PU CHE ÑI MONGEN

Jewba kellukeenew tañi nor miyawal

ÑI FEYPIEL STHEPHEN HARDY

KIÑE rupa kiñe weche wentru ramtuenew: “¿Chuchi texto Biblia mew doy ayükefimi?”. Fey feypifiñ: “Müna ayükefiñ Proverbios 3:⁠5, 6, tüfa ta feypi: ‘Maneluwnge Jewba mew kom tami piwke mu, ka eymi tami rakiduam mu reküluwkinolnge. Kom tami rüpü mew rakiduamanieafimi, ka kidu norümaeymu chew tami miyawal’”. Feley llemay, Jewba fillke dungu femi tañi norümaetew chew tañi miyawün. Fewla nütramkaleluwayiñ.

TAÑI PU CHAW KIMELENEW CHEW PÜLE TAÑI MIYAWAL

Dew rupalu 1920 tripantu, tañi chaw ka ñuke kimelelngey Biblia ñi feypin. Feychi mew petu niewlafuyngu. Iñche 1939 tripantu mew choyüngen. Pichikalu iñche, rume ayükefun amual trawün mew ka müna ayüwülkefenew konal tati Chillkatuwe ta Amuldungual Ngünechen ñi Dungu. Petu acordaniefiñ feychi antü ñi wülün tañi wünen wewpin. Iñche kayu tripantu niefun ka tati atril doy alüpüralefuy iñche mew, feymu püramkünungen kiñe caja mew, ¡müna müllmüllkülefun!

Stephen Hardy petu pichikalu, amuldunguyawi tañi pu chaw engün ka kakelu cristiano engün. Nüniefingün letrero, femngechi feypiyawi chem wewpin ñi wülngeal kiñe fütra trawün mu. — Tañi chaw ka ñuke engu amuldungumeken rüpü mew.

Tañi chaw kiñe tarjeta mew wirintukukefuy falinke dungu ñi feypin Biblia. Fey iñche amuldungun mew, pengelelfiñ feychi tarjeta tati pu che. Tati wünen rupa ñi kidu amuldungun kiñe ruka mew, iñche pura tripantu niefun. Feychi mu ti ngen ruka papeltuy tañi tarjeta ka llowi ti lifru “Sea Dios Veraz”. ¡Müna ayüwün! Fey lef amutun tañi chaw mew, ñi feypiafiel ñi küme tripan tañi amuldungun. Amuldungual ka trawüluwal, müna ayüwülkefenew. Fey tüfa kelluenew ñi serfiafiel ta Jewba fill antü.

Tañi chaw ñi kellun mew, iñche llowürpun ti revista Ti Werken. Tüfachi revista rume kelluenew tañi doy piwkeyerpuafiel tati Biblia. We llowfulu müten kiñe we revista, pürüm papeltukefun. Tüfa kelluenew tañi doy maneluwal Jewba mew ka wültukulelafiel iñche tañi mongen.

1950 tripantu mew iñche ka tañi pu che mangelngeiñ taiñ amual kiñe fütra trawün, Nueva York waria mew. Jueves 3 konchi agosto, taiñ peñi Carey Barber wüli tati wewpin tati pu fautizawalu engün. Fey dewlu tañi wewpin, epu dungu ramtungeiñ, fey iñche witrapüran ka newentun mu feypin: “¡May!”. Welu ka llükalefun konal ko mew, iñche kim weyelkelafun. Welu tañi malle compañenew ka tüngduamelenew. Fey kiñe peñi pürüm ñamtukuenew ti ko mew, fey kangelu peñi nentuenew ti piscina mew. Feychi mu iñche 11 tripantu niefun, welu rume falintuniefiñ tañi femürpun. Feychi antü ta fantepu mew küme adnieenew Jewba, femngechi tañi nor miyawal.

ELUWÜN TAÑI MANELUWAL JEWBA MEW

Tripalu iñche colegio mu, ayülefun ñi precursor ngeal. Welu tañi pu profesor ngüchaltukuenew tañi konal universidad mu. Fey fente tañi femngechi ngülamtungen, amun ta universidad mew. Fey pichi rupalu, ngüneduamün tati universidad welulkayafenew, fey eluwün tañi tripatual. Ngillatufiñ ta Jewba ka kiñe carta mew kimelelfiñ tañi pu profesor tañi amuwenoal universidad mu dewle feychi tripantu. Fey fente tañi maneluwkülen Jewba mew, pürüm müten eluwün tañi wüneleal amuldungun mew.

1957 tripantu mew, Betel werküenew tañi amuldungual Wellingborough waria mu. Fey feypifiñ pu peñi Betel Londres mu mülelu: “Kümeafuy ñi kiñentrür amuldungual kangelu precursor mu doy adümuwkülelu”. Fey peñi Bert Vaisey kiñentrür küdawürpuyu. Bert fillke dungu kimeltuenew ka kellurpuenew tañi doy küme adkünual tañi amuldungun küdaw. Ti trawünche mew pichin-ngefuiñ, mülerkefuy kayu kusheke lamngen, ti peñi Bert ka iñche. Pepikawkefun ka koneltukefun kom trawün mew, fey tüfa kelluenew tañi doy fülkonküleal Jewba mu. Ka wiñoldungual trawün mew kelluenew tañi pengelal tunte tañi maneluwkülen Jewba mu.

Tañi kon-non pu militar mew, pichi mülekafun carcel mew. Fey tripatulu wüla, kimfiñ ta Barbara, kidu precursora especial ngefuy. Fey 1959 tripantu niewiyu ka eluwiyu tayu amuldungual chew rume. Wünelu mew amuiñ ta Lancashire waria, Inglaterra mu mülelu. Fey wüla enero 1961 tripantu mew, mangelngen ñi konal kiñe küyen mew tati Chillkatuwe ñi Pepikangeam pu Longkolelu ka Konakechi Kellukelu. Dewlu wüla tüfachi escuela, ¡afmatulewen! Elfalkünungen ñi witranmeafiel fillke trawünche. Fey Barbara iñchiw, amuyu Birmingham waria mu. Üyew epu semana iñche pepikangen ñi witran-ngepakechi longkolelu ngerpual. Fey wüla tañi domo iñchiw, eluwiyu tayu witranmeafiel fillke trawünche mülelu Lancashire ka Cheshire mapu mew.

MANELUWLIYIÑ JEWBA MEW, RUMEL KÜME TRIPAYAIÑ

1962 tripantu mu petu vacacion mu miyawiyu, llowiyu kiñe carta Betel mew küpalu. Fey ponwi mu mülefuy epu solicitud ñi amual Galaad pingechi escuela. Fey wünelu mu ngillatuyu ka eluwiyu tayu apolafiel, fey pürüm müten werkülelfiyu ta Betel. Fey kechu küyen rupalu, amuyu Brooklyn, Nueva York mu mülelu, ñi konal ti clase 38 ñi femngen. Tüfa mari küyen puwkefuy.

Galaad mu, fentren dungu kimeltungeyu Biblia mu ka Ngünechen ñi trokiñche mew. Welu kafey fillke dungu kimürpuiñ taiñ pu peñi ka pu lamngen wall Mapu mew. Wechengefulu rume iñchiw, pütrün dungu kimürpuyu tayu pu compañ mu. Mülefulu üyew, fill antü kiñentrür küdawün taiñ peñi Fred Rusk. Tüfachi peñi kimeltukeeiñmu Galaad mu, fey kiñe fütra küme dungu trokifiñ tayu kiñentrür küdawün mew. Taiñ peñi Fred kiñe falin dungu kimeltueiñmu: ‘Eluwliyiñ taiñ ngülamtucheal, Biblia mew tripape ti ngülam’. Kiñeke peñi wewpikelu müna adümuwkülefuyngün, tüfa ta kiñeke: Nathan Knorr, Frederick Franz, ka Karl Klein. ¡Falinke dungu ka kimeltueiñmu taiñ peñi Alexander Hugh Macmillan! Kiñe wewpin mew, kimeleiñmu chumngechi Jewba kellufi tañi trokiñche ellakonlu 1914 tripantu puwalu 1919 tripantu.

KAÑPÜLE WERKÜNGEYU

Tripatulu Galaad mew, taiñ peñi Knorr feypieyumu tayu amuldungual Burundi mapu mu, África mu mülelu. Fey pürüm Barbara iñchiw amuyu tati biblioteca mu tayu kimal tunten peñi ka lamngen serfimekey üyew. ¡Afmatuleweyu! Kiñe lifru no rume tripalafuy tunten peñi ka lamngen müley üyew. Fey kimtukuyu tayu amual kiñe trokiñ mapu turpu ñi amuldungungekenofel, fey rume llükalefuyu. Welu ngillatufiyu ta Jewba, fey tüfa müna kellueyumu.

Burundi mapu trürlafuy tayu tuwün mapu mew. Ka wimtun niekefuy ta che, ka kewün dungukefuy engün ka duamfalngefuy tayu adümürpual frances kewün. Ka femngechi duamniefuyu tayu nieal kiñe ruka. Epu antü rupalu tayu akun mew, taiñ compañ Galaad mu, Harry Arnott pingey, witranmaeyumu ka kellueyumu tayu kinturukayal. Fey tañi kellun mew, peyu kiñe ruka. Tati pu autoridad newe kimkelafuyngün pu Dungukelu Iney Ngen Jewba, feymu kiñeke küyen rupalu katrütueyumu tayu mülenagal. Fey nopuyu Uganda trokiñ mapu mew.

Puwlu Uganda mapu mew, llükalefuyu nienolu kay visa. Welu llellipufilu ta Jewba tüngnagi tayu rakiduam. Kiñe peñi Canada mu küpalu, serfimekelu Uganda mu, dunguñpeeyumu pu autoridad mew, fey elungeyu kiñeke küyen tayu kintual tati visa. Fente tañi küme amulerpun tüfachi dungu, kimtukuyu Jewba tayu kelluetew.

Uganda mapu trürkülelafuy Burundi mapu mew. Uganda mapu mew dew amuldungungekefuy, feymu mülefuy 28 pu peñi ka pu lamngen. Üyew fentren che gringodungukefuyngün. Welu ka mülekefuy kakerume kewün dungun, fey tayu puwal pu che ñi piwke mew, duamfalngefuy kimürpual kiñe rume feytachi kewün dungun. Eluwiyu tayu amuldungual Kampala waria mu. Üyew fill püle tati pu che luganda kewün dungukefuy, fey eluwiyu tayu adümürpuafiel. Fentren tripantu küdawtuyu tayu adümal tüfachi kewün dungun. ¡Welu müna kellueyumu tayu doy küme amuldungucheal! Kafey kellueyumu tayu doy küme kimal chem duamniefuy tati pu che tayu kimelelfiel Biblia. Fey tüfa engün ngüneduamlu tayu duamtuniefiel engün, maneluwingün iñchiw mu ka feypieyumu ñi chum duamkülen.

KAKE MAPU AMUYU

Fillke adentun: 1) Kiñe mapa pengelkey chew ñi mülerpun Stephen Hardy África mu. 2) Stephen anüley kiñe wangku mu wekuntu tañi auto mu. 3) Stephen ñi wünen domo, Barbara pingelu, küchamekey tukukan kiñe lafatorio mu. — Miyawiyu Uganda mapu mew.

Ka falin küdaw elfalkünungen, witranmeafiel fillke trawünche kom Uganda mapu mu. Pu peñi mülelu Betel Kenia mu, feypienew tañi ngüneduamal fillke lof, femngechi ñi werküngeal precursores especiales. Üyew pu che kimnon mu rume pu testigo, küme llowkeeyumu ka misakefeyumu tañi iyael.

Fey wüla kañpüle werküngen. Kampala waria mu amun ta Mombasa waria mew, epu antü tren mew puwün. Fey wüla farcu mew amun ta fillke wapi Seychelles pingelu. Fey 1965 tripantu puwlu 1972, Barbara ka compañnieenew ñi witrankontuafiel feychi fillke wapi. Ellaka mew, epu amuldungukelu müten mülefuy feychi mew, welu rupalu chi tripantu kiñe müna küme trawünche mülerpuy üyew. Kafey werküngen tañi witrankontumeafiel pu peñi ka lamngen Eritrea, Etiopía ka Sudán mapu mew.

Rupalu chi tripantu kaletuy tati politica dungu Uganda mapu mew. Pu militar eluwingün ñi longkoleal tüfachi mapu mew. Tati fillke wedake dungu ñi rupan Uganda mapu mew, kimeltuenew ñi fente falin-ngen inanieal tüfa ñi feypin Biblia: “Elufimün ti Longko Ülmen kidu ñi koneltuel, ka elufimün ta Chaw Ngünechen kidu ñi koneltuel” (Mar. 12:⁠17, TNM). Feychi mew, kom pu kamapu küpalu feypingey ñi wirintukuñmangeal tañi üy pu soltau mew. Iñchiñ feyentufemiyiñ. Rupalu chi antü, iñche ka kangelu peñi petu amulefuyu Kampala waria mu, fey fülkontueyumu pu soltau. ¡Pellkelefuyu tati! “Eymu ta espia ngeymu” pintukungeyu. Fey yengeyu tati comisaria mu. Feypifiyu pu soltau: “Iñchiw küpayu tüfachi mapu mew tayu amuldungual müten. Dew wirintukuñmangey tayu üy comisaria mew”, welu allkütungelayu. Fey yengeyu tati comisaria fülkülelu tayu ruka mu. Puwlu üyew, kiñe soltau kimüñmaeyumew, fey acorday ñi dew wirintukuñmangeel tayu üy. Fey lifrekünungetuyu. ¡Müna tüngduamnagiyu!

Stephen petu entuwirimekey kiñe publicacion. — Tati Betel Costa de Marfil mew, nentuwirimeken tati papel *Taiñ Amuldungukeel.*

Pu soltau fentren rupa katrütukefeiñmu rüpü mew, kiñeke mu ngollilefuyngün, fey rume pellkelekefuiñ. Ngillatukefuiñ ta Jewba, fey tüngduameleiñmu ka siempre elungekefuiñ taiñ rupayal. Welu kiñe müna weda dungu rupay. 1973 tripantu mew, kom pu misionero feypingeiñ taiñ tripatual Uganda mapu mew.

Fey werküngeyu ta Costa de Marfil mapu mew, África mu mülelu. Kimürpuyu weke wimtun ñi nieel ti che. Ka wiño dungutuiñ tati frances kewün dungun fill antü. Ka eluwiyu tayu küme yewküleal kakelu misionero engu. Fey ka wiño peyu Jewba tañi kellun. Chaw Jewba kellueyumu peal tati pu che küme piwkengelu ka ayülelu ñi doy kimafiel. Fente tayu maneluwkülen Chaw Jewba mu, adnieeyumew tayu nor miyawal.

FÜTRA KALETUY TAÑI MONGEN

Kiñe antü, kimürpuyu Barbara ñi konturumeetew cancer kutran. Fentren rupa amukefuyu Europa mapu mu Barbara ñi lawentuñmangeal. Welu 1983 tripantu mu, kimtukuyu tayu pepi serfiwenoal África mu. ¡Rume weda duamiyu!

Mülefulu Betel, Londres mapu mew, Barbara tañi kutran doyeli, fey lay. Pu peñi ka pu lamngen mülelu Betel mu, rume yafültukuenew. Fey kimürpufiñ kiñe lamngen kelluntukupalu Betel kiñeke antü, Ann pingey. Kidu precursora especial ngefuy ka kimfali ñi piwkeyekefiel ta Jewba. 1989 tripantu mu niewiyu, fey petu amulekay tayu küdawmeken Betel mu.

Stephen engu Ann Hardy. — Iñche Ann iñchiw tati we Betel Gran Bretaña mu.

1995 tripantu mu puwlu 2018 tripantu, elfalkünungen ñi witranmeafiel fentren Betel wall Mapu mew. Epe 60 paises witrankontufiñ, fey kimfali Jewba ñi kuñiwtukukefiel tañi pu che.

2017 tripantu mew, feypingen ñi witrankontuafiel ti Betel mülelu Burundi waria, África mapu mew. Üyew pefiyu fentren che ñi konün Jewba ñi trokiñche mu, fey afmatulewiyu. Feychi waria chew tañi amuldungukefel kuyfi, fewla müley kiñe Betel kellukefilu ta doy 15.500 peñi ka lamngen.

Kiñe antü feypingen ñi witrankontumeafiel ti Betel mülelu Costa de Marfil mapu mew, 2018 tripantu mu. Fey müna ayüwkülefun. Puwlu üyew, elungen kiñe papel wirintukunielu pu betelita ñi üy ka tañi numero de telefono. Fey ngüneduamfiñ kiñe peñi ñi üy Sossou pingelu. Fey rakiduamün: “Kuyfi kimfiñ kiñe peñi Sossou pingelu, longkolekefulu tüfa mu”. Welu fey ürke no. Kidu tañi fotüm ürke.

Fillke wedake dungu rupakefun tañi mongen mu, welu kimtukun: maneluwküleli Jewba mu, kelluaenew tañi nor miyawal. Chaw Jewba llemay feypikünuy taiñ rumel kelluaetew. Feley llemay, küpa amulen Jewba tañi rüpü mu, femngechi taiñ mülepual ti we Mapu mu (Prov. 4:⁠18).