1925: pataca tripantu cuifi

FEMTRIPALAI TAÑI ESPERANIEFEL ENGÜN

Fentrenque taiñ pu peñi, pu lamngen raquiduamcülefuingün 1925 mu ñi acual tati hue mapu feichi tripantu mu. Taiñ peñi Albert Schroeder coneltulelu ti Troquiñ Adniechequelu mu feipi: “Cuifi raquiduamcülequefuiñ tati pu dullinque cristiano ñi amual huenu mu 1925 tripantu. Ca raquiduamquefuiñ Abrahán, David ca caquelu cuifique che poyequefilu Jehová ñi huiñomongetual engün mapu mu, femngechi ñi ngünenieal mapu”. Huechutripanolu tañi raquiduamcülequefel engün, quiñeque peñi, lamngen huesa duamingün (Prov. 13:12).

Huesa duamfulu engün rume, huelu epe com taiñ pu peñi, pu lamngen eluucüleingün tañi amuldunguleal. Quisu engün inaduamingün ñi amuldungual Jehová mu doi falin cüdaungefui. Inaduamaiñ chumngechi tañi amuldungun radio mu engün tañi puhual doi fentrenque che mu.

CA DEUMANGEI CAQUELU RADIO

Feichi 1924 tripantu mu, fentren che allcütuquefui tati radio WBBR pingelu. Fei mu taiñ pu peñi amuldunguquefui. Feitachi radio tañi cüme tripan mu, deumaingün ca radio, femngechi doi fentrenque che tañi allcütuaeteu. Feitachi radio deumangei Chicago huaria mu, WORD pingei. Taiñ peñi Ralph Leffler quellulu ñi deumayal tüfachi radio feipi: “Puquemngefulu am, fei pun allcütuquefuingün feitachi radio camapuleyechi che rume”. Quiñe familia doi 5 mil kilometro camapulefulu allcütui quiñe feitachi hunenque quimeltun tati radio mu. Aflu tati programa, feitachi familia huirilelfi quiñe carta tati radio, femngechi ñi mañumtuafiel. Feipingün feitachi programa fente tañi yafültucueteu ca quimeltueteu Chau Dios mu.

Ti Huerquen tripalu 1 conchi diciembre 1925 tripantu quimeltui chemu tati radio fente camapu allcütungequei. Feipi feitachi radio doi camapu allcütungequei caquelu radio mu. Estados Unidos mu com püle allcütungequei, Cuba mu ca allcütungequei Alaska pingechi mapu. Fentrenque che turpu allcütuquenolu tati rüf dungu feula allcüturpufingün radio mu, doi ayüfui tañi quimal engün.

Ca feichi tripantu mu, taiñ pu peñi ca ayüfuingün ñi deumayal radio Canadá mapu mu, femngechi ñi quimeltuafiel ta che. Feimu 1924 mu, deumangei quiñe radio Saskatoon huaria mu. Feitachi radio CHUC pingei. Tüfa quiñe tati hunenque radio nütramcalu Chau Dios mu Canadá mu. Huelu 1925 mu mülefui tañi yeafiel tañi radio cañpüle. Feimu taiñ pu peñi ngillaingün quiñe cuifi teatro feichi huaria mu, fei cüme elfingün, fei mu tañi elafiel tati radio.

Quiñeque che mülelu camapulechi lof mu turpu allcütuquelafuingün tati rüf dungu, huelu feitachi radio tañi duam mu allcüturpufingün. Quiñe domo mülelu quiñe pichi huaria mu deu allcütulu quiñe programa radio mu, huirintucui ñi mandalelngeal publicacion. Taiñ peñi George Naish feipi: “Tati domo huirintuculu ngüneduamfiyiñ fente tañi duamniefiel tati publicacion, feimu pürüm müten huercüfiyiñ fentrenque lifru, feichi Estudios de las Escrituras pingelu”. Femngechi feitachi domo pichiñma mu müten yelelfi tati cümeque dungu doi camapulechi che.

DOI CÜME QUIMÜRPUIÑ QUIÑEQUE QUIMELTUN

Ti Huerquen tripalu 1 conchi marzo 1925 mu niefui quiñe troquiñ feipilelu “Mülerpui quiñe hue troquiñche”. ¿Chemu fente falifui feitachi articulo? Jehová tañi pu che quimniefui Huecüfü tañi ngüneniefiel pu huesaque püllü, pu coilaque religion, pu gobierno ca ti negocian dungu. Huelu feitachi articulo mu ti “quim manelfal cüdaufe” quimelelfi pu peñi ca pu lamngen Jehová tañi ca nien quisu tañi troquiñ (Mat. 24:45). Jehová tañi troquiñche chumconpalai rume Huecüfü tañi troquiñche mu, doi mai chaftuquefingün Huecüfü ca tañi pu inaniequeteu. Ti Huerquen ca feipi 1914 tripantu Chau Dios tañi Gobierno elcünungei huenu mu, ca Huecüfü tañi pu huesaque püllü engün ütrüfnacümngepai mapu mu rupalu am quiñe hueichan huenu mu (Apoc. 12:7-9).

Quiñeque taiñ pu peñi ca lamngen cüdautuingün tañi cüme llohuafiel feitachi quimeltun. Feimu ca feitachi articulo feipi: “Quiñeque che papeltufilu tüfachi revista cüdautule tañi inayafiel tüfachi quimeltun, tüngcülepe, maneluucülepe Jehová mu, amulepe tañi poyenieafiel Jehová”.

Taiñ peñi Tom Eyre quiñe precursor mülelu Gran Bretaña mu feipi chum duamingün taiñ pu peñi, pu lamngen deu papeltufilu feitachi troquiñ. Taiñ peñi feipi: “Pu peñi, pu lamngen ayühunquechi lloufingün feitachi quimeltun, doi cüme adümngei Apocalipsis 12. Quimürpuiñ Chau Dios tañi Gobierno ñi elcünungen huenu mu, feimu rume ayüucülefuiñ taiñ nütramcalelafiel caquelu che. Tüfa quellueiñmu taiñ doi amuldungual ca doi inaduamürpuiñ Jehová ñi femal doi fentrenque dungu cüpalechi antü mu”.

CÜME NGÜNEDUAMINGÜN TAÑI AMULDUNGUAL JEHOVÁ MU

Fachantü, iñchiñ taiñ Dunguquelu Ineingen Jehová ngen, cüme quimniefiyiñ tañi chem pin Isaías 43:10, feipilu: “‘Eimün dunguqueimün iñche meu’ feipi Chau Jehová. ‘Mai, eimün iñche tañi cüdaufe, iñche tañi dullifiel’”. Huelu petu tañi acunon 1925 tripantu, müte nütramcaquelafuiñ feitachi texto mu. Huelu rupachi antü mu, caletui ti dungu. 1925 tripantu mu, 11 revista Ti Huerquen mu nütramcangei Isaías 43:10, 12 mu.

Epe aflu agosto 1925 tripantu mu, mülei quiñe fütra trahun 8 antüngelu Indianápolis huaria mu. Taiñ peñi Rutherford huirintucui quiñe mensaje ñi llohuafiel pu amulu ti trahun mu. Feipi: “Cüpaiñ feitachi fütra trahun mu taiñ nehuentucuaeteu Jehová, femngechi huiñotuliyiñ doi nehuencüleaiñ taiñ amuldungual ineingen Jehová”. Tati fütra trahun mu, com pu amulu yafültucungei tañi amuldungual Jehová mu cheu rume ca chumül rume.

Sabado 29 conchi agosto, taiñ peñi Rutherford huli quiñe hueupin feipilelu “Duamfalngei taiñ amuldungual”. Pengeli fente tañi falin-ngen taiñ amuldungual. Tañi hueupin mu, taiñ peñi feipi: “Jehová feipifi tañi pu che: ‘Eimün dunguqueimün iñche meu. Iñche cai ta Chau Dios’, ca feipifi: ‘Huitracünufimün quiñe orcon ñi peaeteu pu troquiñche’” (Is. 43:12; 62:10). Taiñ peñi Rutherford ca feipi Jehová tañi pu che müten dunguafui quisu meu, Jehová am dullifilu tañi troquiñche ca eluquefi tañi nehuen.

Rupan hueupilu taiñ peñi Rutherford, papeltui quiñe huirintucun feipilu “Mülei maneluhun”. Tüfachi huirintucun feipilei Chau Dios tañi Gobierno müten cüpalafui ta tüngün, cüme feletual, rumel mongen ca rumel ayüucüleal. Com tati mülelu fei mu cüme llohuingün ñi feipin. Feitachi huirintucun rulpangei fentren quehun mu ca quiñe tratado reque elungei pu che amuldungun mu. Doi 40 millon hulngei.

Feichi mu petu yeniequelafuiñ tati üi Dunguquelu Ineingen Jehová, huelu taiñ pu peñi, pu lamngen deu inaduamfuingün ñi fente falin-ngen amuldungual Jehová mu.

ELUHUINGÜN ÑI HUIÑO PEMETUAFIEL PU CHE

Deu alün-ngerpulu tati pu amuldunguquelu, feipingeingün tañi re elcünunoal müten ta revista, doi mai tañi huiño pemetuafiel pu che. Rupan hulngelu ti tratado Mülei maneluhun pingelu, ti Bulletina feipi: “Amuaimün ca huiño pemetuafimün tati lloulu ti tratado”.

Ti Bulletin tripalu enero 1925 tripantu feipifui tañi feipin quiñe peñi Texas mu mülelu. Quisu feipi: “Huiño amun mu cheu taiñ amuldunguquefel cuifi, rume cüme lloungequeiñ. Fente cüme lloungequelaiñ hue amun mu quiñe lof mu. Mülei quiñe pichi huaria, 5 rupa amuquefuiñ 10 tripantu mu. Pichiñma rupalu, lamngen Hendrix ca iñche tañi ñuque ca huiño amuingu tañi amuldungual engu. ¡Fentrenque lifru elelfingu ta che!”.

Quiñe precursor Panamá mu mülelu feipi: “Hue pemefilu pu che, müte eluuquelafui tañi allcütuaeteu. Huelu huiño pemetufilu iñche, fentren engün feula queta eluucületuingün tañi allcütuaeteu. Tüfachi tripantu doi elantücünumequen tañi huiño pemetuafiel pu che. ¡Rume cüme tripamequei tañi amuldungun cüdau!”.

CÜPALEFUI DOI ALÜN CÜDAU

Epe aflu 1925 tripantu, taiñ peñi Rutherford huirintuculelfi quiñe carta tati pu precursor. Nütramcai tañi femün engün feichi tripantu ca ñi femal cüpalechi tripantu mu. Feipi: “Tüfachi tripantu mu, eimün yafültucufimün alün che tamün amuldungulelfiel mu. Tüfa tamün cüme femün, rume ayüucülei tamün piuque. Tati 1926 tripantu mu, amuleai tamün amuldunguquen Chau Dios ca tañi Gobierno mu. Ca pengelcünuaimün tamün rüf poyequefiel ta Chau Dios. Taiñ amuldungun mu tripaquei quiñe ülcantun reque taiñ püramyeafiel Chau Dios ca ti lonco ülmen”.

Epe aflu 1925 tripantu, taiñ pu peñi eluucülefuingün tañi doi fütracünuafiel ti Betel ruca mülelu Brooklyn huaria mu, fei 1926 tripantu conafulu ti doi fütra deumarucan ñi femngequenofel cuifi.