Tati Inteligencia Artificial, ¿cümelcayaiñmu cam huesalcayaiñmu? | ¿Chem pilei Biblia?

Nehue chumül nga, fentren huall pülechi loncolelu, pu cientifico ca pu adümuulu ti tecnologia feipifeipingün ñi rume falingen ti inteligencia artificial (IA). Tüfachi pu che feipilu rume ñi fütra falingen tati inteligencia artificial, huelu ca feipingün ñi huesa pünengeafel tüfachi tecnologia.

• “Famülque mu, tati inteligencia artificial (IA) fei tati doi nehuengechi tecnologia taiñ nieel, cümelcayafui pu che ñi mongen. […] Huelu ca femngechi IA ñi duam mu cuñihun mu tucungeafuiñ, huesalcangeafuiñ, rume quimnieñmangeafuiñ taiñ mongen, ca cüdautuafuiñ taiñ maneluhual pu gobierno mu” (Kamala Harris, Estados Unidos ñi vicepresidente, 4 conchi mayo 2023 tripantu).

• “Tati inteligencia artificial (IA) quelluafeiñmu taiñ tremoleal, huelu cafei huesalcayafeiñmu cam cutranelafeiñmu chi”, feipi quiñeque doctor ca quiñeque adümuhun-ngechi che tañi lonconieeteu ti doctor Frederik Federspiel, quiñe revista mu tripalu 9 conchi mayo, 2023 tripantu.a

• “Famülque mu tati inteligencia artificial pünengequei ñi ngünencacheal. Pichiñma mu, tati inteligencia artificial müntüñmayafui pu che ñi cüdau. Quiñeque che cüdauquelu tecnologia mu feipicünui ta cüpalechi antü mu, tati inteligencia artificial huesalcayafui pu che mülelu huall mapu püle” (The New York Times, 1 conchi mayo, 2023 tripantu).

Rupale ta tripantu quimngerpuai feichi inteligencia artificial ñi cümelcacheal cam ñi huesalcacheal. Huelu, ¿chem pilei Biblia?

Quimlaiñ ñi chum tripayal pu che ñi deumacünuel

Tati pu che feipiafui ñi cüme pünengeal müten tañi tecnologia. Huelu tati Biblia pengeli chumngelu pu che quimlayafui ñi chum tripayal tañi tecnologia.

1. 1. Cüme duam mu femngele rume quiñe dungu, tati pu che quimlayafui ñi chum tripayal tañi tecnologia, huesalcayafui chi caquelu che.

   • “Mülei quiñe rüpü norngelu ñi troquiquefiel quiñe huentru, huelu yequeyu ñi layal müten” (Proverbios 14:12).

2. 2. Quiñe che no rume feipicünulayafui chumngechi caque che püneafui cam pünelayafui tañi deumael.

   • “Iñche elcünulelafiñ [tañi cüdau] tati huentru inalelu iñche mu. Fei ¿inei am quimafui ñi quimchengeal cam ñi quimchengenoal? Fei ngefule rume, quisu ngünenieafi com tañi nierpuel fente tañi yafüluhun ca quimün meu” (Eclesiastés 2:18, 19).

Quimnolu am iñchiñ chum triparpuafel chi dungu, duamnieiñ taiñ adnieaeteu Chau Ngünechen.

¿Chem dungu mu maneluhuafuiñ?

Taiñ Huenu Chau Dios turpu eluñmalayai tati tecnologia cam tati pu che ñi apümcayafiel ti mapu cam com pu che.

• “Tati Mapu rumel mülecayai” (Eclesiastés 1:4).

• “Tati pu norngechi che llohuai ti mapu ñi ngen-ngeal engün, ca rumel müleaingün fei mu” (Salmo 37:29).

Taiñ Chau Ngünechen Biblia mu ngülamtueiñmu, femngechi taiñ nieal cüme felen ca cüme mongen cüpalechi antü mu. Taiñ doi quimal chem pilei Biblia, papeltuafuimi “¿Existe alguna guía confiable que le asegure su futuro?” ca “La esperanza real de un mañana mejor.”