Quechu cüyen umañpuiñ Sam engu Christina Waiswa ñi ruca mu. Fei engu niefui 5 pichiqueche, ca mülequefui 4 pariente. Quiñeque antü, quiñe rupa müten iquefuingün. Huelu eluucülefuingün taiñ misayaeteu tañi nieel pichin-ngefulu rume. Taiñ mülen mu fei engün ñi ruca mu, entuiñ falinque quimeltun taiñ quellueteu taiñ misionerongen mu. Quimiyiñ taiñ ngünamnoafiel ti co, müñetuquefuiñ pichin co meu ca hutrulquelafuiñ ca guardacünuquefuiñ taiñ tucuafiel baño mu. Fei 1983 mu, huiñamtuhuiyu cangelu ruca Kampala mu cheu doi cuñihun-ngenolu.

Rume ayühulquefeiñmu taiñ amuldungual. Quiñe cüyen elcünuyu rume alün revista, ¡doi 4 mil! Huelu doi ayühulquefeiñmu tati pu che chumngechi ñi lloufiel ti amuldungun. Respetaquefuingün Chau Dios ca ayüquefuingün ñi nütramcangeal Biblia mu. Tañi füta iñchiu quisuque niequefuyu mari, mari quechu chillcatuquelu Biblia. Iñchiu ca entuyu falinque quimeltun fei engün meu. Com semana trecalen amuquefuingün trahun mu, ca femngechi huiñoquetufuingün, huelu ayüucülefuingün.

Ca mülerpui 2 hueichan Uganda mu, 1985 ca 1986 tripantu mu. Alün rupa pequefuiñ pichique huentru armaucülelu, soltau reque ngüneduamquefuingün inei ñi rupaquen carretera mu. Rumel llellipuquefuiñ Jehová taiñ cuñiutucuhual amuldunguyahun mu ca taiñ tüngcüleal. Felei llemai, fei allcütui taiñ llellipun. Pefilu iñchiu quiñe che eluulu ñi quimelelngeal Biblia, acordahuequelaiñ reque taiñ llicafel.

Ca femngechi rume ayüquefuiñ taiñ amuldungulelafiel pu catripanche. Quimfiyu quiñe curehuen tuulu Rusia mu, fei quimelelfiyu Biblia. Feiti huentru doctorngefui. Mür fautizahurpuingu ca serfiniefingu Jehová. Cangelu rupa, quimfiñ quiñe domo Ucrania tuulu. Fente hueñancülen mu, cüpa langümuufui. Fei ca fautizahurpui, huiñotui Ucrania mu ca quelluntucurpui tañi rulpadungual taiñ publicacion quisu tañi quehun mu.a

HUERCÜNGEYU CA PAIS MU

Feiti 1991 mu, petu pasiayaulu iñchiu Austria mu, ti Betel mülelu üye mu feipieiñmu tayu mülepual Bulgaria mu. Fentren tripantu catrütungequefui taiñ amuldungun cüdau Bulgaria ca caquelu pais Europa mu. Huelu feula eluñmangetuiñ taiñ amuldungual. Chumngechi feipiupeiñ, cuifi mu amuyu, huelu ellca yefuyu publicacion. Feula huercüngeyu tayu amuldungumeal.

Feipingeyu tayu huiñonoal Uganda mu, feimu pepi yemetulayu tayu chemcün ca peucayal pilafiyu rume tayu pu lamngen. Feimu amufemiyu Betel Alemania mu. Fei meu elungeyu quiñe auto, fei amuyu Bulgaria mu. Huercüngeyu tayu coneltual quiñe pichi troquiñ mu, 20 publicador müten mülequefui, Sofía huaria mu.

Bulgaria mu ca rupayu cüdaungechi dungu. Quimlafuyu ti bulgaro quehun. Cafei mülefui epu lifru müten feichi quehun mu: La verdad que lleva a vida eterna pingelu ca Tañi lifru Biblia nütram nielu. Ca cüdautuqueyu nieal chillcatuquelu Biblia. Cüdaungefulu rume, feiti pichi troquiñche com piuque mu amuldungulequefui. Huelu ti Iglesia ortodoxa ngüneduamlu tüfa, huesa duamingün, fei caiñetueiñmu.

Fei 1994 tripantu mu, ti gobierno feipi pu testigo ñi religion pingehuenoal. Feimu alün che cuñihun-ngechi secta troquieiñmu. Ca presuntucungei quiñeque lamngen. Fei diario mu ca television mu feipingequefui fütra huesaque dungu iñchiñ mu. Dalluntucungequefuiñ taiñ feipiquefiel caquelu che tañi quisutu langümuhual. Ca taiñ llounofiel mu mollfüñ lahuentun dungu mu, feipingequefui pu testigo ñi eluñmaquefiel tañi pu pichiqueche ñi layal müten. Rume cüdaungefui amuldungucheal. Amuldunguyaulu iñchiñ, pu che huirarelquefeiñmu huesaque dungu, ütrüftuquefeiñmu chem rume ca mütrümquefuingün pu soltau. Pepi mandalelngequelafuiñ publicacion ca rume cüdaungefui alquilayal cheu taiñ trahuluhual. Fei quiñe rupa pu soltau lefcontueiñmu quiñe fütra trahun mu, fei catrütueiñmu taiñ huechurpual. Turpu pequelafuyu femngechi üdehun. Tati pu che Uganda mu, cheu tayu mülequefel, rume cümeque chengefuingün ca rume cüme llouquefui taiñ amuldungun. ¿Chem quellueiñmu taiñ ayüucüleal?

Rume quellueiñmu trür müleal taiñ pu lamngen iñchiñ. Fei engün rume ayüucülefuingün tañi quimfiel ti rüf dungu ca iñchiu tayu mülepun fei engün meu. Feichi mu com quiñeucüleiñ ca hueluconque quelluuquefuiñ. Tañi füta ca iñche quimtucurpuyu: müte raquiduamnoliyu tayu huesa rupamequen, doi mai raquiduamtucufiliyu pu che, ayüucüleafuyu cheu rume huercüngeliyu.

Rupachi tripantu, doi cüme feletui ti dungu. Fei 1998 mu, ti gobierno elutueiñmu taiñ ca huiño religion pingetual. Fei rulpadungungei fillque publicacion bulgaro quehun mu. Ca 2004 mu chalintuculelngei Jehová quiñe hue Betel ruca. Feula mülei 57 trahunche Bulgaria mu ca 2 mil 953 amuldunguquelu. Cafei 2024 mu, 6 mil 475 che trahuluhuingün ñi acordayal Jesús tañi lan. Ca Sofía huaria mu cheu tañi mülequefel 5 lamngen müten, feula mülei 9 trahunche. Felei tañi femtripan ñi feipin Biblia, “tati pichingelu huarancaquechingerpuai” (Is. 60:22).

HUESA DUNGU RUPAN TAÑI MONGEN MU

Rupachi tripantu mu, nierpun quiñeque cutran. Quiñeque rupa tripai tumor tañi cuerpo mu ca quiñe rupa tañi lonco mu. Femngen radioterapia ca operangen India mu, 12 hora entungerpui ti operacion. Epe com entungei ti tumor. Deu operangelu iñche, mülenagiyu ti Betel India mu tañi doi yafücontual. Fei hula huiñotuyu Bulgaria mu.

Tañi füta nierpui quiñe cangechi cutran. Tañi nieel feichi cutran, cüdautuquefui tañi trecayal, nütramcayal ca tañi cuerpo quisu nengümuuquefui. Doyeli tañi cutrancülen, feimu doi duamniefui iñche tañi dapiafiel. Quiñeque mu iñche rume cansalequefun, feimu pepi dapinoafilu troquiuquefun. Huelu quiñe hueche lamngen Bobi pingelu yequefeyu tañi amuldungual. Quimfalngefui ñi cutrancülen iñche tañi füta, huelu Bobi duamcülelafui tañi chem raquiduamquen caquelu che. Ayühunquechi yequefui müten. Iñche ca duamlu tañi quellungeal ñi dapiafiel tañi füta, iñche feman piquefeneu Bobi. Tayu doi cüdahuelafiel Jehová, eluhuiyu tayu nienoal püñeñ. Huelu Bobi quiñe püñeñ ca müten Jehová tayu elueteu (Mar. 10:29, 30).

Tañi poyen füta ca contueyu cancer cutran, feimu lai 2015 tripantu mu. Fei rume quelluquefeneu tañi tüngcüleal, rume hueñancütufiñ. Quiñe huesa peuma reque troquiquefiñ tañi mülehuenon. Huelu rumel raquiduamtucuquefiñ. Piuquentucunien com tayu trür rupan (Luc. 20:38). Fill antü acordaquefiñ tañi poyenquechi dunguquefeteu ca ti cümeque ngülam tañi eluquefeteu. Rume mañumcülen tayu alün tripantu trür serfifiel Jehová.

MAÑUMCÜLEN JEHOVÁ TAÑI QUELLUETEU MU

Quimfali Jehová tañi afcadinieteu com tañi huesa rupan mu. Yehuen chengelu rume iñche, Jehová quellueneu tañi misionerangeal ca tañi duamtuafiel pu che (2 Tim. 1:7). Chau Jehová tañi duam mu, tañi inan lamngen iñchiu fill antü cüdahuelquefiyu Jehová. Tañi lamngen ñi füta engu huitranmaquefi pu trahunche serbio quehun dungulu Europa mapu mu. Jehová huiñoldungufi tañi chau ñi llellipun ñi femquefel pichicalu tañi lamngen iñchiu.

Papeltufiel Biblia tüngduamelqueneu. Huesa dungu rupan mu, quimürpun tañi com piuque mu llellipual Jesús reque (Luc. 22:44). Feula coneltulen quiñe piuqueyen-ngechi trahunche Sofía huaria mu. Chumngechi tañi piuqueyeteu com tañi pu lamngen, Jehová huiñoldunguqueneu tañi llellipun. Mangelqueneu engün taiñ trür cüme rupaleal ca feipiqueneu tunte tañi piuqueyeteu. Tüfa ayühulmaqueneu tañi piuque.

Raquiduamtucuniefiñ ti huiñomongetun. Peyeniefiñ reque com tañi pu che ti hue mapu mu. Tañi pu chau huechengetui hue nieulu reque. Tañi lamngen petu deumaiyaeli. Ca tañi füta yem inafülcülei tañi cahuell mu. Femngechi raquiduamün mu, famentuquefiñ ti hueñancün ca tañi piuque mu tripaquei ñi mañumafiel ta Jehová.

Raquiduamfiel mu com ñi rupan tañi mongen mu ca com ñi eluaeteu Jehová cüpalechi antü mu, mañumcülei ñi piuque. David reque feipiquen: “¿Cheu müleafun chi maneluunofuli tañi pefiel Jehová ñi piuqueyechequen ti mapu cheu ñi mülen tati pu mongelelu? Maneluunge Jehová mu; llicaquilnge ca nehuencüleai tami piuque. Felei, maneluunge Jehová mu” (Sal. 27:13, 14).