Weniyefinge ka tuwün chengen

¿Chem mu welulkawafuiñ?

Famentufiliyiñ feychi pu che taiñ weda trokiniefiel, doy weda rakiduamürpuafuiñ kidu engün mu. Müley che iñchiñ taiñ tuwün niey ka iñchiñ reke rakiduamkey, fey eluwafuiñ taiñ weniyeafiel kidu engün müten. Femngechi femliyiñ, kümenolu trokiafuiñ kakelu che ñi rakiduam, fey “iñche tañi rakiduam müten kümey” piafuiñ.

Biblia ñi ngülam

‘Doy piwkeyecheaymi’ (2 KORINTIO 6:⁠13, TNM).

¿Chem küpa kimeltuy? Müley taiñ doy piwkeyechefengeal. Re weniyefiliyiñ müten tati pu che iñchiñ reke rakiduamkelu, rüf piwkeyechefengelayaiñ. Fey ¿chumafuiñ? Weniyeafiyiñ feyti pu che iñchiñ reke rakiduamkenolu. Femngechi pengelaiñ taiñ rüf piwkeyechefengen.

Doy weni nierpulmi, ¿chumngechi kelluaeymu?

Weniyefilmi kakelu che, doy kimafimi. Fey doy küme entendeaymi chumngechi ñi rakiduamken, fey illamkalayafimi. Welu fey ka müten no, yamnieafimi ka duamtuafimi.

Ngüneduamnge ñi rupan kiñe domo, Nazaré pingelu. Kidu weda rakiduamkefuy tati pu ka tripanche mew. Welu weda rakiduamwelay kidu engün mu. ¿Chem kellueyew? Kidu feypi: “Kiñeñtrür küdawkefuiñ ka rulpaantükefun kidu engün mu. Fentren che weda dunguyekefi tati pu ka tripanche. Welu kimfiel mu engün, ngüneduamürpun ñi rüfngenon ñi feypingekeel kidu engün mu. Fey kimtukun, pu che koneltulelu kiñe trokiñche mew kom trürngelay engün. Femün mu tüfa, doy piwkeyerpufiñ ka falintufiñ pu ka tripanche”.

Chem tami femafel

Nütramkayafuymi kiñe che ka tuwün-ngelu, fey ¿chumafuymi?

Ramtufinge kiñeke dungu ñi rupan tañi mongen mu.
Trür iyafuymu.
Nütramkaelmu, küme allkütuafimi. Fey kimürpunge chem ñi doy falintukefiel.

Küme kimfilmi ñi rupan ta kiñe che tañi mongen mu, doy küme entendeaymi ñi chumngen feychi che. Fey küme rakiduamaymi kidu mu. Ka doy küme trokituafimi femngechi tuwün-ngechi che.

Ñi rupan kiñe kurewen: Kandasamy ka Sookammah (Canadá mapu mu)

“Pichikalu iñchiw Sudáfrica mapu mew, tati pu kurü che ka kakelu che ka tuwün-ngelu wichukünungeyngün pu fülang che mu. Fey femngechi felerpulu tati pu trokiñche, doy üdewingün. Feychi mu iñchiw tayu ka tuwün chengen pu fülang che illamkaeyumu, feymu eluwiyu tayu doy weda trokiafiel. Iñchiw illamkangekefuyu, feymu tayu femngechi rakiduamkefel ‘weda dungu no’ pikefuyu”.

“Welu ka rakiduam nietuyu. ¿Chumiyu? Eluwiyu tayu weniyeafiel kakelu che ka tuwün-ngelu. Fey ka weniyerpufiyu fülang ngechi che. Fey ngüneduamiyu, pu fülang che pichin dungu mew müten kalekey iñchiñ taiñ tuwün che mew. Pu fülang che rupakeyngün wedake dungu mu, iñchiñ reke”.

“Kiñe rupa mangelfiyu kiñe kurewen fülang ngelu ñi alüñma umañpayal tayu ruka mu. Fente küme kimürpufiyu, fey weniyerpufiyu. Feymu fewla doy küme rakiduamkeyu pu fülang che mu”.